#иһитиннэрии

✅ Убаастабыллаах нэһилиэк олохтоохторо!

Сааскы кус этигэр саркоцистоз/саркоспоридиоз диэн паразит баара билиннэ. Бу паразитарнай ыарыы хроническай формалаах. Үксүн кыыл уонна көтөр ыалдьар. Носитель буолар. Ситэ буспатах эти сиэтэххитинэ киһиэхэ эмиэ сыстыан сөп. Онон кус этигэр болҕомтогутун ууруҥ, үчүгэйдик көрүҥ, былчыҥар маҥан кыра эттиктэр баалларын буллаххытына уматан кэбиһиҥ, ыкка, куоскаҕа сиэтимэҥ.

Бу паразит 30-60 мүнүүтэ устата оргуйдаҕына өлөр, -20 кыраадыска биир суукка иһигэр өлөр.

Ветучасток

"Үөһээ Бүлүү" хаһыат

#иһитиннэрии

✅ Саха Өрөспүүбүлүкэтин Баһаары бохсор судаарыстыбаннай сулууспа сэрэтэр!

Ойуурга, толооҥҥо сылдьан уоттан сэрэхтээх буолуу ирдэнэр.🚒 Тыа баһаара үксүн дьон сыыһа-халты сыһыаныттан, уоттан сэрэхтээх буолуу ирдэбиллэрин кэһииттэн тахсар. Айылҕаҕа сынньанааччылар бэйэлэрин кэннилэриттэн бөхтөрүн хомунан, кутаа уоту умаппакка эрэ сынньаналлара көҥүллэнэр. Баһаартан сэрэхтээх буолуу быраабылатын 218-с пуунугар олоҕуран, оту өртөөһүн толору бобуллар.

Быраабылалары кэспит киһи РФ Административнай Кодексын 8.32 ыст. олоҕуран 15 тыһыынчаттан 30 тыһыынча солкуобайга диэри ыстырааптанар кутталлаах, оттон дуоһунастаах сирэй 50 тыһ.солк., юридичэскэй сирэй 200 тыһ. солкуобайга диэри ыстырааптаналларын санатабыт. Ону тэҥэ ураты бэлэм буолуу эрэсиимэ саҕаланнаҕына ирдэбил үрдүүр.

Онтон өскөтүн киһи ыыппыт уотуттан ойуур баһаара турдаҕына, РФ Холуобунай Кодексын 261 ыст. олоҕуран дьыала көбүтүллэр. Ити ыстатыйанан буруйдаммыт сирэй көҥүлэ 10 сылга диэри быһыллыан уонна 3 мөл.солкуобайга диэри ыстыраап ананыан сөптөөх.
Ону тэҥэ, туох-баар ойуурга тиксэриллибит хоромньу, ол иһинэн баһаары умулларыы уонна ойууру чөлүгэр түһэрии үлэтин сыаната буруйдаах киһиттэн ирдэниллэр.

Баһаар буолбутун көрдүгүт даҕаны тутатына 01, 101 эбэтэр 112 нүөмэрдэргэ эрийэн этэргит булгуччулаах. 👨🏻‍🚒👩🏻‍🚒

Улуустааҕы баһаарынай этэрээт инструктора Александра Михайлова

#Үөһээбүлүүхаһыат

#иһитиннэрии

✅✅✅Үөһээ Бүлүү улууһун олохтоохторун истиилэригэр!

Быйыл, ойуур баһаарыттан сэрэхтээх буолуу кэмэ аһыллыаҕыттан, Үөһээ Бүлүүгэ этиҥтэн 2 ойуур баһаара таҕыста. Бастакы ойуур баһаара тахсаатын, кыра эрдэҕинэ тута умулуннарбыттара, иккис баһаарбыт Туобуйа нэһилиэгэр таҕыста. Иэнэ улаатан иһэр. Бу баһаары умулуннарыыга нэһилиэнньэттэн көмөҕө дьон тахсыыта ирдэнэр.

Күннээҕи хамнаска "Якутлесресурс" ГАТ тэрилтэттэн 2900 солкуобай, Улуус дьаһалтатыттан 1000 солкуобай, уопсайа биир күннээҕи хамнас 3900 солкуобай буолар.

Мустар сир: Үөһээ Бүлүүтээҕи лесхоз тэрилтэтэ.

Билсэр нүөмэргит: 41569.
89841196221.

Бу ойуур баһаара улаата илигинэ умуллара охсуохха, төрүт сирбитин уоттан харыстыахха!!!

Үөһээ Бүлүүтээҕи ЕДДС отдела.

