ፎቶ ፦ #ኢትዮጵያ የአየር ክልሏን ከማንኛውም ጥቃት ሊከላከሉ የሚችሉ ዘመናዊ የውጊያ ትጥቆችን እየታጠቀች መሆኑና ይህም ተጠናክሮ እንደሚቀጥል የኢትዮጵያ የሀገር መከላከያ ሰራዊት አሳውቋል።

የኢትዮጵያ አየር ሀይል ዛሬ እጅግ ዘመናዊ የሆነውን የsu-30 ተዋጊ ጀቶችንና የስትራቴጂክ ሰው አልባ ተዋጊ አውሮፕላኖችን በመረከብ መታጠቁን ገልጿል።

ይህ የመጀመሪያ ዙር ሲሆን ሌሎች በሂደት እንደሚገቡ ተነግሯል።

ዛሬ የአየር ኃይሉ የታጠቃቸው የsu-30 እና የስትራቴጂክ ሰው አልባ አውሮፕሎች እጅግ ዘመናዊ፣ የ5ኛው ትውልድ አካል የሆኑ በሀገር ላይ ሊቃጡ የሚሞከሩ ጥቃቶችን ለማክሸፍ ወሳኝ የሆኑ ናቸው ተብሏል።

@tikvahethiopia

#እንድታውቁት

ሱስ ምንድን ነው ?

- ቀጣይነት ያለው፣ ሊመላለስ የሚችል፣ ተጓዳኝ ችግሮች እንዳሉት እየታወቀ እንኳን ከፍትኛ የሆነ ንጥረ-ነገር የመጠቀም ፍላጎት ነው፡፡

- እንደ የአዕምሮ እክል የሚቆጠር ሲሆን፣ አእምሮን የተለመደ ስራውን እንዳይሰራ በእጅጉ ይገድበዋል ፡፡

- መከላከል እንዲሁም መታከም የሚችል ነው፡፡

- ብዙ ጊዜ ከደካማነት የተነሳ ሰዎች
እንደሚያደርጉት እየታሰበ ቢቆይም፤ በአሁን ጊዜ በዚህ በሽታ የተጠቁ ሰዎች ለመጠቀም ዋነኛ ምክንያታቸው ከአካላዊ እና ከስሜታዊ ህመሞቻቸው ለመሸሽ እንደሆነ እየታመነ ነው፡፡

- ሱስ ከንጥረ-ነገር ጋር የተያያዘ (ሲጋራ፣አልኮል) ወይም ያልተያያዘ (እንደ ቁማር) ሊሆን ይችላል፡፡

አጋላጭ ሁኔታዎች፦
* ከቤተሰብ የሱስ ችግር ከነበረ
* የአቻ ግፊት
* ስነ-ልቦናዊ ችግሮች የመሳሰሉት ናቸው።

- ሱስ እጅግ አደገኛና በአንድም በሌላ መንገድ የብዙ ሰዎችን ህይወት የሚቀጥፍ ነው፡፡

- ከሱስ መላቀቅ ይቻላል፡፡ አብዛኛውን ጊዜ ሰዎች በራሳቸው ጊዜ ሲያቆሙ በህክምና እርዳታም መቆም ይችላል፡፡

- ይህ ችግር ተመላላሽ ስለሆነ ለማቆም ብዙ ሙከራዎች ያስፈልጉታል፡፡በተለይም የሲጋራ ሱስ ለማቆም ረጅም ጊዜ ሊወስድ ይችላል፡፡

- በአሁን ጊዜ ግን በሰለጠነው ዓለም የተለያዩ ሳይንሳዊ ግኝቶች ይህን ችግር የበለጠ ለመረዳት እያገለገሉ ይገኛሉ፡፡
(ምሳ. Brain Imaging Technologies)-አዕምሮአችን ለተለያዩ ሁኔታዎች (ለንጥረ-ነገር ጋር የተያያዙ ወይም ያልተያያዙ ሱሶች) ተመሳሳይ ምላሽ እንደሚሰጥ አሳይተዋል፡፡

