ДЕ ’НГУЫЛДЗТÆ

Дæ фæлмæн æнгуылдзтæ
Мæ урс хилтæ иугай æвзарынц,
Дæ фæлмæн æнгуылдзтæ
Мæ царды хуыздæр бонтыл зарынц.

Дæ фæлмæн æнгуылдзтæ
Рызтысты, мæн хæстмæ куы ’рвыстой.
Дæ фæлмæн æнгуылдзтæ
Дæ тарст æнгас хæстмæ æвдыстой.

Дæ фæлмæн æнгуылдзтæ
Нæ хæдзармæ цардамонд хастой.
Дæ фæлмæн æнгуылдзтæ
Узæлын, лæггад кæнын уарзтой.

Дæ фæлмæн æнгуылдзтæ
Нæ хæдзармæ талынг нæ уагътой.
Дæ фæлмæн æнгуылдзтæ
Мæ цинæн ирон фæндыр цагътой.

Дæ фæлмæн æнгуылдзтæ
Дæ риуыл — дзуарæвæрд, хаудæй.
Дæ фæлмæн æнгуылдзтæ...
Ныхгæдтой дæ цæстыты хаутæ.

Гафез
#рухс_ссудз
#рс_поэзи

ИС АХÆМ ЛÆГ ХÆХТЫ...

Мæсыгтигъ хæххон хъæу,
Уыгæрдæн-фæз рæгътыл-
Кæцыфæнды ран дæр ис ахæм лæг хæхты:
æрмæстдæр ын радзур-
кæмæй дæ,
кæцон дæ,
æмæ дын фырцинæй æрхæцдзæн дæ цонгыл:
«Нæхи лæппу куы дæ!
Цæуæм-ма нæхимæ!» —
Дæ фыдимæ
Кæнæ дæ фыдыфыдимæ
Уый царди хæларæй,
Йе разынд дæ хæстæг.
æмæ дын нæ кæны æфсоны ныхæстæ, —
Къæсы фарнæн баззад ирон хъæуы уазæг.
Фыдæлтон сыкъайы дын рахæсдзæн нуазæн,
æрæвæрдзæн хойраг зырнæйзылд тæбæгъты...
Ис ахæм æмбæлæг,
Ис ахæм лæг хæхты:
Фæдзурдзæн дын номгай æнæсгæрст къуыбыртæ,
æрисдзæн дын мæсгуыты тулдзын гуыдыртæ,
Фæкæндзæн дын таурæгъ æнæном лæгæтыл,
æнаххос уды маст,
Хъайтары мæлæтыл...
Ис ахæм æмбæлæг...
Цæудзынæн мæ къæхтыл
Ныфсджынæй —
цы бонмæ
Уа ахæм лæг хæхты!

Дзаболаты Хазби
#рухс_ссудз
#рс_поэзи

Зондджын æгад ми йæ сæрмæ нæ хæссы:
Къогъотæ ахсгæ кæд федтай цæргæсы?!

Дзасохты Музафер (латинаг зондджын ныхæстæ)
#рухс_ссудз
#рс_поэзи

ХУРЫ ФЫРТЫ УАРЗОН

Доны уырынгтыл
Хуры тын фестъæлфыд;
Уый æнгуыры бос аскъуыдта кæсаг
æмæ цады бын лæф-лæфгæнгæ балæууыд,
Йæ цъæхдзаст
Рæсугъд хотæн дзуры:
- Хуры фырт мæ скъæфынмæ хъавыд,
Фæлæ нæ бакуымдтон...
æз сымах
æмæ нæ дзæбæх хъуынахæдзар кæуыл баивон,
Ахæм нæма райгуырд.

Чеджемты Æхсар
#рухс_ссудз
#рс_поэзи

ФÆЛМÆ

Сæуæхседи артæй
Фæззиндтæн зæнхи арммæ.
Хъуæлти гъазгæй радæй,
Нæ искастæн мæ сæрмæ.

