#ኢዜማ

የኢዜማ የአመራሮች ምርጫ ውጤት እስካሁን (ምሽት 4:18 ድረስ) ይፋ ያልሆነ ሲሆን ፓርቲው ቆጠራው እንደተጠናቀቀ ይፋ እንደሚያደርግ አሳውቋል።

የጉባኤው አባላት የአመራሮችን ምርጫ ውጤት እየተጠባበቁ ይገኛሉ።

ተከታትለን እናሳውቃለን !

@tikvahethiopia

#NewsAlert #ኢዜማ

ፕሮፌሰር ብርሃኑ መሪ ፤ አርክቴክት ዮሐንስ ደግሞ ምክትል መሪ ሆነው ተመረጡ።

የኢትዮጵያ ዜጎች ለማኅበራዊ ፍትህ ፓርቲ (ኢዜማ) አንደኛ መደበኛ ጠቅላላ ጉባኤ ዛሬ ሰኔ 26 ቀን 2014 ዓ.ም ባደረገው ምርጫ ፕ/ር ብርሀኑ ነጋን እና አርክቴክት ዮሐንስ መኮንንን የኢዜማ #መሪ እና #ምክትል_መሪ አድርጎ መርጧል፡፡

በጉባኤው ላይ ወደ 900 ገደማ የፓርቲው አባላት ያተሳተፉ ሲሆን ፕሮፌሰር ብርሃኑ ነጋ 549 ድምፅ ማግኘታቸው ተገልጿል።

ከፕ/ር ብርሃኑ ነጋ ጋር ለመሪነት የተወዳደሩት አቶ አንዱአለም አራጌ 326 ድምፅ ነው ያገኙት። አቶ አንዱአለም ከፓርቲው ምስረታ አንስቶ የፓርቲው ምክትል መሪ ሆነው ቆይተዋል።

ለምክትል መሪነት የተወዳደሩት አርክቴክት ዮሐንስ መኮንን በጉባኤው የተመረጡ ሲሆን ለቦታው በተፎካካሪነት ቀርበው የነበሩት አቶ ሀብታሙ ኪታባ ነበሩ።

@tivahethiopia

#አብን #ኢዜማ

የኢትዮጵያ ዜጎች ለማኀበራዊ ፍትህ ፓርቲ (ኢዜማ) እና የአማራ ብሔራዊ ንቅናቄ (አብን) በሀገራዊ ወቅታዊ የፖለቲካ ጉዳዮች ላይ የመጀመሪያ ዙር ገንቢ ውይይት ማድረጋቸውን በማህበራዊ ትስስር ገፆቻቸው ላይ አስታውቀዋል።

በቀጣይም #በሚያግባቡ_ሀገራዊ_ጉዳዮች ላይ ውይይቶችን ለማድረግና #የጋራ_አቋም ለመያዝ ከስምምነት ላይ መደረሳቸውንም ገልፀዋል።

ሁለቱ ፓርቲዎች የ " ህዝባዊ ወያነ ሓርነት ትግራይ / ህወሓት " ን ከሽብርተኝነት መዝገብ መሰረዝን በቅድሚያ የተቃወሙ ፓርቲዎች ናቸው።

ፓርቲዎቹ ተቃውሟቸውን በየተናጠል ባወጡት በመግለጫ አሳውቀዋል።

ይህ ከተሰማ ከሰዓታት በኃላ ነው ሁለቱ ፓርቲዎች በሚያግባቡ ሀገራዊ ጉዳዮች ላይ ውይይቶችን ለማድረግና የጋራ አቋም ለመያዝ ከስምምነት ላይ እንደደረሱ የተነገረው።

@tikvahethiopia

#ኢዜማ

ጉምቱው ፖለቲከኛ ከፓርቲያቸው ለቀቁ።

የኢትዮጵያ ዜጎች ለማህበራዊ ፍትህ ፓርቲ (ኢዜማ) መስራቾች አንዱ የሆኑት ጉምቱው ፖለቲከኛ አቶ አንዱዓለም አራጌ ከፓርቲው መልቀቃቸውን አስታውቀዋል።

