#кыһа #ситиһии

⭐️ Кулун тутар 12-16 күннэригэр М.Т.Егоров аатынан 2-с нүөмэрдээх оскуола 8-11 кылаастарын үөрэнээччилэрэ уонна 2 салайааччы, химия уонна биология учууталлара, Кристина Даниловна Уйгурова, Эльза Тимофеевна Ивановна Бүтүн Россиятааҕы "Моя будущая профессия - врач" диэн медицинскэй форумҥа кытта сылдьаллар.

Биэс күннээх тэтимнээх бырагыраамалаах күрэххэ кыттан, оҕолор элбэх ситиһиилэннилэр. Барыта 15 хамаандаттан чорбойон, "Удачный дебют" диэн ааттаах кубок хаһаайыттара буоллулар.

Чинчийэр үлэ конференциятыгар дакылаат ааҕан 4 оҕо миэстэҕэ тигистэ.
Ол курдук, Семенов Коля 9-с кылаас, Селясинова Даша 10-с кылаас, Гурьев Емельян 11-с кылаас үөрэнээччилэрэ "Железодефицитная анемия в Верхневилюйском улусе" диэн дакылааттарынан педиатрия хайысхатыгар бастакы бочуоттаах миэстэҕэ тигистилэр.

11-с кылаас үөрэнээччитэ Изольда Иванова "Хронические заболевания при дефиците химических элементов" диэн дакылаатынан химия, фармацевтика уонна медицинэ хайысхатыгар бочуоттаах үһүс миэстэ буолла.

Бу форум бэһис төгүлүн Санкт-Петербург куоракка ыытыллар. Оҕолорго быраас идэтин билиһиннэрэр сыаллаах элбэх экскурсиялар, көрсүһүүлэр буоллулар. Санкт-Петербургтааҕы медицинскэй хайысхалаах үөрэх салааларыгар сырыттылар. Бу тэрээһин оҕолор инники үөрэхтэрин хайысхатын талалларыгар төһүү күүс буолуо диэн эрэнэбит.

Сүдү оруоллаах тэрээһиҥҥэ оҕолорбут баран кытталларыгар уонна сайдан кэлэллэригэр көмөлөспүт улууспут дьаһалтатын баһылыгар Валерий Валериевич Николаевка уонна куруук биһиэхэ көмө-ама буолар, мед. үөрэхтээһиҥҥэ кылааттарын киллэрэ сылдьар улуустааҕы киин балыыһа кылаабынай бырааһыгар Сардаана Николаевна Павловаҕа уонна кылаабынай сиэстэрэҕэ Светлана Васильевна Павловаҕа махталбытын тиэрдэбит.

Сонуннарга анаан Елена Андреева, дириэктэри үөрэх чааһыгар солбуйааччы

"Үөһээ Бүлүү" хаһыат

#уһуйаан #кыһа

⭐️ Бүгүн, кулун тутар 28 күнүгэр, «Аленушка» оҕо сайдар киинэ 35 сыллаах үбүлүөйүгэр анаммыт улуустааҕы «Дьиэ кэргэним оонньуур оонньуута» диэн төрөппүттэр оҥорон таһаарбыт дидактическай оонньуурдарын күрэҕэ буолла.

Уопсайа 34 араас көрүҥнээх үлэ киирдэ. Дьүүллүүр сүбэҕэ эбии үөрэхтээһин педагогтара Татьяна Анисимова, Ульяна
Андреева, педагог-психолог Георгианна Афанасьева үөрэх управлениетын информационнай-методическай салаатын сүрүн специалиһа
Сардаана Павлова салайыытынан үлэлээтилэр. Киирбит үлэлэртэн 3 бастыҥы быһаардылар.

Күрэх түмүгүн уһуйаан 35 сыллаах үбүлүөйүн бэлиэтиир үөрүүлээх тэрээһинигэр, муус устар 4 күнүгэр Оҕо искусство оскуолатын дьиэтигэр иһитиннэриэхтэрэ. Хас биирдии киирбит үлэ бу күн быыстапкаҕа туруоруллан дьон көрүүтүгэр тахсыахтара.

Биһиги куонкуруспутугар кыттыбыт төрөппүттэргэ, иитээччилэргэ улахан махталбытын тиэрдэбит.

Сонуннарга анаан Георгианна Афанасьева

"Үөһээ Бүлүү" хаһыат

#БКЭ #кыһа

⭐️Төрөппүттэр биир кэлим эксээмэни туттараллар

"Төрөппүттэр БКЭ туттарар күннэрэ" Бүтүн Россиятааҕы акция бүгүн дойду үрдүнэн ыытыллар. Үөһээ Бүлүү улууһун хас биирдии нэһилиэгин оскуолатыгар, оттон улуус киинигэр Д.С.Спиридонов аатынан 4-с нүөмэрдээх оскуолаҕа саҕаланна.