መፍትሄ ፦
➡ ለማቆም ተነሳሽነትን ማዳበር
➡ አካባቢያችንን፣ ውሎአችንን ማስተካከል
➡ የስነ-ልቦና ምክር
➡ በሽታ መሆኑን በመገንዘብ ወደ ህክምና አልያም ማገገሚያ ቦታዎች መሄድ ያስፈልጋል።

#HarvardHealthPublishing

@tikvahethiopia 

#AddisAbaba

የግብረ-ስጋ ግንኙነት እንዲፈፅሙ ጠይቋት ፈቃደኛ ባለመሆኗ ሟችን በቢላዋ  ወግቶ የገደለው ተከሳሽ በ23 ዓመት ፅኑ እስራት ተቀጣ።

ዳንኤል በርሄ ስዩም የተባለ ተከሳሽ ሀምሌ 15 ቀን 2014 ዓ.ም ከጠዋቱ በግምት 3፡30 ሲሆን በአቃቂ ቃሊቲ ክፍለ ከተማ ወረዳ 06 ሳሪስ አደይ አበባ መኪና መሻገሪያ ድልድይ አካባቢ በሚገኘው ፍሬሕይወት ህንፃ ውስጥ ሟችን የሽንት ቤት ቁልፍ ክፈችልኝ ብሏት ስትከፍትለት የግብረ-ስጋ ግንኙነት እንዲፈፅሙ ጠይቋት ፈቃደኛ ባለመሆንዋ አንገትዋን በቢላ በመውጋት ሕይወትዋ እንዲያልፍ አድርጓል፡፡

በዚህም ምክንያት በአዲስ አበባ ፖሊስ ኮሚሽን ምርመራ ተጣርቶ በሴቶችና ህጻናት ላይ የሚፈፀሙ ወንጀሎች ዐቃቤ ሕግ ዳይሬክቶሬት በወ/ሕ/አ 539/1/ሀ መሰረት በፌዴራል ከፍተኛ ፍ/ቤት ልደታ ምድብ 1ኛ የሰው ግድያና ከባድ ውንብድና ወንጀል ችሎት ክስ ቀርቦበት ክርክር ሲደረግ ቆይቷል፡፡

በክርክሩ ሂደትም የዐቃቤ ሕግ ማስረጃ ከተሰማ በኋላ ተከሳሽ እንዲከላከል ብይን ተሰጥቶ ተከሳሽ የመከላከያ ምስክሮች በማስረጃነት አቅርቦ ያሰማ ቢሆንም በዐቃቤ ሕግ የቀረበበትን ክስ መከላከል ባለመቻሉ ምክንያት ፍርድ ቤቱ በተከሳሽ ላይ የጥፋተኛነት ፍርድ በመስጠት ተከሳሽ በ23 ዓመት ፅኑ እስራት እንዲቀጣ ሲል ወስኗል፡፡

#MinistryofJustice

@tikvahethiopia

#ጥንቃቄ

1. አጭበርባሪዎች በኢትዮጵያ አየር መንገድ የእቃ ጭነት አገልግሎት (ካርጎ) በኩል ለተለያዩ ግለሰቦች ዕቃ እንደተላከላቸው አስመስሎ በመደወል እና ሐሰተኛ የእቃ ጭነት መለያ ቁጥር Air Waybill (AWB) በመጠቀም የተላከውን ዕቃ ለመቀበል የሚከፈል በሚል ክፍያ በመጠየቅ የማጭበርበርና የማታለል ስራ እየሰሩ ስለሆነ ጥንቃቄ ይደረግ።

2. አጭበርባሪዎች #ስራ_ፈላጊዎች በኢትዮጵያ አየር መንገድ ለመቀጠር ለምዝገባ እና ለተለያዩ ወጪዎች በሚል ገንዘብ በማስከፈል የማታለል ተግባር ላይ በመሰማራታቸው አስፈላጊውን ጥንቃቄ ማድረግ ይገባል።

3. የካናዳ መንግስት የስራ እና የትምህርት እድል እንዳወጣ እና የኢትዮጵያ አየር መንገድ ከዚህ ጉዳይ ጋር በተያያዘ ሰው እንደወከለ እንዲሁም መመዝገብ ለሚፈልጉም ሁሉ ክፍያ የሚፈፅሙበት የባንክ አካውንትም አንዳሳወቀ በማስመሰል ደብዳቤ በማዘጋጀት ሰዎችን የማታለል ተግባር ላይ አጭበርባሪዎች በመሰማራታቸው ተገቢው ጥንቃቄ ይደረግ።

