#DireDawa

3 ነጥብ 5 ቢሊዮን ብር ውጭ ተደርጎበት ተገንብቷል የተባለው የድሬዳዋ ደረቅ ወደብ እና ተርሚናል ዛሬ አገልግሎት መስጠት መጀመሩን ኢዜአ ዘግቧል።

የድሬደዋ ወደብ እና ተርሚናል በ34 ነጥብ 1ሄክታር መሬት ላይ ያረፈ ሲሆን ባለሶስት ወለል የቢሮ ህንፃ ፣ መጋዘን ፣ የኮንቴይነር ተርሚናልና 10 ሄክታር የውስጥ ለውስጥ የኮንክሪት መንገድ አለው ተብሏል።

በተጨማሪም በአንድ ጊዜ 140 መኪናዎች ማቆም የሚያስችል የተገነባ ቦታ፤ ሁለት የዕቃ ማስቀመጫ መጋዘን እንዲሁም ወደቡን ከኢትዮ ጅቡቲ ባቡር መስመር የሚያገናኝ #የባቡር_ሃዲድ የተሰራለት እንደሆነ ተገልጿል።

Credit : ENA

@tikvahethiopia

የኢትዮ ቴሌኮም እና ገቢዎች ሚኒስቴር ስምምነት !

ኢትዮ ቴሌኮም እና በገቢዎች ሚኒስቴር መካከል #የግብር_ክፍያዎችን በቴሌብር ለመሰብሰብ የሚያስችል ስምምነት ዛሬ አድርገዋል።

ስምምነቱ የሚኒስቴር መ/ቤቱ ደንበኞች የተለያዩ የግብር ክፍያዎችን በቴሌብር የዲጂታል ክፍያ ስርዓት ተጠቅመው #በየትኛውም_ጊዜ እና #ቦታ ሆነው ያለምንም ውጣውረድ በኦንላይን አገልግሎት እንዲፈጽሙ ያስችላቸዋል ተብሏል፡፡

አጭር መረጃ ስለ ስምምነቱ፦

- በዋናነት ለገቢዎች ሚኒስቴር የገቢ ግብርንና የግል ሠራተኞች የጡረታ መዋጮ፣ የፌደራል ታክስ ክፍያዎችን በወቅቱ ለመሰብሰብ ያግዛል።

- የቴሌብር ተጠቃሚዎች ከግል ወይም ከድርጅት የቴሌብር አካውንታቸው በቴሌብር የሞባይል መተግበሪያ/ በአጭር ቁጥር *127# በመጠቀም የግብር ክፍያቸውን ባሉበት ቦታ ሆነው በቀላሉ ለመክፈል ያስችላቸዋል።

- በቴሌብር ግብይት የሚፈጽሙ ነጋዴዎች ከሚፈጽሟቸው ግብይቶች ከሰበስቡት ገንዘብ ላይ ለግብር ክፍያ በቀጥታ መክፈል ይችላሉ።

- በገቢዎች ሚኒስቴር ሰርቨር ላይ መረጃን ወቅታዊ በማድረግ በመዘግየት ምክንያት በግብር ከፋዩ ላይ የሚደርሰውን ቅጣት ለማስቀረት እና ትልቅ ፋይዳ ይኖረዋል።

- አገልግሎቱን ለማግኘት የሚኒስቴር መ/ቤቱ ደንበኞች ወደ www.mor.gov.et. በመግባት እና የኤሌክትሮኒክ ታክስ አገልግሎት የሚለውን በመመምረጥ፣ አስፈላጊውን ሂደት ሲጨርሱ ከገቢዎች ሚኒስቴር የሚሰጣቸውን የሰነድ ቁጥር በመጠቀም በቀላሉ ክፍያቸውን በቴሌብር አፕሊኬሽን መፈጸም ይችላሉ።

- በአጭር ቁጥር *127# በመጠቀም የግብር ክፍያ የሚለውን በመምረጥ ክፍያ መፈፀም ይቻላል።

- ደንበኞች የክፍያ ደረሰኝ ወዲያውኑ በኢ-ሜል አድራሻቸው ማግኘት ይቻሉ።

Credit : አዲስ ማለዳ
Photo Credit : የገቢዎች ሚኒስቴር

@tikvahethiopia

#Update

" ተፈታኞች የቅሬታቸውን ምላሽ ከዛሬ 12፡00 ሰዓት ጀምሮ ማየት ይችላሉ " - የትምህርት ምዘናና ፈተናዎች አገልግሎት

የ2014 ትምህርት ዘመን የ12ኛ ክፍል ተፈታኞች ቅሬታ ማቅረቢያ ጊዜ ነገ አርብ ጥር 26/2015 ዓ.ም ከቀኑ 11፡30 ሰዓት እንደሚያበቃ የትምህርት ምዘናና ፈተናዎች አገልግሎት አስታውቋል።

