Мэҥэ Хаҥалас улууһугар, Майа сэлиэнньэтигэр ыытыллар өрөспүүбүлүкэтээҕи "Аҕа уолунаан - 2024" күрэх түмүктэннэ.

Күрэххэ Саха сирин улуустарыттан барыта 19 хамаанда кыттыыны ылла, ол иһигэр Дьокуускай куораттан 2 хамаанда уонна Мэҥэ Хаҥалас улууһуттан 2 хамаанда. 

Үөһээ Бүлүү улууһун хамаандата Петровтар Айсен уонна Арсен 6 түһүмэх түмүгүнэн 5-с миэстэҕэ тахсан баран, түмүктүүр 7-с түһүмэх - остуолбаҕа ыттыы тыҥааһыннаах киирсиитин түмүгэр уопсай зачётка Өрөспүүбүлүкэ үрдүнэн 8-с миэстэни ыллылар.

"19 хамаандаттан, 11 хамаанданы кэннилэригэр хаалларан, Петровтар Айсен уонна Арсен ситиһиилээхтик, олус таһаарыылахтык кыттыннылар, инникитин өссө күүскэ бэлэмнэннэхтэринэ кыайар кыахтаахтар уонна эһиил өссө төгүл кыттарга бэлэмнэр. Үөһээ Бүлүү улууһун чиэһин үрдүк таһымнаахтык көмүскээтилэр", - диэн Үөһээ Бүлүү улууһун баһылыгын социальнай хайысхаҕа уонна дьиэ кэргэн бэлиитикэтигэр солбуйааччы Анна Михайловна Уларова бэлиэтээтэ.

Петровтарга Айсеҥҥа уонна Арсеҥҥа уонна Дүллүкү нэһилиэгин дьаһалтатыгар истиҥ махталы тиэрдэбит. Ону тэҥэ улууспут Аҕаларын түмсүүтүн салайааччытыгар Руфов Алексей Васильевичка, хамаанда тэрээһиннээхтик, ситиһиилээхтик кыттарыгар сыраҕыт иһин, икки күнү супту сарсыардаттан киэһээҥҥэ дылы тэҥҥэ сылдьыһан, тэрээһиҥҥэ көмөҥ, өйөбүлүн иһин махтанабыт.

Күрэх тэрийээччилэригэр маннык дириҥ ис хоһоонноох, суолталаах, Аҕалары өйүүр, Аҕа оҕону иитиигэ сыратын киэҥ эйгэҕэ сырдатар, дьиэ кэргэн олоҕор, туругар саҥаны киллэрэр күрэҕи олохтообуккут олус хайҕабыллаах. Үөһээ Бүлүү дьаһалтатын аатыттан тэрийээччилэргэ махталбытын тиэрдэбит.

Өрөспүүбүлүкэтээҕи "Аҕа уолунаан-2024" күрэххэ өссө биир улахан ситиһиибит - Үөһээ Бүлүү улууһа сүүмэрдиир түһүмэҕи үрдүк таһымнаахтык ыытан Өрөспүүбүлүкэҕэ бастыҥ тэрийиигэ кыайыылааҕынан тахсан, сыаналаах бирииһинэн наҕараадаланна.

#АҕаУолунаан2024
#ДеньОтца
#АҕаКүнэ
#ҮөһээБүлүү

Үөһээ Бүлүү улууһун дьаһалтатын пресс-сулууспата.