#сонунбырайыак

⭐️ Бүөтүр Тобуруокап аатынан норуот айымньытын дьиэтэ айар үлэтин саҕалаата

Ол курдук, бэлиэ күн ураты түгэнтэн саҕаланна! Айар бөлөх 2022 сыллаахха улахан экраҥҥа тахсыбыт «Спирит» аатырбыт ойуулугу сахалыы тыыннаан, доҕуһуоллаан, көрөөччү кыраҕы дьүүлүгэр туруорда. Бырайыак ураты култуурунай түгэн быһыытынан сыаналанна уонна омуктуу айымньылар төрөөбүт тылбытыгар көҥүл тылбаастанан бэйэлэрин көрөөччүлэрин булар кыахтаахтарын көрдөрдө.

Омук ойуулугун саха тылыгар тылбаастаан уонна муусуканан доҕуһуоллаан көрдөрүүнү Бүөтүр Тобуруокап аатынан норуот айымньытын дьиэтин музыканнара кыайа-хото туттулар. Бырайыак ааптара Дмитрий Дьячковскай бэлиэтээбитинэн, бу коллектив бастакы холонуута буолар. Уустук эрээри, интэриэһинэй тургутууну ситиһиилээхтик толорбуттарын салайааччы махтана, киэн тутта кэпсээтэ.

Ойуулугу ураты тыыннаан көрдөрөр кэмҥэ оҕолор да, улахан да дьон олус сөхтүлэр- махтайдылар. Саха традиционнай музыкальнай инструменнарыгар толоруллубут тыыннаах доҕуһуолу кытта ойуулугу сахалыы саҥардыы уратыта, эпичнайа көрөөччүлэр куттарын тутта.

Туруоруу түмүктэниитигэр кинилэр сылаас махталларын уонна соһуччу үөрүүлэрин ытыс тыаһын уһун доҕуһуолунан биллэрдилэр.

Дмитрий Дьячковскай инникитин хамаанда былаана элбэҕин уонна атын ойуулуктары салгыы сахалыы тыыҥҥа туруорар санаалаахтарын кэпсээтэ. Бу олохтоох култуура эйгэтигэр саҥа саҕахтары арыйар уонна көрөөччүлэр сөбүлүүр ойуулуктарын ураты толоруунан дуоһуйалларыгар кыаҕы үөскэтэр.

Айар коллективка инникитин да ситиһии сиэттиһэ турарыгар, көрөөччүнү соһуччу үөрдэр сонунтан сонун бырайыактары, саха култуурунай нэһилиэстибэтин барҕара сайыннара туралларыгар баҕа санаабытын тиэрдэбит.

Сахалыы тылынан оруоллары саҥартылар:

Спирит - Айан Саввинов, Дмитрий Дьячковскай
Лакота - Афанасий Миронов
Офицер - Борис Титов
Капрал - Андрей Алексеев

Каадыр кэннигэр тиэкис: Дмитрий Дьячковскай

Ырыалары толордулар: Андрей Иванов, Айан Саввинов, Дмитрий Дьячковскай

@ueheebuluu @ulusmedia