#Tigray

የትግራይ ክልል ጊዜያዊ አስተዳደር በትግራይ ክልል የመደፈር ጥቃት የተፈፀመባቸው ሴቶች እና ልጃገረዶች ቁጥር ከ1,400 መብለጡን ገለፀ።

በፌዴራል መንግስቱ የተሾሙት የትግራይ ጊዜያዊ አስተዳደር የፍትህ እና የሴቶች ጉዳይ ቢሮ ኃላፊ ወ/ሮ ኢተነሽ ንጉሰ ፥ ጉዳት ደርሶባቸው ወደ ህክምና ተቋማት የሄዱ ሴቶች እና ልጃገረዶች ቁጥር 1,408 መድረሱን ተናግረዋል።

እንደትግራይ ጊዜያዊ አስተዳደር መረጃ ፦
- በመቐለ 716
- ከዓዲግራት 362
- ከአክሱም 85
- ከሽረ 48
- ከማይጨው 37
- ከመሆኒ 18 የተመዘገቡትን ጨምሮ አጠቃላይ 1,408 ሴቶች እና ልጃገረዶች ተደፍረዋል።

የዓይደር ሆስፒታል ዋና ስቶፕ ሴንተር አስተባባሪ ሲስተር ሙሉ መስፍን ፥ በትግራይ ውስጥ በሴቶች ላይ የሚፈፀመው ጥቃት ከመሻሻል ይልቅ እየተባባሰ መሄዱን አመልክተዋል።

ወደ ዓይደር ሆስፒታል ሄደው ስለታከሙ እና በመታከም ላይ ስለሚገኙ ጉዳተኞች ሲስተር ሙሉ መስፍን ሲገልፁ "ተሻሽሏ የሚባል ነገር የለም" ብለዋል።

በኤርትራም ፤ በኢትዮጵያም ወታደሮች ተደፍረው ፅንስ ለማቋረጥ ወደሆስፒታሉ የሄዱ 238 ሴቶች እና ልጃገረዶች መኖራቸውን ሲስተር ሙሉ ተናግረዋል።

ፅንስ ሲያቋርጡ በደም እና በሌላም የሰውነት ፈሳሽ መፍሰስ ምክንያት የተወሳሰበ የጤና እክል ያጋጠማቸው ፣ በኩላሊት መጎዳት ምክንያት ለዳይለሲስ ህክምና የገቡ ሴቶች መኖራቸውን ጨምረው ገልፀዋል።

ያንብቡ : https://telegra.ph/Tigray-06-09

@tikvahethiopia

#EskinderNega

የባልደራስ ለእውነተኛ ዲሞክራሲ ፓርቲ የፓርቲው ፕሬዘዳንት እና እጩ የሆኑት እስክንድር ነጋ በአዲስ አበባ ቃሊቲ ከፍተኛ ጥበቃ ማረሚያ ቤት ውስጥ ታስረው የሚገኙበት ሁኔታ ከፍተኛ ስጋት እንደፈጠረበት አመልከተ።

የአቶ እስክንድር ነጋ አያያዝ ሲከታተል መቆየቱን የገለፀው ባልደራስ ፥ በተለይ ከግንቦት 27 ቀን 2013 ዓ/ም ጀምሮ ቀድሞ ታስረውበት ከነበረው "ዋይታ" ተብሎ ከሚጠራው ዞን በደረሰባቸው የሰብዓዊ በደል ምክንያት 8ኛ ዞን ተብሎ ወደሚጠራው ቦታ እንዲዘዋወሩ ተደርጓል ብሏል።

አቶ እስክንድር አሁን ታስረውበት ባለበት ቦታ በእስረኞች የደህንነታቸው ሁኔታ፣ አደጋ ላይ እንደወደቀ የፓርቲው ከፍተኛ አመራሮች ማረሚያ ቤቱ ድረስ በመሄድ ለማረጋገጥ እንደቻሉ ፓርቲው ገልጿል።

አቶ እስክንድር እየገጠማቸው ያለውን የደህንነት አደጋ፣ ማረሚያ ቤቱ ሆነ ጠቅላይ ዓቃቤ ሕጉ እያወቁ መፍትሄ ለመስጠት ባለመፈለጋቸው አዝኛለሁ ብሏል ባልደራስ።

ያንብቡ : https://telegra.ph/Balderas-06-09

@tikvahethiopia

#AddisAbaba

የጉራጌ ልማትና ባህል ማህበር በአዲስ አበባ ክ/ ከተሞች ሲያከናውን የቆየውን የልማትና ባህል ኮንፈረንስ ማጠቃለያ ፕሮግራም በወዳጅነት ፓርክ እየተካሄደ ይገኛል።

በዚህ ፕሮግራም ላይ ይገኛሉ ተብለው ያልተጠበቁት የኢትዮጵያ ጠ/ሚ ዶ/ር ዐቢይ አህመድ ተገኝተው ንግግር አድርገዋል።

ከመድረኩ ላይ እንደተሰማው ጠቅላይ ሚኒስትሩ በስራ ጫና ምክንያት በቦታው ይገኛሉ ተብሎ ያልተጠበቀ ነበር ነገር ግን በድንገት በመገኘት ለፕሮግራሙ ተሳታፊዎች መልዕክት አስተላልፈዋል ፤ ከፕሮግራሙ አዘጋጆችም ስጦታ ተበርክቶላቸዋል።

