በጊዜያዊነት ታግደዋል !

" ብራስ ዩዝ አካዳሚ " እና " ቅዱስ ሚካኤል ትምህርት ቤቶች ከክፍያ ጭማሪ ጋር በተያያዘ በጊዜያዊነት ታገዱ።

የአዲስ አበባ ትምህርት እና ስልጠና ጥራት ቁጥጥር ባለስልጣን ሁለት ትምህርት ቤቶችን በጊዜያዊነት አግዷል።

የታገዱት " ብራስ ዩዝ አካዳሚ " እና ቅዱስ ሚካኤል ትምህርት ቤቶች ናቸው።

ለምን ታገዱ ?

ብራስ ዩዝ አካዳሚ ፦

ት/ቤቱ ከክፍያ ጭማሪ ጋር በተያያዘ ከወላጆች ጋር ስምምነት ሊደርስ አልቻለም ተብሏል።

ት/ቤቱ ያቀረበው 40 % እና ወላጆች ለቅድመ መደበኛ 25 % ለመጀመሪያ ደረጃ 30 % ያቀረቡ ሲሆን በዚሁ ጉዳይ ሰፊ ውይይት ተደርጓል።

ባለስልጣን መስሪያ ቤ/ት የሁለቱንም ወገን ምክንያት ታሳቢ በማድረግ በ30% ለማስማማት መሞከሩን በዚህም ወላጆች ቢስማሙ ት/ቤተ ግን የማደራደሪያ ሃሳቡን አልተቀበለም።

ከወላጆች ጋር በ2016 ዓ/ም የትምህርት አገልግሎት ክፍያ ላይ የጋራ ስምምነት ላይ ሳይደረስ ለ2016 ዓ/ም የተማሪ ምዝገባ ማከናወን የማይቻል በመሆኑ ተቋሙ በጊዜያዊነት መታገዱን ባለስልጣን መ/ቤቱ አሳውቋል።

ቅዱስ ሚካኤል ትምህርት ቤቶች ፦

ይህም ት/ቤቱ በተመሳሳይ ከክፍያ ጭማሪ ጋር በተያያዘ ከወላጆች ጋር ስምምነት ሊደርስ አልቻለም ተብሏል።

ት/ቤቱ ያቀረበው 80 % ጭማሪ ሲሆን እና ወላጆች 50 % እንዲቀራረቡ ሰፊ ውይይት ለማድረግ ቢሞከርም  ማስማማት አልተቻለም።

ባለስልጣን መስሪያ ቤ/ት የሁለቱንም ወገን ምክንያት ታሳቢ በማድረግ በ60% ለማስማማት መሞከሩን በዚህም ወላጆች እና ተወካዮቻቸው ቢስማሙ ት/ቤቱ ግን የማደራደሪያ ሃሳቡን አልተቀበለም።

ከወላጆች ጋር በ2016 ዓ/ም የትምህርት አገልግሎት ክፍያ ላይ የጋራ ስምምነት ላይ ሳይደረስ ለ2016 ዓ/ም የተማሪ ምዝገባ ማከናወን የማይቻል በመሆኑ ተቋሙ በጊዜያዊነት መታገዱን ባለስልጣን መ/ቤቱ አሳውቋል።

ምንጭ፦ የአዲስ አበባ ትምህርት እና ስልጠና ጥራት ቁጥጥር ባለስልጣን

@tikvahethiopia

የመውጫ ፈተና !

ከ168 ሺ በላይ የ2015 ዓ.ም ዕጩ ተመራቂዎች በቀጣይ ወር የሚሰጠውን ሀገር አቀፍ የመውጫ ፈተና ይወስዳሉ።

የመውጫ ፈተናው ከሐምሌ 03 እስከ 08/2015 ዓ.ም በኦንላይን በ208 የትምህርት መስኮች ይሰጣል።

መንግሥት ከዚህ ቀደም ፈተናው ለ240 ሺህ በላይ ዕጩ ተመራቂዎች ይሰጣል ብሎ የነበረ ቢሆንም፤ ፈተናውን ለመውሰድ 168,345 ተማሪዎች ብቻ #መስፈርት ማሟላታቸው ተገልጿል።