እንድታውቁት ፦

➡ የኢትዮጵያ አየር መንገድ ዕቃ ለተላከላቸው ደንበኞቹ ዕቃቸው መድረሱን እና ወደ ድርጅቱ በመምጣት አስፈላጊ ሂደቶችን እንዲያስጀምሩ ከማሳወቅ ውጪ ምንም አይነት ቅድመ ክፍያ እንዲከፍሉ በስልክ አይጠይቅም።

➡ ለስራ ቅጥር በሚል የኢትዮጵያ አየር መንገድ ምንም አይነት ቅድመ ክፍያ አይጠይቅም ፤ ከማንኛውም አይነት ኤጀንት ጋር አብሮ አይሰራም ፤ ለስራም ሆነ ለትምህርት ወደ የትኛውም ሀገር ሰዎችን የመላክ ስራ ላይ አልተሰማራም።

#የኢትዮጵያአየርመንገድ

@tikvahethiopia

#Somaliland #Somalia

የኢትዮጵያ አየር መንገድ ዋና ሥራ አስፈፃሚ አቶ መስፍን ጣሰው ለቢቢሲ አማርኛ በሰጡት ቃል ፤  ዛሬ ወደ ሶማሊላንድ መዲና ሃርጌሳ ሲበር የነበረ የኢትዮጵያ አየር መንገድ አውሮፕላን የሶማሊያ አየር ክልል ውስጥ ከመግባቱ በፊት እንዲመለስ መደረጉን ተናግረዋል።

ዋና ሥራ አስፈጻሚ፤ ከአዲስ አበባ ተነስቶ ወደ ሃርጌሳ ሲጓዝ የነበረው አውሮፕላን ከሶማሊያ በኩል " ፍቃድ የለውም " በመባሉ ወደ አዲስ አበባ ተመልሶ ለማረፍ ተገዷል ብለዋል።

" ወደ ሃርጌሳ እየሄደ የነበረው አውሮፕላን ተመልሷል። ምክንያቱም በረራውን ከጀመረ በኋላ ከሶማሊያ በኩል ፍቃድ አልሰጠንም የሚል ጥያቄ ተነስቶ ነው። " ሲሉ አስረድተዋል።

የበረራ መከታተየ " ፍላይትራዳር24 " በተባለው ድረ ገጽ ላይ መመልከት እንደሚቻለው ዛሬ ጥር 8/2016 ዓ.ም. ሁለት በረራዎች ወደ ሶማሊያ ተደርገዋል።

መደበኛው የበረራ ቁጥር ኢቲ372 ረፋድ 5 ሰዓት ላይ ሃርጌሳ ማረፉን ፍላይትራዳር ያሳያል።

ይሁን እንጂ የበረራ ቁጥር ኢቲ8372 የሆነው ዲ ሃቪላንድ-400 አውሮፕላን ጠዋት 2፡30 ከአዲስ አበባ ተስቶ ወደ ሃርጌሳ አቅጣጫ እየበረረ ሳለ የጂግጂጋ ሰማይ ላይ በመዞር ረፋድ 4፡30 አካባቢ አዲስ አበባ ቦሌ ዓለም አቀፍ አየር ማረፊያ ተመልሶ አርፏል።

አቶ መስፍን ጣሰው ፤ የትኛው የአየር መንገዱ አውሮፕላን እንዲመለስ እንደተደረገ እና እንዲመለስ በተደረገው አውሮፕላን ተሳፍረው ስለነበሩት መንገደኞች ተጨማሪ መረጃ ከመስጠት ተቆጥበዋል።

ነገር ግን ወደ ተነሳበት መድረሻ እንዳይበር ተከልክሎ ጉዞው የተስተጓጎለውን አውሮፕላን በተመለከተ ንግግር ከተደረገ በኋላ በረራው ዳግም እንዲቀጥል መደረጉን ተናግረዋል።

የሶማሊያ የማስታወቂያ ሚኒስትር ዳውድ አዌይሳ የኢትዮጵያ ከፍተኛ የመንግሥት ባለሥልጣናትን የያዘ አውሮፕላን ፍቃድ ስላልነበረው ወደ ሃርጌሳ እንዳይገባ ተከልክሏል ሲሉ ለቢቢሲ አማርኛ ተናግረዋል።

የሶማሊያ ሲቪል አቪዬሽን ምን አለ ?

