#GONDAR : በጎንደር ከተማ ህግ ተላልፈዋል የተባሉ 53 የፀጥታ አካላት እንዲጠየቁ መደረጉን የጎንደር ከተማ አስተዳደር ሰላምና ፀጥታ መምሪያ ገለፀ።

መምሪያው ይህ ያሳወቀው በመምሪያው ኃላፊ አቶ ፋሲል ሰንደቁ አማካኝነት ለከተማው ነዋሪዎች በወቅታዊ ሀገራዊና ክልላዊ ጉዳዮች ዙሪያ የመወያያ ፅሁፍ ባቀረበበት ወቅት ነው።

በከተማዋ የእገታ ወንደል ህገ ወጥ የጥይት ተኩስ ተጀራጅቶ ዘረፉ ዋና ወና የከተማዋ ወንጀሎች መሆናቸውን አቶ ፋሲል ገልፀዋል።

በዚህ የእገታ ወንጀል ተሳትፈዋል የተባሉ 34 ተጠርጣሪዎች በህግ ቁጥጥር ስር ውለው ጉዳያቸው በህግ እየታየ መሆኑን ተናግረዋል።

4 በእገታ ወንጀል የፍርድ ውሳኔ የተላለፈባቸው መሆኑም ጠቅሰዋል።

በከተማዋ ኃላፊነታቸውን አልተወጡም የተባሉት 14 በየደረጃው በሚገኙ የፀጥታ አመራሮች 20 የፓሊስ አባላትና 14 የሚኒሻ አባላት ተጠያቂ መሆናቸውም አሳውቀዋል።

የመስቀል በዓልን ምክኒያት በማድረግ ጥይት ተኩሰዋል የተባሉ 115 ግለሰቦች በህግ ቁጥጥር ስር መዋላቸውን ተናግረዋል።

የከተማዋን ፀጥታ በመጠበቅ ረገድም ህብረተሰቡ እያበረከተ ያለውን አስተዋፅዎ የሚበረታታ ነው የተባለ ሲሆን የጀመረውን የሰላም የፀጥታ ስራዎችን አጠናክሮ በመቀጠልና በከተማዋ አስተማማኝ ሰላም ለመገንባት ድርሻውን ሊወጣ ይገባል ተብሏል።

መረጃው የጎንደር ኮሚኒኬሽን ነው።

@tikvahethiopia

#GONDAR : ፖሊስ በጎንደር ከተማ ለእኩይ/ለሽብር ተግባር ሊውል ነበረ ያለውን ገጀራ በቁጥጥር ስር ማዋሉን ገለፀ።

ገጀራው በከተማው ቀበሌ 16 በተለምዶ ግሩፕ እየተባለ በሚጠራው አካባቢ ግለሰብ ቤት ውስጥ በተደረገ ፍተሻ የተገኘ ነው ተብሏል።

ማህበረሰቡ ባደረሰው ጥቆማ ከአንዲት ግለሰብ መኖሪያ ቤት ውስጥ ህገወጥ ገጀራው መገኘቱን ያስረዳው የከተማው ፖሊስ ጥቆማ የተሰጠባት ግለሰብ ቤት ፖሊስ ሄዶ ህገወጥ ገጀራ መኖሩን ሲጠይቅ ምንም ነገር እንደሌለ መግለጿ ተመላክቷል።

ነገር ግን በተደረገው ፍተሻ በአልጋ ስር በከፍተኛ ሁኔታ የተደበቁ ገጀራዎች መገኘቱን እና ገጀራው ከዚህ ቀደም አገልግሎት ላይ ያልዋለና ለእኩይ አላማ ሊውል እንደታሰበ ያመለክታል ብሏል ፖሊስ።

የጎንደር ፖሊስ አሁን ላይ ነባራዊ ሁኔታውን መሰረት ባደረገ ሁኔታ በሮችን ከሁሉም የፀጥታ ኀይል ጋር በመሆን 24 ሰዓት እየጠበቀ መሆኑን ወንጀልንና ወንጀለኞችን መከላከልና መቆጣጠር ላይ እንደሚገኝ ገልጿል።