ከ44 የመንግሥት እና ከ161 የግል ከፍተኛ ትምህርት ተቋማት የተውጣጡ ዕጩ ተመራቂዎች ፈተናውን በ82 የመፈተኛ ማዕከላት ውስጥ ይወስዳሉ።

ከሐምሌ 09/2015 ዓ.ም ጀምሮ ውጤት ይገለጻል ተብሏል።

በሌላ በኩል ፤ የመውጫ ፈተና የሚወስዱ ዕጩ ተመራቂ ተማሪዎችን የተመለከተ መረጃ ለትምህርትና ስልጠና ባለሥልጣን የላኩ የግል ከፍተኛ ትምህርት ተቋማት የተፈታኝ ተማሪዎቻቸውን የመግቢያ ስም እና የይለፍ ቃል መውሰድ እንደሚችሉ ተገልጿል።

ባለሥልጣን መ/ቤቱ ከትምህርት ሚኒስቴር የመጣለትን የግል ከፍተኛ ትምህርት ተቋማት የተፈታኝ ተማሪዎች የመግቢያ ስም እና የይለፍ ቃል እንዲወስዱ ለተቋማቱ ጥሪ አድርጓል፡፡

More : @tikvahuniversity

ለሃጫሉ ሁንዴሳ ፋውንዴሽን ድጋፍ ተደረገ።

ኦሮሚያ ባንክ ለ " ሃጫሉ ሁንዴሳ ፋውንዴሽን " ስራ ስኬት አንድ ሚሊዮን ብር ድጋፍ ማድረጉን አሳውቋል።

ድጋፉን የሃጫሉ ሁንዴሳ ባለቤትና የፋውንዴሽኑ የቦርድ ሰብሳቢ ወ/ሮ ፋንቱ ደምሶ ከኦሮሚያ ባንክ ዋና ስራ አስፈፃሚ አቶ ተፈሪ መኮንን እጅ ተቀብለዋል።

ባንኩ ፤ ለሃጫሉ ሁንዴሳ ፋውንዴሽን የተደረገው ድጋፍ የባንኩ የማህበራዊ ሃላፊነት ስራ አንዱ አካል መሆኑን ገልጿል።

ኦሮሚያ ባንክ ባለፈው አመትም ለፋውንዴሽኑ ተመሳሳይ ድጋፍ ማድርጉን አስታውሷል።

@tikvahethiopia

" . . . ግድያው መከላከያን በካደ አንድ ግለሰብ የተፈጸመ እንጂ በሠራዊቱ ደረጃ የተፈጸመ አይደለም " - የሶማሌ ክልል መንግስት ኮሚኒኬሽን

ከትላንት በስቲያ በሶማሌ ክልል፣ ቀብሪደኀር ከተማ አንድ የመከላከያ ሠራዊትን ከድቶ ከካምፕ ያመለጠ ነው የተባለ አባል ድንገት ተኩስ በመክፈት አራት ሰዎችን ገድሎ ሶስት ሰዎችን ማቁሰሉ ተሰምቷል።

የክልሉ ኮምዩኒኬሽን ቢሮ ለቪኦኤ ሬድዮ በሠጠው ቃል ፤ ድርጊቱን የፈጸመው ወታደር ከካምፕ #አምልጦ የጠፋና ለሦስት ቀናት ክትትል ሲደረግበት የቆየ እንደሆነ ገልጾ አስቀድሞ ተኩሶ የመታውም ተከታትለው የደረሱበትን የቀብሪ ደኀር ነዋሪ እና የከተማዋን አመራር አባል ነው ሲል ገልጿል።

ግድያውን የፈጸመው ወታደር ተጨማሪ ጉዳት ከማድረሱ በፊት በመከላከያ ሠራዊት አባላት ርምጃ እንደተወሰደበት ተገልጿል።

የሶማሌ ክልል መንግሥት ኮምዩኒኬሽን ግድያውን የፈጸመው ወታደር ከ3 ቀናት በፊት ከመከላከያ ካምፕ ያመለጠና ክትትል እየተደረገበት የነበረ የመከላከያ ሠራዊት አባል መሆኑን ገልጾ " ግድያው መከላከያን በካደ አንድ ግለሰብ የተፈጸመ እንጂ በሠራዊቱ ደረጃ የተፈጸመ አይደለም " ብሏል።