"Үөһээ Бүлүү" хаһыат

#иһитиннэрии

✅ От ыйын 31 күнүгэр күнүс 12 чааска үөһэнэн көтө сылдьан кэтээн көрүү кэмигэр Туобуйа нэһилиэгиттэн 56 км тэйиччи сытар "Улахан Арбай" сиригэр ойуур баһаара турбута, 5 га иэннээх ойууру сиэбитэ бэлиэтэммитэ.

Улуус дьаһалтатын иһинэн үлэлиир Биир кэлим диспетчерскэй сулууспа үлэһиттэрэ иһитиннэрбиттэринэн, бүгүҥҥү күҥҥэ сарсыарда 9 чааска ойуур баһаарын иэнэ 50 гектарга тэҥнэспит. Уот алларанан күүскэ умайа турар.

Ойуур уотун умуруорууга 48 киһи тахсан үлэлии сылдьар. Ол иһигэр ойуур баһаарынай хамаандатыттан 12 парашютист, баһаарынай химическэй ыстаансыйа 19 үлэһитэ, десантнай баһаарынай хамаанда 17 үлэһитэ бааллар. Манна Ньурба улууһуттан 5, Бүлүүттэн 4 киһи көмөҕө сылдьаллар. Ойуур баһаарын умуруоруу үлэтин Василий Мойтохонов салайар.

"Үөһээ Бүлүү" хаһыат

#иһитиннэрии

✅ Россия Ис дьыалаҕа министиэристибэтин Үөһээ Бүлүүтээҕи отделын суолга сэрэхтээх буолуу судаарыстыбаннай инспекциятын начальнига Владислав Поскачин нэһилиэнньэҕэ туһаайыыта.

Суоппардар, сатыы сылдьан дьон истиилэригэр! Бэйэ-бэйэҕэ харыстабыллаахтык сыһыаннаһан, суолга сэрэххитин күүһүрдүҥ, ирдэнэр быраабылалары тутуһаргытын умнумаҥ!

"Үөһээ Бүлүү" хаһыат

#иһитиннэрии

✅ Нам нэһилиэгин уотун ситимигэр өрөмүөн үлэтэ ыытылларынан атырдьах ыйын 10 күнүгэр Балаҕаннаах, Нам, Ороһу нэһилиэктэригэр уот арахсыаҕа.

"Үөһээ Бүлүү" хаһыат

#иһитиннэрии

✅✅✅ Убаастабыллаах Үөһээ Бүлүү улууһун олохтоохторо!

Бүгүҥҥү күҥҥэ Бүлүү эбэни туоратыыга икки паром хаалан сүүрэ сылдьаллар. Бу күннэргэ сырыы тохтуурун биллэрэбит.

Эбэни туоратыыга билиҥҥи туругунан үс аэробот, биир аэроглиссер үлэлэрин саҕалыахтара.

Улуус дьаһалтатын ЕДД сулууспата

#иһитиннэрии

✅ Үөһээ Бүлүү аннынан Бүлүү эбэни туоруур суолга ахсынньы 22 күнүттэн 20 туонна уйуктаах тиэхиньикэҕэ көҥүл бэрилиннэ.

Бу туһунан "РИК Автодор" АУо Үөһээ Бүлүүтээҕи филиалын дириэктэрэ Александр Васильев иһитиннэрдэ.

"Үөһээ Бүлүү" хаһыат

#иһитиннэрии

✅ Үөһээ Бүлүү нэһилиэгин олохтоохторун истиилэригэр

Газ субсидиятын туһанан дьиэҕитигэр күөх төлөнү киллэттэриэххитин баҕарар буоллаххытына, эбэтэр 2015 сыл кэнниттэн бэйэҕит күүспүтүнэн олорор дьиэҕитигэр киллэриммит буоллаххытына, субсидия көмөтүнэн төлөттөрүөххүтүн сөп.

❗ Быйылгы сылга газ субсидиятыгар уопсайа 1️⃣5️⃣ квота көрүлүннэ.

Ким субсидияны туһаныан баҕарар олохтоох дьаһалта дьиэтигэр 201 кабинекка кэлэн билсиҥ, эбэтэр 8 (41133) 41378 тел. номерынан ыйыталаһыҥ.

Олохтоох дьаһалта

#иһитиннэрии

✅ Үөһээ Бүлүү улууһун балыксыттарын истиилэригэр!

Саха сиринээҕи "Главрыбвод" ФГБ тэрилтэни кытта Үөһээ Бүлүү улууһа 2024 сылга лицензионнай (төлөбүрдээх) балыктыыр учаастакка балыктыырга анаан салгыы дуогабар түһэристэ.

Бүлүү өрүс 4350 - 4430 км диэри (Хоро нефтебазатын алын өттүттэн Нам нефтебазатын анныгар диэри) биэрэк уҥа, хаҥас өттүлэрин киллэрэн туран.

