📰📰📰

⭕ Лөгөй нэһилиэгин Даалы бөһүөлэгин олохтооҕо Николай Борисов «Агростартап» диэн тыа хаһаайыстыбатын сайыннарар бэйэ дьыалатын тэриниигэ туһуламмыт граны ылары ситиһиигэ биисинэс-былааны көмүскээн, ыра санаата туолар чинчилэннэ.

⭕ Бу куонкуруска кыттарга Николай Николаевичка Лөгөй нэһилиэгин КПФХ салайааччыта Анатолий Бурнашев сүбэлээбит. Итиэннэ кэргэнэ туох баар докумуоннары бэлэмнииргэ күүс-көмө буолбут. Ону тэҥэ биирдиилээн дьон эмиэ сүбэ-ама, көмө буолан, эдэр киһи баҕа санаата олоххо киирэригэр төһүү буолбуттар.

⭕ Онон Николай Борисов барыларыгар улахан махталлаах уонна санаатын маннык үллэстэр:

📌 – Тыа сирин сайыннарыыга кыра дэриэбинэбитигэр хамсааһыны таһаарар итиэннэ ынах сүөһүнү иитэн дьарыктаах буолар баҕаттан бу куонкуруска кыттыбытым. Кэпсэтиһии кэтэхтэн көрүү быһыытынан ыытыллыбыта, ыйытыыларга хоруйдаабытым, бэйэ дьыалатын сайыннарыыга көрдөөбүт суумам - 2 мөлүйүөн 436 тыһыынча солкуобай. Итиннэ, ирдэбил быһыытынан, ити үптэн 10%-нын бэйэм укпутум. Быйыл саҥа хотону тутан, үлэҕэ киллэрэн эрэбин. Билиҥҥи туругунан, сэттэ сүөһүлээхпин, онтон иккитэ ыанар. Биэс сылынан уопсайа 15 ыанар ынахха тиэрдэр, үлэ миэстэтин таһаарар, бэйэ бородууксуйатын дэлэтэр соруктаахпын. Бу бырайыакка кыттаары эбии сири арендаласпытым. Бу иннинэ ДВ гектарынан ылбыт сирбэр оттуубун. Тыа хаһаайыстыбатынан дьарыктаммытым син ыраатта. Кыра эрдэхпиттэн төрөппүттэрбин кытта тыа сирин олоҕор, эр киһи быһыытынан хаһаайыстыбаҕа сыстан, үлэ-хамнас үөһүгэр тэҥҥэ сылдьыспытым. Ону таһынан, Лөгөй нэһилиэгин Анатолий Бурнашев КПФХ-гар үлэлиибин. Онон сүөһүнү көрүүнү, хаһаайыстыба үлэтин-хамнаһын эппинэн-хааммынан билэбин.

⭕ Тыа сиригэр маннык инникилээх өйдөөх-санаалаах ыччат баара хайҕаллаах. Николай Борисов бу ылыммыт дьыалатын сайыннаран, киэн тутта кэпсиир хаһаайыстыбалаах улууспут бастыҥ үлэһитэ буоларыгар баҕарыаҕыҥ.

🖊️ Ольга Шепелева

✅ @muru.sahargata

#уйгусирэуусалдан
#уусалданхаһыата
#мүрүсаһарҕата
#агростартап2021
#тыахаһаайыстыбата
https://www.instagram.com/p/CT1QkVXs5kw/?utm_medium=share_sheet