በሌላ በኩል የኦጋዴን ብሔራዊ ነፃነት ግንባር (ኦብነግ) ባወጣው መግለጫ ፤ ከቀብሪድሃር ከተገደሉት አራት ሰዎች ሶስቱ ፓርቲው አባላት እንደነበሩ አንዱ ሰው ደግሞ የብልፅግና ፓርቲ አመራር እንደነበር ገልጿል።

የፌዴራል እና የክልሉ መንግሥት እንዲሁም የጦር ሰራዊቱ ድርጊቱን በፍጥነት አጣርተው እርምጃ እንዲወስዱ ጠይቋል።

ባለፉት ስድስት ወራት በሰሜን ኢትዮጵያ ጦርነት ወቅት አካባቢውን ለቆ የነበረው መከላከያ ሠራዊት ወደ ሶማሌ ክልል ከተመለሰ በኋላ ይህን መሰል ጥቃት በልዩ ልዩ ከተሞች እየተሰማ ነው ሲል ኦብነግ በመግለጫው አመልክቷል።

ኦብነግ፤ የሠራዊቱ ካምፖች ከከተሞች እንዲርቁና የመከላከያ አባላት ትጥቅ ይዘው ወደ ከተማ ከመግባት እንዲከለከሉ ጠይቋል።

የሶማሌ ክልል ሕዝብ በዘመነ " ኢሕአዴግ " በርካታ ጅምላ ጭፍጨፋዎች እንደተፈጸሙበት ያስታወሰው ኦብነግ ዛሬም የመከላከያ ሠራዊቱን እንደ ጠላቱ እንዲያይ ከሚያደርጉ አካሔዶች መቆጠብ ተገቢ ነው ሲል አስጠንቋል።

ተመሳሳይ ጥቃቶች ዳግም እንዳይፈጸሙ ርምጃዎች መወሰድ አለባቸውም ብሏል።

ትላንት የመከላከያ ሠራዊት አመራሮችና የሶማሌ ክልል አመራሮች የቀብሪደኀር ከተማ ነዋሪዎችን ሰብስበው ስለ ጉዳዩ እንዳወያዩዋቸው የክልሉ ኮሙኒኬሽን ቢሮ  አስታውቀዋል።

መረጃው የቪኦኤ ሬድዮ አማርኛ አገልግሎት ነው።

ፎቶ፦ ኦብነግ

@tikvahethiopia

የ3 ዓመት ህፃን ልጅ #አግቶ ቤተሰቦቹ 500 ሺህ ብር እንዲያመጡ ሲጠይቅ የነበረው አጋች በቁጥጥር ስር ዋለ።

በአማራ ክልል፤ ማዕከላዊ ጎንደር ዞን የቆላድባ ከተማ ነዋሪ የሆነው አቶ ደጀን አረጋ የ3 ዓመት ልጅ ህፃን አማኑኤል ወንድማገኝን ከደብረ ማርቆስ ከተማ 06 ቀበሌ በማገት ወደ ጠገዴ ወረዳ እርጎየ ቀበሌ ጫካ ውስጥ ይዞ ይገባል።

ህፃኑን በጫካው ውስጥ ለ7 ቀን ያክል ይዞ ቤተሰቦቹን 500 ሺህ ብር እንዲከፍሉ ሲጠይቅ ከቆየ በኃላ ፖሊስ ባደረገው ኦፕሬሽን ህፃኑን ከአጓቾች እጅ ማስለቀቅ ችሏል።

ፖሊስ ህፃኑ ታግቶ የነበረበትን ጫካ በመክበብ እና የተኩስ ልውውጥ በማድረግ ለጊዜው ዋናው አጋች ቢያመልጥም የጉዳዩ ተባባሪ እንደሆነ የተነገረው ጣማለው አስፋ የተባለ ግለሰብ ህፃኑን እንደያዘ በቁጥጥር ስር ማዋል ችሏል።

ዋናው አጋች አቶ ደጀን አረጋን በቁጥጥር ስር ለማዋል በተደረገው እንቅስቃሴም ግለሰቡን ሰኔ 14 በቁጥጥር ማዋል ተችሏል።

የሶሮቃ ንዑስ ወረዳ ፖሊስ ፅ/ቤት ታግቶ የነበረውን ህፃን ለቤተሰቡ ካስረከበ በኃላ የማህበረሰቡ እሴትና ባህል መገለጫ ያልሆነ አፀያፊ ተግባር በዋና ተዋናይነት ፈፅሟል በሚል የተጠረጠረውን ደጀን አረጋን በቁጥጥር ስር ለማዋል የተባባሪ አጋች ጣማለው አስፋ ቤተሰቦች ጉዳዩን በዋናነት እንዲከታተሉና ጥቆማ እንዲሰጡ ማድረጉን ገልጿል።

