ሄሜቲ ሞስኮ ምን ይሰራሉ ?

የጎረቤታችን ሀገር ሱዳን ሉአላዊው የሽግግር ም/ ቤት ምክትል ፕሬዝዳንት ጄነራል መሐመድ ሃምዳን ዳጋሎ (ሄሜቲ) ሩስያ፣ ሞስኮ ይገኛሉ።

የሄሜቲ የሩስያ ጉብኝት በምዕራባውያን ሀገራት እና በሱዳን ወታደራዊ ክንፍ መካከል ውጥረት ባለበት እንዲሁም በዩክሬን ጉዳይ ምዕራባውያን ሩስያን በዲፕሎማሲያዊ መንገድ ለማግለል ማዕቀብም ለመጣል እየዛቱ ባሉበት ወቅት ነው።

ሄሜቲ በትዊተር ገፃቸው ላይ ጉብኝታቸው በሱዳን እና በሩሲያ መካከል ያለውን ግንኙነት ለማስፋት እና ትብብርን ለማጠናከር ያለመ መሆኑን ገልፀዋል።

የሱዳን የውጭ ጉዳይ ሚኒስቴር ቃል አቀባይ ካሊድ ፋራህ አሁን ከፍተኛ ውጥረት ባለበት ጊዜ ሄሜቲ ወደ ሩሲያ የተጓዙበት ጉዳይ ላይ አስተያየት የሰጡ ሲሆን በዩክሬን ጉዳይ በምዕራቡ ዓለም እና በሩሲያ መካከል ካለው ግጭት ጋር ምንም ግንኙነት እንደሌለው ተናግረዋል።

ካሊድ ፋራህ ፥ "ይህ ጉብኝት ሁለቱ ወዳጅ ሀገራት (ሱዳን እና ሩሲያ) ያላቸውን ወዳጅነት በሁሉም መስክ እና ሁኔታ ለማጠናከር ካለው ፍላጎት አንፃር የመጣ ነው። ሁለቱ ሀገራት ታሪካዊ እና የቆየ ግንኙነት አላቸው። ይህ ጉብኝት አስቀድሞ የታቀደ ነበር ፤ በዩክሬን ውስጥ ካለው ነገር ጋር ምንም ግንኙነት የለውም " ብለዋል።

ጡረታ የወጡት ሜጀር ጄኔራል እስማኤል ማዞብ ለቪኦኤ በሰጡት ቃል ደግሞ ጉብኝቱ በዋናነት በንግድ እና በኢንቨስትመንት ላይ ያተኮረ ይመስላል ብለዋል። የልዑካን ቡድኑ የሱዳን የፋይናንስ፣ የማዕድን፣ የግብርና ሚኒስትሮችን ያካተተ መሆኑንም ጠቅሰዋል።

@tikvahethiopia

#TsehaiFamiles

ለወላጆች 'ፀሐይ ለቤተሰብ' የተሰኘ የኦላይን ትምህርት መስጫ ፕላትፎርም ይፋ ሆነ።

ዊዝ ኪድስ ወርክሾፕ ፀሐይ ለቤተሰብ https://www.t4f.et የተሰኘ አዲስ የቤተሰብ የኦላይን ትምህርት መስጫ ፕላትፎርም በኢትዮጵያ ለመጀመሪያ ጊዜ ዛሬ አስተዋውቋል።

ፀሐይ መማር ትወዳለች በተሰኘው የሕጻናት ፕሮግራሙ የሚታወቀው ዊዝ ኪድስ ወርክሾፕ በኢትዮጵያዊቷ እንስት በብሩክታዊት ጥጋቡ ከ17 ዓመታት በፊት የተመሰረተ ነው።

በዛሬው ዕለት አዲስ የተዋወቀው ፕሮግራም ቤተሰቦች ልጆቻቸውን እንዴት ማሳደግ እንዳለባቸው ትምህርት የሚያገኙበት ሲሆን በፕላትፎርሙ ከሚሰጠው ትምህርት በተጨማሪ ምዘናዎችንም ያካተተ መሆኑ በመድረኩ ተገልጿል።

በተለይ እድሜያቸው ከዜሮ ዓመት እስከ 7 ዓመት ለሆኑ ህጻናት የቤተሰቦች አስተዳደግ ላይ ሥልጠና ይሰጣል የተባለው ይህ ፕላትፎርም በነጻ እንዲሁም በክፍያ ያሉ ሥልጠናዎችን አካቷል።

ዊዝ ኪድስ ወርክሾፕ ከዚህ በተጨማሪ ጥበብ ለሴቶች እንዲሁም ወጣቶቹ ተመራማሪዎች የተሰኙ ሌሎች ፕሮጀክቶችን ያካተተ ሲሆን በመሰረታዊነት ሕጻናትና ቤተሰብ ላይ ትኩረቱን አድርጎ ይሰራል።

@tikvahethiopia

የኪዬቭ እጣፋንታ ምን ይሆን ?

