#уһуйаан #кыһа #күрэх #всейсемьей

⭐️ Уһуйааннар төрөппүттэригэр аналлаах күрэх аҕалары түмтэ

Бүгүн 3-с нүөмэрдээх оҕо сайдар киинин "Үрүйэчээн" уһуйаан иитээччилэрин көҕүлээһининэн, Аҕа күнүн көрсө, Үөһээ Бүлүүтээҕи оҕо уһуйааннарын иитиллээччилэрин аҕаларын икки ардыларыгар улууспутугар үһүс төгүлүн "Квест-оонньуу 2024" буолан ааста.

Күрэххэ уопсайа 5 хамаанда кытынна. Биирдии уһуйаантан 4-түү төрөппүт кыттара ирдэниллибитэ.

Күрэхтэһээччилэр 6 станциянан сылдьан сорудахтары толордулар.

Бүлүү эбэҕэ сыал ытыыта, тоҥуу хаарынан сүүрэн тиийэн мууһу буурдааһын, хапсаҕайдааһын, канат тардыһыыта курдук күрэхтэргэ аҕалар күөн көрүстүлэр.

Кыайыылааҕынан Нам нэһилиэгин «Кэнчээри» уһуйааһын аҕаларын хамаандата буолла.

Иккис миэстэни Дүллүкү уһуйаанын "Молния" хамаандата ылла.

Үһүс миэстэ - "Теремок" уһуйаан "Крепкие парни" хамаандата буолла.

Маны таһынан үс көрүҥҥэ аҕаларга анал аат олохтонно. Ол курдук, хапсаҕайга Саввинов Гаврил, "Теремок" уһуйаан, сыалы ытыыга - Петров Сергей , Дүллүкү "Кустук" уһуйаан уонна мууһу буурдааһыҥҥа Романятов Константин, Дүллүкү "Кустук" уһуйаан, муҥутуур кыайыылаахтарынан буоллулар.

Түгэнинэн туһанан, Үөһээ Бүлүү нэһилиэгин дьаһалтатыгар, үөрэх салалтатын профсойууһун бэрэссэдээтэлигэр Лазарев Леонид Гаврильевичка, Үөһээ Бүлүүтээҕи Ис Дьыала уорганын, ГИБДД управлениетын, Үөһээ Бүлүүтээҕи О. Д. Федорова аатынан киин модельнай библиотека, оҕо технопарката,
Үөһээ Бүлүүтээҕи баһаарынай этэрээт, Госпожнадзор коллективтарыгар улахан махталбытын тиэрдэбит.

Сонуннарга анаан Вероника Протопопова

"Үөһээ Бүлүү" хаһыат

#үбүлүөй #уһуйаан

⭐️ Кииннэммит модельнай бибилэтиэкэ дьиэтигэр 8-с нүөмэрдээх "Аленушка" оҕо сайдар киинин 35 сыллаах үбүлүөйүн бастакы тэрээһинэ саҕаланна.

Үбүлүөйү көрсө уһуйаан бэтэрээннэрин, урукку сылларга үлэлээн ааспыт үлэһиттэр истиҥ-иһирэх ахтыыларыттан түмүллүбүт кинигэлэрэ "Үөһээ Бүлүү" хаһыат редакциятыгар таҥыллан, бэчээттэнэн таҕыста.

Кинигэ ис хоһоонун, тутулун бу детсадка өр сылларга методиһынан үлэлээбит Раиса Павлова бэлэмнээн, ааптар быһыытынан ис хоһоонун кэлбит дьоҥҥо билиһиннэрдэ.

Кинигэ сүрэхтэниитин уһуйаан иитээччилэрэ Туйаара Федорова, Светлана Варварикова салайар "Үнүгэсчээн" орто бөлөҕүн оҕолоро сахалыы иһит-хомуос, өбүгэбит туһана сылдьыбыт тэриллэрин туһунан хоһооннорун ыалдьыттары көрүстүлэр.

Арианна Афанасьева, Надежда Герасимова иитээччилэрдээх бэлэмнэнии бөлөҕүн оҕолоро эҕэрдэ нүөмэрдэрин көрдөрдүлэр.

"Үөһээ Бүлүү" хаһыат

#үбүлүөй #уһуйаан

⭐️ Исидор Барахов аатынан 1-кы нүөмэрдээх орто оскуола 10-с кылааһын үөрэнээччитэ, Петр Одорусов хос сиэнэ Антон Иванов иитиллибит оҕо саадын иитээччилэрин ахтан-санаан кэлэн, эҕэрдэлээн, Тыас Уус "Мин хаалыаҕым" ырыатын бэлэх уунна.

"Аленушка" оҕо саадыгар сэбиэдиссэйинэн үлэлээн ааспыт Людмила Егорова аан бастаан уһуйаан боруогун атыллаан киириэҕиттэн үлэлээн ааспыт сылларыттан истиҥник саныыр түгэннэрин ыалдьыттары кытта үллэһиннэ.

