YAXSHILIKKA DALOLAT QILUVCHI YAXSHILIK QILUVCHI KABIDIR

Ramazon – xayr-saxovat, mehr-muhabbat ulashiladigan oy. Bu oyda koʻngli oʻksiklar, ehtiyojmand, kam taʼminlangan oilalar holidan xabar olinib, ularga yaxshiliklar qilinadi.

Toshkent viloyati bosh imom-xatibi Jasurbek domla Raupov homiylarni jalb qilgan holda Zangiota tumanidagi “Oqsaroy” toʻyxonasida roʻzaning birinchi kuni 400 kishilk iftorlik tashkil qilindi.

Tumandagi “Eshonguzar”, “Boʻzsuv”, “Erkin”, “Zangiota”, “Oʻrta ovul” mahallalaridan jismoniy imkoniyati cheklangan fuqarolar, kam taʼminlangan, ehtiyojmand oilalar uchun yozilgan iftorlik dasturxoni Ramazon tuhfasi boʻldi.

Haqiqatan, ehsonni oʻz oʻrniga qilish, haqdorlarga yetkazishning savobi koʻp.

Hadisi sharifda: “Kim roʻzadorni iftor qildirsa, unga uning ajricha ajr boʻladi. Shu bilan birga, roʻzadorning ajridan hech bir narsa kamaymaydi”, deyilgan (Imom Termiziy rivoyati).

Alloh taolo saxovat va muruvvatni oʻzlariga shior qilib olgan homiylardan va yaxshilikka dalolat qiluvchi aziz insonlardan Oʻzi rozi boʻlsin. Zero, Imom Muslim rahimahulloh rivoyat qilgan hadisda: “Kim yaxshilikka dalolat qilsa, unga uni qiluvchining ajricha ajr beriladi”, deyilgan.

Shu kunlarda Toshkent viloyati hokimining Ramazon oyini munosib tarzda oʻtkazish toʻgʻrisidagi qarori ijrosi yuzasidan hududlarda iftorlik dasturxonlari yozilib, ehsonlar ulashilmoqda.

Toshkent viloyati vakilligi Matbuot xizmati

🌐Telegram 🌐Website 🌐YouTube 📱Instagram 📱Facebook 📱Twitter