#тэрээһин #педагогуоннауһуйааччысыла

⭐️"ҮС КӨЛҮӨНЭ КЭРЭ ЭЙГЭҔЭ"

Балаҕан ыйын 16 күнүгэр олус истиҥ, долгутуулаах, соһуччу үөрүүлээх Арассыыйаҕа Учуутал уонна уһуйааччы сылыгар туһуламмыт, Н.И.Бойлохов аатынан Үөһээ Бүлүүтээҕи Оҕо искусствотын оскуолатыгар ыытыллыбыт умнуллубат кэрэ-бэлиэ "ҮС КӨЛҮӨНЭ КЭРЭ ЭЙГЭҔЭ" тэрээһин саалаҕа кэлбит үөрэнээччилэри, эдэр уонна өр кэмнэргэ сыралаахтык үлэлээбит учууталлары ураты иэйиинэн кууста, умнуллубат түгэни тосхойдо.

Улууска аан бастаан домра курдук бүтүн аркыастырга ураты тыыны биэрэр аналлаах домра үнүстүрүмүөн кылааһын аан бастаан арыйан үгүс ыччат кэрэ эйгэҕэ сыстарыгар, сайдарыгар олук уурбут, күн бүгүҥҥэ диэри ыччат дьоҥҥо үтүө сүбэтин, муудараһын, дириҥ билиитин-көрүүтүн аныы сылдьар киһинэн Татьяна Даниловна СПИРИДОНОВА буолар.
Кини үөрэппит такайбыт, домраҕа үөрэнэригэр тылын ылыннарбыт үөрэнээччитэ Марта Анатольевна ТОНОЕВА билигин баай уопуттаах, үрдүк категориялаах учуутал, "Барҕарыы" Фонда стипендиата, СР культуратын туйгуна, үлэ бэтэрээнэ. Кини домраҕа Бүлүүтээҕи М.Н.Жирков аатынан Оҕо искусствотын оскуолатыгар үлэлиир сылларыгар уһуйбут бастакы үөрэнээччилэриттэн биирдэстэрэ, билигин С.А.Зверев-Кыыл Уола аатынан Үҥкүү тыйаатырын иһинэн айымньылаахтык үлэлиир Саха аркыастырын солистката Инна Александровна СКРЫБЫКИНА бу долгутуулаах тэрээһиҥҥэ тус бэйэлэрэ музыка эйгэтигэр хайдах тиийэн кэлбиттэрин, үөрэммит кэмнэригэр уһуйбут учууталларын олус истиҥник ахтан-санаан аастылар, санааларын үллэһиннилэр.

Көрөөччүлэргэ анаан Марта Анатольевна бастакы үөрэнээччитинээн Инна Скрыбыкиналыын Н.Будашкин "Родные просторы" айымньытын домраҕа толороннор истээччи дохсун ытыс тыаһын ыллыллар. Маны таһынан, Инна СКРЫБЫКИНА аатырбыт скрипач Линдси Стирлинг "Бегство" айымньытын домраҕа оонньоон көрөөччү биһирэбилин ылла.

Салгыытын комментарийга киирэн ааҕыҥ⬇️⬇️⬇️⬇️⬇️⬇️

#оҕосаас #тэрээһин

⭐️Бүгүн, балаҕан ыйын 28 күнүгэр, Үөһээ Бүлүүтээҕи "Тускул" оҕо киинигэр эбии дьарыктанар оҕолору сүрэхтиир, уруйдуур тэрээһин буолла.

Манна уопсайа 10 араас холбоһуктан оҕолор кэлэн кыттыыны ыллылар. Кинилэргэ анаан араас көрдөөх күрэхтэр буоллулар, оҕолор бииргэ дьарыктанар үөрэнээччилэрин, педагогтарын иннилэригэр андаҕар тыл эттилэр.

"Тускул" оҕо киинин салайааччыта Марианна Ивановна Иванова оҕолорго инникилэригэр үрдүк ситиһиилэри баҕарда.

"Тускул" оҕо киинигэр эбии дьарыктаммыт оҕолор олоххо бэйэлэрин суолларын булан, үрдүк таһаарыылаахтык үлэлии-хамсыы сылдьаллар. Олортон биирдэстэрэ - Михаил Андреевич Алексеев республикатааҕы лицей-интернатын математикаҕа уонна информатикаҕа учуутала Дьулус Мичилович Захаров эйэҕэс эҕэрдэтин тириэртэ.