Үөһээ Бүлүү нэһилиэгин оскуолаларыттан төрөппүттэр, общественность кыттыылаах эксээмэни туттарыыга 15 киһи кэллэ.

Улуус дьаһалтатын дьыалаларын дьаһайар салаа сүрүн специалиһа Евгений Николаев, нэһилиэк дьаһалтатыттан аппарат салайааччыта Александр Бороннуров, улуус Сэбиэтин депутата, култуура департаменын салайааччыта Сардаана Ильинова кыттыыны ылаллар.

Үөрэх управлениетын салайааччытын солбуйааччыта Леонид Огочонов:
- Ааспыт сылга 20-чэ киһи кыттыбыта. Эксээмэн хайдах ааһарын бэйэлэринэн кэлэн билэллэрэ туһалаах дии саныыбын. Киирэр аантан саҕалаан тимири көрдүүр тэрилинэн бэрэбиэркэни ааһан баран төлөпүөннэрин туттаран, суумкаларын хаалларан, паспордарын уонна гелевай уруучуканы эрэ илдьэ киирэллэр. Уруучуканы саппаастаах илдьэ кэлэр ирдэнэр. Хас биирдии эксээмэни туттарааччы иккилии уруускалаах буолуохтаах. Төрөппүттэр БКЭ толорортон толлубакка, Ол оннугар толоруу процедуратын кытта билсиһэ кэлиэхтээхтэр.

Бүгүҥҥү биир кэлим эксээмэҥҥэ история предметин 9 сорудахтаах кылгатыллыбыт тиэһин 40 мүнүүтэ устата толоруохтара. Сорудахтаах лиистэри эксээмэн хаамыытын билиһиннэрэн баран утары бэчээттээн таһааран түҥэтиллэр. Эксээмэни саха тылын уонна литературатын учуутала Герасим Егоров ыытар.

Маннык акцияҕа ОГЭ, БКЭ туттарыахтаах оҕолор төрөппүттэрэ ордук интэриэстээх буолуохтаахтар эбит. Төрөппүт бэйэтинэн БКЭ буолар эйгэтин кытта билсэн, оҕотугар сиһилии быһааран биэрэр түгэнигэр үөрэнээччи эксээмэнтэн долгуйбакка, толлубакка, өй-санаа өттүнэн бэлэмнээх кэлэн туттарарыгар кыах бэриллэр.

"Үөһээ Бүлүү" хаһыат

#уһуйаан #кыһа #күрэх #всейсемьей

⭐️ Уһуйааннар төрөппүттэригэр аналлаах күрэх аҕалары түмтэ

Бүгүн 3-с нүөмэрдээх оҕо сайдар киинин "Үрүйэчээн" уһуйаан иитээччилэрин көҕүлээһининэн, Аҕа күнүн көрсө, Үөһээ Бүлүүтээҕи оҕо уһуйааннарын иитиллээччилэрин аҕаларын икки ардыларыгар улууспутугар үһүс төгүлүн "Квест-оонньуу 2024" буолан ааста.

Күрэххэ уопсайа 5 хамаанда кытынна. Биирдии уһуйаантан 4-түү төрөппүт кыттара ирдэниллибитэ.

Күрэхтэһээччилэр 6 станциянан сылдьан сорудахтары толордулар.

Бүлүү эбэҕэ сыал ытыыта, тоҥуу хаарынан сүүрэн тиийэн мууһу буурдааһын, хапсаҕайдааһын, канат тардыһыыта курдук күрэхтэргэ аҕалар күөн көрүстүлэр.

Кыайыылааҕынан Нам нэһилиэгин «Кэнчээри» уһуйааһын аҕаларын хамаандата буолла.

Иккис миэстэни Дүллүкү уһуйаанын "Молния" хамаандата ылла.

Үһүс миэстэ - "Теремок" уһуйаан "Крепкие парни" хамаандата буолла.

Маны таһынан үс көрүҥҥэ аҕаларга анал аат олохтонно. Ол курдук, хапсаҕайга Саввинов Гаврил, "Теремок" уһуйаан, сыалы ытыыга - Петров Сергей , Дүллүкү "Кустук" уһуйаан уонна мууһу буурдааһыҥҥа Романятов Константин, Дүллүкү "Кустук" уһуйаан, муҥутуур кыайыылаахтарынан буоллулар.