@tikvahethiopia

የሀዋሳ ታቦር ተራራ በባለሃብቶች እንዲለማ ለማድረግ እየተሰራ ነው ተባለ።

የሀዋሳ ልዩ መለያ የሆነው 'ታቦር ተራራ' ባላሀብቶች መዋዕለ ነዋያቸውን የሚያፈሱበትና የኢንቨስትመንት የስበት አካል እንዲሆን እይተሰራ መሆኑን የከተማይቱ ም/ከንቲባ ረዳት ፕሮፌሰር ፀጋዬ ቱኬ ለኢትዮጵያ ፕሬስ ድርጅት ተናግረዋል።

ምክትል ከንቲባው፥ የታቦር ተራራ ባለሃብቶች እንዲያለሙትና "ገበታ ለሀገር" ፕሮጀክትን ሚስተካከል ልማት የሚከናወንበት ስፍራ እንዲሆን እየተሰራ መሆኑን አስረድተዋል።

ሀዋሳ የመላው ኢትዮጵውያን ከተማ ከመሆን አልፋ የቱሪስቶች መዳረሻ በመሆኗ ሰፊ የኢንቨስትመንት ሥራ በማከናወን ሀገርን ተጠቃሚ ማድረግ ይገባል ሲሉ ተናግረዋል።

ምክትል ከንቲባው፥ ታቦር ተራራን ጨምሮ በሃዋሳ አቅራቢያ የሚገኙ ሃብቶችን ሥራ ላይ የማዋል ብርቱ ጥረት መጀመሩን ጠቁመው በቀጣይ ዘርፈ ብዙ ስራዎች እንደሚከናወኑ ገልፀዋል። #EPA

@tikvahethiopia

"ትግራይ ውስጥ ሰዎች በረሃብ እየሞቱ ነው" - ዴቪድ ባስሌ

በተባበሩት መንግስታት የዓለም የምግብ ፕሮግራም (WFP) ዋና ዳይሬክተር ዴቪድ ባስሌ በጦርነት በትግራይ ክልል ውስጥ ሰዎች በረሃብ #እየሞቱ መሆኑን በይፋዊ የትዊተር ገፃቸው ላይ አሳውቀዋል።

"ጊዜው እያለቀ ነው ያሉት" ባስሌ ፤ የሰብአዊ ድጋፍ ተደራሽነትን ከፍ ለማድረግ እና አደጋን ለመከላከል ያልተገደበ እቅስቃሴ ሊኖር ይገባል ሲሉ አሳስበዋል።

አሁኑኑ ሁሉም ወገኖች በዚህ ላይ ቁርጠኝነትን በማሳየት ጥሩ ውጤት ማምጣት እንዳለባቸው አስገንዝበዋል።

ትላንትና የተባበሩት መንግስታት ድርጅት (ተ.መ.ድ) ዋና ጸሃፊ አንቶንዮ ጉተሬዝ በርካታ የኢትዮጵያ ትግራይ ክልል አካባቢዎች ረሃብ አፋፍ ላይ መሆናቸውን መገራቸውን ይታወሳል።

@tivahethiopia

#Update

የጠቅላይ ሚኒስትር ፅ/ቤት በዛሬው መግለጫ ምን አለ ?

በትግራይ ሰብዓዊ ድጋፍ በተመለከተ :

የብሄራዊ አደጋ ስጋት ስራ አመራር ኮሚሽን ኮሚሽነር አቶ ምትኩ ካሳ ከተናገሩት ፦

- ከ5 ነጥብ 4 ቢሊዮን ብር በላይ ወይም 135 ሚሊዮን ዶላር በላይ ግምት ያለው ምግብ ሸቀጥ ተሰራጭቷል።

- በመጀመሪያ ዙር 4 ነጥብ 5 ሚሊዮን ሰዎች ተጠቃሚ ተደርገዋል። በሁለተኛና በሶስተኛ ዙር 5 ነጥብ 2 ሚሊዮን ሰዎችን ተጠቃሚ ማድረግ ተችሏል።

- 170 ሺህ 798 ሜትሪክ ቶን ምግብ ቀርቧል። ለዚህም ከ5 ነጥብ 4 ቢሊዮን ብር በላይ ወጪ ተደርጓል።

- በ1ኛና በ2ኛ ዙር የተሰራጨው የሰብዓዊ ድጋፍ ወጪ 70 በመቶ በመንግስት እንዲሁም ቀሪው 30 በመቶ በአጋሮች የተሸፈነ ነው። በ3ኛ ዙር ድጋፍ መንግስትን ጨምሮ 6 አካላት ተሳትፎ እያደረጉ ይገኛሉ።