የመልቀቂያ ደብዳቤው በትላንትናው እለት ለሚመለከተው አካል ገቢ ማድረጋቸውንም ገልጸዋል።

አቶ አንዱዓለም አራጌ ፓርቲውን ለምን ለቀቁ ? የመልቀቂያ ደብዳቤያቸው ላይ በዝርዝር አስረድተዋል ፤ ከላይ ተያይዟል ያንብቡት !

ምንጭ፦ የተረጋገጠው የማህበራዊ ትስድር ገፃቸው

@tikvahethiopia

#ኢዜማ

የኢትዮጵያ ዜጎች ለማህበራዊ ፍትህ ፓርቲ በላከው መግለጫ ፤ የመገናኛ ብዙኀን ባለሥልጣን በማህበረ ቅዱሳን ቴሌቪዥን ላይ ያሳለፈው የእግድ ውሳኔ ህጋዊ ግዴታውን የጣሰ ነው ሲል ገልጿል።

ኢዜማ ፤ " የኢትዮጵያ መገናኛ ብዙኀን ባለሥልጣን ከተልዕኳቸው ውጪ የገዢው ፓርቲ ልሳን ሆነው የህዝብን በደል እና የመንግሥትን ብልሹ አሰራር ጆሯቸውን ደፍነው ዘወትር የውዳሴ ዘገባ ለገዢው ፓርቲ እና መንግሥት በማቅረብ ለተጠመዱት የህዝብ መገናኛ ብዙኋን ምንም አይነት #ተግሳጽ እንኳ ሳያቀርብ ባለፈው እሁድ ግንቦት 13/2015 ዓ.ም ለማኅበረ ቅዱሳን ብሮድካስት አገልግሎት በፃፈው የእግድ ደብዳቤ ብሮድካስት ባለፍቃዱን በጊዜያዊነት ማገዱን ገልጿል " ብሏል።

" ይህ የእግድ ውሳኔ ምክንያቱ ሕጋዊ ሆነም አልሆነ በመገናኛ ብዙኀን ባለሥልጣኑ በአዋጅ ቁጥር 1238/2021 አንቀጽ 73 ፣ 76 እና 81(2) የተጠቀሱትን በቅድሚያ #ማስጠንቀቂያ የመስጠትም ሆነ የሚዲያ ተቋሙ #ራሱን_እንዲከላከል ቀድሞ እድል የመስጠት ሕጋዊ ግዴታውን የጣሰ ነው " ሲል ኢዜማ ገልጿል።

" ተቋማት የሚወስዷቸው እርምጃዎች በእርግጥም ሕግን ከማስከበር መነሻነት ይልቅ በማን አለብኝነት ድርጅታዊ ፍላጎትን ብቻ ታሳቢ ያደረገ ነው " ያለው ኢዜማ የመገናኛ ብዙኀን ባለሥልጣን በማኅበረ ቅዱሳን ብሮድካስት አገልግሎት ላይ የወሰደው እርምጃ ይህን በግልፅ ያስረዳል ብሏል።