በቀጣይም ከማህበረሰቡ ጋር በመሆን መሰል ህገወጦችን በቁጥጥር ስር እያዋልነ ወደ ህግ የማቅረብ ተግባሩ እንደሚቀጥል አሳቋል።

ምንጭ ፦ የጎንደር ከተማ 4ኛ ዋና ፖሊስ ጣቢያ የማህበረሰብ የማህበረሰብ አቀፍ ፖሊስ አገልግሎት ክፍል

@tikvahethiopia

#GONDAR

በጎንደር ከተማ በፋሲል ክፍለ ከተማ በአንድ ሪስቶራንት ላይ በተነሳ የእሳት ቃጠሎ ሬስቶራንቱ ወደመ።

በጎንደር ከተማ አስተዳደር የማህበረሰብ አቀፍ ወንጀል መከላከል ኃላፊ ኢስፔክተር ስማቸው ፈንታ እንደገለፁት በከተማዋ በፉሲል ክፍለ ከተማ ከቀኑ 8 ስዓት ላይ በተነሳ የእሳት አደጋ የሪሴቶራንቱ ቁሳቁስ የወደመ ሲሆን የእሳት አደጋው ምክኒያት እየተጣራ መሆኑን እንስፔክተር ስማቸው ገልፀዋል።

ከሪስቶራንቱ የተነሳው የእሳት አደጋ በዙሪያው ያሉ ቤቶች መጠነኛ ጉዳት ቢደርስም በፀጥታ አካላትና በአካባቢው ህብረተሰብ ርብርብ የእሳት ቃጠሎውን መቆጣጠር መቻሉን ኢንስፔክተሩ ገልፀዋል።

በእሳት አደጋ መከላከል ስራው ላይ የነበረ አንድ ግለሰብ ጉዳት የደረሰ ሲሆን ሆስፒታል ገብቶ ህክምና እየተደረገለት መሆኑ ጠቁመዋል።

መረጃው የጎንደር ኮሚኒኬሽን ነው።

@tikvahethiopia

#GONDAR

ዛሬ ከሁመራ አድርጎ ወደ ጎንደር ከተማ በመግባት ላይ ያለ ተሳቢ መኪና ተገልብጦ ሹፌሩን ጨምሮ የ5 ሰዎች ህይወት ጠፋ።

አደጋው በጎንደር ከተማ በፋሲል ክፍለ ከተማ ልዩ ስሙ ኩረበረብ ተብሎ እሚጠራው አካባቢ ቀን 8:30 ገደማ የደረሰ ሲሆን 2 ወንድ እና 3 ሴቶች ህይወታቸው ሲያልፍ 3 ሰዎች ላይ ከባድ የመቁሰል አደጋ ደርሷል።

የአደጋው መንስኤ በመጣራት ላይ እንደሚገኝ የአንደኛ ፖሊስ ጣቢያ የማህበሰረብ አቀፍ ፖሊስ አገልግሎት ክፍል ኃላፊ የሆኑት ም/ ኢንስፔክተር ስማቸው ፈንቴ አሳውቀዋል።

@tikvahethiopia

#Gondar

በጎንደር ከተማ በሸይኽ ከማል ለጋስ ስርዓተ ቀብር ወቅት ከተፈጠረ ግጭት በኃላ በተፈፀመ ጥቃት እስካሁን ባለው ከ10 ሰዎች በላይ መሞታቸው ፤ በርካታ ሰዎች መጎዳታቸውን ፣ መስጂዶችም መጠቃታቸው ፣ ከዚህም አልፎ ንብረት መውደሙ ፣ የግለሰብ ቤቶች መጠቃታቸውን የጎንደር ቲክቫህ አባላት አሳውቀዋል።

የኢትዮጵያ እስልምና ጉዳዮች ጠ/ም/ቤት በበኩሉ ፤ በጎንደር ሙስሊሙን የማጥቃት፣ መስጂዶችን የመድፈር እና ንብረቶቹን የማውደም የተደራጀ ጥቃት እናወግዛለን ብሏል።

ዛሬ የጎንደር ከተማ ፀጥታ ምክር ቤት ባወጣው መግለጫ ፤ ትላንት በአራዳ ክ/ከተማ የተፈጠረው ሁኔታ በፍፁም የክርስትና እና እስልምና እምነት ተከታዮችን ሊወክል የማይችል ነው ብሎታል።

ምክር ቤቱ ጥፋቱ የተፈፀመው በጥቂት ጽንፈኛና አክራሪ ግለሰቦች የተከበሩትን የሁለቱን ዕምነት ተከታዮች ወደ ለየለት ግጭት ለማስገባት ሆን ተብሎ ለግጭት የማያበቃ ምክንያትን በመምዘዝ ጥፋት እንዲፈጠር የተቀነባበረና የተመራ ሴራ ነው ሲል ገልጾታል።