- የዓለም የምግብ ፕሮግራም፣ ወርልድ ቪዥን፣ ኬር ኢንተርናሽናል፣ የትግራይ መልሶ ማቋቋም ድርጅት እና ፉድ ፎር ሀንግሪ በክልሉ የሰብዓዊ ድጋፍ ስራዎች ላይ እየሰሩ ነው።

- መንግስት እየተደረገ ያለውን ድጋፍ እየተቆጣጠረ እንደሚገኝ ገልጸው፤ የእርዳታ አሰጣጥ ሂደቱ እንዲሳካ ምቹ ሁኔታ እየፈጠረ ነው።

ያንብቡ : https://telegra.ph/ENA-06-09 #ኢዜአ

@tikvahethiopia

የኦንላይ ትምህርት በኢትዮጵያ :

ኢትዮጵያ ለ4 የከፍተኛ ትምህርት ተቋማት ፍቃድ በመስጠት ለመጀመሪያ ጊዜ የባሉበት ትምህርትን (online Education) መስጠት ጀምራለች።

ይህ የተገለፀው ‹‹የባሉበት ትምህርት (online Education) ዘርፉን በመልካም ጎን ይቀይረው ይሆን?›› በሚል የዘርፉ ባለሙያዎች የተሳተፉበት የበይነ መረብ ውይይት በተካሄደበት ወቅት ነው።

በውይይቱ ትምህርትን በቴክኖሎጂ መደገፍ በሚቻልበት ሁኔታ እንዲሁም ሊያጋጥሙ በሚችሉ ችግሮች እና የመፍትሄ ሃሳቦች ላይ ምክክር ተደርጓል፡፡

በዚሁ ምክክር መድረክ ላይ የከፍተኛ ትምህርት ጥራና አግባብነት ኤጄንሲ ዋና ዳይሬክተር አንዷለም አድማሴ (ፒኤችዲ) የኦንላይን ትምህርትን በተደራጀ መልኩ ለመስጠት መመሪያ ተዘጋጅቶ ወደ ስራ መግባቱን አስረድተዋል።

አሁን ላይም ለ4 የከፍተኛ ትምህርት ተቋማት ፍቃድ በመስጠት ኢትዮጵያ ለመጀመሪያ ጊዜ የባሉበት ትምህርትን (online Education) መስጠት ጀምራለች ብለዋል። #ኢብኮ

@tikvahethiopia

የግብፅ የውጭ ጉዳይ እና መስኖ ሚኒስትሮች በሱዳን የአንድ ቀን ይፋዊ ጉብኝት አድርገዋል።

የግብፅ ባለስልጣናቱ ከሱዳን አቻዎቻቸው ጋር ሆነው የጋራ መግለጫ አውጥተዋል፡፡

በመግለጫቸው የሕዳሴ ግድቡን ጉዳይ በተመለከተ ሁለገብ ስምምነት ላይ ለመድረስ “ኢትዮጵያ በቁም ነገር ፣ በታማኝነት እና በእውነተኛ የፖለቲካ ፍላጎት እንድትደራደር በቀጣና ፣ በአህጉር እና በዓለም አቀፍ ደረጃዎች ግፊት እንዲደረግ ሁለቱ ሀገራት በጋራ እንደሚሰሩ” አስታውቀዋል፡፡

በዚህም በሕዳሴው ግድብ ሙሌት እና አስተዳደር ላይ “ፍትሃዊ እና ህጋዊ አስገዳጅ ስምምነት እንዲደረስ እንደሚሰሩ” ገልጸዋል፡፡

በቀጠናው እና በአፍሪካ አህጉር ፀጥታ ፣ ሰላም እና መረጋጋትን ለማስጠበቅ ፣ “የግብፅ እና የሱዳን ቅንጅት አስፈላጊነት” ላይ መስማማታቸውንም የሚያትተው መግለጫው ፣ ለዚህም “ኢትዮጵያ በግድቡ ጉዳይ የያዘችውን ፖሊሲ መቀጠሏ የሚያስከትለውን አደጋ ለመከላከል የአለም አቀፉን ማህበረሰብ ንቁ ጣልቃ ገብነትን ይጠይቃል” ብለዋል፡፡

ኢትዮጵያ በመጪው የክረምት ወቅት “የሕዳሴውን ግድብ ለመሙላት የጀመረችውን ጉዞ ዓለም አቀፉ ማሕበረሰብ እንዲያስቆም” ነው በመግለጫቸው የጠየቁት፡፡

አስገዳጅ ስምምነት ሳይደረስ የግድቡን ሁለተኛ ዙር ሙሌት ማከናወን እንደሚያሰጋቸው ሁለቱ ሀገራት በድጋሚ ገልጸዋል፡፡

ሁለቱን የታችኛው ተፋሰስ ሀገራት የመጉዳት ፍላጎት እንደሌላት በተደጋጋሚ የገለጸችው ኢትዮጵያ ፣ አስገዳጅ ስምምነት የመፈረም ፍላጎት የላትም ፤ የግድቡን ሁለተኛ ዙር የውሃ ሙሌትም በተያዘው ጊዜ እንደምታከናውን ቁርጠኛ አቋም ይዛለች፡፡

#አልዓይን

@tikvahethipia