#кэрээйгэ

⭐️ Ил Түмэн депутата Владимир Поскачин скульптор Николай Чоччасовы персональнай быыстапкатынан эҕэрдэлээтэ.

Арассыыйа худуоһунньуктарын Сойууһун уонна Саха Өрөспүүбүлкэтин худуоһунньуктарын бырабылыанньатын чилиэнэ, киэн туттар биир дойдулаахпыт Николай Никитич Чоччасов "Рождение мифа" быыстапкатын Дьокуускай куоракка туруорда.

Владимир Поскачин быыстапкаҕа сылдьан: "Эн айбыт үлэлэриҥ куорат араас муннуктарын киэргэтэллэр, дьону сөхтөрөллөр. Саха сиригэр кэлбит ыалдьыттары аэропортка уруйдуу көрсөр хомпоруун хотой төбөтө, хорсун саха кырачаан кыыһа Карина, Сэбиэскэй Союз Героя Н.А.Кондаков скульптуралара саха норуота модун санаалааҕын, ханнык да ыарахаттартан чаҕыйан турбакка олох иһин охсуһарын, инникигэ эрэллээҕин туоһулууллар. Оттон "Чурочник" уонна "Дворник" диэн дьикти оҥоһуктаргын араас кэмнэргэ Дьокуускай куорат сайдарыгар бэйэлэрин сэмэй кылааттарын киллэрбит, билигин да киллэрэр боростуой үлэһит дьоҥҥо анаабыккын. Бу үлэлэриҥ Эн норуоттан тахсыбыккын, ол иһин норуокка чугаскын, кинини сыаналыыргын, ытыктыыргын кэрэһэлииллэр. Биһиги, Үөһээ Бүлүүлэр, киэн туттар кэрэ символбыт, "Хотун Бүлүү" эбэҕэ анаммыт скульптура биир тутаах автора Анисим Прокопьевтан тымыр тардар буолаҥҥын, айар кутуҥ силистээх-мутуктаах, дириҥ күүстээх. Эһэҥ айбыт "Хотун Бүлүүтэ" Аан дойдуга өрүскэ анаммыт биир бастакы скульптура буолар, ону салҕаан, саха дьонун тыйыс дойдуга уһун тыыннаабыт улуу эбэбит Өлүөнэ уобараһын айбытыҥ Өлүөхүмэ куорат биир саамай кэрэ киэргэлэ буолан турар. Дьэ онтон, дойдуҥ, Үөһээ Бүлүүҥ, иккис символа буолбут "Үс хоһуун" скульптураҥ геройдара, аатырбыт бөҕөстөр, Ийэ Дойдуларын уоттаах сэриигэ көмүскээбит буойуннар, умнуллубат Манчаары оонньуутун саҕаттан "үс куттаах үс хоһуун, үс саха биир ньыгыл сүдү күүс буоланнар, кыайыыга кынаттыы тураллар"! Бу
скульптура "Үөһээ Бүлүү өрүү үөһэ, өрүү үөһэ Үөһээ Бүлүү" диэн Сомоҕолоһуу бэлиэтэ буолан, биһигини инники кыайыыларга, түмсүүгэ, сайдыыга ыҥыра туруо!" - диэн эҕэрдэ тылын анаата.

"Үөһээ Бүлүү" хаһыат

#култуура #кэрээйгэ

⭐️ Бүгүн, кулун тутар 16 күнүгэр, Саха академическай театрыгар Үөһээ Бүлүү улууһун Балаҕаннаах нэһилиэгин "Балаҕаннаах бэтиэхэлэрэ" норуот театра көр-күлүү дьоро киэһэтин Дьокуускай куорат олохтоохторугар уонна ыалдьыттарыгар бэлэхтээтэ.

Концерды "Саҥа күн" биэрии ыытааччыллара Ньургуйаана Ботуева, Никита Аянитов иилээн-саҕалаан ыыттылар.

"Эн сулускун" проект кыттыылааҕа Варвара Поскачина, "Туймаада" государсвеннай ансамбль солиһа Валерий Раменскай ылбаҕай ырыаларынан киэргэттилэр.

