#сво #своихнебросаем

⭐️ Хоро нэһилиэгиттэн "Сэгэйэ" түмсүү байыаннай дьайыыга сулууспалыы сылдьар байыастарга анаан харысхаллары уонна инчэҕэй салпыаккалары иистэнэр сыахха туттардылар.

Оттон "Айылгы" түмсүүлэр 2 хаххалыыр сетканы анаан бэлэмнээбиттэр.

"Дойдум тыына" иистэнэр сыахха күннэтэ байыаннай дьайыы буола турар сиригэр сулууспалыы сылдьар уолаттарбытыгар ананан бэлэмнэммит мал-сал, таҥас-сап, туттар тэрил күннэтэ кэлэ турар. Бары биир санаанан салайтаран Кыайыы туһугар туруулаһабыт.✊

"Үөһээ Бүлүү" хаһыат

#сво #своихнебросаем

⭐️ Балаҕаннаах нэһилиэгин үтүө санаалаах кэрэ аҥаардара анал байыаннай дьайыыга Ийэ дойдуларын туһугар туруулаһа сылдьар хорсун уолаттарга анаан, мал-сал бэлэмнии сылдьаллар.

СИЭЛ УГУУННЬА сайыҥҥы өттүгэр бүтэй атах таҥаска уолаттарбыт атахтара куулуйарыттан харыстыыр. Берцы, саппыкы киһи атаҕын уутун обороруттан харыстыырын билэн, ийэлэрбит, эбээлэрбит угуунньа оҥороллор.

@uoheebuluu

#сво #своихнебросаем

⭐️ Оҕолор хаххалыыр сетка баайыытыгар көмөлөстүлэр

"Движение первых" диэн Трудовой лааҕырыгар сылдьыбыт 24 оҕо анал байыаннай дьайыыга баһыылка буолан барыахтаах хаххалыыр сетканы оҥорууга көмөлөстүлэр.
Түөрт сетканы баайан бүтэрдилэр.

Бары бииргэ - кыайыыга✊✊✊

@uoheebuluu

#сво #своихнебросаем

⭐️ БАЙЫАСТАРГА 43 АЛГЫСТААХ МӨҺӨӨЧЧҮК БЭЛЭМНЭННЭ

Улуус баһылыга Валерий Николаев бу аҕыйах хонугунан анал байыаннай дьайыы буола турар сиригэр сулууспалыы сылдьар уолаттарбытын, биир дойдулаахтарбытын көрсө барар. Маныаха анаан улуус олохтоохторуттан аадырыстаммыт баһыылкалары тута олороллор.

"Дойдум тыына" иистэнэр сыах толору маллаах алгыстаах мөһөөччүктэри түүннэри-күнүстэри түбүгүрэн, бэлэмнээн бүтэрдилэр. 43 байыаска дойдуларыттан кэһии буолан тиийиэҕэ. Итиэннэ хас да ыччаты утары тэрийэн ыыттылар.

"Бары күүс-көмө, сүбэ буолбут түмсүүлэрбэр, биирдиилээн дьоммор баара махталбын тиэрдэбин. Биһиги күүспүт - түмсүүгэ! Уолаттарбыт Кыайыы кынаттаах этэҥҥэ эргиллэллэрин туһугар, бары күүһү - кыайыыга!", - дииллэр "Дойдум тыына" иистэнэр сыах салайааччыта Васма Иванова уонна улуус дьахталларын Сэбиэтин бэрэссэдээтэлэ Ольга Тумусова.

Хас биирдии алгыстаах мөһөөччүккэ угуллубут "Үөһээ Бүлүү" улуус хаһыата байыаннай дьайыы буола турар сиригэр дойдуларыттан сибиэһэй салгыҥҥа тэҥнээх сонун буолан тиийдин.