ተቋማት ከእንደዚህ አይነት ወጥነትና ገለልተኝነት የጎደለው ተግባር በአስቸኳይ እንዲወጡም አሳስቧል።

ፓርቲው ፦

- የመገናኛ ብዙኀንን ጨምሮ ገለልተኛ ሊሆኑ የሚገባቸው ተቋማት ከገዢው ፓርቲ አባላት ተጽዕኖ ነፃ ማውጣት፤

- የመንግሥት እና የፓርቲ አሠራር የተለያዩ መሆናቸውን በሕግም በተግባርም ማረጋገጥ፤

- የሚወሰዱ እርምጃዎች ሕግ እና ሕግ ላይ ብቻ መሠረት ያደረጉ ብቻ ሊሆኑ ይገባል ብሏል።

ኢዜማ ፤ የመገናኛ ብዙኀን ባለሥልጣን የወሰደው እርምጃ " በአዋጅ ከተሰጠው ሥልጣን ወሰን ተላልፎ የወሰደው " ነው ያለ ሲሆን ፓርቲው ሕገ ወጥ ነው ያለው ውሳኔ እንዲሽር፤ ባለስልጣኑ ይህን ውሳኔ ያሳለፉትን አካላት ተጠያቂ በማድረግ ለሕዝብ እንዲያሳውቅ ጥሪ አቅርቧል።

(ሙሉ መግለጫው ከላይ ተያይዟል)

@tikvahethiopia

#ኢዜማ

ከኢትዮጵያ ዜጎች ለማህበራዊ ፍትህ ፓርቲ  / ኢዜማ  መስራቾች መካከል የሆኑት የፓርቲው አባላት በገዛ ፍቃዳቸው ከፓርቲው አባልነት ለቀቁ።

ፓርቲውን በገዛ ፍቃዳቸው የለቀቁት ፦
- አቶ የሽዋስ አሰፋ
- ወ/ሮ ናንሲ ውድነህ
- አቶ ሀብታሙ ኪታባ
- አቶ የጁአልጋው ጀመረ
- አቶ ተክሌ በቀለ
- አቶ ኑሪ ሙደሲር               
- አቶ ዳንኤል ሺበሺ ናቸው።

ለምን ከኢዜማ ለቀቁ ?

በመሠረቱት ኢዜማ ፓርቲ ውስጥ በአንዳንዶች መሀል መጠነኛ የአቋም ልዩነት እንደነበር ገልጸዋል።

ይህ ልዩነት ግን በሂደት በውይይት እና በስራ እየጠበበ እና እየተስተካከለ ይሄዳል በሚል እሳቤ አብረው መጓዣቸውን አመልክተዋል።

የኃላ ኃላ ግን የአቋም ልዩነቱ ላይ የአካሄድም ልዩነት ተጨምሮበት ትግሉ መስመር ስቶ ከፍተኛ በሆነ በውስጠ ፓርቲ ትግል  ተጠልፈው ለመዎየት መገደዳቸውን ገልጸዋል።

" የኢትዮጵያ አሁን ሕዝብ በታሪኩ ገጥሞት የማያውቅ እዚህ መከራ ውስጥ ከመግባቱ በፊት መንገዳችንን እንድናስተካክል በፓርቲው ውስጥም በብዙ ታግለናል፡፡  " ያሉት እኚህ የፓርቲው አባላት " ስህተቶች ይታረሙ ይሆናል በማለት የትግሉን መድረክ ለማስፋት ብንሞክርም በተለያዩ ውስጣዊ እና ውጫዊ ምክንያቶች ማሳካት አልተቻለም " ብለዋል።

ኢዜማን ጠግኖ ለማዳን ያደረግነው ትግልም ከንቱ ቀርቷል ሲሉ አሳውቀዋል።

የኢዜማ ከፍተኛ አመራር ሀገርን ለመታደግ ሕዝብንና ፓርቲዎችን አስተባብሮ ከማታገል ይልቅ አገዛዙ እየፈፀመ ላለው ሀገር አቀፍ ግፍ ድጋፍ እየሰጠ ይገኛል ሲሉ ወቅሰዋል።

" ለዚህ ሥርዓት ምሶሶ እና ማገር ሆኖ በማገልገል የአንድነት ኃይሉን አቅም አላባ በማድረግ ከፍተኛ ሚና እየተጫወተ ለመሆኑ የአባላት ብቻ ሳይሆን የሕዝብም ቅሬታ ሆኖ በመሰማት ላይ ይገኛል " ያሉት የፓርቲው አባላት " ይህም ኢዜማ ከቆመላቸው መሠረታዊ አላማዎች፤ መርሆች እና እሴቶች በመውጣት የገዢውን ቡድን እሴቶች እና አላማዎች እያራመደ እንደሆነ ግልፅ ሆኗል " ብለዋል።

