#ҳудудлар_ҳаёти
#Бухоро_шаҳар

Ўзбекистон Республикаси Президентининг 2022 йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги ПҚ-408-сон қарори билан 2022-2023 йилларда маҳаллалар инфратузилмасини ривожлантириш бўйича республиканинг 5284 та маҳалласида ички йўллар, ичимлик сув таъминоти, оқава сув таъминоти, электр ва газ таъминоти, таълим муассасалари, маданият, спорт ва бошқа объектларни ривожлантириш белгиланган.

Мазкур қарор ижроси бўйича Бухоро шаҳрида ҳам салмоқли ишлар амалга оширилмоқда. Хусусан, С.Айний маҳалла фуқаролар йиғини ҳудудидаги 14.5 км шундан, 4 км йўл бетонлаштириш, 10.5 км қисмини асфальтлаштириш режалаштирилган. Ҳозирги вақтда "POMEGRANATE BUILDING" МЧЖ муҳандислари томонидан маҳалланинг "Урганжиён 1", "Урганжиён 2" кўчаларига цемент-бетон ётқизиш ишлари олиб борилмоқда.

Мазкур тадбирларни амалга ошириш учун 11 млрд сўмдан ортиқ маблағ ажратилган. Бу каби хайрли ишлар вилоятимиз бўйлаб давом этмоқда.

Buxoro.uz | Facebook | Instagram | YouTube

#ҳудудлар_ҳаёти
#Бухоро_шаҳар

Бугунги кунда вилоятимизнинг барча ҳудудларида бўлгани каби Бухоро шаҳрида ҳам йўл инфратузилмасини яхшилаш борасида кенг кўламдаги ишлар жадал давом этмоқда. Йўлсозлар айни пайтда аҳоли талаб ва мурожаатларидан келиб чиққан ҳолда шаҳардаги маҳаллаларда таъмирлаш тадбирларини олиб боришмоқда.

Хусусан, "Лоша" МФЙнинг ички йўлларини асфальтлаштириш мақсадида 9,8 млн сўм маблағ ажратилган бўлиб, айни пайтда асфальт ётқизиш ишлари амалга оширилмоқда. Белгиланган дастурга кўра маҳалланинг ички автомобиль йўлларининг 19.8 км қисми асфальтлаштирилади. Худди шундай хайрли ташаббус "Ҳавзи Нав" МФЙда ҳам олиб борилмоқда. 600 млн сўм маблағ эвазига маҳалланинг 1 кмдан ортиқ носоз йўллари тўлиқ асфальтлаштирилди.

Бунёдкорлик нафаси "Имом Ал-Бухорий" МФЙни ҳам четлаб ўтмади. Ушбу маҳалла ички йўллари таъмини учун 1 млрд 800 млн сўм маблағ ҳисобига Ҳавзи Қози Калон, Ҳавзи Лесак, Тагбанбофон, Афросиёб, Мирфаёз, Хўжа Азизон кўчалари асфальтлаштирилмоқда. Ушбу маҳаллаларнинг 3 км 732 м йўл қисмини таъмирлаш кўзда тутилган бўлиб, шундан 1 км 400 м қисми бетонлаштирилади, 2 км 332 м йўл қисмига эса асфальт қопланади. Бу каби жараёнлар "Шербудин" ва "Кўкалдош" маҳаллаларида ҳам давом этмоқда.

Бугун, 1 апрель куни шаҳар ҳокими Жамол Носиров юқоридаги маҳаллаларда бўлиб йўлсозлар томонидан амалга оширилаётган ишлар билан яқиндан танишди.

Buxoro.uz | Facebook | Instagram | YouTube

#назорат_тартибидаги_ўрганиш
#Бухоро_шаҳар

Ҳудудларни ободонлаштириш, озода ва покизаликни таъминлаш, аҳоли хонадонлари, айниқса, кўп қаватли уй-жойлар, ижтимоий соҳа ва ҳаётий муҳим объектлар ҳамда уларга туташ ҳудудларни тартибга келтириш, уларни қишки мавсумга барқарор ишлашини таъминлаш мақсадида бугун, 21 декабрь куни вилоят ҳокими Ботир Зарипов бошчилигидаги вилоят секторлари раҳбарлари, шаҳар ҳокимлиги мутасаддилари ҳамда тегишли корхона-ташкилотлар раҳбарлари иштирокида Бухоро шаҳрида назорат тартибидаги ўрганиш тадбири бўлиб ўтди. Шу куни Б.Нақшбанд маҳалласи Амир Темур кўчасида жойлашган халқ тили билан айтганда 7-кичик ноҳия ҳудудидаги кўп қаватли уйлар ва уларга туташ майдонлар кўздан кечирилди. Жараёнда маҳалладаги мавжуд муаммолар ўрганилиб, уларни бартараф этиш, аҳоли учун муносиб шарт-шароитлар яратиш чоралари ҳам кўрилди.

Бухоро шаҳрининг 7-кичик ноҳия аҳоли пункти ташкил этилганига узоқ йиллар бўлгани йўқ. Шу сабаб ҳар қадамда қурилиш-бунёдкорлик ишлари амалга оширилаётганлигини кўриш мумкин.