በዚህ እኩይ ተግባር ከሁለቱም የዕምነት ተከታዮች የህይዎትና አካል መጉደል እንዲሁም የንብረት መቃጠልና ዘረፋ አጋጥሟል ሲል አሳውቋል።

አሁን አካባቢው ሙሉ በሙሉ ከፀጥታ መዋቅርና ከአካባቢው ነዋሪ ጋር ትብብር በማድረግ የተረጋጋ ሰላም ለመፍጠር በሁሉም አካባቢ ስምሪትና ቁጥጥር እየተደረገ እንደሚገኝ የፀጥታ ምክር ቤቱ አሳውቋል።

ሙሉ መግለጫው በዚህ ተያይዟል ፦ https://telegra.ph/Gondar-04-27

@tikvahethiopia

#GONDAR

ትላንት በጎንደር ከተማ ስለተፈጠረው ሁኔታ ዛሬ ውይይት ተካሂዷል።

ውይይቱን የአማራ ክልል ም/ርእሰ መሥተዳድር ዶ/ር ጌታቸው ጀምበር ፣ የክልሉ ሰላምና ጸጥታ ቢሮ ኀላፊ አቶ ደሳለኝ ጣሰው እና የክልሉ የቱሪዝም ቢሮ ኃላፊ አቶ ጣሂር መሐመድ ናቸው የመሩት።

ዶ/ር ጌታቸው ፤ ውይይቱ ችግሩን በሰከነ መንገድ ለመፍታት ያለመ ነው ብለዋል።

አክለው ፥ " ትናንት የተፈጠረው የፀጥታ ችግር አሳዛኝና የከተማዋን ሕዝብ አብሮነት ታሪክ የማይገልፅ ነው ፤ የፀጥታ ችግሩን የፈጠሩ አካላትን በመለየት የእርምት እርምጃ እንዲወሰድ የክልሉ መንግሥት ከከተማው ነዋሪዎች ጋር በጋራ ይሰራል " ሲሉ ገልፀዋል።

አቶ ደሳለኝ ጣሰው በበኩላቸው፤ " የተፈጠረው ችግር ለጠላት ምቹ ሁኔታን የሚፈጥር በመሆኑ ችግሩን በውይይት ለመፍታት ሕዝቡ ባለቤት መኾን አለበት " ብለዋል።

" በየደረጃው ያለው የመንግሥት መዋቅር ያሉትን ክፍተቶች ለማስተካከል ጠንካራ ሥራ ይሠራል " ሲሉም ተናግረዋል። የሃይማኖት አባቶችና የሀገር ሽማግሌዎችም ከመንግሥት ጋር በመሆን እንዲሠሩ ጥሪ አቅርበዋል።

አቶ ጣሂር መሐመድ ፤ ችግሩን ለመፍታት በስክነት መወያየት እንደሚገባ ገልጸዋል።

በከተማው የቆየውን አብሮነት ለመሸርሸር የሚሠሩ አካላትን ተከታትሎ በቁጥጥር ሥር በማዋል ሕግ የማስከበር ሥራ ሊሠራ እንደሚገባም ተናግረዋል።

በሌላ በኩል ፤ ትላንትና ጎንደር ላይ የተፈፀመውን ድርጊት የሚያወግዝ ተቃውሞ ዛሬ በአዲስ አበባ እና ጅማ ከተማ የተለያዩ መስጂዶች ተካሂዷል።

በአዲስ አበባ በኑር (በኒ) መስጂድ እና በአንዋር መስጃድ ከፍተኛ ቁጥር ያለው ምዕመን ድርጊቱን አውግዞ ፍትህ ጠይቋል። በተመሳሳይ በጅማ ፈትህ መስጂድ ምእመኑ በጎንደር የተፈፀመውን ድርጊት አውቆ የተቃውሞ ድምፅ አሰምቷል።

@tikvahethiopia

#GONDAR

የጎንደር ከተማ ተቀዳሚ ም/ ከንቲባ አቶ ዘውዱ ማለደ በወቅታዊ የጎንደር ሁኔታ ዙሪያ ትላንት መግለጫ ሰጥተው ነበር።

በመግለጫቸው ፤ " በጎንደር ከተማ በተፈጠረው ግጭት ተሳታፊዎችን ለመያዝ ሁሉም የከተማዋ ነዋሪዎች ትብብር እያደረጉ ነው " ብለዋል።