አገልግሎቱ ፤ ቅሬታ ያላቸው ተፈታኞች ቅሬታ ማቅረቢያው ቀን ነገ 11:30 እንደሚያበቃ አውቀው በተጠቀሰው የጊዜ ገደብ ውስጥ አለን የሚሉትን ቅሬታ እንዲያቀርቡ መልዕክት አስተላልፏል።

በሌላ በኩል ፤ ቀድመው ቅሬታ ያቀረቡ ተፈታኞች የቅሬታቸውን መልስ www.neaea.gov.et:8081 ድረ ገጽ ላይ የመለያ ቁጥራቸውን (Registration Number/ID) ብቻ በማስገባት ከዛሬ 12፡00 ሰዓት ጀምሮ ማየት እንደሚችሉ የትምህርት ምዘናና ፈተናዎች አገልግሎት አሳውቋል።

የትምህርት ምዘናና ፈተናዎች አገልግሎት ፤ ቅሬታዎች ሁሉም ተጣርተው ሲጠናቀቁ በቀጣይ ቀናት የሚያሳውቅ መሆኑን ገልጾ የቅሬታ ምላሽ ያልደረሳቸው ተፈታኞች በትዕግስት እንዲትጠባበቁ አሳስቧል።

በተጨማሪ ባልተሟላ ወይም በተሳሳተ ወይም በሌላ ሰው መለያ ቁጥር ያመለከቱ የስም ዝርዝራቸው ዛሬ ከምሽቱ 4፡00 ሰዓት ጀምሮ ከላይ በተጠቀሰው ድረ ገጽ አድራሻ ላይ እንደሚያሳውቅ የገለፀው አገልግሎቱ ተፈታኞች ቅሬታቸውን በድጋሚ በተስተካከለ መለያ ቁጥራቸው ማመልከት እንደሚችሉ ገልጿል።

@tikvahethiopia

#DigitalLottery

አድማስ ዲጂታል ሎተሪ ዛሬ ጥር 25 ቀን 2015 በብሄራዊ ሎተሪ የዕጣ ማውጫ አዳራሽ በህዝብ ፊት ወጥቷል።

1.5 ሚሊዮን ብር ባለዕድለኛ የሚያደርገው የዕጣ ቁጥር 007235088931 ሆኖ ወጥቷል።

👉 1.5 ሚሊዮን ብር - 007235088931
👉 800 ሺህ ብር - 007311229183
👉 350 ሺህ ብር - 007308618207
👉 200 ሺህ ብር - 007209120515
👉 160 ሺህ ብር - 007304282769
👉 120 ሺህ ብር - 007293769171

(ተጨማሪ የዕጣ ቁጥሮች ከላይ ተያይዘዋል)

ምንጭ፦ የብሔራዊ ሎተሪ አስተዳደር

@tikvahethiopia

#Update

የኢትዮጵያ ኦርቶዶክስ ተዋሕዶ ቤተክርስቲያን ቅዱስ ሲኖዶስ ጾመ ነነዌን በማስመልከት ጾምና ጸሎት አወጀ።

ቅዱስ ሲኖዶስ አዋጁን ያስተላለፈው ዛሬ ከደቂቃዎች በፊት በሰጠው መግለጫ ነው።

ቅዱስ ሲኖዶስ ፤ በቤተክርስቲያኗ በተከሰተው ሃይማኖታዊ፣ ቀኖናዊና አስተዳደራዊ መዋቅሮች በጣሰ ሁኔታ መፈንቅለ ሲኖዶስ በማድረግ በሕገወጥ መንገድ ኤጲስ ቆጶስነት ሢመት በሰጡትና በተሾመ ግለሰቦች ላይ ጥር 18 ቃለ ውግዘት ታላልፎ እንደነበር ገልጿል።

