#Ҳоким_ҳудудларда
#Қоракўл_тумани
#Мактабгача_таълим_қамрови

Вилоят ҳокими Ботир Зарипов Қоракўл туманига ташрифи чоғида ҳудудда мактабгача таълим қамровини ошириш бўйича таклифлар тақдимоти билан танишди.

Маълумотларга кўра, бугунги кунда туманда жами 134 та мактабгача таълим ташкилотларида 9 минг 702 нафар ўғил-қиз тарбияланмоқда. Тизимга болаларни қамраб олиш кўрсаткичи 70,6 фоизга етган.

Шу билан бирга, жойларда ўтказилган очиқ мулоқотларда аҳоли боғчаларни янада кўпайтириш истагини билдирган. Шунга асосан, мактабгача таълим жараёнини янги тартибда ташкил этиш бўйича таклифлар ишлаб чиқилган.
Тақдимотда мактабгача таълим тизимини янада такомиллаштириш, боғчаларда сифат ва қамровни ошириш чоралари ҳақида ахборот берилди. Хусусан, аҳолиси зич ёки қамров кўрсаткичи паст бўлган ҳудудлардаги мактабларнинг бўш турган биноларида ва кам қувватда ишлаётган мактабларда қўшимча гуруҳлар ташкил этиш кўзда тутилган.
Масалан, ҳозирда Қаймоқчи қишлоғидаги 41-умумтаълим мактабининг бўш турган биносида 24-сонли давлат мактабгача таълим ташкилоти таркибига кирувчи қўшимча 3 та 90 ўринли гуруҳ, “Пойкент” маҳалласидаги 2-умумтаълим мактабининг бўш турган биносида эса 14-сонли давлат мактабгача таълим ташкилоти таркибига кирувчи қўшимча 2 та 60 ўринли гуруҳ ташкил этилган.

Шу тариқа “Човли”, “Жиғачи”, “Сайёд”, “Осиё” ва “Ваҳм” маҳаллаларидаги мактабларда ҳам худди шундай қўшимча гуруҳлар фаолияти йўлга қўйилган. Натижада қамровга 1 минг 315 та қўшимча ўрин яратилмоқда. Туман миқёсида қамров даражаси эса 80 фоизга етказилади.

Вилоят раҳбари қўшимча гуруҳлар яратилиши аёлларга енгиллик яратиш ва фарзандлар тарбиясида муҳим эканини алоҳида таъкидлади.

Мутасаддиларга бу тажрибани оммалаштириш, таълим сифатини яхшилаш юзасидан кўрсатмалар берилди. Мактабгача таълим қамровини кенгайтириш бўйича дастур ишлаб чиқиш вазифаси қўйилди.

Buxoro.uz | Facebook | Instagram | YouTube

#қишга_тайёргарлик
#ҳоким_ҳудудларда
#Қоровулбозор_тумани

Бухоро вилояти ҳокими Ботир Зарипов ҳудудларга ташрифи давомида ижтимоий соҳа объектлари, аҳоли хонадонларида куз-қиш мавсумига кўрилган тайёргарлик ҳолати ва мавжуд шароитларига эътибор қаратмоқда. Бугун вилоят раҳбари Қоровулбозор туманида бўлиб, қатор ижтимоий соҳа объектлари, кўп хонадонли уй-жойларнинг мавсумга шайлик ҳолатини кўздан кечирди.

Ўрганишларнинг дастлабки манзили “Навбаҳор” маҳалла фуқаролар йиғинидаги 8- давлат мактабгача таьлим ташкилоти бўлди. 150 ўринли мазкур муассаса 1983 йилда бунёд этилган. 2019 йилда “Обод қишлоқ” дастурига киритилиб, тўла реконстуркция қилинган. Ўз навбатида ўшанда ички иситиш тармоқлари тўлиқ таъмирдан чиқарилган. Айни кунда 14 нафар олий маьлумотли педагог фаолият юритаётган масканда замонавий ўйин майдончаси, махсус жиҳозланган мусиқа ва тил ўргатиш хоналари мавжуд.

Ботир Зарипов муассасада таълим-тарбия жараёнларини ташкил этиш билан боғлиқ шарт-шароитларни бирма-бир кўздан кечирди ва мавжуд ҳолатга юқори баҳо берди.

Шу билан бирга қиш мавсумига тайёргарлик, асосий турдаги озиқ-овқат маҳсулотлари захирасини яратиш борасида олиб борилган ишлар билан яқиндан танишди. Мудирадан иситиш тизими билан боғлиқ муаммолар ҳақида сўради. Қиш-қировли кунларда иситиш тизимида муаммолар кузатилганда муқобил вариантларни шай қилиб қўйиш бўйича масъулларга топшириқ ва кўрсатмалар берди. Шунингдек, мазкур боғча мисолида вилоятдаги барча таълим масканларида педагог-ходимларнинг ёнғинга қарши бирламчи курашиш воситаси саналган ўт ўчиргичлар фойдаланиш малакасини ошириш юзасидан кўргазмали ўқувлар ташкил этиш зарурлиги таъкидланди.

Шу куни боғча ҳудудидаги ер майдонида дарахт кўчатлари ўтқазилди.

Buxoro.uz | Facebook | Instagram | YouTube