"Үөһээ Бүлүү" хаһыат

#үбүлүөй #уһуйаан

⭐️ Үөһээ Бүлүү нэһилиэгин баһылыга Максим Силигиянов тыа сирин уһуйаана оҕоҕо бастакы укулааты уурар улахан суолталаах тэрилтэ буоларын бэлиэтээн туран эҕэрдэлээтэ.

"Оҕону иитэр диэн манан дьыала буолбатах, чахчы идэтигэр бэриниилээх дьон үлэлиир идэтэ. Инники өттүгэр салгыы үлэлэһиэхпит"- диэн эрэннэрдэ.

Уһуйаан сэбиэдиссэйигэр Александра Михайловаҕа уонна бөһүөлэккэ күүс-көмө буолар үлэһиккэ, иитээччи көмөлөһөөччүтэ Альбина Григорьеваҕа дьаһалта аатыттан Махтал суруктары туттарда.

"Үөһээ Бүлүү" хаһыат

#үбүлүөй #уһуйаан

⭐️ Үөрэх управлениетын салайааччытын солбуйааччыта Леонид Огочонов кырачааннар бөлөхтөрүн иитээччитигэр Долгуяна Ивановаҕа, бэлэмнэнии бөлөҕүн иитээччитигэр Арианна Афанасьеваҕа сыралаах үлэлэрин бэлиэтээн туран Бочуот грамотатын туттарда.

Үөрэх үлэһиттэрин идэлээх Сойуустарын бэрэссэдээтэлэ Леонид Лазарев уһуйаан физкультураҕа инструкторыгар Алена Сергееваҕа, улахан бөлөз иитээччитигэр Надежда Степановаҕа, иитээччи көмөлөһөөччүтүгэр Любовь Ивановаҕа өр сыллаах үтүө суобастаах үлэлэрин иһин Грамотанан бэлиэтээтэ.

"Үөһээ Бүлүү" хаһыат

#бэлиэкүн #уһуйаан

⭐️Кырачааннар Судаарыстыбаннас күнүн кытта билистилэр

Хоро нэһилиэгин уһуйаанын кырачаан бөлөҕүн иитиллэччилэрэ СӨ Судаарыстыбаннаһын күнүн көрсө Сахабыт сирин былааҕын кытта билистилэр. Билиилэрин чиҥэтэн, оҥоһуктарын кумааҕыга тистилэр.

Нэһилиэк библиотекатыгар тахсан Мария Чиряева бэлэмнээбит иһитиннэриитин болҕомтолоохтук истэн сэҥээрдибит.

Саха Судаарыстыбаннаһын күнэ бэрт сэргэхтик ааста.

Сонуннарга анаан Хоро уһуйаанын иитээччилэрэ Евдокия Корякина уонна Сахая Николаева.

"Үөһээ Бүлүү" хаһыат

#уһуйаан #СПО

🏃‍♂️ Үөһээ Бүлүүтээҕи техникум спорт саалатыгар 6 №дээх "Солнышко" уһуйаан иитээччилэрэ "Ийэм, аҕам уонна мин - чөл олоҕу өрө тутабыт" ыҥырыылаах Саха сиригэр оҕо аймах, Россияҕа Дьиэ кэргэн сылларыгар аналлаах спортивнай күрэҕи ыыттылар.

Күрэххэ уопсайа 3 ыал кытынна, ол курдук Эрхан Левин, Климентий Григорьев, Ильдар Николаев төрөппүттэрин уонна убай, эдьий.

Дьүүллүүр сүбэ Үөһээ Бүлүүтээҕи техникум физкультураҕа учуутала Лев Васильевич Саввинов уонна "Солнышко" уһуйаан төрөппүт кэмитиэтин бэрэссэдээтэлэ Уруйдаана Уйгурова сыаналаатылар.

Оҕолор уонна төрөппүттэр билиилэрин, сатабылларын киллэрэн туран, үөрэ-көтө оонньоотулар, оҕо саастарын санаатылар. Күрэх түмүгүнэн "Ильдар и команда" бастаата, "Звездочкалар" иккис, "Дружба" хамаанда бочуоттаах үһүс миэстэ ыллылар. Кыайыылаахтар мэтээл кэттилэр, бириистэринэн наҕараадаланнылар.

Техникум салалтатыгар уонна коллективыгар уһуйаан коллектива махталларын тиэрдэллэр. "Ил-эйэ эҥэрдэстин, байылыат олоҕу баҕарабыт. Түгэнинэн туһанан Ийэлэр уонна Аҕалар күннэринэн "Солнышко" коллектив аатыттан итии истиҥ эҕэрдэ этэбит" - дииллэр.