- የኢትዮጵያ አየር መንገድ የበረራ ቁጥር ኢቲ8372 ፍቃድ ስላልነበረው ሃርጌሳ ላይ እንዳያርፍ ተከልክሏል።

- የኢቲ 8273 በረራ ከሶማሊያ ማግኘት የነበረበትን ፈቃድ ስላልነበረው የዓለም አቀፍ የበረራ ሕግን በመተላለፉ ወደ አገሪቱ የአየር ክልል እንዳይገባ ተደርጓል።

- ወደ አዲስ አበባ እንዲመለስ ከተደረገው አውሮፕላን ውጪ በሁለቱ አገራት መካከል የሚደረጉት መደበኛ በረራዎች ቀጥለዋል።

ከዚሁ ጋር በተያያዘ...

የተለያዩ የሶማሌላንድ አክቲቪስቶች እና ጋዜጠኞ ዛሬ ወደ ሶማሌላንድ በገባው አውሮፕላን የኢትዮጵያ መንግሥት ልዩ ልዑካን ስለመኖራቸው እየገለፁ ይገኛሉ።

እኚህ ልዑካን ከሶማሌላንድ መንግሥት ጋር ለመምከር የመጡ ናቸው ብለዋል።

ምንም እንኳን ጋዜጠኞቹና አክቲቪስቶቹ ይህን ቢሉም የሶማሌላንድ መንግሥት በይፋ ምንም ያለው ነገር የለም።

የኢትዮጵያ መንግሥት እየተባለ ስለሚገኘው ጉዳይ ሆነ ወደ ሶማሌላንድ ልዑክ ስለመላኩ ያለው ነገር የለም።

በሌላ በኩል የሶማሊያ ጋዜጠኞች እና አክቲቪስቶች የኢትዮጵያ ልዑካን የያዘ አውሮፕላን ወደ ሀርጌሳ እንዳይገባ መደረጉን ሲፅፉ ተስተውለዋል።

የኢትዮ-ሶማሌላንድ የመግባቢያ ስምምነት ከተፈረመ በኃላ የኢትዮጵያ እና ሶማሊያ ግንኙነት የሻከረ ሲሆን ሶማሊያ ኢትዮጵያ ላይ ዛቻ እንስከመሰንዘር ደርሳለች።

ኢትዮጵያ ከሶማሌለንድ ጋር የተፈረመው የመግባቢያ ስምምነት የትኛውንም ሀገር / አካል የማይጎዳ፣ ዓለም አቀፍ ህግንም ያልጣሰ መሆኑን በተደጋጋሚ ገልጻለች። የህዝቧን ጥቅም ለማስጠበቅ በሁሉም የሰላማዊ መንገዶች ፍላጎቷን እንደምታሳካም አሳውቃለች።

@tikvahethiopia

#AddisAbaba

ለነዳጅ ማደያዎች ማስጠንቀቂያ ተሰጣቸው።

የአዲስ አበባ ከተማ አስተዳደር ንግድ ቢሮ በአዲስ አበባ ከተማ ለሚገኙ የነዳጅ ማደያዎች በሙሉ የመጨረሻ ማስጠንቀቂያ መስጠቱን ሪፖርተር ጋዜጣ አስነብቧል።

ቢሮው በተለያዩ ባለሙያዎች እያደረገ ባለው የመስክ ሥራ አማካይነት በከተማዋ ሕገወጥ የነዳጅ ንግድ በመስፋፋቱ ምክንያት ማስጠንቀቂያ መሰጠቱን፣ ስማቸው እንዲገለጽ ያልፈለጉ የቢሮው ባልደረባ ተናግረዋል።

እኚሁ ባልደረባ ምን አሉ ?