Күндү биир дойдулаахтарбыт, сонуннаргытын, сэргэх суруйууларгытын улуус хаһыатыгар ыыта туруҥ диэн ыҥырабыт. Дойду көмүскэлигэр сылдьар байыастарбыт төрөөбүт дойдуларын, эһиги сонуннаргытын ааҕан сэргэхсийиэхтэрэ, ахтылҕаннарын таһааран күүстэригэр күүс, кыахтарыгар кыах эбиллиэҕэ.

"Үөһээ Бүлүү" хаһыат

#сво #своихнебросаем

⭐️ Үөһээ Бүлүү байыастарыгар анаммыт баһыылка хомуллан, алгыстанан, айаннаан эрэр

Үөһээ Бүлүүттэн улуус баһылыга Валерий Николаев, баһылык солбуйааччыта, дьаһалта дьыалаларын дьаһайааччы Михаил Егоров, Үөдүгэй нэһилиэгин баһылыга Альберт Иванов анал байыаннай дьайыы буола турар сиригэр уолаттарбытын көрсө, билсэ, баһыылка тиксэрэ, от ыйын 21 күнүгэр командировкаланан айанныахтара.

Маныаха анаан иистэнэр сыах анаан-минээн тикпит толору маллаах алгыстаах мөһөөччүктэри бэлэмнээтэ, биирдиилээн байыастарга дьонноруттан  аадырыстаммыт баһыылкалары, тэрилтэлэр, нэһилиэнньэ көмөтүнэн бэлэмнэммит малы-салы хомуйдулар, спонсордар көмөлөрүнэн тиэхиньикэ, туттар тэрил атыыластылар.

Улуус Аҕа баһылыгар уонна ыраах айанныыр баһыылкаларга алгысчыт Трофим Миронов аал уот оттон айах тутта, сыт таһааран илбистээх тылларын иҥэрдэ.

Барыта Кыайыы туһугар диэн туран анаммыт улуус аатыттан көмөбүт тиийэн байыастар куттарын бөҕөргөттүн🙌

Байыаннай дьайыыга туох ханнык көмө оҥоһуллубутун "Үөһээ Бүлүү" хаһыат кэлэр нүөмэригэр ааҕыҥ.

"Үөһээ Бүлүү" хаһыат

#сво #своихнебросаем

⭐️ Байыастарга ананар көмө тохтообот

«Online» маҕаһыын хаһаайката Туйаара Васильевна Трофимова
анал байыаннай дьайыыга сулууспалыы сылдьар байыастарга туһалаах буолуо диэн иитиллэр лаампалары спонсордаата.

"Бэйэтэ ис иһиттэн сырдыгынан, сылааһынан сыдьаайа сылдьар Туйаара маннык көмөнү оҥорбутуттан олуһун үөрдүм", - диир байыастарга анаан таҥас тигэр "Дойдум тыына" иистэнэр сыах салайааччыта Васма Иванова.

"Үөһээ Бүлүү" хаһыат

#сво #своихнебросаем

⭐️ "Бүлүү" рынок урбаанньыттара байыастарга анаан "Дойдум тыына" иистэнэр сыахха ис таҥас арааһын туттардылар.

"Номнуо хас да кэмпилиэк байыаннай дьайыыга сулууспалыы барар уолаттарбытыгар туттарылынна. Инники өттүгэр ыкса үлэлэһэрдии сүбэлэстибит. Рынок администратора Фаина Рафаэловна Семеноваҕа ыҥырыыбытын ылынан көмөлөспүтүгэр махталбытын биллэрэбит", - диир сыах салайааччыта Васма Иванова.

Ону тэҥэ Васма Васильевна убайа Вакапрону кытта бииргэ 10-с "в" кылааска үөрэммиттэр, 1976 сыллаахха И.Н.Барахов аатынан оскуоланы бүтэрбиттэр ааттарыттан, Аврора Ивановна Николаева көҕүлээһининэн, харчынан көмөлөрүн хомуйбуттарын аҕалан туттарда.