Гиризгæнгæй цардæй,
Ратухстæн цъæх изæрмæ,
Бон еувæрсти рандæй, —
Фæууагъта фæлорс фæлмæ...

Скъодтати Эльбрус
#рухс_ссудз
#рс_поэзи
#рс_дигорон

О, цардуарзты æхсызгон сæнттæ!
О, дунесконды рухс фæлгонц!
Æдзух мæ зæрдæйæн ныфс дæтты
Лæджы зынг бæллицты уæлмонц.

Боциты Солтан
#рухс_ссудз
#рс_поэзи

ЦАРДЫ ФÆНДАГ

Цæй хорз у, ехх, дзæвгар рæстæг фæцæрын!
Цы цæрай, уый та хъуамæ уа дзæбæх.
Кæм дæ, зынгбазырджын æмдзæвгæ?
Ныннæр, цæхæртæкалгæ тæх,
Дæ фæстæ 'Рфæны фæд æвзæрæд!
Зынаргъ у цард,
Æнæкæрон зынаргъ у,
Æмæ йыл чи фæзардзæни йæ фаг?
Æмбæхсы дард кæмдæр йæ сызгъæрин фæндаг,
Фæлæ, кæсут-ма, гъей, уæддæр цæй даргъ у!

Калоты Хазби
#рухс_ссудз
#рс_поэзи

Тæнæг мылаз сæумæйы рухсмæ тади,
Рæхцыд ма зæхх йæ урспакъуы фынты. —
Ныууарыд мит, уæрагæрфæн æрбадти...
Уыдтон: цæхгæрмæ рафæд кодтай ды.

Уыдтон: ныззылдтæ донисæн æрхырдæм,
Фæаууон дæ уæ сыхæгты фæскау.
æз та лæгæрстон хъæууынгты дæргъырдæм,
Нæ фæдтæ фесты дзуарæвæрд — сынкау

Цыма дыл хъавгæ бамбæлдтæн мæ армæй,
Цыма æрдæ мæ сагъæсты æмуд...
Фæлæ мæ тъæры ницы баззад хъармæй, —
æрмæст дзы- уазал, уаддымгæйы футт...

Кæддæр уыд уый...
Тызмæг рæстæг мæ сæрыл
æгæр-мæгуыр нæ ныууагъта хъуын дæр.
Нæ рагфембæлд мæ зæрдæйы къæсæрыл
Зыны мысалгъæй дзуар-къахтау ныр дæр!

Цæрукъаты Алыксандр
#рухс_ссудз
#рс_поэзи

ДИДИНÆГ МА РАКАЛ

Дидинӕг ма ракал, дидинӕг ма ракал,
Байхъус мӕм, ма у къуырма.
Дидинӕг калынӕн, дидинӕг калынӕн,
Уалдзӕг нӕма рцыд нырма.
Уый мӕм нӕ байхъуыста, коммӕ нӕ бакасти,
Йе стыр уарзт райхӕлд уӕддӕр.
Амонды базыртыл, амонды базыртыл
Иунӕг бон калдта цӕхӕр.
Иннӕ бон карз зымӕг, урс бӕхыл хъазгӕйӕ,
Зӕхмӕ фӕзынди ӕваст.
Гъе, мӕгуыр дидинӕг, гъе, мӕгуыр дидинӕг,
Миты сӕр бамыр дӕ уарзт.
Хуры иу ракастӕй, боны иу бахудтӕй
Чи фергом афтӕ ӕгӕр?

Чеджемты Æхсар

Рухсадон проект/ просветительский проект
#рухс_ссудз
#рс_поэзи

Хæрхæмбæлд фестæм уынджы абон,
Фæлæ та бамыр и мæ дзых...
Дæуæн та цыма «уарзын» загътон, —
Дæ цæсгом уардийау фæсырх.

Нæ, уый зæринбазыр сæуæхсид
Ыссыгъд дæ уадултыл, фæхудт.
Тæхуды, уый фæстæ куы скæсид
Мæныл дæ сау цæстыты хур!