በዚህም ፤ ኢዜማ የተለየ ቁመና የሌለውና ተክለ ሰውነቱም ሆነ ህልውናው በየዕለቱ ለትውልድ የሚተላለፍ ጠባሳዎችን ጥሎ ከሚያልፈው አገዛዝ የተለየ እንዳይመስል ተደርጎ እየተሠራ እንደነበር ግልጽ ሆኗል ሲሉ አሳውቀዋል።

በዚህና በሌሎች በርካታ ምክንያቶች ፓርቲውን ማዳን በማይቻልበት ሁኔታ ላይ በመደረሱ ፤ እንዲሁም " አስፈላጊ ሆኖ ሲገኝ በሂደት በምንገልጻቸው በርካታ ምክንያቶች " ፓርቲውን ወደ ሃዲዱ ለመመለስ ያደረግነው ትግል ግቡን ስላልመታ ራሳችንን ከኢዜማ አባልነት አግልለናል ብለዋል።

(ሙሉ መልዕክታቸው ከላይ ተያይዟል)

NB. ከዚህ ቀደም ጉምቱው ፖለቲከኛ እና ከኢዜማ መስራቾች አንዱ አቶ አንዱዓለም አራጌ ኢዜማን በገዛ ፍቃዳቸው መልቀቃቸው ይታወሳል።

@tikvahethiopia

#ኢዜማ

የኢትዮጵያ ዜጎች ለማህበራዊ ፍትህ ፓርቲ (ኢዜማ) አንድ ዓመት የሞላውን የፕሪቶሪያው የሰላም ስምምነት አስመልክቶ ለቲክቫህ ኢትዮጵያ በላከው መግለጫ ፤ የፕሪቶሪያው ስምምነት ለሁለት ዓመታት የቆየው እና ከፍተኛ ሰብአዊና ቁሳዊ ውድመት ያስከተለው ጦርነት እንዲቆም እንዲሁም እንደገና የሰላም ተስፋ እንድንሰንቅ ማድረጉ በበጎ ጎኑ እናስታውሰዋለን ብሏል።

ፓርቲው ፤ ምንጊዜም ችግሮችን በሰላማዊ መንገድ ለመፍታት የሚደረግ ጥረትን እንደሚያበረታታ ገልጾ ሥምምነቱን መልካም ጅማሮ እንደሆነ ገልጿል።

መንግሥት ከዚህ ቀደም ቅራኔዎችን በውይይት ለመፍታት ከተለያዩ ታጣቂ ቡድኖች ጋር ካደረጋቸው ስምምነቶችና የውይይት ሙከራዎች በተሻለ መልኩ የፕሪቶሪያው ስምምነት ለሕዝብ በይፋ የተገለጸ መሆኑ መልካም የሚባል ጅማሮ እንደሆነ አመልክቷል።

" ነገር ግን አፈጻጸሙ ላይ በመንግሥት በኩል በታየ ዳተኝነት እና ግልጸኝነት መጉደል እንደ፦
🔹ሥምምነቱ መፈጸም አለመፈፀሙን፣
🔹ከስምምነቱ ጋር ተያይዞ የተገኙ ውጤቶችና ያጋጠሙ ተግዳሮቶችን የተመለከቱ ጉዳዮችን የሚያመላክቱ መረጃዎች በአግባቡ ሲቀርቡ አለመመልከታችን፤
🔹በተለያየ ጊዜ የሕወሓት አመራሮች በተለያዩ መድረኮች ላይ የሚያሰሙት ግጭት ቆስቋሽ እና ተጨማሪ ውጥረቶችን የሚያጭሩ ገለፃዎችን መንግሥት ዐይቶ እንዳላየ በዝምታ ማለፉንና ማብራሪያ አለመስጠቱ ስንመለከት ሥምምነቱ በተባለው መልኩ ከመፈጸም ይልቅ ' በተቃራኒው እየሄደ ይሆን? ' የሚያስብል ስጋት ውስጥ ይጥላል " ብሏል ፓርቲው።

