Убаастабыллаах Аҕалар!
Саха Өрөспүүбүлүкэтигэр Аҕа күнүнэн итиитик-истиҥник эҕэрдэлиибин!

Ыал Аҕата дьиэ кэргэҥҥэ тутаах киһи. Киниэхэ сүгүллэр элбэх эппиэтинэс, дьиэ кэргэнин үтүө туруга, харысхаллаах буолуута Аҕаттан тутулуктаах.

Аҕа оҕону иитиитигэр оруола сүҥкэн, уол оҕоҕо көлүөнэттэн көлүөнэҕэ бэриллэр өбүгэлэрин сатабылын, тутулун булту, балыктааһыны, хаһаайыстыба үлэтин көрүҥнэрин, сүөһүнү, сылгыны иитээһини тиэрдэн, бу орто дойдуга саха ыала үксээн, саха үгэһэ тэнийэн өбүгэлэрбититтэн кэлбит төрүт дьарыктарбытын сүтэрбэккэ илдьэ сылдьабыт. Уолаттар бары да Аҕаларбытыттан, Эһээлэрбититтэн, Убайдарбытыттан элбэххэ үөрэнэн эрэллээх эр дьон буола улааттыбыт.

Бу күннэргэ 24 төгүлүн Мэҥэ Хаҥалас Майа сэлиэнньэтигэр ыытылла турар Өрөспүүбүлүкэтээҕи "Аҕа уолунаан - 2024" күрэххэ биһиги улуустан кытта сылдьар Петровтар дьиэ кэргэнин Аҕата Айсен үгүс аҕаларга холобур буолар. Уолунаан Арсенныын дьарыктананнар, улуус күрэҕэр кыайан, билигин өрөспүүбүлүкэҕэ кытта сылдьаллар. Бу маннык дьиэ кэргэҥҥэ Аҕа оҕолорун кытта чугас сыһыаннаһара, үүнэр көлүөнэни дьоһуннаахтык иитэрэ хайҕабыллаах!

Ытыктабыллаах аҕалар, Аҕа буолар аналгытын тосхоллоохтук ылынан, бэйэҕит Аҕаларгыт, Эһээлэргит ииппит иитиилэрин, биэрбит билиилэрин салҕыы аныгыс көлүөнэҕэ тиксэрэр курдук оҕолоргутун иитиигэ эппиэтинэстээхтик сыһыаннаһан Айбыт Аҕа сүдү үлэтин толору толороргутугар баҕарабын.
Дьоллоох, доруобай буолун, дьиэ кэргэҥҥитигэр ил-эйэни,  ыччаттаргыт эһигини өрүү үөрдэ турдуннар! Аҕа уускут ууһаатын!

Эҕэрдэни кытта, Үөһээ Бүлүү улууһун баһылыга Валерий Николаев

#АҕаКүнэ
#ҮөһээБүлүү
#СднемОтца

t.iss.one/ValeriNikolaev