#егэ #ситиһии #кыһа

⭐️ Үөһээ Бүлүүттэн Евдокия Николаева историяҕа биир кэлим эксээмэни 100 баалга туттарда

Өрөспүүбүлүкэ үрдүнэн история предметигэр муҥутуур баалы ылбыт бастакы выпускник буолла.

Евдокия 9 кылааһы Үөһээ Бүлүүтээҕи лицей-интернаты бүтэрэн баран салгыы Норуоттар икки ардыларынааҕы Арктика оскуолатын ааспыт сылга түмүктээбитэ.

Былырыын нуучча тылын 100 баалга туттаран Ил Дархан Айсен Николаевтан 100 тыһыынчалаах бириэмийэни ылбыта.

"Былырыын бааллара үрдүк этэ, хас да үрдүк үөрэхтэн 100 бааллаах выпускник диэн биһиэхэ киирэн үөрэн диэн ыҥырбыттара. Ону эһиил туттарыам диэн биир сыл үөрэхтэн сынньанан, чопчу ханнык үөрэххэ киирэрбин толкуйдуом диэн докумуоннарын биэрбэтэҕэ.
История предметин таах туттарбакка хаалбыппын диэн быйыл эбии историяны уонна английскай тылы туттарда. Билигин омук тылын эксээмэнин түмүгүн күүтэбит. Историяны туттарарыгар Үөһээ Бүлүүтээҕи лицей выпускнигын быһыытынан туттарда. Онон бу ситиһии улуус туһатыгар ааҕыллар", - диэн Евдокия ийэтэ Лариса Семеновна Верховцева кэпсээтэ.

Оттон Евдокия аҕата Василий Валерьевич Николаев улууспут Аҕа баһылыга Валерий Николаев бииргэ төрөөбүт быраата. Николаевтар дьиэ кэргэттэригэр, аймахтарыгар биир кэлим эксээмэни 100-түү баалга туттарбыт ыччаты иитэн таһаарбыккытынан эҕэрдэ бастыҥа буолуохтун!

"Үөһээ Бүлүү" хаһыат

#иһитиннэрии #кчс

✅ Бэс ыйын 29 күнүттэн Үөһээ Бүлүү оройуонугар ойуур баһаарыттан сибээстээн ыксаллаах быһыы-майгы балаһыанньата биллэрилиннэ

Улуус баһылыгын бастакы солбуйааччыта Егор Иванов бэрэссэдээтэллээх улуус ыксаллаах быһыыга хамыыһыйатын быһаарыытынан, маннык балаһыанньа муниципальнай суолталаах ойуурдарга биллэрилиннэ.

Бүгүҥҥү күҥҥэ балаһыанньа хайдаҕын Үөһээ Бүлүүтээҕи ойуур хаһаайыстыбатын лесничейэ Павел Тимофеев иһитиннэрдэ:

- "Кырыкый нэһилиэгиттэн 44 км тэйиччи сиргэ - Түҥҥэ бэс ыйын 24 күнүгэр турбут ойуур уота бүгүҥҥү туругунан иэнэ 832 гектарга тиийдэ. Онтон 62 га верховой. Ойуур баһаарын умуруоруу үлэтигэр уопсайа 105 киһи үлэлии-хамсыы сылдьаллар. Онтон 54 үлэһит Бүлүү, Ньурба улуустарыттан кэлэн көмөҕө тахсыбыттара. Мобилизация көмөтүнэн нэһилиэнньэттэн 23 киһи баҕа өттүнэн уоту умуруорууга үлэлии тахсыбыта. Баһаар соҕуруу өттө күүскэ умайар.

Билигин бу баһаарбытыгар икки критерий киирэн, улууспутугар бэҕэһээ ыксаллаах балаһыанньаны биллэрдибит.
Баһаарбыт иэнэ улаатан уонна ойуур баһаарын умулларар күүстэрбит 50 %-тан элбэх киһи баһаарга үлэлии сылдьалларынан сибээстээн."


✅ Мантан сиэттэрэн, ыксаллаах балаһыанньа биллэриллибитин кэннэ ойуурга тахсыы, уоту оттуу, айылҕаҕа тахсан шашлыктааһын кытаанахтык бобулларын өссө төгүл санатабыт.

Улуус дьаһалтатын уурааҕар олоҕуран, нэһилиэктэр баһылыктара суһал хамсаныынан миэстэлэригэр ыстаап тэринэн, уоту умуруорар тэриллэринэн хааччынан, водоемнары уунан толору хааччыйан, баһаарынай сулууспа үлэһиттэрэ үлэлэрин күүһүрдэн, бэлэмнээх олороллоругар, баһаартан сэрэхтээх буолуу инструктаһын нэһилиэнньэҕэ тириэрдиини күүһүрдэргэ сорудахтанна.

"Үөһээ Бүлүү" хаһыат
@uoheebuluu
@ulusmedia_admin