#отчуот

✅ Тамалакаан орто оскуолатын нуучча тылын учуутала Агния Иванова уот, газ тарыыба сылга иккитэ үрдүүрүн кытта тэҥҥэ, тоҕо хамнас эбиллибэтин ыйытта.

Ону тэҥэ саха тылын харыстааһыныгар уонна сайыннарыытыгар төһө өйөбүл баарын уонна ханнык программа үлэлиирин туоһуласта.

Эппиэти миниистир Гаврил Кириллин биэрдэ:
- Төрүт тыл харааныгар аналлаах государственнай программа ылыныллыбыта 3 сыл буолла. Сыл аайы сөптөөх үп көрүллэр. Холобур, ааспыт сылга 56,5 мөл. солк. көрүллүбүт. 2022 сылга Ил Дархан төрүт тыллары үөрэтэргэ уонна чинчийэргэ анал киин тэрийэргэ сорудахтаан турар. Быйылгы сорудаҕар Дьокуускай куоракка биир оскуоланы ойо тутан сахалыы тылынан үөрэтэр оскуола баар буолуохтаах диэн. Манна анаан хамсааһын тахсан, үлэ тэтимнээхтик бара турар. Быйылгыттан бу хайысхаҕа икки бүк улаатта. Мантан сиэттэрэн, саха тылын харааныгар сыһыаннаах бырайыактар элбиэхтээхтэр. Маныаха анаан олохтоммут граҥҥа бастыҥ бырайыакка куонкурус биллэриллиэҕэ.

#отчуот

✅ Тамалакаан орто оскуолатын дириэктэрэ Спиридон Иванович Федоров ФГОС бырагырааматыгар киирбит учебниктары атыылаһар наадатыгар оскуола бюджетын 70% орокуоттанаары турарын иһитиннэрдэ. Ону тэҥэ оскуолаҕа 5 үлэ миэстэтэ аһаҕас турар эбит. Эдэр учууталлар тыаҕа кэлэллэрин наадатыгар тыа сирин учууталларын хамнаһын үрдэтэллэригэр эттэ.

#отчуот

✅ Тамалакаан орто оскуолатын Октябрина Федорова анал байыаннай эпэрээсийэҕэ сылдьар оҕолоох ийэ быһыытынан бэбиэскэ тутан барбыт байыастар 3 ый буолан баран булгуччу бэрээдэгинэн уоппускаҕа хайаан да кэлиэхтээхтэрин ийэлэр туруорсабыт диэн боротокуолга киллэттэрдэ.

Ыарахан усулуобуйаҕа сылдьар оҕолор, уолаттар дойдуларыгар кэлэн киһилии аһаан, утуйан сынньаныахтаахтар.

Анал байыаннай дьайыы кыттыылаахтарын тула киирбит бары боппуруостар, туруорсуулар төһө кыалларынан түргэнник быһаарыллыахтара диэн ситэриилээх былаас үлэһиттэрэ эппиэттээтилэр.

#отчуот

✅ Тамалакаан олохтооҕо Валерий Гаврильев гсм боппуруоһун таарыйда. Сайын от кэмигэр сэлээркэ сыанатын хонтуруоллуулларын, бырабыыталыстыба өттүттэн дойду таһымыгар туруорсуллуохтааҕын эттэ.

#отчуот

✅ Тамалакаан нэһилиэгин олохтооҕо Святослав Иванов тыа дьонугар харгыстары үөскэтэр сокуоннары тула үгүс боппуруоһу таарыйда.

Ол курдук, скоростной режимҥэ ыстараап баарын туһунан извещение кэлбэтин, саа көҥүлүн, балбаах туһунан саҥа сокуону, Роскосмос ыытар ракеталарын дьайыылара тоҕо сабыылааҕын, улуус киинин балыыһатыгар тыаттан көрдөрүнэ киирэр дьон уочаракка хабыллыыта о.д.а.

Суут-сокуон, быраап өттүгэр хоруйу улуус прокурора Прокопий Слепцов биэрдэ: - Саа ирдэбилэ сылтан сыл кытаатан иһэр. Скоростной режим ыстараабын илиигэ туппут кэннэ 10 хонук иһигэр ааһынар бырааптааххыт.

Ыксаллаах быһыы-майгы үлэтин тэрийэр хамыыһыйа бэрэссэдээтэлин быһыытынан Семен Михалев: - Ракета көтүүтүн траекторията уларыйар кыаҕа суох. Ракета түспүт тобохторун көрдөөһүнүгэр Үөһээ Бүлүү быыһыыр сулууспатын уолаттара сылдьаллар. Куһаҕан дьайыы баара буоллар тута билиэ этибит.

#отчуот

✅ Тамалакаан орто оскуолатын учуутала Маргарита Иванова ТКО - кытаанах эттиктээх бөҕү-саҕы урукку курдук миэстэтигэр дьаһанан олорор наадалааҕын ыйда. Үөһээ Бүлүү свалкатыгар ый аайы илдьэн тохпотторун, кураанахтыы харчы хомуйуута буоларын эттэ.

#отчуот

✅ Тамалакаан нэһилиэгин бэтэринээрэ Галина Пахомова тыаҕа бэтэринээр тиийбэтин ыйда. АГАТУ кыһатыгар Үөһээ Бүлүү оҕолоро үөрэммэттэрин кэриэтэ, хамнас кыра диэн тыаҕа ким да кэлбэтин бэлиэтээтэ.

Ону тэҥэ "Земскэй быраас" курдук бырагырааманы тыа хаһаайыстыбатын специалистарыгар анаан көрөллөрө буоллар диэн этии киллэрдэ.