- ቢሮው ያስተላለፈውን ማስጠንቀቂያ ተላልፎ የሚገኝ ማንኛውም የነዳጅ ማደያ መመርያው በሚያዘው መሠረት ታሽጎ ክስ ይመሠረትበታል።

- በተለያዩ ሱቆች፣ በመኖሪያ ቤት፣ በመንገድ ላይና ሕጋዊ የነዳጅ ማደያ ቦታ ባልሆኑ አካባቢዎች ነዳጅ በዕቃ በመቅዳት ሽያጭ እየተከናወነ በመሆኑ ማስጠንቀቂያ ተሰጥቷል።

- በቢሮው መመርያ መሠረት ሕጋዊ ደብዳቤ ከተጻፈላቸው ድርጅቶች ውጪ፣ በቀንም ሆነ በሌሊት ምንም ዓይነት የበርሜል ሽያጭ ማካሄድ አይቻልም።

- መመርያውን መሠረት በማድረግ ለነዳጅ አዳዮች በተደጋጋሚ ግንዛቤ በማስጨበጥ፣ እንዲሁም ደብዳቤ እንዲደርሳቸው በማድረግ ሕገወጥ ድርጊቶች እንዳይፈጸሙ ጥረት እየተደረገ ነው።

- በተቀመጠው አቅጣጫ መሠረት ሕጋዊ ደብዳቤ ከሚጻፍላቸው የንግድ ድርጅቶችና ነዳጅ ከሚጠቀሙ ተሽከርካሪዎች በስተቀር፣ በዕቃና በበርሜል የነዳጅ ሽያጭ የተከለከለ ነው፡፡

- የነዳጅ ማደያዎቹ በዕቃ እንዲሸጡ የሚፈቅደውን በየስድስት ወራት የሚታደሰውን ደብዳቤ መያዝ ግዴታ ነው።

- ያለ ደብዳቤ ነዳጅ በመግዛት ሕገወጥ ሽያጭ የሚፈጽሙ ነጋዴዎች ማደያ መግባት ለማይችሉ አነስተኛ ባጃጆች፣ እንዲሁም የነዳጅ እጥረት በሚኖርበት ወቅት በተጋነነ ዋጋ ለመሸጥ ነው።

- በአሁኑ ወቅት በአዲስ አበባ የቤንዚን ዋጋ 77.65 ብር ሲሆን፣ በዕቃ በመቅዳት ውጪ የሚሸጠው እስከ 80 ብር ድረስ ነው።

- በዕቃ ተቀድቶ የሚሸጠው የዋጋ ጭማሪ በማድረግ ከመንግሥት ታሪፍ ውጪ ከመሸጥም በላይ፣ እንደ ቤንዚን ያሉ ምርቶች ደግሞ ወዲያውኑ አገልግሎት ላይ ማዋል እንጂ ማስቀመጥ ለደኅንነት አሥጊ ናቸው።

- ይህ እየታወቀ የነዳጅ ማደያ ድርጅቶች ስህተት እንዳይፈጽሙ ቅድመ ማስጠንቀቂያ መስጠት አስፈላጊ በመሆኑ፣ እንዲሁም ቢሮው ባደረገው የመስክ ምልከታ በየመንገዱ ሲሸጥ የተገኘውን በመመልከት ሽያጭ እንዳያካሂዱ ክልከላ ብቻ ያደረገ በመሆኑና እስካሁን የቅጣት ዕርምጃ ባለመወሰዱ፣ ሕገወጥ ድርጊቱ ሳይስፋፋ ዕርምጃ ለመውሰድ የተሰጠ ማስጠንቀቂያ ነው።

የንግድ ቢሮው ዕርምጃ መውሰድ የሚችለው በንግድ ስም የተቋቋሙ ድርጅቶች ላይ ብቻ በመሆኑ፣ ሕገወጥ ድርጊት የሚከናወነው በመኖሪያ ቤት ከሆነ ከደንብ ማስከበር፣ ከፖሊስ፣ ከሕገወጥና ኮንትሮባንድ ግብረ ኃይል ጋር በመሆን ምርቱ እንዲወረስና ክስ እንዲመሠረት ይደረጋል ተብሏል። #ሪፖርተር

