ወላጆች ልጆቻችሁን ጠብቁ !

ትላንት በአዲስ አበባ ከተማ ፤ ንፋስ ስልክ ላፍቶ ዋና እንዋኛለን ብለው ወንዝ ውስጥ ከገቡ 2 ልጆች የአንዱ ህይወት ማለፉን የአዲስ አበባ እሳት እና አደጋ ስጋት አመራር ኮሚሽን ገልጿል።

ህይወቱ ያለፈው የ12 ዓመት ታዳጊ መሆኑ ተነግሯል።

የኮሚሽኑ የህዝብ ግንኙነት ባለሞያ አቶ ንጋቱ ማሞ " .. ወረዳ አንድ ለቡ አርሴማ አካባቢ ነው በአንድ ወንዝ ውስጥ እድሜያቸው የ8 እና የ12 ዓመት ታዳጊዎች ዋና ለመዋኘት በሚል ነው ወንዝ ውስጥ ገብተው ዋና ሲዋኙ የ12 ዓመት ታዳጊው ህይወቱ አልፏል።

የ8 ዓመቱ ታዳጊ በአካባቢው የነበሩ የህብረተሰብ ክፍሎች ተረባርበው እሱን ከነህይወቱ አውጥተውታል።

ጥሪው ለኛ ቢመጣም እኛ ከመድረሳችን በፊት ህይወቱ የተረፈውን የ8 ዓመት ታዳጊ እና የሞተውን ልጅ የአካባቢው ህብረተሰብ አውጥተውታል " ሲሉ ሁኔታውን አስረድተዋል።

በዚህ ወር ብቻ ዋና ለመዋኘት በሚል ወንዝ ከገቡት 3 ልጆች ህይወታቸው አልፏል።

የአዲስ አበባ እሳት እና አደጋ ስጋት አመራር ኮሚሽን ፤ ወላጆች አሁን ትምህርት ቤት የሚዘጋበት ወቅት በመሆኑ ታዳጊዎች ወደ ወንዝ እንዳይሄዱ ማድረግ በከተማው ያሉ ገደላማ እና ውሃ የሚያቁሩ ቦታዎችን መከለያ በማበጀት ልጆችን ከአደጋ መጠበቅ ይገባል ሲል ማሳሰቡን ሸገር ኤፍ ኤም 102.1 ሬድዮ ጣቢያ ዘግቧል።

@tikvahethiopia

" ከሟቾች መካከል ሴቶች እና ህፃናት ይገኙበታል " - የቲክቫህ አባል

ዛሬ በቄለም ወለጋ ለምለም ቀበሌ በተፈፀመ ጥቃት በርካታ ሰዎች ተጨፍጭፈዋል።

እሱና ቤተሰቦቹ በአካባቢው ነዋሪ የሆኑ የቲክቫህ አባል ዛሬ የተፈፀመው ጭፍጨፋ እጅግ በጣም አሳዛኝ እንደነበር ገልፆ በርካታ ሰው ተገድላል፤ ሴቶች እና ህፃናትም ይገኙበታል ብሏል።

በአካባቢው ኔትዎርክ ይሰራ ነበር አሁን ላይ እየሰራ አይደለም ቤተሰቦቼ ቦታው ላይ ነበሩ አምልጠው ማቻራ የምትባል አካባቢ ገብተዋል ፤ ሲል ገልጿል።

ጥቃቱን እስካሁን የኢትዮጵያው ጠቅላይ ሚኒስትር አረጋግጠዋል ፤ " ጨፍጫፊዎቹ የሸኔ ቡድን " ናቸው ብለዋል።

ጠ/ሚ ዶ/ር ዐቢይ አህመድ ፤ " የጸጥታ አካላት ከሚያደርሱበት ዱላ የፈረጠጠው የሸኔ ቡድን በምዕራብ ወለጋ በዜጎች ላይ አደጋ እያደረሰ በመሸሽ ላይ ነው " ብለዋል።

" በኦሮሚያ ክልል፣ ቄለም ወለጋ ውስጥ የሚገኙ ዜጎች ጭፍጨፋ ተፈጽሞባቸዋል " ሲሉ ፅፈዋል።

" በዜጎቻችን ላይ በደረሰው መከራ እያዘንን ይሄንን አሸባሪ ቡድን እስከመጨረሻው ተከታትለን ከህዝባችን ጋር እናስወግደዋለን። " ሲሉም አክለዋል።

ከጥቂት ቀናት በፊት በምዕራብ ወለጋ ቶሌ ቀበሌ መንግስት በይፋ ባመነው ብቻ ከ300 በላይ ሰዎች መጨፍጨፋቸው ይታወሳል። በወቅቱ ተገድለው የተቀበሩ በአንድ አካባቢ ብቻ እስከ 600 እንደሚደርስ ቤተስቦቻቸው እዛው ያሉ የቲክቫህ አባላት መናገራቸው አይዘነጋም። አንዳድን ተቋማት ቁጥሩን ከዚህም ከፍ ያደርጉታል።

አሁንም ንፁሃን ፣ ምንም ስለፖለቲካ የማያውቁ ህፃናት፣ ሴቶች እየተገደሉ ሲሆን ከቀናት በፊት የነበረው የንፁሃን ጭፍጨፋ ሰሞነኛ አጀንዳ ሆኖ አልፎ ነበር።

በድጋሚ የመንግስት ተቀዳሚው ተግባሩ የዜጎችን ደህንነት ማስጠበቅ በመሆኑ ለንፁሃን ዜጎች ጥበቃ ሊደረግ ይገባል።

@tikvahethiopia

" በትንሹ 150 ሰዎች ተገድለዋል "

ቢቢሲ አፍሪካ ዛሬ ማምሻውን ይዞት በወጣው ዘገባ በኦሮሚያ ክልል፣ ሀዋ ገለን ወረዳ በተፈፀመው ጥቃት በትንሹ 150 ሰዎች መገደላቸውን ገልጿል።

ቢቢሲ አፍሪካ ፤ የአይን እማኞች ጥቃቱ በሀዋ ገላን ወረዳ መፈፀሙን እንደገለፁለትና በአካባቢው ላይ በሚኖሩ የአማራ ተወላጆች ላይ ያነጣጠረ እንደነበር አክሏል።

@tikvahethiopia