Матенаькъан lабаса Илез

Укх деношка арадаьннад аз дукха сатийсса книжка – «ГIалгIай ага иллеш». Ер йоазув дешаш кIеззига вай дIаходаьлча ховргда шоана укханга аз са хIана тийссад а сона ер сов боча хIана да а.
2003 шера вола а венна, вай мехка гIолла кхозза чакхваьнна хургва со, гIалгIай ага иллеш ховш бола нах лохаш, царгара уж хьаяздеш. Цу хана денз сай аьттув болча тайпара аз къа а хьийга дIаяздаь иллеш да укх книжка тIа кепа мел техараш. Акхарех цхьаккха илли хьалха цхьаннахьа а кепа теха дац. Ераш дерригаш а 35 илли да.
Цхьадола ага иллеш аларгахьа къоастам болаш дале а чулоацам шоайла тара болаш нийслу вай. Бакъда, аларгахьа а чулоацамгахьа а эргаш дараш а да дукха. ХIаьта цу иллеша хьакховдадеш долча маIано шийца дукха хоам бахь мотт Iомабеш доагIача бера. Юххьанца беро дIалаьцар цо укх дунен чу мел йоаккхача хана цунца даха дус. Цунга хьежжа хул цун вахара оагIонаш, цо нахаца леладу гIулакхаш, ший мехкацара, халкъацара безам.
Ер мо бола болх кхоачашбе атта дац. Iилманхошта ховргда аз фу ях. Дукха къахьега дезаш, дукханахьа чакхвала везаш гIулакх да ер. Цудухьа, дешаца, гIа баккхарца, дIа-хьа вигарца, хоам бирца, саг хьехарца сайна укх юкъе дакъа лоацаш гIо мел даьча наха баркал оал аз. Эггара доккхагIа баркал аз ях вай боккхийча наха, къаьстта исташта. Цар шоай хана уж иллеш хьаIомадаьдецаре тахан доацаш хургдар уж. теркалде деза, дас воIа доахаш илли укх юкъе хилар а.
Хьамсара ноаной, нагахьа санна гIалгIачун дог чу а доаллаш, гIалгIачун лерхIамаш а довзаш шоай дезалхо хилар шоашта лой дахалаш шоай берашта ага иллеш. Телефона тIа, е компьютера хьалхашка багIаш тхьовсачул дикагIа да шоана уж хозача, къаьнарча гIалгIай къаман ага иллега ла а дувгIаш тхьовсаш хилча. Маьрша, гIоза, иразе дахалда шо.
Книжкаш эца йиш я, "Ковчег" яхача махбара таьрге "Мир книг" яхача тика чура.
Гlоза дешалда оаш.

#Ингушетия #ингуши #МТобщество #МатиевИлез #литература #сказки #песни #дети