"Аврора Ивановналыын ону - маны сэһэргэһэн, ирэ-хоро сэлэстибит. Көрсүбэтэх ырааппыт. Аврора Ивановна хаххаланар сетка баайыытыгар көхтөөхтүк кыттан, кыайыы туһугар бэйэтин тус кылаатын киллэрсибитигэр махталбытын тиэрдэбит", - диэн Васма Иванова санаатын үллэһиннэ.

"Үөһээ Бүлүү" хаһыат

#сво #своихнебросаем

⭐️ Сэтинньи ыйга байыастарга тиксиэхтээх көмөнү бэлэмнээн саҕалаатылар

Байыаннай дьайыы буола турар сиригэр улуус салалтата гуманитарнай көмөнү илдьэ сэтинньи ыйга барыар диэри лоп курдук биир ый баар.

Бүгүн Ороһу нэһилиэгин "Күбэй" түмсүү ийэлэрэ, эбээлэрэ сылаас илиилэринэн баайбыт хаххаланар сеткаларын "Дойдум тыына" сыахха туттардылар.

Ону тэҥэ Константин Котоконов сэрии бэтэрээннэрин аатыттан кытыан хомуйан аҕалан туттарда.

"Кытыан уолаттарбытыгар арчыланалларыгар, эмтэнэллэригэр туһалааҕын билэн суһаллык аҕалла.
Сэтинньитээҕи сырыыга уолаттарбытыгар кэһии тиийэригэр кыһанан, туһалаах малы, таҥаһы хомуйан саҕалаатыбыт", - диэн иистэнэр сыах салайааччыта Васма Васильевна иһитиннэрдэ.

"Үөһээ Бүлүү" хаһыат

#сво #СвоихНеБросаем

⭐️Байыастарга көмөҕө Техникум кыттыһар

Бүгүн Үөһээ Бүлүүтээҕи Техникум коллектива баайбыт хаххаланар сеткатын "Дойдум тыына" иистэнэр сыахха, салайааччы Васма Ивановаҕа аҕалан туттардылар. Бу үлэни дьахтар Сэбиэтин бэрэссэдээтэлэ Ольга Тумусова иилээн-саҕалаан оҥоттордо.

"Лицей коллективыгар барҕа махталбытын тиэрдэбит. Бары бииргэ КЫАЙЫЫГА!" - диир Васма Васильевна.

"Үөһээ Бүлүү" хаһыат

#сво #СвоихНеБросаем #КомсомолКүнэ

⭐️ Комсомоллуу үлэни - Кыайыы туһугар!

Аҕыйах хонуктааҕыта 10 сыллаах үбүлүөйүн бэлиэтээбит "Көмүс сүүтүк" сахалыы ииһи баһылаабыт түмсүү иистэнньэҥнэрэ байыастарга аналлаах таҥаһы-сабы тигэр "Дойдум тыына" иистэнэр сыахха Комсомол күнүнэн субуотунньуктаатылар. Ол курдук, иистэнньэҥнэргэ күүс-көмө буолан иистэрин ситэрдилэр, хаххаланар сетка баайдылар.

Биһиги байыастарбыт дойдуларыгар уоппускаҕа күүстээх, күүс-сэниэ ылына кэллэхтэринэ сүрэх сылааһын иҥэриммит таҥастары бэлэмнээн, илии тутуурдаах, өттүк харалаах ыытардыы иис үлэтэ тохтоло суох ньиргиччи барар.

Иистэнэр баҕалаах көмөҕө кыттыһар санаалаах дьоҥҥо бу сыах аана мэлдьи аһаҕас🙌

"Комсомоллуу күүстээх үлэ барыта Кыайыы туһугар" - диир улуус уопсастыбаннай түмсүүлэрин салайар Ирина Потапова.

