Ўзбекистон Электрон оммавий ахборот воситалари миллий ассоциацияси (ЎзЭОАВМА) COVID-19 коронавирусининг тарқалишига қарши курашда мамлакатимиз фуқароларининг руҳий бардамлигини кўтариш мақсадида кенг қамровли #birgakurashamiz #вместепобедим хэштеги остидаги янги челленжни ишга туширмоқда.

Челленж доирасида ўзбекистонликлар телеканалларнинг электрон ва ижтимоий тармоқдаги манзилларига карантин даврида бўш вақтни қандай ўтказаётганлари, болаларига қай йўсинда таълим-тарбия бераётганлари ҳақидаги видеолавҳаларини юборишлари керак бўлади.

Бу челленжда барча иштирок этиши мумкин.

Бундан ташқари барча телеканаллар томонидан коронавирусга қарши курашаётган тиббиёт ходимларининг, ҳуқуқ-тартибот идоралари вакилларининг фидокорона ҳаракатлари акс эттирилган лавҳалар намойиш қилинади.

Қайд этиш ўринлики, мавжуд вазият талабларидан келиб чиқиб, миллий телеканалларимиз ўз дастурларига муайян ўзгартиришлар киритишган.

«Биз ассоциациямизга аъзо бўлган барча телеканаллар, радиостанциялар, кабель телевидениеси студияларига коронавирус эпидемиясига қарши курашда кўрсатилаётган фаол фуқаролик позицияси учун самимий миннатдорлик билдирамиз», — дейди ЎзЭОАВМА раҳбари Фирдавс Абдухолиқов.

@koronavirusinfouz
#vahimasizkarantin
#карантинбезпаники