Көрөөччүлэр театр артыыстара оонньообут көрдөөх сценкаларын дохсун ытыс тыаһынан биһирээтилэр.

"Үөһээ Бүлүү" хаһыат

#кэрээйгэ

⭐️ Ороһу норуот тыйаатыра аатын көмүскүүр харах уулаах "Кэрэ көмүскэлэ" испэктээги нэһилиэнньэ көрүүтүгэр таһаарда.

Туруорааччы режиссер Розалия Акимова

Сарсын 16:00 чаастан дьүүллүүр сүбэ иннигэр көрдөрүөхтэрэ.

"Үөһээ Бүлүү" хаһыат

#кэрээйгэ

⭐️ Ольга Григорьева аатынан Боотулуутааҕы норуот тыйаатыра аатын көмүскээтэ

Бэс ыйын 7 күнүгэр "Норуот самодеятельнай коллектива" дьүүллүүр сүбэ иннигэр аатын чиэстээхтик көмүскээтэ.

Варвара Буртахова режиссердаах норуот тыйаатыра бу күн сыанаҕа Былатыан Ойуунускай айымньытынан «Ыраахтааҕы ыйааҕа» испэктээги уонна «Боккуойа» музыкальнай инсценировканы туруорда.

Аттестациялыыр хамыыһыйаҕа Өрөспүүбүлүкэтээҕи Норуот айымньытын дьиэтин уус-уран салайааччыта Алексей Захаров, П.Ойуунускай аатынан Сахатеатр артыыһа,
Михаил Апросимов уонна Өрөспүүбүлүкэтээҕи Норуот айымньытын дьиэтин генеральнай дириэктэрэ Николай Дмитриев үлэлээтилэр.

@uoheebuluu

#кэрээйгэ

⭐️Үөһээ Бүлүүттэн норуот маастара Анастасия Борисова "Душа России" куонкуруска

Дойду тэбэр сүрэҕэр - Москва куоракка Гостинай дворга бэс ыйын 8 күнүттэн 16 күнүгэр диэри "Душа России" диэн кырадаһыннарынан аттаран тигии куонкурса буола турар.

Үөһээ Бүлүүттэн адвокат идэлээх Анастасия Борисова өрөспүүбүлүкэ, Бүтүн Россия, норуоттар икки ардыларынааҕы куонкурустар кыттыылааҕа, дипломаннара. Бу куонкуруска Саха сирин аатыттан уопсайа үс кыттааччылаах. Онтон биирдэстэрэ Анастасия Борисова.

"Саха Дьон" диэн ааттаах валяние коллекциятынан кыттан дьон сэҥээриитин ылла. Куонкурус түмүктэннэҕинэ түмүгэ тахсарын долгуйа кэтэһэбит.

"Үөһээ Бүлүү" хаһыат

#кэрээйгэ

⭐️ Кэрэтэ суох олох туругурбат

Олунньу 15 күнүгэр И.С.Семенов аатынан Үөһээ Бүлүүтээҕи норуот тыйаатыра Борис Павлов “Сюзанна” айымньытынан “КЭРЭТЭ СУОХ ОЛОХ ТУРУГУРБАТ” 70 кыттааччылаах музыкальнай испэктээгин Харбалаах нэһилиэгэр туруорда.

Бу тэрээһин уһулуччулаах бэлэтиичэскэй диэйэтэл, Саха сирин Автономиятын төрүттэспит И.Н.Бараахап аатын сүгэр саҥа култуура киинин арыйан үөрүүлээх күҥҥэ бэлэх кэриэтэ буолла.

Харбалаах олохтоохторугар саҥа дьиэҕэ бастакынан турбут испэктээк сонун буолан, көрөөччүлэр биир тыынынан көрдүлэр.

Норуот тыйаатырын артыыстара уонна салайааччы Сайыына Васильева итии чэйдээх, сылаас аһылыктаах көрсүбүт Харбалаах нэһилиэгин ытык мааны дьонугар махтанан, уруй-айхал тылларын аныыр.