ሌሎች ልዩ ልዩ ዘዴዎችንም በመጠቀም ባደረገው ክትትል ሰኔ 14/2015 ዓ.ም ከአካባቢው ሚሊሻና ማህበረሰብ ጋር በመተባበር ጠገዴ ወረዳ እርጎየ ቀበሌ ልዩ ስሙ " እምባ ጓዳድ " ከተባለ ቦታ ደጀን አረጋን በቁጥጥር ስር ማዋል ችሏል።

የሶሮቃ ንዑስ ወረዳ ፖሊስ ፅ/ቤትም ጉዳዩን እያጣራ መሆኑን ያሳወቀ ሲሆን ተጠርጣሪውን በህግ ቁጥጥር ስር ለማዋል ሲባል የአካባቢው ማህበረሰብና መላው የፀጥታ መዋቅር ላደረገው ትበብር ምስጋና አቅርቧል።

በዚህና መሰል የወንጀል ተግባራት ላይ በሚሰማሩ አካላት ላይ ህጋዊ እርምጃ ለመውሰድ በቀጣይም በተጠናከረ መንገድ ርብርብ እንደሚደረግ አሳውቋል።

መረጃው የጠገዴ ወረዳ ኮሚኒኬሽን ነው።

@tikvahethiopia

በታጣቂዎች #ታግተው የነበሩት የ " ሰዴን ሶዶ " የወረዳ አመራር ተገድለው ተገኙ።

በኦሮሚያ ክልል፤ ደ/ምዕራብ ሸዋ ዞን፤ የሰዴን ሶዶ ወረዳ አስተዳዳሪ ከመኖሪያ ቤታቸው ታፍነው ከተወሰዱ ከሁለት ቀን በኃላ ተገድለው መገኘታቸው ተሰምቷል።

የሰዴን ሶዶ ወረዳ አስተዳዳሪ አቶ በቀለ ቃቻ ፤ ባለፈው ቅዳሜ ዕለት ከመኖሪያ ቤታቸው ታፍነው ከተሰወዱ በኋላ ማክሰኞ ተገድለው አስክሬናቸው መገኘቱን የደቡብ ምዕራብ ሸዋ ዞን የመንግስት ኮሙዩኒኬሽን ጉዳዮች ጽህፈት ቤት ለቢቢሲ አፋን ኦሮሞ በሰጠው ቃል ገልጿል።

ወረዳው ለግድያው በክልሉ የሚንቀሳቀሰውን የኦሮሞ ነፃነት ሰራዊትን ተጠያቂ አድርጓል ፤ እስካሁን ከታጣቂ ቡድኑ ዘንድ የተሰጠ አስተያየት የለም።

አቶ በቀለ ፤ ከታገቱ በኃላ ያገቷቸው ታጣቂዎች እንዲለቀቁ ' 10 ሚሊየን ብር ' መጠየቃቸውን ቢቢሲ አፋን ኦሮሞ ለጉዳዩ ቅርብ ከሆኑ ሰዎች መስማቱን ገልጿል።

የወረዳው የኮሙዩኒኬሽን ፅህፈት ቤት ጉዳዩ ተጨማሪ ምርመራ የሚጠይቅ ቢሆንም ታጣቂዎቹ ለተወሰኑ ሰዎች በወረዳው አስተዳዳሪ ስልክ ደውለው እስከ 10 ሚሊዮን ብር መጠየቃቸውን አመልክቷል።

በደቡብ ምዕራብ ሸዋ ወረዳ ውስጥ ግለሰቦችን በታጣቂዎች እያታገቱ ከ200 ሺህ ብር አንስቶ እስከ 500 ሺህ ብር ድረስ እንደሚጠየቅባቸው ፤ ከዚህ ባለፈ ማሰቃየት እና ግድያ እንደሚፈፀም ከወረዳው የተገኘው መረጃ ያመለክታል።

@tikvahethiopia