" ኪዬቭ በጥቂት ሰዓታት ውስጥ በሩሲያ ኃይሎች እጅ ልትወድቅ ትችላለች " - የደህንነት ባለስልጣን

አንድ ስማቸው ያልተገለፀ የምዕራቡ ከፍተኛ የደህንነት ባለስልጣን የዩክሬን አየር መከላከያ ስለተወገደ ኪየቭ በጥቂት ሰዓታት ውስጥ በሩሲያ ኃይሎች ልትወድቅ እንደምትችል መናገራቸውን ብሉምበርግ ዘግቧል።

ባለስልጣኑ የሩሲያ ወታደሮች በዲኒፐር ወንዝ በሁለቱም በኩል ወደ ዩክሬን እየገሰገሱ ሲሆን ዋና ከተማይቱን ለመያዝ የተቃረቡ ይመስላሉ ብለዋል።

የሩስያ ጦር ኃይሎቹን ወደ አገሪቱ ውስጥ ለማስገባት የሚጠቀምባቸው በርካታ የአየር ማረፊያዎችን መቆጣጠሩ ተነግሯል።

እኚሁ የደህንነት ባለስልጣን የሩሲያው ፕሬዝዳንት ቭላድሚር ፑቲን ወታደራዊ እርምጃዎች በምስራቅ፣ ደቡብ እና በመሃል ሀገሪቱ ላይ ያተኮሩ ቢሆንም፣ መላው ዩክሬን የመቆጣጠር አላማ እንዳላቸው ይታመናል ብለዋል።

አክለው የፑቲን የመጨረሻ ጨዋታ በኪዬቭ የሚገኘውን መንግስት አስወግደው የሚታዘዝላቸውን የአሻንጉሊት አገዛዝን ማስቀመጥ ነው ሲሉ አስረድተዋል።

የዩክሬኑ ፕሬዝዳንት ዘሌንስኪ አገራቸውን ለመከላከል ቃል የገቡ ሲሆን " እሳቸው እና መንግስታቸው በዋና ከተማው እንደሚቆዩ አረጋግጠዋል።

የደህንነት ባለሥልጣኑ ሩሲያውያን ኪዬቭን ሲቆጣጠሩ 3 ሚሊዮን ህዝብ ያላት ከተማ ከፍተኛ የሆነ ጥቃት ሊደርስባት ይችላል ሲሉ ስጋታቸውን ገልፀዋል።

የሩሲያው ፕሬዝዳንት ቪላድሚር ፑቲን ከሰዓታት በፊት እያካሄዱ ስላሉት ወታደራዊ ዘመቻ በሰጡት መግለጫ " ሊስቆመን የሚሞክር፣ በሀገራችን እና በህዝባችን ላይ ተጨማሪ አደጋ የሚጥል ማንኛውም አካል በታሪኩ አይቶት የማያውቀው እጣፋንታ ይገጥመዋል " ሲሉ ዝተው ነበር።

@tikvahethiopia

#እንኳን_ለዐቢይ_ጾም_አደረሳችሁ !

ቅዱስ ፓትርያርኩ ዐቢይ ጾምን በማስመልከት ለመላው ኦርቶዶክሳዊያን አባታዊ መልዕክት አስተላለፉ።

ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሀይማኖት የዐቢይ ጾም መግባትን አስመልክተው ዛሬ የካቲት 18/2014 ዓ.ም ለመላው የኢትዮጵያ ኦርቶዶክስ ተዋሕዶ ቤተክርስቲያን ምዕመናን የእንኳን አደረሳችሁ መልዕክት አስተላልፈዋል።

ቅዱስ ፓትርያርኩ በመልዕክታቸው ፥ " በመዋዕለ ጾሙ ስለ ሀገርና ስለ ቤተ ክርስቲያን አንድነት ፣ ስለ ሕዝባችን ዘላቂ ፍቅርና ስምምነት አጥብቀን እንድንጸልይ ፣ እንደዚሁም በግጭቱና በድርቁ ለተጎዱ ወገኖቻችን ካለን በማካፈል የችግሮቻቸው ተካፋይ እንድንሆን ከዚህም ጋር ለሀገራዊ ሰላም እና ፍቅር መሳካት ያላሰለሰ ጥረት በማድረግ መዋዕለ ጾሙን እንድናሳልፍ በእግዚአብሔር ስም መልእክታችንን እናስተላልፋለን " ብለዋል።

* የመልዕክቱ ሙሉ ቃል ከላይ ተያይዟል።

@tikvahethiopia