"Үөһээ Бүлүү" хаһыат

#кэрээйгэ #тыйаатыр

⭐️ Былатыан Ойуунускай аатынан саха драматическай тыйаатыра Бүлүү бөлөх улуустарынан уһун айаҥҥа туруммут сааскы гастролун Үөһээ Бүлүүттэн саҕалаата.

Улуу Кыайыы 80 сылыгар, Дойдуга - Аҕа Дойдуну, Өрөспүүбүлүкэҕэ Ийэ дойдуну көмүскээччи сылыгар анаммыт гастрол бастакы күнүгэр байыаннай драманы көрдөрдүлэр.

Бу киэһэ Борис Васильев аатырбыт «А зори здесь тихие…» сэһэнинэн турбут харах уулаах «Сарсыарда. уу-чуумпуга…» диэн сэрии драматын театр уус уран салайааччыта Андрей Борисов үөрэнээччитэ режиссер Роман Дорофеев туруоруутугар көрдөрөн, көрөөччүлэр куттарын туттулар, уйулҕаларын хамсаттылар, уостан бүппэт ытыс дохсун тыаһын хомуйдулар.

Спектакль иннинэ артыыстары Олоҥхо дьиэтигэр арыылаах алаадьынан айах туттулар, уохтаах бырпаҕынан күндүлүү көрүстүлэр. Култуура уонна духуобунай сайдыы департаменын салайааччыта Айталина Мойтохонова артыыстары өҥ буордаах Үөһээ Бүлүү сиригэр үктэммиттэринэн уруйдаата. Норуот айымньытын киинин дириэктэрэ Анна Герасимова СӨ норуодунай артыыскатыгар, киэн туттар биир дойдулаахпытыгар - Домна Уйгуроваҕа сибэкки дьөрбөтүн туттарда.

Театр сүрүн режиссера Руслан Тараховскай Саха сирэ бүттүүнэ киэн туттар, астына көрөр артыыстарын биир-биир билиһиннэрэн, биир дойдулаахтарыгар, үөһээ бүлүүлэргэ эҕэрдэ тылын анаата.
Гастроллуур биригээдэ салайааччыта Илья Стручковка тыл биэрдэ.

Оттон сарсын киэһэ 19:00 чаастан Иван Гоголев - Кындыл айымньытынан көстүбэт күүстээх "Хара кыталык" драматын көрөөччүлэргэ бэлэх уунуохтара. Сүрүн оруолга СӨ култууратын туйгуна Жанна Ксенофонтова оонньуоҕа.

Кэлиҥ, көрүҥ, сэргээҥ, сэҥээриҥ.

"Үөһээ Бүлүү" хаһыат

#кэрээйгэ

⭐️ "Декор" дизайн мастарыскыайын иитиллээччилэрин быыстапката турда

"Тускул" оҕо киинин эбии үөрэхтээһинин педагога Мария Павлова салайар мастарыскыайыгар дьарыктанар оҕолор үлэлэрэ бүгүн аан бастакытын киэҥ эйгэҕэ таҕыста.

Быыстапка кэмигэр дьаарбаҥкаҕа уруһуй алыбар ылларбыт оҕолор үлэлэрэ атыыга хамаҕатык барда.

Мария Платоновнаны бастакы улахан быыстапкатынан "Тускул" оҕо киинин дириэктэрэ Мария Волкова эҕэрдэлээтэ.

Улахан дьоҥҥо ыытар маастар кылаастарыгар икки сыл устата утумнаахтык дьарыктаммыт Антонина Хобусарова уруһуй эйгэтин кытары билиһиннэрбитигэр махтанан туран, уһуйааччытыгар аалай кыһыл роза дьөрбөтүн туттарда.

Ону тэҥэ мастарыскыайга дьарыктанар оҕолор төрөппүттэрин ааттарыттан эҕэрдэ тылы Иранна Макарова эттэ.

Олоҥхо дьиэтигэр утары уруһуй куруһуогар сылдьыан баҕалаах оҕолорго маастар кылаас тэрийдилэр. Мария Павлова үөрэтиитинэн утары объемнай хартыына уруһуйдаан дьиэлэригэр илдьэ бардылар.