"Үөһээ Бүлүү" хаһыат

#уһуйаан

🏃‍♂️ "Аленушка" уһуйааҥҥа төрөппүттэр уопсай мунньахтара

Үөһээ Бүлүү улууһун Сэбиэтин дьокутаата Александра Михайлова сэбиэдиссэйдээх 1989 сылтан тэриллэн үлэлиир "Аленушка" оҕо сайдар киинэ 52 үлэһиттээх. Сэттэ бөлөҕүнэн 22 педагог үлэлиир, ол иһигэр логопед, психолог курдук сэдэх идэлээх педагогтар логопедическай бөлөххө мөлтөх саҥалаах оҕолору кытта ыкса дьарыктаналлар. Илиитигэр дьоҕурдаах оҕолору көрөн ылан туой буорунан дьарыктыыр улууска ураты эбии дьарык куруһуога үлэлиир. Ааптар бырагыраамата оҥоһуллан бу сыл бүтэһигэр күн сирин көрүөҕэ.

"Оҕо быраабын туһунан кэпсэтиэххэ" диэн тиэмэлээх сэтинньи 6 күнүгэр тэриллибит төрөппүт уопсай мунньаҕар 2022 сылтан саҥа ананан үлэлээн эрэр Үөһээ Бүлүү улууһугар оҕо быраабын боломуочуйалааҕа, бу уһуйааҥҥа иитиллэн тахсыбыт Гаврил Волков "Оҕо бырааба - төрөппүт эбээһинэһэ" диэн тиэмэнэн кыттыыны ылла.

Иитиллээччилэр уйулҕа өттүнэн чөл туруктарыгар анаммыт ыйга ыытыллар тэрээһиннэр чэрчилэринэн үөрэх управлениетын психолого-педагогическай сулууспатын сэбиэдиссэйэ, эмиэ бу уһуйааҥҥа иитиллибит, билигин бу уһуйааҥҥа иитиллэр оҕолордоох элбэх оҕолоох ыал ийэтэ Мария Спиридонова "Педагогтар уонна төрөппүттэр түмсүүлэрэ бииргэ үлэлэһии түмүгэр уйулҕа өттүнэн куттала суох эйгэни хааччыйыы" туһунан бэсиэдэлээтэ.

Оттон үөрэх управлениетын логопедическай арыаллааһынын сүрүн специалиһа Любовь Алексеева "Оҕо саҥарар саҥатыгар, тылын сайдыытыгар кэһиллии" диэн аныгы гаджет үйэтигэр иитиллэн тахсан эрэр оҕолор ортолоругар сытыытык турар боппуруоска кэпсэтиини ыытта.

Төрөппүттэргэ оҕо сааһынан уратыларын, хайа сааһыгар туох-ханнык хамсаныылары оҥоруохтааҕын, ханнык тыллары саҥарыахтааҕын, хайа өйдөбүллэри билиэхтээҕин быһаарда.

3 сааһыгар кэлэн оҕо чуолкайдык саҥарбат, тыл оннугар илиитин-атаҕын, хамсаныы көмөтүнэн туһанан бэйэтин наадатын быһаарсар буоллаҕына, саҥарар эрээри өйдөммөт буоллаҕына төрөппүт долгуйара тоҕоостоох. Маннык түгэҥҥэ логопед көмөтө быһаччы наадатын умнумаҥ.

Төрөппүт оҕотун кытта сахалыы чуолкайдык саҥаран кэпсэтиэхтээх, күннээҕи олоҕу токкоолоһон сэһэргэһиэхтээх. Оҕону кытта күннэтэ дьарыктаныахтаах. Кинигэтэ ааҕыҥ, остуоруйата кэпсэтиҥ, бииргэ оонньоһуҥ.

Статистика быһаарбытынан, 4 саастаах оҕолор гаджеты туттуулара, 7 саастаах оҕолор тус телефоннаахтара уопсай көрдөрүүттэн 35% ылар эбит. Оттон оскуолаҕа киирэр саастаах оҕолор өйгө тутар дьоҕурдара мөлтөөбүтэ бэлиэтэммит.

Өр телефоҥҥа олорор оҕо 10 тылтан 6 эрэ тылын өйдөөн хаалыан сөп. Оҕо сирэйин былчыҥнара ситэри сайдыбакка хаалыахтарын сөп. Киһи саҥатын кыайан өйдөөн истибэттэр. Хорутуулаах ураты толкуйа, оҥорон көрөр дьоҕура ситэ сайдыбат. Атын оҕону кытары бодоруһарыгар, бииргэ алтыһарыгар уустуктары көрсөр.

Онон, төрөппүттэр, оҕо төрөөбүт сахалыы тылынан саҥарар саҥата сайдарыгар күннэтэ төрөппүт ыкса алтыһыыта, көмөтө, дьарыга ирдэнэрин төрүт умнумаҥ.

"Үөһээ Бүлүү" хаһыат