Хас биирдии холбоһук бу тэрээһиҥҥэ анаан бэйэни билиһиннэрии уонна музыкальнай нүөмэр бэлэмнээтэ. Маннык тэрээһин оҕолору түмэр, "Тускул" оҕо киинин билиһиннэрэр сыаллаах.

"Үөһээ Бүлүү" хаһыат

#тэрээһин

⭐️ Нам нэһилиэгэр Сомоҕолоһуу күнэ

Анал байыаннай дьайыыга сулууспалыы сылдьыбыт биир дойдулаахпыт Дмитрий Игнатьев сырдык тыына быстан, көһөрүллэн, сэтинньи 11 күнүгэр ыытыллыбыта.

Манна түмсүүлэр, тэрилтэлэр кыттыыны ыллылар. "Дьиэрэй" ансаамбыл "Ойдуо" ырыатынан кэнсиэри арыйда, "Уран иэйиилэр" сахалыы үҥкүүнү толордулар. Марианна Былкова, Мария Романова, Евдокия Гаврильева ырыаларын бэлэх ууннулар. "Кэнчээри" оҕо сайдар киинин коллективын толоруутугар испаниялыы, оскуола коллективын индиялыы уонна "Кыталыына" үҥкүү ансаамбылын толорууларыгар узбектыы үҥкүү дохсун ытыс тыаһынан доҕуһуолланна.

Интернациональнай дьиэ кэргэттэри сырдатар видео көрөөччү болҕомтотун тарта.

Ирина Бетту долганныы, Лия Бельды нанайдыы көстүүмнэрин көрөөччү дьүүлүгэр таһаардылар.

"Намыына" ырыа ансаамбыла "Доҕордоһуу ырыатынан" кэнсиэри түмүктээтэ.

Көрүү-күрэх түмүгүнэн оскуола коллектива 1-кы миэстэни ылла, "Кэнчээри" оҕо сайдар киинэ 2-с бириистээх миэстэҕэ тигистэ.

Надежда Мутуукаба

"Үөһээ Бүлүү" хаһыат

#тэрээһин #оскуолаттан

⭐️ТЫМНЫЫ ОҔУҺУН иккис муоһа тостор күнүгэр аналлаах үөрүүлээх тэрээһин Ю.Н. Прокопьев аатынан Үөһээ Бүлүүтээҕи спортивнай орто оскуолаҕа олус бэркэ табылынна!

Сахалыы тыыҥҥа иитиигэ, өбүгэлэрбит олохторун үйэтитиигэ, оскуолабыт үөрэнээччилэригэр уонна үөрэтээччилэригэр үтүө өйдөбүлү иҥэрбиккитигэр убаастыыр уһуйааччыбытыгар Дулусхаан Баппаҕай уола Баппаҕайга барыбыт аатыттан БАРҔА МАХТАЛ! Аны оҕуспут моонньоох баһа тостон түһүүтүгэр мустуохпут.

Сонуннарга анаан Наталья Иванова

"Үөһээ Бүлүү" хаһыат

#эйгэ #тэрээһин

⭐️ "Эйгэ" тэрилтэ үлэһиттэрэ сонун көрсүһүүнү тэрийдилэр

Бүгүн, олунньу 24 күнүгэр, "Работа России" дьиэтигэр СӨ култууратын туйгуна, "Култуура сайдыытыгар үтүөлэрин иһин" бэлиэ хаһаайката, Үөһээ Бүлүү култууратын бочуоттаах үлэһитэ, Боотулуу нэһилиэгин бочуоттаах олохтооҕо Аграфена Долгунова - Далбарай Айыыһыт сылынан эҕэрдэлээн, сайыны санаан, сибэкки, эмтээх от араас чэйдэрин кистэлэҥнэрин арыйда.

Киһи доруобуйатыгар туһалаах үүнээйилэр хаһан, хайдах хомуллалларын, ханнык ыарыыларга туттуллалларын сиһилии кэпсээтэ.

Эмтээх оту сэҥээрээччилэр мустан чэй арааһын амсайан, сүбэ-ама ылан тарҕастылар.

"Үөһээ Бүлүү" хаһыат

#тэрээһин #ийэтыл

⭐️ "ЭЙГЭ" КСЭК МАТ уонна Үөһээ Бүлүү улууһун устуоруктарын уонна кыраайы үөрэтээччилэрин түмсүүтэ эһигини бу кэлэр бээтинсэҕэ, о.э. кулун тутар 22 күнүгэр Түгэхтэй сирин Кыырт Далын улахан балаҕаныгар күнүс 2 чаастан төрүччүнү үөрэтэргэ, оҥорорго анаммыт тэрээһиҥҥэ ыҥыраллар.

