#бэлиэкүн

🔴 Улуу киһи Исидор Барахов аатын ааттаан...

Бүгүн, олунньу 12 күнүгэр, уһулуччулаах политическай деятель, Саха Автономиятын төрүттэспит киэн туттар биир дойдулаахпыт Исидор Никифорович Барахов төрөөбүтэ 127 күнүгэр, кини аатын сүгэр сквергэ сибэкки дьөрбөтүн ууруу түгэнэ буолла.

Санатар буоллахха, ааспыт сыл ахсынньы 6 күнүгэр Үөһээ Бүлүү нэһилиэгин киинин киин болуоссатыгар общественнай- политическай деятелэ Исидор Барахов уонна кини соратниктара Үс Кыһыл Знамя орденнаах төлөннөөх революционер, хамандыыр Иван Яковлевич Строд, ону тэҥэ Забайкальскай уобаласка уонна Саха сиригэр буолбут гражданскай сэриилэр кыттыылаахтара Сергей Юльевич Широких- Полянских сырдык уобарастарын көрдөрөр пааматынньыгы үөрүүлээх быһыыга-майгыга арыйбыппыт.

Бүгүн бу пааматынньыкка улуус, сэлиэнньэ салалтата, Үөһээ Бүлүү олохтоохторо муҥура суох махтал, сырдык, үтүө өйдөбүл бэлиэтин - тыыннаах сибэкки дьөрбөтүн уурдулар.

Олохтоохторго уонна инники кэскилбитигэр, кэнчээри ыччакка туһаайан эҕэрдэ тылы улуус баһылыгын солбуйааччыта Анна Уларова, улуус депутаттарын Сэбиэтин бэрэссэдээтэлэ Николай Николаев, сэлиэнньэ баһылыгын солбуйааччыта Егор Михайлов, сэлиэнньэ баһылыгын сүбэһитэ Георгий Степанов эттилэр.

Инникитин бу сквергэ өрөспүүбүлүкэ суолталаах бэлиэ күннэргэ үөрүүлээх тэрээһиннэр ыытыллар буолуохтара.

Исидор Барахов курдук улуу дьонноох буолан, Саха Автономиятын туруулаһан, аныгы сайдыылаах олоххо кэлбиппитигэр махтанан туран өйдүү-саныы сылдьыах тустаахпыт.

"Үөһээ Бүлүү" хаһыат
@ulusmedia

#бэлиэкүн

🔴 Исиидэр Бараахап төрөөбүт күнүгэр аналлаах түмэл уруога

Уһулуччулаах судаарыстыбаннай, политическай деятель, талааннаах учуонай экэнэмиис Исидор Никифорович Барахов төрөөбүт күнүгэр улуустааҕы история уонна этнография түмэлигэр оскуола оҕолоругар уруок тэрилиннэ.

Түмэл үлэһитэ Ю.Н.Прокопьев аатынан спортивнай орто оскуола 7-с кылааһын үөрэнээччилэригэр Исидор Барахова тус олоҕун туһунан кэпсээтэ. Харбалаах нэһилиэгиттэн тахсыбыт оччотооҕу ыччат оҕо алын кылаас оскуолаҕа, онтон салгыы училищеҕа үөрэммит сылларын билиһиннэрдэ. Бобуулаах кистэлэҥ куруһуок чилиэниттэн саҕалаан, бэрт эдэр сааһыгар автономияны төрүттэспит биллэр-көстөр салайааччы буола үүнэн тахсыбыт суолун сырдатта.

Исидор Барахов чугас доҕотторун, биир санаанан салайтаран ыксаласпыт дьонун ахтыыларыттан ааҕан иһитиннэрдэ.

Автономия боппуруоһун туруорса сылдьан тэҥинэн өрөспүүбүлүкэҕэ инники өттүгэр промышленность, транспорт, норуот үөрэҕириитэ хайдах сайдыахтааҕын туһунан, итиэннэ саха норуота суруктаах-бичиктээх буоларыгар үлэлэспитин, социальнай сыһыаннаһыы тиэмэтигэр бэйэтин билиитин-көрүүтүн, анаарыытын сурукка тиспит туоһуларын туһунан олус интэриэһинэйдик, хорутуулаахтык кэпсээтэ.

"Үөһээ Бүлүү" хаһыат

#бэлиэкүн

⭐️ Бараахап аатынан култуура киинэ үлэҕэ киирдэ

Бүгүн Харбалаах нэһилиэгэр үөрүүлээх күн. Өр күүппүт Исидор Никифорович Барахов аатынан элбэх хайысхалаах култуура киинин таас дьиэтэ өрөспүүбүлүкэ инвестиционнай бырагырааматынан тутуллан үлэҕэ киирдэ.

Алгысчыт Трофим Миронов аал уоту оттон айах тутта, кучу от сытын дыргытан мустубут дьону-сэргэни арчылаата.

Бүччүм нэһилиэккэ өрөспүүбүлүкэ суолталаах түмэллээх култуура дьиэтин уораҕайын арыллыытыгар Саха Өрөспүүбүлүкэтин Ил Дархана Айсен Николаев бэйэтинэн кэллэ. Саҥа таас дьиэҕэ киирии бэлиэтин - аалай кыыл лиэнтэни Ил Дархан Айсен Николаев, Үөһээ Бүлүү улууһун баһылыга Валерий Николаев уонна Харбалаахтааҕы култуура киинин дириэктэрэ Татьяна Сергеева кырыйдылар.

Өрөспүүбүлүкэҕэ автономияны турууласпыт Исидор Барахов биир санаалаах доҕотторун кытта, билиҥҥи кэмҥэ бааллара буоллар эдэркээн уолаттар, хаартыскаҕа түспүттэрин кэриэтэ худуоһунньуктар холустаҕа түһэрбит хартыыналарын уонна култуура киинигэр наадалаах тэрилинэн хааччыналларыгар аналлаах сертификаты бэлэх уунна.

@ueheebuluu
@ulusmedia