"Көмүс сүүтүк" түмсүү салайааччыта Елена Петрова хоһоонунан эҕэрдэтин ыытар:

Эдэр сааспыт аргыһа
Эрчимнээх Комсомол
Эҕэрдэ төрөөбүт күҥҥүнэн,
Элиэнньин эппит суолунан
Элэс гыммыт эдэр сааспыт
Эрэллээх суолдьута эн этиҥ,
Үлэҕэ, үөрэххэ инники
Үрдүккэ, сырдыкка тардыһан
Үтүмэн сыллары аастахпыт,
Умайар сулуспут уостубат
Уот курдук сырдыктык
Өрүүтүн иннибэр угуйар,
Комсомол бу күндү билиэтэ
Кистэммит сүрэхпэр сылаастык ,
Албыны, түөкэйи ылыммат
Ааспыт олоҕум чаҕылхай,
Кэннибэр хааларым суобаһым
Күн курдук күлүмнүүр
Комсомол саастарым.

"Үөһээ Бүлүү" хаһыат

#муҥха #БарыБииргэ #сво #СвоихНеБросаем

⭐️ Харбалаахтар байыаннай дьайыы кыттыылаахтарын дьиэ кэргэттэрин муҥха балыгынан күндүлээтилэр

Үөһээ Бүлүү Харбалааҕын Таай Күөлүгэр сэтинньи 1 күнүгэр 80-тан тахса киһи кыттыылаах дьоһуннаах муҥха буолан ааста.

Нэһилиэк баһылыга Константин Платонов: "Кэлбит дьон инчэҕэйдии иккилии куул собону үллэһиннилэр, уолаттар муҥханы халлаан хараҥарыар диэри таһаардылар. Инньэ гынан кэнники таһаарыыттан ким төһө кууллааҕынан, иһиттээҕинэн үллэстии буолла. Павлов Олимпий бураанынан кэлэн көмө буолан абыраата, анньыыһыттарга салайан, суоллаан биэрэн, хоппо таһан, дьоҥҥо тиэйсэн, маладьыастаата. Бураан суоҕа буоллар эстиэ эбиппит. Күөх Боллох Тойон күндүлээтэ, Таай Күөл Эбэбит балык бөдөҥүн, минньигэһин бэристэ. Дьон-сэргэ махтанан, үөрэн-көтөн тарҕаста. Муҥхалаах дьоммутугар Виктор Новиковка, Данил Платоновка махталбыт улахан. Бу курдук муҥхаҕа түмсэн, көхтөөхтүк сылдьар буолуохха, сахалар кыстыыр аспытын булунар төрүт үгэспитин умнубакка тута сылдьыахха. Барыгытыгар чэгиэн доруобуйаны баҕарабын."

Күөх Боллох бэлэҕиттэн нэһилиэктэн анал байыаннай дьайыыга дойду туруктаах буоларын туруулаһа сылдьар буойун уолаттар дьиэ кэргэттэригэр, төрөппүттэригэр өлүүлээн бэристилэр. Итиэннэ нэһилиэк ытык кырдьаҕастарыгар, оҕолорун соҕотохтуу иитэр ийэлэргэ эмиэ ирээт балык тиксэн үөрүүлэрэ үгүс буолла.

Ороһу нэһилиэгэр Ольга Тумусова көҕүлээһининэн байыаннай дьайыыга сылдьар байыастарга, госпитальга эмтэниини ааһар буойуттарга балык арааһын астаан баһылыкка бэлэмнээн тиксэрэр үгэстээх. Кини дьаныардаах көмөтүгэр көмө буоллун диэн, Харбалаах нэһилиэгин дьаһалтатын аатыттан бу сырыыга айанныахтаах баһыылкатыгар балык үчүгэйиттэн талан ирээттээн тиксэрдилэр.

Ону тэҥэ харбалаахтар сэтинньи 8 күнүгэр бэлиэтээри олорор Николай Золотарев - Якутскай аатынан оскуола тэриллибитэ 105 сыллаах үбүлүөйдээх тэрээһиннэригэр, сыл бүтэһигэр үлэҕэ киириэхтээх биллиилээх политическай деятель, улуу киһи Исидор Барахов аатынан култуура киинин арыллыытыгар ыалдьыттары айах тутар балыктарын ирээттээн хаһааннылар.

"Үөһээ Бүлүү" хаһыат @ulusmedia_admin