@tikvahethiopia

#NewsAlert የአፍሪካ ህብረት የሰላም እና ፀጥታ ምክር ቤት ዛሬ ስብሰባ አካሂዶ ነበር።

በስበባውም ኢትዮጵያ እና ሶማሊያ መካከል ያለውን ሁኔታ ተመልክታል።

ምክር ቤቱ ፤ እኤአ ጥር 1 በኢትዮጵያ እና ሰሜናዊ የሶማሊያ ክልል ሲል በጠራት " ሶማሌላንድ " መካከል የመግባቢያ ስምምነት ሰነድ ከተፈረመ በኃላ በኢትዮጵያ እና በሶማሊያ መካከል የተፈጠረው ውጥረት በእጅጉ እንዳሳሰበው ገልጿል።

ሁኔታው በቀጠናው ሰላም፣ ፀጥታ እና መረጋጋት ላይ አሉታዊ ተጽዕኖ ሊያሳድር ይችላል በሚልም ስጋት እንደገባው አመልክቷል።

ምክር ቤቱ ፦

➡ እኤአ ጥር 3/2024 የአፍሪካ ህብረት ኮሚሽን ሊቀመንበር ሙሳ ፋኪ መሀመት የኢትዮጵያን እና የሶማሊያን ጨምሮ የሁሉም አባል ሀገራት አንድነት፣ የግዛት አንድነት እና ሉዓላዊነት ሊከበር እንደሚገባው አፅንኦት የሰጡበትን መግለጫ እንደሚደግፍ አሳውቋል።

➡ የኢትዮጵያ እና የሶማሊያን ጨምሮ የሁሉም አባል ሀገራት አንድነት፣ የግዛት አንድነት፣ ነፃነት እና ሉዓላዊነት መጠበቅ እንዳለበት ያለውን ጠንካራ ቁርጠኝነት እና ድጋፍ በማያሻማ መልኩ አረጋግጧል።

➡ ኢትዮጵያ እና የሶማሊያ የሁለትዮሽ እና የዓለም አቀፍ ግንኙነታቸውን የአፍሪካ ህብረት እና የዓለም አቀፍ ህግ መርሆዎችን ባከበረ መልኩ እንዲመሩ አሳስቧል።

➡ የውጭ አካላት በሁለቱ የአፍሪካ ህብረት አባል ሀገራት የውስጥ ጉዳይ ጣልቃ አለመግባት የሚለውን መርህ እንዲያከብሩ አሳስቧል።

➡ ኢትዮጵያ እና ሶማሊያ በመካከላቸው ያለውን ጠንካራ መልካም ጉርብትና፣ ወዳጅነት እና አብሮነት ትስስር ላይ አሉታዊ ተጽዕኖ ከሚያሳድሩ ተጨማሪ እርምጃዎች እና መግለጫዎች እንዲቆጠቡ አበረታቷል።

➡ ኢትዮጵያ እና ሶማሊያ ለአፍሪካዊ ችግሮች አፍሪካዊ መፍትሄ በሚለው መርህ ችግሮችን በሰላማዊ መንገድ ለመፍታት ትርጉም ያለው ውይይት እንዲያደርጉ እና ውጥረቶችን እንዲያረግቡ ጥሪ አቅርቧል።

➡ ምክር ቤቱ የአፍሪካ ህብረት የአፍሪካ ቀንድ ከፍተኛ ተወካይ የቀድሞው የናይጄሪያ ፕሬዝዳንት ኦሉሴጉን ኦባሳንጆ በኢትዮጵያ እና ሶማሊያ መካከል ውይይት እንዲያመቻቹና በየወቅቱ ለምክር ቤቱ መረጃዎችን እንዲያቀርቡ ብሏል።

➡ ኢጋድ በዩጋንዳ ካምፓላ ለነገ የጠራውን ልዩ የመሪዎች ስብሰባ በደስታ እንደተቀበለው ገልጿል።

ምክር ቤቱ ጉዳዩን በንቃት እንደሚከታተል አሳውቋል።

@tikvahethiopia