" ይህ የመንግሥት ቸልተኝነት እና በተለያየ ጊዜ የሚሰጡ ምክረ ሀሳቦችን አልሰማ ባይነት ለሌሎች ችግሮችም ሆነ አሁን በአማራ ክልል ለተፈጠረው የሰላም መደፍረስ ድርሻው ቀላል የሚባል ካለመሆኑ በተጨማሪ በክልሉ ላይ ለተፈጠረው ችግር ምክንያትነት ተብለው ከሚጠቀሱት ጉዳዮች መካከል ቀዳሚው ነው ቢባል ስህተት አይሆንም " ሲል ገልጿል።

ኢዜማ ከዚህ ቀደምም በተደጋጋሚ አሳስቢያለሁ እንዳለው መንግሥት ከስምምነቱ ጋር የተያያዙ መረጃዎችን በተገቢው ወቅትና ሁኔታ ለሕዝብ የማድረስ ከፍተኛ ድክመቱን አርሞ የዚህን ሥምምነት የአፈጻጸም ሂደት ምን ደረጃ ላይ እንደሚገኝ እና የገጠሙ ችግሮች ካሉም በይፋ ለሕዝብ እንዲያሳውቅ ጠይቋል።

(ፓርቲው የላከው መግለጫ ከላይ ተያይዟል)

@tikvahethiopia

#ኢዜማ

የኢትዮጵያ ዜጎች ለማህበራዊ ፍትህ ፓርቲ (ኢዜማ) ፤ የደቡብ ኢትዮጵያ ክልል ም/ቤት የህዝብ ተወካይ አባሉ ህግ ተጥሶ እንደታሰሩበት ገለጸ።

ፓርቲው አባሉ በአስቸኳይ ከእስር እንዲፈቱ ጠይቋል።

ኢዜማ ፤ በ2013 ዓ.ም በተደረገው 6ኛ ሀገር አቀፉ ምርጫ #ካሸነፈባቸው የምርጫ ክልሎች መካከል አንዱ በሆነው " ዛይሴ ልዩ ምርጫ ክልል " በሚገኙ አባላት ላይ በተለያየ ጊዜ ልዮ ልዮ ጥቃቶች እየደረሱ እንደሆነ አመልክቷል።

ፓርቲው በጋሞ ዞን የሚገኙ የመንግሥት አካላት ፦
- ከሕግ አግባብ ውጪ የሚፈጽሟቸውን ተግባራት እንዲያቆሙ፣
- በእነዚህ ድርጊቶች የተሣተፉ አካላት ተጠያቂ እንዲሆኑ፣ 
- ያለአግባብ የታሠሩ አባሎቹ እንዲፈቱና አስፈላጊው ካሣ እንዲፈጸምላቸው በተደጋጋሚ መጠየቁን ገልጾ ፤ የዞኑ አመራሮች ግን ከዚህ ተግባራቸው ለመቆጠብ ምንም አይነት ተነሣሽነት የሌላቸው መሆኑን እና ህገወጥ ድርጊቱም ተባብሶ መቀጠሉን  አረጋግጠናል ብሏል።

በዚህም የዛይሴ ልዩ ምርጫ ክልል የቀድሞው የደቡብ ብ/ብ/ክልል የአሁኑ የደቡብ ኢትዮጵያ ክልል ም/ቤት ተወካይ እና የኢዜማ አባል የሆኑት አቶ አማንያስ ጉሹና መታሰራቸውን አሳውቋል።

