#күөхсуугун #холобур

⭐️Быйыл Көтөрдөөхтөн төрүттээх 3 норуодунай үрдүк бэлиэ ааттарын ылбыт 90 саастарын туолбут чулуу дьоммутугар, ол курдук СӨ норуодунай худуоһунньуга Николай Амыдаев, СӨ норуодунай учуутала Василий Долгунов, СӨ норуодунай суруйааччыта Василий Сивцев төрөөбүт дойдуларыгар - Көтөрдөөххө үбүлүөйүнэй улахан үрүҥ тунах ыһыах тэриллибитэ.

Бу хаһан да мустубатах элбэх дьонноох ыһыах үрдүк тэрээһиннээхтик ааспыта.

Ол курдук, Көтөрдөөхтөн төрүттээхтэр Аҕа уус аймахтарынан ыһыах тэрээһинигэр араас тупсаҕай көстүүлээх тутуулары ыытарга бэрт үгүс үп хомуллубута. Дэлэҕэ да этиэхтэрэ дуо, норуот күүһэ - көмүөл күүһэ диэн, ол курдук бииргэ түмсэннэр сылдьыбыт дьон ыытыллыбыт тэрээһиннэртэн астынан, махтанан барбыттара.

Саха Өрөспүүбүлүкэтин Судаарыстыбаннаһын күнүн көрсө улуустааҕы айылҕа харыстабылын инспекциятын үлэһиттэрэ уонна Көтөрдөөхтөн сыдьааннаах дьон биир санааҕа киирэннэр, чулуу дьоммут ааттарын үйэтитэр сыалтан быйыл тупсарыллан оҥоһуллубут ыһыахтыыр пааркаҕа араас отонноох мастары уонна кедр, пихта, бэс курдук ыччат мастар олордуллуохтара. Киэн туттар дьоммут чаҕылхай ааттарын үйэлэргэ ааттатан, лаглайа, чэлгийэ үүнэ туруохтара диэн эрэнэбит.

СӨ Судаарыстыбаннаһын күнүн көрсө Саха Өрөспүүбүлүкэтин үрдүктүк наҕараадаламмыт дьоммутугар үтүө дьыаланы, хамсааһыны сахпыппытыттан киэн эрэ туттуох кэриҥнээхпит.

Тулалыыр эйгэ харыстабылын старшай инспектора Василий Титов.

"Үөһээ Бүлүү" хаһыат