Балыктыырга анаан илим, муҥха, быһыт көҥүллэрин (путевка) балык араас көрүҥүгэр, ол иһигэр сыа балыкка (тугунок), хатыыска, тууччахха (нельма) биэриитин саҕалаабытын туһунан иһитиннэрэр.

Хатыыс балыкка лицензиялаах, күөгүнэн (закидушка) балыктааһын сааскы - күһүҥҥү месячниктарга көҥүл буолбутун санатабыт.

2024 сылга путевка сыаната 10 хонукка:
1. Хатыыс 3шт - 1300 солк ,
2. Тууччах 3шт - 900 солк,
3. Илим - 750 солк,
4. Муҥха (сыа балык) - 750 солк.

Саха сиринээҕи"ГЛАВРЫБВОД " ФГБ тэрилтэ Үөһээ Бүлүү улууһугар бэрэстэбиитэлэ Егоров Пантелеймон Прокопьевич

б.т. 89841070565

#иһитиннэрии

✅ Үөһээ Бүлүү улууһун Хоро нэһилиэгэр ыксаллаах быһыыга-майгыга бэлэм буолуу үрдүкү режимэ ыам ыйын 18 күнүгэр тохтотулунна. Бу туһунан Хоро нэһилиэгин баһылыга Альберт Иванов иһитиннэрдэ:

- Билигин Хоро аннынан Бүлүү эбэ уута түһэн, харан турбут муус хойуута ааста. Бүгүҥҥү күҥҥэ уу таһымын кээмэйдиир усулуобуйа суох, гидропостка муус анньан турар. Онон дьуһуурунайдар уу төттөрү үөһээ эрэ таҕыстаҕына диэн маныы сылдьаллар.

Санатар буоллахха, Хоро нэһилиэгэр ыам ыйын күнүттэн ыксаллаах быһыыга-майгыга бэлэм буолуу күүстээх режимэ биллэриллэн, Үөһээ Бүлүүттэн, Дүллүкүттэн, Оҥхойтон:
Үөһээ Бүлүүтээҕи көрдүүр быыһыыр сулууспаттан:
- Семенов Александр
- ⁠Семенов Борис
- Петров Айсиэн
- Алексеев Алберт
Дүллүкү нэһилиэгин аҕыйах ахсааннаах баһаарынай чаастан:
- Руфов Аркадий
- ⁠Руфов Александр
- ⁠Тобохов Степан
Оҥхой нэһилиэгин аҕыйах ахсааннаах баһаарынай чаастан:
- Сидоров Дмитрий
- ⁠Сергеев Степан
быыһыыр этэрээт Хороҕо тахсан ыксаллаах балаһыанньаҕа көмөҕө тахсардыы бэлэм олорбуттара.

"Олохтоох дьаһалта аатыттан, Хоро олохтоохторун аатыттан, тус бэйэм ааппыттан бу 17-18 күннэргэ кэлэн кэтээн манаан бэлэм олорбуккутугар улахан махталбытын тиэрдэбит", - диэн Хоро нэһилиэгин баһылыга Альберт Иванов махталын биллэрдэ.

@uoheebuluu

#иһитиннэрии

✅ Үөһээ Бүлүү улууһун лесничествота нэһилиэнньэҕэ биллэрэр!

Бэйэ туһатыгар туттуллар маһы бэлэмнээһиҥҥэ сайабылыанньаҕыт Госуслуга портал нөҥүө эрэ бэриллэрин иһитиннэрэбит.

Госуслугата суох лесничествоны кытары мас атыытын-эргиэнин дуогабарын түһэрсибэккит.

Онно ирдэнэр дөкүмүөннэр:
✅ РФ гражданинын паспора,
✅ ИНН,
✅ СНИЛС,
✅ ЕГРН выписката,
✅ лесоделяна "АБРИС" схемата,
✅ чэпчэтиинэн туһанар туһунан дастабырыанньа.

@uoheebuluu

#иһитиннэрии

✅ Саха Өрөспүүбүлүкэтин сокуонун 15 ыстатыйатыгар олоҕуран, Үөһээ Бүлүү сиригэр-уотугао айылҕаҕа үүнэр сир аһын хомуйуу болдьохторо улуус баһылыгын уонна ойуур хаһаайыстыбатын салайааччыта илии баттааһыныннарынан бигэргэннилэр.

Ол курдук, хаптаҕаһы, дьэдьэни уонна биэ эмиийин от ыйын 16 күнүттэн, сугуну атырдьах ыйын 1 күнүттэн, моонньоҕону атырдьах ыйын 10-тан уонна отону атырдьах ыйын 25 күнүттэн хомуллара көҥүллэнэр.

Эрдэлээбит дьон эппиэтинэскэ тардыллыаххытын сөбүн сэрэтэбит.

"Үөһээ Бүлүү" хаһыат