እስሩ " በኢፌድሪ ሕገመንግስት አንቀጽ 54(6) የተጠቅሰውን ድንጋጌ የተላለፈ ነው  " ያለው ፓርቲው " ወንጀል ሲፈጽሙ እጅ ከፍንጅ ባልተያዙበት እና ያለመከሰስ መብታቸው በም/ቤቱ ባልተነሳበት ሁኔታ ከታህሳስ 09 ጀምሮ በጋሞ ዞን አሰተዳደር ፖሊስ ቁጥጥር ስር ውለው በአርባምንጭ ዙርያ ወረዳ ፖሊስ ጣብያ ይገኛሉ ፤ ፍ/ቤት ያለመቅረባቸውን አረጋግጠናል ብሏል።

ህግ ተስጥሶ የተሳሩት አባሉ እና የደቡብ ኢትዮጵያ ም/ቤት ተወካይ የሆኑት አቶ አማንያስ ጉሹና በአስቸኳይ እንዲፈቱ ጠይቋል።

በሌላ በኩል . . .

የደቡብ ምዕራብ ኢትዮጵያ ዜጎች ለማህበራዊ ፍትህ ፓርቲ ኢዜማ ሰብሳቢ ኢንጂነር መልካሙ ሼጌቶ በፖሊስ ተይዘው መታሠራቸውን ፓርቲው አሳውቋል።

የክልሉ የፖርቲው ምክትል ሰብሳቢ አቶ አስቻለው ገ/ሚካኤል ለዶቼ ቨለ ሬድዮ በሰጡት ቃል ፤ ኢንጂነር መልካሙ በከፋ ዞን ፖሊስ አባላት የተያዙት በሥራ ገበታቸው ላይ እንዳሉ መሆኑና ፖሊስ #የፍርድ_ቤት ማስረጃ እንዳላቀረበ ገልጸዋል።

ፓርቲው እስሩን ህግን ያልተከተለ መሆኑ በመግለፅ ለካፋ ዞን ፍትሕ ቢሮ በፃፈው ደብዳቤ የአባሉ ጉዳይ በህግ እንዲታይ ጠይቋል። የተፈፀመውን ተግባራም አውግዟል።

የከፋ ዞን ፖሊስ አዛዥ ኢ/ር መኮንን ገ/መድኅን ሰብሳቢው በማኅበራዊ ትስስር ገጻቸው ባሰራጩት ጹሑፍ ተጠርጥረው መታሰራቸውን አረጋግጠዋል።

" መታሰሩ ትክክል ነው በሶሻል ሚዲያ የተላለፈ ነገር አለ። በዚህ በሶሻል ሚዲያ እርስ በእርሱ ህዝቡን የሚያጋጭ፤ በዚህ ጉዳይ ላይ አንተ ተነስ እከሌ ተነስ  የእከሌ ዘር ብሎ ማስተላለፍ ይሄ የተከለከለ ነው። ይሄንን እያጣራን ስለሆነ በዚህ ጉዳይ ላይ የተጠረጠረ ነው።" ሲሉ ምላሻቸውን ለሬድዮ ጣቢያው ሰጥተዋል።

የፓርቲው የካፋ ዞን ኢዜማ ማስተባበሪያ በበኩሉ ፤ " እኛ እንደ ፖርቲ በግለሰቡ ሶሻል ሚዲያ አካውንት ህዝብን ከህዝብ ብሔርን ከብሔር የሚያጋጭ መልዕክት ፖስት ተደርጎ አላገኝንም " ብሏል።

በ24 ሰዓት ውስጥ  ቃል መስጠት እና በ48 ሰዓት ውስጥ ፍርድ ቤት መቅረብ ሲገባቸው ሁለቱም ሳያደረጉ እስከ አሁን እስር ላይ ይገኛሉ ሲል ገልጿል።