Түгэнинэн туһанан, Үөһээ Бүлүү нэһилиэгин дьаһалтатыгар, үөрэх салалтатын профсойууһун бэрэссэдээтэлигэр Лазарев Леонид Гаврильевичка, Үөһээ Бүлүүтээҕи Ис Дьыала уорганын, ГИБДД управлениетын, Үөһээ Бүлүүтээҕи О. Д. Федорова аатынан киин модельнай библиотека, оҕо технопарката,
Үөһээ Бүлүүтээҕи баһаарынай этэрээт, Госпожнадзор коллективтарыгар улахан махталбытын тиэрдэбит.

Сонуннарга анаан Вероника Протопопова

"Үөһээ Бүлүү" хаһыат

#үбүлүөй #техникум #кыһа

⭐️ Үөһээ Бүлүүтээҕи Техникум үйэ аҥаардаах үбүлүөйүн бэлиэ күнэ алгысчыт Трофим Миронов алгыһыттан саҕаланна.

Устудьуоннар парадтаан киирэн алгыс бастыҥын, тыл үтүөтүн иҥэриннилэр.

"Үөһээ Бүлүү" хаһыат

#кыһа

⭐️ Уолаттарга 5 күннээх байыаннай үөрэхтээһин

Ыам ыйын 27-31 күннэригэр Н.Г. Золотарев - Якутскай аатынан Харбалаах орто оскуолатын базатыгар 8-с сылын 5 хонуктаах байыаннай үөрэх хомууругар 13 оскуолаттан 10-с кылаас уолаттара, Үөһээ Бүлүүтээҕи техникум үөрэнээччилэрэ, барыта 89 уол үөрэннэ.

Сүрүн салайааччынан физкультура учуутала Арнольд Брощев, штаб салайааччытынан Кэнтик оскуолатыттан Степан Родионов, эдэр байыастары бэлэмнээх буолууга иитэр Саха сирин быыһыыр сулууспатын салаатын салайааччыта, анал байыаннай дьайыы кыттыылааҕа Михаил Ан, рота хамандыырынан Уйгулаан Тимофеев уолаттары бэлэмнээтилэр.

Арыллыы үөрүүлээх чааһыгар улуус баһылыга Валерий Николаев, улуустааҕы үөрэх салалтатын салайааччыта Юрий Кынатов, Харбалаах нэһилиэгин баһылыга Константин Платонов, оскуола дириэктэрэ Васмар Руфов бэйэлэрин эҕэрдэ тылларын эттилэр, уолаттарга инники олохторугар ситиһиини, хомуур кэмигэр ылбыт сатабыллара, билиилэрэ олохторун устата туһалыырыгар, дойдуларыгар бэриниилээх патриот дьон буолалларыгар баҕардылар.

@uoheebuluu

#егэ #ситиһии #кыһа

⭐️ Үөһээ Бүлүүттэн Евдокия Николаева историяҕа биир кэлим эксээмэни 100 баалга туттарда

Өрөспүүбүлүкэ үрдүнэн история предметигэр муҥутуур баалы ылбыт бастакы выпускник буолла.

Евдокия 9 кылааһы Үөһээ Бүлүүтээҕи лицей-интернаты бүтэрэн баран салгыы Норуоттар икки ардыларынааҕы Арктика оскуолатын ааспыт сылга түмүктээбитэ.

Былырыын нуучча тылын 100 баалга туттаран Ил Дархан Айсен Николаевтан 100 тыһыынчалаах бириэмийэни ылбыта.

"Былырыын бааллара үрдүк этэ, хас да үрдүк үөрэхтэн 100 бааллаах выпускник диэн биһиэхэ киирэн үөрэн диэн ыҥырбыттара. Ону эһиил туттарыам диэн биир сыл үөрэхтэн сынньанан, чопчу ханнык үөрэххэ киирэрбин толкуйдуом диэн докумуоннарын биэрбэтэҕэ.
История предметин таах туттарбакка хаалбыппын диэн быйыл эбии историяны уонна английскай тылы туттарда. Билигин омук тылын эксээмэнин түмүгүн күүтэбит. Историяны туттарарыгар Үөһээ Бүлүүтээҕи лицей выпускнигын быһыытынан туттарда. Онон бу ситиһии улуус туһатыгар ааҕыллар", - диэн Евдокия ийэтэ Лариса Семеновна Верховцева кэпсээтэ.

Оттон Евдокия аҕата Василий Валерьевич Николаев улууспут Аҕа баһылыга Валерий Николаев бииргэ төрөөбүт быраата. Николаевтар дьиэ кэргэттэригэр, аймахтарыгар биир кэлим эксээмэни 100-түү баалга туттарбыт ыччаты иитэн таһаарбыккытынан эҕэрдэ бастыҥа буолуохтун!

"Үөһээ Бүлүү" хаһыат