#отчуот
✅Балаҕаннаах нэһилиэгэр Бырабыыталыстыба 2022 сыллааҕы үлэтин отчуоттуур Гаврил Кириллин салайааччылаах бөлөх олунньу 17 күнүгэр кэллэ. Олохтоохторго отчуот иннигэр өрөспүүбүлүкэ ыытар тэрээһиннэрин кэпсиир видео көрдөрдүлэр, онтон кылгас дакылаат быһыытынан ааста.

Биэнсийэлээх Егор Гаврильев биэнсийэни цифровой харчыга көһөрүөхтэрэ дуо диэн ыйытта.
Манна миниистир Гаврил Кириллин өрөспүүбүлүкэ үрдүнэн 90% цифровизацияҕа көһөн олоробут диэтэ. Маныаха анаан интернет ситимэ киириэн наада. Былырыын 15 нэһилиэнньэлээх пууҥҥа оптоволокно ситимэ киирбитэ. Былаан быһыытынан 2025 сылга диэри өрөспүүбүлүкэ бүттүүнэ сибээстээх буолуохтаах. Онуоха диэри биэнсийэни харчынан ылыаххыт диэн быһааран биэрдэ.

Билигин бочуоттаах сынньалаҥҥа олорор Балаҕаннаах агрооскуолатын үлэтин саҕалаабыт, өр сылларга дириэктэринэн үлэлээбит Лидия Тихоновна Васильева кымыһынан дьарыктанар кыра комплектаах агрооскуола үбүлээһиҥҥэ, сокуоҥҥа сөп түбэспэтиттэн сылтаан, хапсыбат диэтэ. Бу боппуруос туруорсуллара наадалааҕын ыйан туран мунньах боротокуолугар киллэрдилэр.

Олохтоох бибилэтиэкэ үлэһитэ Туйаара Егорова биэстэн элбэх оҕолоохтор мөлүйүөн солкуобайы ылар бэрээдэктэрин сураста.

Балаҕаннаах нэһилиэгин баһылыга Степан Дмитриев сүрүн туруорсар боппуруос оскуола тутуллуута буоларын эттэ.
- Улууска сылгылаах, кымыс оҥорон атыылыыр оскуола суох. "Үрэх" диэн кооператив тэринэн үлэлии олороллор, тыа хаһаайыстыбатын министерствотын өттүттэн төбөҕө субсидия ылаллар. Ол эрэн учууталларга эбии төлөбүр көрүллүбэт. Улуус дьаһалтата, үөрэх управлениета Борбуев көмөлөһөн кухняланан олоробут.

Предпринимательство министерствотын департаменын салайааччыта Лилия Золотарева атыы-эргиэн өттүгэр араас көрүҥнээх табаардары маркировкалааһын, олохтоох оҥорон таһаарыыга көрүллэр субсидия туһунан кылгастык иһитиннэрии оҥордо.

Түмүккэ нэһилиэк баһылыга олохтоохтор ааттарыттан Бырабыыталыстыба ыытар үлэтин биһирииллэрин биллэрдэ, тыа дьонун кыһалҕатын өйдүү туталларын баҕаралларын эттэ.

#отчуот

✅ Үөһээ Бүлүү киинигэр ситэриилээх былаас отчуоттуур мунньаҕа култуура дьиэтигэр саҕаланна. Үөһээ Бүлүү улууһун кураторынан сыһыарыллыбыт СӨ транспорт уонна суол хаһаайыстыбатын миниистирэ Владимир Сивцев салайааччылаах бөлөх улууска үлэтин түмүктээтэ.

Улуус баһылыга Владимир Поскачин икки күн устата нэһилиэктэринэн ыытыллыбыт отчуокка дьон көхтөөҕүн, сөптөөх этиилэр, туруорсуулар киирбиттэрин бэлиэтээтэ. Түмүктүүр мунньахха Ил Түмэн дьокутаата Феодосия Габышева кыттыыны ылар.

Мунньах бастакы чааһыгар Бырабыыталыстыба наҕараадаларын туттардылар.

Ол курдук, миниистир Владимир Сивцев Ил Дархан Айсен Николаев Ыйааҕынан олохтоммут Саха Автономиятын 100 сыллаах үбүлүөйдээх бэлиэтин Николай Еттяновка, Григорий Андреевка туттарда.

"СӨ автомобильнай транспорт бочуоттаах үлэһитэ" түөскэ кэтэр бэлиэнэн "Верхневилюйск" МТС ХЭТ суоппара Анатолий Герасимов уонна 4-с нүөмэрдээх Д.С.Спиридонов аатынан орто оскуола суоппара Владимир Седалищев наҕараадаланнылар.

Доруобуйа харыстабылын систиэмэтигэр уонна нэһилиэнньэ доруобуйатын харыстабылын дьыалатыгар кылааттарын иһин үрүҥ халааттаах үлэһиттэр бэлиэтэннилэр.

Ол курдук, "СӨ доруобуйа харыстабылын туйгуна" түөскэ кэтэр бэлиэни улуустааҕы киин балыыһа санитарката Ульяна Ананьева, ыарыһахтары буостуктуур младшай медицинскэй сиэстэрэ Сааскылаана Барахова-Корякина, профилактика кабинетын медицинскэй сиэстэрэтэ Ольга Тумусова уонна акушерка Лариса Уйгурова ураты бэлиэни миниистир илиититтэн туттулар.

#отчуот

✅ Улуустааҕы спорт управлениетын начальнига Егор Николаев Бүлүү бөлөххө саанан ытыы опорнай базатын тэрийэн, оҕолору дьарыктыырга усулуобуйаны тэрийэргэ, 100 сыллаах үбүлүөйүн бэлиэтээри олорор физическэй культура уонна спорт министерствотын өйөөн, көмөлөһөллөрүгэр көрдөстө.

#отчуот

✅ Харбалаах нэһилиэгин баһылыга Константин Платонов нэһилиэгэр оскуола-саад тутуутун туруорсар суругун миниистир Владимир Сивцевка илиитигэр туттарда.