@tikvahethiopia

" የመንግሥት ንብረትና ሐብት ለፓርቲ ሥራ ስለመዋሉ እንዲጣራልኝ ብጠይቀም ምላሽ አላገኘሁም " - ኢዜማ

" የመንግሥት ንብረትና ሐብት ለፓርቲ ሥራ እየዋለ ስለመሆኑ እንዲጣራልኝ ብጠይቀም ምላሽ አላገኘሁም ሲል " የኢትዮጵያ ዜጎች ለማኅበራዊ ፍትሕ (ኢዜማ) አስታወቀ።

ኢዜማ " ብልጽግና ፓርቲ መንግሥትን እና ፓርቲን ባለመለየቱ እሳየ ያለው ቸልተኝነት ዴሞክራሲያዊ ሥርዓት ለመገንባት እንቅፋት ይሆናል " ብሏል፡፡

በተጨማሪ ፓርቲው ለፌደራል ዋና ኦዲተር የመንግሥት ንብረትና ሀብት ለፓርቲ ሥራ መዋሉ በኦዲት እንዲጣራ ቢጠይቅም አጥጋቢ ምላሽ አለማግኘቱን አስታውቋል፡፡

ፓርቲው ባወጣው መግለጫ፤ " ጥቅምት 12 ቀን 2016 ዓ.ም. ለፌደራል ዋና ኦዲተር መስሪያ ቤት የመንግሥት ንብረት እና ሀብት ለፓርቲ ሥራ መዋሉን ጠቅሰን በኦዲት እንዲጣራልን በደብዳቤ የጠየቅን ቢሆንም እስከ አሁን አጥጋቢ ምላሽ አላገኘንም " ሲል ገልጿል።

በተመሳሳይ ጥቅምት 07/2016 ዓ.ም. ለብልፅግና ፓርቲ አባላት ሥልጠና ከመንግሥት ካዝና ገንዘብ ወጥቶ መከፈል ስህተት መሆኑንና ሊታረም እንደሚገባ መግለጹን አስታውሷል።

" ይኼው ተግባር ከተጠናቀቀ ጥቂት ቀናት ባስቆጠረው ያለፈው ዓመት ብልፅግና ፓርቲ ከመንግሥት ንብረት የተለያዩ ተግባራትን እየፈጸመ ነው " ሲል ፓርቲው ገልጿል።

" ብልፅግና ፓርቲ የመንግሥት ሥልጣንን እንደያዘ ፓርቲ እያሳየ ያለው ዳተኝነትም በሀገራችን እውን ሆኖ ማየት ለምንፈልገው የመድብለ ፓርቲ እና የዴሞክራሲ ሥርዓት ግንባታ እንቅፋት መሆኑን በተደጋጋሚ በሚፈፅማቸው ስህተቶች እየተመለከትን ነው " ሲልም ተችቷል፡፡

ይህ ተግባር በአስቸኳይ የእርምት እርምጃ ካልተወሰደ ለሀገር ዴሞከራሲ ግንባታ ወደሚበጅ ትክክለኛ አሠራር እና ልምምድ ካልተመለሰ በስተቀር የሚያመጣው ቀውስ እና ይዞ የሚመጣው መዘዝ ቀላል አይደለም ብሏል።

" የሚመለከታቸው ዴሞክራሲያዊ ተቋማት ሰሞኑን ብልፅግና ፓርቲ ለሥልጠና የተጠቀመበትን ሀብትና ንብረት በትክክል ወደ መንግሥት ካዝና መመለሱን እንዲያረጋግጡ " ሲል ጥሪውን አቅርቧል።

መንግሥትንና የሥራ ኃላፊዎቹን ተጠያቂ ለማድረግ፣ የተቋቋሙ ዴሞክራሲያዊ ተቋማትም በሀገር እና በሕዝብ የተጣለባቸውን ኃላፊነት እንዲወጡና መንግሥትን ተጠያቂ እንዲያደርጉ እንዲሁም የሀገርን ሀብት ከሙስና እና ከምዝበራ እንዲታደጉ ሲል ፓርቲው ጠይቋል። #ኢዜማ #አሀዱ

@tikvahethiopia