" ይሁን እንጂ እነዚህ ሕገወጥ ቡድኖች ከድርጊታቸው ሊታቀቡ አልቻሉም " ያለው ቅዱስ ሲኖዶስ ፤ ከዚህም በላይ በመንግሥት ኃይሎች በመታገዝ  የኢትዮጵያ ኦርቶዶክስ ተዋሕዶ ቤተ ክርስቲያን የምታስተዳድራቸውን መንበረ ጵጵስናዎችንና ቢሮዎችን በኃይል በመውረርና በመስበር ከፍተኛ ጥፋት እያደረጉ ነው ብሏል።

እንዲሁም የአህጉረ ስብከት ሥራ አስኪያጆችን ፣ ሠራተኞች ካህናትና ምእመናን በማሰርና በማንገላታት ላይ ይገኛሉ ሲል ገልጿል።

ቅዱስ ሲኖዶስ ፤ መንግሥት ሕግ ከማስከበር ይልቅ ለሕገ ወጥ ቡድኖች ድጋፍ በመስጠት የቤተ ክርስቲያኒቱን ሕግና መብት ሊያስከብር አልቻለም ያለ ሲሆን " ሁሉን ማድረግ ወደሚቻለው አምላካችን በመማፀን ጸሎትና ምሕላ ማድረጉ አስፈላጊ መሆኑን ተረድተናል " ሲል አሳውቋል።

በዚህም " ጾመ ነነዌን ምክንያት በማድረግ በመላው ዓለም የሚገኙ ሕዝበ ክርስቲያን #ጥቁር_ልብስ ብቻ በመልበስ በጾምና በጸሎት ምሕላ በመያዝ በቤተ ክርስቲያን ዓውደ ምሕረት በመገኘት ወደ እግዚአብሔር ጾም፤ ጸሎትና ምሕላ እንድታቀርቡ " ሲል ቅዱስ ሲኖዶስ ጥሪ አስተላልፏል።

" ጥቁር ልብስ  የምንለብሰው በመከራ መጽናት ለመግለጽ ነው " ሲልም አክሏል።

(ቅዱስ ሲኖዶስ ያወጣው መግለጫ ከላይ ተያይዟል)

@tikvahethiopia

#ማስታወሻ

የ2014 ትምህርት ዘመን የ12ኛ ክፍል ተፈታኞች ቅሬታ ማቅረቢያ ጊዜ ዛሬ አርብ ጥር 26/2015 ዓ.ም ከቀኑ 11፡30 ሰዓት ያበቃል።

@tikvahethiopia

#SomaliRegion

የሶማሊ ክልል ስራ አስፈፃሚ ኮሚቴ ፤ የሶማሊኛ ቋንቋን ያሳድጋል ፤ ይጠብቃል የተባለውን በሶማሊኛ የተዘጋጁ የወራት ስያሜዎች ስራ ላይ እንዲውሉ ወስኗል።

የክልሉና ሌሎች ባለሞያዎች በሶማለኛ የወር ስያሜዎች ላይ ያካሄዷቸው ጥናቶች ላይ ትላንት ውይይት ተካሂዶ ነበር።

በውይይቱ ላይ ባለሞያዎቹ በሶማሊኛ ቋንቋ በቀን ፤ በወርና በአመት ላይ የተከናወነውን ጥናት የሚያሳይ ጥናታዊ ጽሑፍ አቅርበዋል።

የክልሉ የስራ አስፈፃሚ ኮሚቴ ፤ በሶማሊኛ ቋንቋ የተዘጋጀው የወራት ስያሜዎችን እንዳደነቀና ይህም የሶማለኛ ቋንቋን ለማሳደግና ለመጠበቅ ጠቀሜታ እንዳለው መግለፁ ተመላክቷል።

የስራ አስፈፃሚ ኮሚቴው ከታች የተዘረዘሩትን የሶማሊኛ ቋንቋ የወር ስያሜዎች ከትላንት ጀምሮ የክልሉ መንግስት ስራ ላይ እንዲውል ውሳኔ አሳልፏል።

1. ኮድሂን / መስከረም / September
2. ዲሪር / ጥቀምት / October
3. ጉድባ / ህዳር / November
4. ሆሬይ / ታህሳስ / December
5. ደርበለይ / ጥር / January
6. አሪር / የካቲት / February
7. ኡር / መጋቢት / March
8. ዱጋቶ / ሚያዚያ / April
9. ሚአድ / ግንቦት / May
10. አጋሊ / ሰኔ / June
11. አፍጋል / ሀምሌ / July
12. ነፍ / ነሀሴ / August