አቶ ዘውዱ እስካሁን ከ370 በላይ ተጠርጣሪዎች በቁጥጥር ስር ውለው ምርመራ እየተደረገ መሆኑን ገልፀው ተጨማሪ ተጠርጣሪዎችንም ለመያዝ እየተሰራ ነው ብለዋል።

" የተፈጠረው ግጭት የሁለቱንም ሀይማኖቶች የማይወክል የጥቂት ጸረ ሰላም ሀይሎች እኩይ ድርጊት ነው " ያሉት አቶ ዘውዱ " በግጭቱ የ15 ሰው ህይወት ጠፍቷል፤ ንብረት ላይም ጉዳት ደርሷል " ብለዋል።

በከተማው ተዘግተው የነበሩ አንዳንድ የከተማዋ ሱቆች ተከፍተው አሁን ላይ ሰላማዊ እንቅስቃሴ መጀመሩን እና የከተማዋን ሰላምና ጸጥታ አስተማማኝ ለማድረግ እስከቀበሌ ድረስ ግልጽ ውይይቶች እየተደረጉ መሆኑን አሳውቀዋል።

🔻

በሌላ በኩል ፦ የከተማዋን ጸጥታ ለማስጠበቅ የሚያግዙ መመሪያዎች ተግባራዊ ይደረጋሉ ተብሏል።

በዚህም ፦

➡️ ከምሽቱ አንድ ሰዓት በኋላ የእንቅስቃሴ ገደብ ተጥሏል።

➡️ ከተፈቀደላቸው የጸጥታ ሀይሎች ውጭ ማንኛውም ግለሰብ የጦር መሳሪያ ይዞ መንቀሳቀስ አይችልም።

➡️ ወደ ከተማ የሚገባ ማንኛውም ሰው የይለፍ መታወቂያ ሳይኖረው የጦር መሳሪያ ይዞ መግባት ተከልክሏል።

@tikvahethiopia

#Gondar

የኢትዮጵያ እግር ኳስ ፌዴሬሽን በጎንደር ሊያካሂድ የነበረውን የጠቅላላ ጉባኤ ወደ አዲስ አበባ ቀይሯል።

ይህ የሆነው ጎንደር ዝግጅቷን ጨርሳ ጉባኤውን ስትጠባበቅ ነው።

ፌዴሬሽኑ ቦታ ተመቀየር ለምን ፈለገ ?

የኢትዮጵያ እግር ኳስ ፌዴሬሽን ፤ የአማራ ክልል መንግስት የስፖርት ቢሮ ምክትል ቢሮ ኃላፊ የጠቅላላ ጉባኤ ሥራ ወደሚያከናውኑ የኢትዮጵያ እግር ኳስ ፌዴሬሸን ሰራተኞች ስልክ በመደወል ከክልሉ ክለቦች የተላኩ የጠቅላላ ጉባኤ አባላት ወኪሎች ስሞች መቀየር እንዳለባቸው እና ይህንን እንዲያደርጉ ፤ ካላደረጉ ግን ጉባኤው እንዲስተጓጎል እንደሚያደርጉ በማስፈራራት ጭምር ስሜታቸውን መግለፃቸው ማረጋገጡን ገልጿል።

ጠቅላላ ጉባኤው ከጉባኤው አባላት በተጨማሪ የፊፋ እና የካፍ ታዛቢዎች የሚታደሙበት ነው ያለው ፌዴሬሽኑ ነገር ግን የክልሉ ከፍተኛ አመራር ሆነው ጉባኤው የተሳካ እንዲሆን ከፍተኛ ሥራ መሥራት ሲገባቸው ችግር እንደሚፈጥሩ መግለፃቸው የጉባኤው ውጤታማነት ላይ ስጋት እንዲያድርብን ምክንያት ሆኗል ብሏል።

የጎንደር ከተማ አስተዳደር እያደረገ ያለው ተግባር ፍፁም የሚያስመሰግነው ቢሆንም ፤ የክልሉ አመራር በዚህ ደረጃ ችግር ለመፍጠር እየሞከሩ በመሆኑ እና ሌሎች የእርምት እርምጃዎችን ለመውሰድ ያለው ጊዜ አጭር በመሆኑ የጉባኤውን ቦታ መቀየር ማስፈለጉንዳማስፈለጉን ፌዴሬሽኑ ገልጿል።