Ўрганиш давомида ушбу ҳудуддаги кўп қаватли уйлардаги камчиликлар, фуқаролар ва тадбиркорлар томонидан ўзбошимчалик билан ноқонуний қурилиш ишларини амалга ошириш, майиший ва қаттиқ чиқиндиларни дуч келган жойга ташлаб кетиш, уйларнинг ертўла қисмидан самарасиз фойдаланиш каби ҳолатлар мавжудлиги аниқланди. Шунингдек, маҳалла ҳудудида майиший чиқиндиларни йиғиш ва олиб кетиш жойлари етарли эмаслиги ҳамда бошқарув сервис компаниялари томонидан хизмат кўрсатишдаги камчиликлар маълум бўлди. Бир сўз билан айтганда ҳудудни ободонлаштириш ва аҳоли учун муносиб шарт-шароит яратиш ишлари ўз йўлига ташлаб қўйилган. Вилоят ҳокими ўрганиш давомида ҳар бир ҳолатни мутасаддилар иштирокида танқидий муҳокама қилди. Аниқланган камчиликларни бартараф этиш ҳамда ҳудудни ободонлаштириш ишларини жадаллаштириш бўйича муддат ва масъуллар белгиланиб, бажарилиши назоратга олинди. Қолаверса, ноқонуний қурилиш объектларини бартараф этиш, бу каби ҳолатларга йўл қўймаслик учун жамоатчилик назоратининг кучайтириш бўйича вазифалар белгиланди.

Шу ерда Ботир Зарипов аҳоли вакиллари билан ҳам мулоқот қилиб, уларнинг муаммо ва таклифларини тинглади. Фуқаролар томонидан кўтарилган ҳар бир муаммо ечими бўйича мутасаддиларга топшириқ ва кўрсатмалар берилди.

Buxoro.uz | Facebook | Instagram | YouTube

#ноқонуний_қурилиш
#Бухоро_шаҳар


Уй-жой, турли бино ва иншоотлар билан бирга, ижтимоий инфратузилма объектлари, савдо ва хизмат кўрсатиш шохобчалари, таълим, тиббиёт ва маданият муассасалари, истироҳат боғлари ва хиёбонлар, спорт масканларини бунёд этишда шаҳарсозлик қоида ва меъёрларига алоҳида эътибор қаратиш тақозо қилинмоқда. Бироқ ўзига хос қурилиш-бунёдкорлик майдонига айланган шаҳар ва туманларимизда бу соҳада тартиб ўрнатиш зарур, албатта. Аниқроғи, сўнгги йилларда ноқонуний қурилган бино ва иншоотлар туфайли турли салбий ҳолатлар юзага келаётганидан ҳам кўз юмиб бўлмайди.

Вилоят ҳокимлиги, прокуратура, мажбурий ижро бюроси, Бухоро шаҳар ҳокимлиги, Кадастр агентлиги вилоят бошқармаси ва бошқа тегишли хизматлар ҳамкорлигида ҳудуддаги ноқонуний қурилмаларни бартараф этиш амалий чора-тадбири вилоят марказида давом этмоқда. Шаҳарнинг Ибн Сино, Пиридастгир, ва Б.Нақшбанд кўчаларида назорат тадбирлари ўтказилиб фуқаролар томонидан ўзбошимчалик билан эгаллаб олинган бино иншоотлар бартараф қилинди.

Эслатиб ўтамиз, ер қонунбузилишини содир этган шахс томонидан ер участкаси қайтарилиши таъминланиб, оқибатлари бартараф этилса, ер қонунбузилишини содир этган шахсга нисбатан маъмурий жарима жазоси қўлланилмайди!

Buxoro.uz | Facebook | Instagram | YouTube

#Креатив_парк
#Бухоро_шаҳар

Ўзбекистон Республикаси Президенти Шавкат Мирзиёев раҳбарлигида 2023 йил 11 апрель куни кенгайтирилган тарзда ўтказилган видеоселектор йиғилишида IT, реклама, кино, архитектура, дизайн, маркетинг, ҳунармандчилик, рассомчилик каби йўналишларда ёшларнинг иқтидорини қўллаб-қувватлашга зарур шароит яратиш мақсадида ҳар бир ҳудудда биттадан “Креатив парк” ташкил этиш вазифаси юклатилган.

Мазкур топшириқ ижроси таъминлаш мақсадида Бухоро шаҳридаги “Ширбудин” маҳалла фуқаролар йиғинида жойлашган “Сувчилар боғи” ҳудудида ёшларнинг иқтидорини қўллаб-қувватлаш учун зарур шароит яратиш мақсадида анимация дарслар, семинар тренинг ва амалий машғулотлар, ижодий учрашувлар, кўргазмалар учун майдонлар, шунингдек, воркаут, болалар майдончаси, айвонли ўриндиқ (беседка) ҳамда сунъий қопламали футбол майдончасини ўз ичига олган “Креатив парк” ташкил этилди.

Шунингдек, бу масканда ижодкор ёшлар, ҳунарманд ва ёш рассомларни креатив қобилиятларини рўёбга чиқаришлари учун қўшимча шароитлар яратилди.

Бугун, 10 февраль куни мазкур паркни фойдаланишга топшириш маросими ўтказилди. Унда сўз олганлар ёшларнинг бўш вақтини мазмунли ўтказиш, уларнинг ғоя ва ташаббусларини қўллаб-қувватлашга хизмат қилишини алоҳида таъкидлаб, ҳудуд аҳолисини мазкур парк билан табриклашди.

Шундан сўнг маҳалла аҳолиси, кенг жамоатчилик вакиллари парк ҳудудида яратилган шароитлар билан яқиндан танишишди.

Маълумот ўрнида, “Креатив парк”ни пудратчи "Bukhara building" МЧЖ уста-муҳандислари 2,3 млрд сўм маблағ эвазига қисқа муддатда бунёд этишди.

Buxoro.uz | Facebook | Instagram | YouTube