Кэлиҥ, көрүҥ, тускутугар туһаныҥ.

"Үөһээ Бүлүү" хаһыат

#тэрээһин

🏃‍♂️ Оҕолор сайыны көрсөллөр, төрөппүттэр сэргэхсийэллэр

Россияҕа Дьиэ кэргэн сылын чэрчитинэн "Дьиэ кэргэн өрөбүллэрэ" диэн федеральнай таһымнаах бырайыак чэрчитинэн, бүгүн, ыам ыйын 26 күнүгэр доруобуйаларын хааччахтаах оҕолордоох дьиэ кэргэттэр сайыны көрсө айылҕаҕа тахсан сынньаннылар.

Сэргэх тэрээһини "Эйгэ" этнокомплекс түһүлгэтигэр "Тускул" оҕо киинэ, «Харысхал» аһымал пуонда уонна дьиэ кэргэн уонна ыччат политикатын отдела иилээн-саҕалаан, көҕүлээн тэрийдилэр.

Улуус баһылыгын социальнай боппуруостарга солбуйааччыта Анна Уларова улуус олоҕор көхтөөх кыттыыны ылар, доруобуйаларынан хаарчахтаах оҕолордоох төрөппүттэргэ улуус баһылыгын аатыттан махтал суруктары туттарда.

Көрбөттөр уопсастыбаларын салайааччыта Айыына Заболоцкая, "Харысхал" өрөспүүбүлүкэтээҕи пулҥда бэрэстэбиитэлэ Зария Мойтохонова эҕэрдэ тылларын эттилэр.

Сонун тэрээһиҥҥэ 12 дьиэ кэргэн кыттыыны ылан, оҕолор оонньоон-көрүлээн, бириис, бэлэх тутан, атын оҕолордуун алтыһан, билсиһэн, төрөппүттэр ирэ-хоро кэпсэтэн, астынан-дуоһуйан тарҕастылар.

"Үөһээ Бүлүү" хаһыат
@uohee_buluu

#тэрээһин

⭐️ Саха Өрөспүүбүлүкэтин Гражданнарын туруктарын аакталарын толорор уорган үлэһиттэрин сэминээрэ

Бүлүү бөлөх улуустарын ГТАС үлэһиттэрэ биир күннээх үөрэхтээһиҥҥэ Үөһээ Бүлүү сиригэр муһуннулар.

Ыалдьыттары "Сааскылаана" оҕо образцовай үҥкүү ансаамбыла эҕэрдэлээтэ.

Улуус салалтатын аатыттан улуус баһылыгын социальнай боппуруостарга солбуйааччыта Анна Уларова эҕэрдэ тылын этэригэр Үөһээ Бүлүү улууһугар 1927 сылтан гражданнар туруктарын суруйуу саҕаламмытын, бу нэһилиэнньэ олоҕор улахан суолталаах уоргаҥҥа үлэлээн ааспыт дьону иһирэх тылынан ахтан санаан ааста.

СӨ Бырабыыталыстыбатын иһинэн ГТАС салалтатын салайааччыта Дария Слепцова хас биирдии киһи олоҕо ГТАС нөҥүө ааһарын, онуоха хас биирдии үлэһит өрөспүүбүлүкэ, улуус, нэһилиэк историятын суруйалларын, сүрүн докумуоннары толороллорун бэлиэтээтэ.

Ону тэҥэ үлэһиттэргэ олус интэриэһинэй тиэмэлэргэ Дьокуускай куорат ГТАС салаатын салайааччытын солбуйааччыта Ирина Андреева, ГТАС архыыбын салайааччыта Наталья Алексеева иһитиннэрии оҥордулар.

Өрөспүүбүлүкэҕэ барыта 35 ГТАС үлэлиир. Ааспыт сыл устата бу уоргаҥҥа уопсайа 34369 аакта суруллубут.

"Оҕо төрөөһүнэ" суперсервис нөҥүө оҕо төрөөбүтүн туһунан туоһу суругу толорторуу сыллата элбээн иһэр. Олус табыгастаах өҥөнөн былырыын Саха сирин үрдүнэн 4140 киһи туһаммыт. Быйылгы сыл үс ыйын устата номнуо 2050 киһи бу сервис нөҥүө туоһу суругу оҥотторон ылбыт.

Бу сэминээр туһунан "Үөһээ Бүлүү" хаһыат бүгүҥҥү нүөмэригэр, 2-с балаһаҕа ааҕыаххытын сөп.

"Үөһээ Бүлүү" хаһыат