Хъодалаты Герсан
Рухсадон проект/ просветительский проект #рухс_ссудз
#рс_поэзи

Æртахти булæмæргъ мæ бæстæм
Æмæ йæ фæндырæй æрцагъта.
Сæрибар уалдзыгон ныхæстæй
Мæ зæрдæ цинæй арт ысуагъта.

Ныр сатæг уадымсы фæйлауæн
Мæ былтæм хи æнгом нылвасы...
Салам нæ уалдзыгон æгъдауæн!
Æз ын йæ тæмæн бирæ уарзын;

Цъæх гауыз раппæрста нæ фæзтæм
Æмæ йыл дидинджытæ 'рсагъта.
Сæрибар уалдзыгон ныхæстæй
Мæ зæрдæ цины арт ысуагъта.

Калоты Хазби
Рухсадон проект/ просветительский проект #рухс_ссудз
#рс_поэзи

Уарзондзинад лæгъстæтæ, цæстысыгтæй нæу.
Зæды цур дæр дæ зонгуытыл макуы æрлæуу.
Дар-иу дервишау алкæм дæхи ды сæрибар,
Æмæ, чи зоны, бауарзой уый фæстæ дæу.

Омар Хайам
Дзасохты Музаферы тæлмац
Рухсадон проект/ просветительский проект #рухс_ссудз
#рс_поэзи

ЗÆРДÆЙЫ ЦÆРÆГ

Æз хохмæ систон дæу къуылдымæй —
Хъыгæн дæр, цинæн дæр æгæр дæ...
Куы дæ фæрсой, кæм цæрыс, уымæй,
Уæд сын-иу бацамон мæ зæрдæ.

Дзасохты Музафер
Рухсадон проект/ просветительский проект #рухс_ссудз
#рс_поэзи

Баргъæвст зæрдæ, басыд дурыл,
Уæ, кæм дæ ды, тавгæ хур?!
Бамбæхст мигъы, нал и къулыл.
Уазал дары зæрдæ дур.

Токаты Алихан

Рухсадон проект/ просветительский проект #рухс_ссудз
#рс_поэзи

Дæ райсом хорз, мæ Ир, зæрдæрайгæйæ фезмæл —
Сæуæхсиды рардыл æнæзивæгæй фембæл!

«Хохаг ныв»
Годжыциан-Челдыты Надя

Рухсадон проект/ просветительский проект #рухс_ссудз
#рс_поэзи

Æз нал дæн сагъæстæй уырыд,
Дæ цуры нал мысын æрвонты,
Мах иумæ — кард æмæ кæрддзæм,
Зæххыл кæмæн байгом дæ зæрдæ,
Уый цинтæй ихыл дæр цæрдзæн.
Куы хæссой мæн уæлæрвтæм зæдтæ,
Уæддæр ма кувдзынæн дæуæн.

Джыккайты Шамил
"Номарæн" (телестих)

Рухсадон проект #рухс_ссудз
#рс_поэзи

Ды дæ митæй рæсугъд дæ,
Ноджы ма уындæй хайджын дæ.
Дæ зондæй æмæ де 'гъдауæй
Ды мæ цæсты кадджын дæ.

Мамсыраты Темырболат
"Кæмæдæр”
Рухсадон проект/ просветительский проект #рухс_ссудз
#рс_поэзи

Уыцы сау цæстыты каст
Сусæг фатæй мæн рæхуыста.
Уыцы бон æрцыдтæн баст
Æз æнæуынгæ рæхыстæй.

Цæрукъаты Алыксандр
Рухсадон проект/ просветителький проект #рухс_ссудз
#рс_поэзи

Æмæ уæд цавæр кæнæ кæй æмдзæвгæ равзарæм?
Æркæскут ацы хэштегмæ #рс_поэзи

Иу 30-50 адæймаджы куы сæвæрой лайк, уæд рахиздзынæн🚀