Бу быыстапканы сарсын эмиэ Олоҥхо дьиэтин саалатын иһигэр кэлэн көрүөххүтүн сөп.

@uoheebuluu

#кэрээйгэ

⭐️ Уйбаан Сэмиэнэп олоҕо - оҕолор хартыыналарыгар

Быыстапкаҕа сүрүн миэстэни оҕолор коллективынан үлэлэрэ ылла. "Декор" мастарыскыайга дьарыктанар оскуола орто уонна улахан кылаас оҕолорун холбоһуктаах үлэлэрэ сыл устата бэлэмнэннэ.

Бу үлэҕэ Мария Павлова эһэтэ СӨ култууратын үтүөлээх үлэһитэ, Үөһээ Бүлүүтээҕи норуот тыйаатырын артыыһынан, өр сылларга оройуоннааҕы култуура дьиэтин дириэктэринэн үлэлээбит, үгүс ырыа ааптара, мелодист Иван Спиридонович Семенов оҕо сааһын түгэннэриттэн үйэтитиллибит хаартыскалары холустаҕа түһэрэн хартыына оҥорон таһаарбыттара көстөр.

@uoheebuluu

#кэрээйгэ

⭐️ Нам нэһилиэгэр Бүлүү улууһун народнай хора ыалдьыттаата

Нам нэһилиэгэр "Кыайыыны ырыанан үйэтитэн" кэнсиэринэн Владимир Васильев аатынан народнай хор уонна Бүлүү куоратын уус-уран самодеятельноһын кыттыылаахтара ыалдьыттаатылар.

Аҕа дойду Улуу сэриитигэр Кыайыы 80 сылыгар аналлаах СӨ култууратын үтүөлээх үлэһиттэрэ Марфа уонна Владимир Васильевтар бырайыактарынан туруоруллубут кэнсиэр режиссера СӨ култууратын туйгуна Мария Иванова.

@uoheebuluu
@oloxsuola01

#кыһа #кэрээйгэ

Ыам ыйын 30 күнүгэр Николай Бойлохов аатынан Үөһээ Бүлүүтээҕи оҕо искусство оскуолатыгар үөрүүлээх күн үүннэ - оскуоланы түмүктүүр выпускной долгутуулаах түгэнэ буолла.

Быйыл искусство кэрэ эйгэтин - художественнай, хореография, фольклор, народной инструменнар отделениеларын уонна театр кылааһын барыта 68 выпускник үөрэнэн бүтэрэн, ситии свидетельствотын директор Иванов А.В. илиититтэн туттулар. Выпускниктары, учууталлары уонна төрөппүттэри Үөһээ Бүлүүтээҕи культура уонна духуобунай сайдыы департаменын салайааччыта Мойтохонова А. М. эҕэрдэлээтэ, бары үтұөнү баҕарда.

Бэлиэтээн эттэххэ, сылын аайы үтүө үгэс быһыытынан, Николай Бойлохов оҕолоро, сиэннэрэ бастыҥ выпусникка уонна учууталга анал бириэмийэни туттараллар. Быйыл бу бириэмийэни Александр Николаевич Бойлохов эҕэрдэ бастыҥын этэн туран, хореография кылааһын бүтэрбит Платонова Эвелинаҕа уонна Николай Бойлохов үөрэнээччитигэр, сольфеджио учуутала Софья Николаевна Михайловаҕа туттарда.

Биир ураты, бэлиэ түгэнинэн оҕо искусство оскуолатын Кэнтик нэһилиэгиттэн быйыл биир ыалтан 3 талааннаах кыргыттар Герасимовалар үөрэнэн бүтэрбиттэрэ буолар.

Бары выпускниктарбытыгар инники олохторугар искусство эйгэтигэр үөрэммиттэрэ туһалаах буолуо диэн эрэнэн туран, бары үтүөнү, сырдыгы баҕара хаалабыт! 👏👏👏💐💐💐

Анастасия Данилова, Н. И. Бойлохов аатынан оҕо искусство оскуолатын методиһа

"Үөһээ Бүлүү" хаһыат