#SRTVAmharic

@tikvahethiopia

#Tigray

በትግራይ ጦርነት ምክንያት ክፉኛ ከተጎዱት መካከል #ተማሪዎች ዋነኛዎቹ እንደሆኑ ይታወቃል።

በጦርነት ምክንያት በክልሉ ያሉት ተማሪዎች ለበርካታ ወራት ከትምህርት ርቀው ይገኛሉ።

የሰላም ስምምነት ከተደረሰ በኃላም ተማሪዎችን በፍጥነት ወደ ቀደመው የትምህርት ህይወታቸው እንዲመለሱ የማድረጉ እንቅስቃሴ እጅግ በጣም ዘግይቷል።

ከሰሞኑን የክልሉ ትምህርት ቢሮ መደበኛ ትምህርት እስኪጀመር #በሬድዮ እና #ቴሌቪዥን ትምህርት እንዲጀመር ለማድረግ ዝግጅት ማጠናቀቁን ስለማሳወቁ ከድምፂ ወያነ ቴሌቪዥን ያገኘነው መረጃ ያመለክታል።

ቅድሚያ ትንንሽ ህፃናት ላይ ትኩረት እንዳደረገ የገለፀው ቢሮው ይህም በአቅም ውስንነት እና በጀት ስለሌለው መሆኑን አመልክቷል። በሚዲያ ትምህርቱን ከመዋለህፃናት እስከ 4ኛ ክፍል ላሉ ተማሪዎች እንደሚሰጥ ገልጿል።

የሬድዮ ትምህርት በድምፂ ወያነ፣ የቴሌቪዥን ትምህርት በትግራይ ቴሌቪዥን ይተላለፋል ተብሏል።

ትምህርቱ ፤ የትግራይ ህፃናት በጦርነት ከደረሰባቸው ጫና እንዲወጡ ለማድረግና ለመደበኛው ትምህርት እንዲዘጋጁ የሚያደርግ እንጂ ከክፍል ወደ ክፍል የሚያሻግራቸው እንዳልሆነ የክልሉ ትምህርት ቢሮ ገልጿል።

የክልሉ ትምህርት ቢሮ በሬድዮ እና ቴሌቪዥን የሚተላለፈውን ትምህርት በተመለከተ በሰጠው ማብራሪያ ፤ ከአንደኛ እስከ አራተኛ ክፍል በሬድዮ የሚሰጠው ትምህርት ትግርኛ ፣ እንግሊዘኛ እና አካባቢ ሳይንስ ሲሆን በቴሌቪዥን ሒሳብን እንደሚያካትት አሳውቋል።

@tikvahethiopia

#AddisAbaba

የሀገራችን እና የመላው አፍሪካ መዲና አዲስ አበባ በቅርቡ የአፍሪካ ህብረት የመሪዎች ጉባኤን ታስተናግዳለች።

በቅርቡ የሚካሄደው 36ኛው የመሪዎች ጉባኤ እና 42ኛው የህብረቱ የስራ አስፈፃሚዎች ጉባኤ ሲሆን በሰላም ተጀምሮ እንዲጠናቀቅ ዝግጅቶች እየተደረጉ መሆኑ ተሰምቷል።

የዘንድሮው የህብረቱ ስብሰባ የንግድ ግንኙነት እና ኢኮሮሚያዊ ጉዳዮች ላይ ይመክራል።

ይኸው ጉባኤ የሰሜን ኢትዮጵያ ጦርነት በሰላም መቋጫ እንዲያገኝ ከተደረገ በኃላ በአዲስ አበባ የሚካሄድ መሆኑን ተከትሎ በቱሪዝሙ ዘርፍ እየታየ የመጣውን ከፍተኛ መነቃቃት ያሳድገዋል ተብሎ ይታመናል።

በአዲስ አበባ የሚገኙ ሆቴሎች ወደ ኢትዮጵያ የሚመጡ እንግዶችን በኢትዮጵያዊ ጨዋነትና በመልካም መስተንግዶ ለመቀበል ዝግጅታቸውን ማጠናቀቃቸውን እያሳውቁ ይገኛሉ።

Photo Credit ፦ Abel Gashaw

@tikvahethiopia