በዚህም ጉባኤው አዲስ አበባ ከተማ እንዲሆን መወሰኑን አሳውቋል።

@tikvahethiopia

#Gondar

" ውሳኔያችሁን በድጋሜ አጢኑት " - ጎንደር

የጎንደር ከተማ አስተዳደር የኢትዮጵያ እግር ኳስ ፌዴሬሽን ውሳኔን #ተገቢነት_የሌለው ነው አለ ፤ ውሳኔውንም ድጋሜ እንዲያጤነው ጠይቋል።

የኢትዮጵያ የእግር ኳስ ፌዴሬሽን በጎንደር ከተማ የፌዱሬሽኑን የምርጫ ጠቅላላ ጉባኤ ለማካሄድ እንደተዘጋጀ ለከተማው አስተዳደር አሳውቆ ነበር።

ነገር ግን ፌዴሬሽኑ የጉባኤ ቦታው እንዲቀየር መወሰኑን የገለፀ ሲሆን የከተማ አስተዳደሩ ወጣቶችና ስፖርት መምሪያ ይህ ውሳኔ ተገቢነት የለውም ብሏል።

የኢትዮጵያ እግር ኳስ ፌዴሬሽን በ2014 ዓ.ም የምርጫ ጠቅላላ ጉባኤውን ከነሀሴ 21-ነሀሴ 22/2014 ዓ.ም በጎንደር ከተማ እንደሚያካሂድ በቀን 22/11/2014 ዓ.ም በተፃፈ ደብዳቤ ነበር ያሳወቀው።

ፌደሬሽኑ በከተማዋ ጉባኤውን እንደሚያካሂድ ካሳወቀ በኃላ የቅድመ ዝግጅት ስራዎችን ከፌዴሬሽኑ አብይ ኮሚቴ ጋር በቅንጅት በተሳካ ሁኔታ ማከናወን መቻሉን የጎንደር ከተማ አስተደር ወጣቶች እና ስፖርት መምሪያ ገልጿል።

ይሁን እንጅ የቅድመ ዝግጅት ስራዎች ተጠናቀው ጉባኤውን በመጠበቅ ላይ እያለ አሳማኝ ባልሆነ ምክኒያት ፌደሬሽኑ ጉባኤውን ጠቅላላ ምርጫ የሚካሄድበትን ቦታ ቀይሬያለሁ ሲል በቀን 12/12/2014 ዓ.ም ማሳወቁን የከተማ አስተዳደሩ አሳውቋል።

ፌዴሬሽኑ የወሰነው ውሳኔ #ተገቢነት_የሌለው መሆኑን የገለፀው የጎንደር ከተማ አስተዳደር ፌደሬሽኑ የወሰነው ውሳኔው ተገቢነት የሌለው በመሆኑ ውሳኔውን በድጋሜ ሊጤን ይገባል ብሏል።

(ጎንደር ኮሚኒኬሽን)

@tikvahethiopia

#GONDAR

በአጣጥ የኬላ ፍተሻ ላይ 308 ሽጉጥ ተያዘ።

በጎንደር ከተማ አዘዞ ጠዳ ክፍለ ከተማ ከተማ 308 የቱርክ ሰራሽ ሽጉጥ በኬላ ፍተሻ መያዙን የአዘዞ ጠዳ ክ/ከተማ ሰላምና ደህንነት ጽ/ቤት አሳውቋል።

ፅህፈት ቤቱ ሽጉጡ የተያዘው በክፍለ ከተማው በድማዛ ቀበሌ አጣጥ በተባለው የኬላ ፍተሻ መሆኑን ገልጾ 2 ተጠርጣሪዎች በህግ ቁጥጥር ስር ውለው ምርመራ እየተደረገ ነው ማለቱን ከጎንደር ከተማ ኮሚኒኬሽን የተገኘው መረጃ ያሳያል።

@tikvahethiopia

#Awaday #Gondar

ሳፋሪኮም ኢትዮጵያ እያካሄደ የሚገኘውን የሙከራ ኔትዎርክ አገልግሎቱን እያስፋፋ ይገኛል።

ዛሬ በተላከልን መልዕክት ፤ ሳፋሪኮም ኢትዮጵያ መጠነ ሰፊ የደንበኞች የኔትወርክ ሙከራውን በአወዳይ እና ጎንደር ከተሞች አስጀምሯል።

ይህ የደንበኞች ሙከራ የሳፋሪኮምን ኔትወርክ እየሞከሩ ያሉትን ከተሞች ቁጥር 10 አድርሶታል። ከዚህ በፊት በድሬዳዋ፣ ሐረር፣ ሐረማያ፣ ባሕር ዳር፣ አዳማ፣ ቢሾፍቱ፣ ሞጆ እና ደብረ ብርሃን ላይ ሙከራ መጀመሩ ይታወቃል።

የአወዳይ እና ጎንደር ደንበኞች የሲም ካርድ ሽያጭ ምዝገባ፣ የአየር ሰዓት እና የስልክ ቀፎዎች ግዢ እንዲሁም የደንበኞች ድጋፍ የሳፋሪኮም ኢትዮጵያ መለያ ከተለጠፈባቸው መደብሮች እና ሱቆች ማግኘት ይችላሉ ተብሏል።

በአወዳይ አንድ በቀበሌ ዐ1 የሚገኝ የሳፋሪኮም መለያ የተለጠፈበት መደብር እና በጎንደር አራት (በፒያሳ፣ አራዳ፣ አዘዞ እና ኮሌጅ) የሳፋሪኮም መለያ የተለጠፈባቸው መደብሮች ደንበኞችን ለማገልገል ክፍት ናቸው ሲል በላከልን መልዕክት አሳውቋል።

@tikvahethiopia

#GONDAR

የጥምቀት በዓል እጅግ በድምቀት የሚከበርባት ጎንደር ከተማ ዝግጅቷ በማጠናቀው እንግዶቿን እየተጠባበቀች ነው።

በታሪካዊቷ ጎንደር ከተማ የሚገኙ አገልግሎት ሰጪዎች ለበዓሉ የሚመጡ እንግዶችን ለመቀበል እና በክብር ለማስተናገድ ዝግጅታችንን ሁሉ አጠናቀናል ብለዋል።

ዘንድሮ እጅግ ከፍተኛ ቁጥር ያለው ሰው የጥምቀት በዓልን ለማክበር ጎንደር ይገባል ተብሎ ይጠበቃል።

የከተማ አስተዳደሩ " የጥምቀት በዓልን የጥበብ መፍለቂያና የፍቅር ከተማ በሆነችው በጎንደር  ኑ አብረን እናክብር " ሲል ጥሪ አቅርቧል።

" ጎንደር የሃይማኖት፣ የፍቅር ፣ የጥበብ መፍለቂያ፣ የቱሪስት ምስእብ ፣ የኩሩ ህዝብ ባለቤት ከተማ ናት " ያለው አስተዳደሩ ፤ የጎንደር ህዝብ እንግዳ ተቀባይ፣ ሰው አክባሪ ህዝብ ነው ፤ ኑ የጥምቀት በዓል በጋራ እናክብር ብሏል።

@tikvahethiopia

#GONDAR

በጎንደር ክልከላዎች ተጣሉ።

የጎንደር ከተማ አስተዳደር የፀጥታ ኮማንድ ፖስት ክልከላዎችን አስቀመጠ።

ኮማንድ ፖስቱ ፤ ክልከላው " የከተማዉን ሰላምና የህግ የበላይነት ለማረጋገጥ እንዲቻል " የተቀመጠ መሆኑን ገልጿል።

የተቀመጡ ክልከላዎች ምንድናቸው ?

1. በከተማው ያሉ ማንኛውም መጠጥ ቤቶችና ጭፈራ ቤቶች እስከ ምሽቱ 3:00 ሰዓት ዉጭ አገልግሎት መስጠት ተከልክለዋል።

2. በከተማው የትራንስፖርት አገልግሎት የሚሰጡ ባለ 3 እግር ባጃጆች ከንጋቱ 12:00 ሰዓት እስከ ምሽቱ 2:00 ሰዓት ዉጭ መንቀሳቀስ ተከልክለዋል።

3. ከተፈቀደለት የመንግስት የፀጥታ ኃይል ውጭ የጦር መሳሪያ ይዞ መንቀሳቀስ ተከልክሏል።

4. ድምፅ አልባ መሳሪያዎችን ስለታማ የሆኑ እንደ ጩቤ ፣ ገጀራ ፣ አንካሴ ፣ ጦርና ፌሮ ብረት ወዘተ የመሳሰሉትን ይዞ መንቀሳቀስ ተከልክሏል።

5. በህግ የሚፈለጉ ወይም ተጠርጣሪዎችን ሽፋን የሰጠ ፣ የደበቀ ፣ የሀሰተኛ መረጃ ሰጥቶ ያሰመለጠ ፣ የፀጥታ ሀይሎችን የህግ ማስከበር ተልዕኮ ማደናቀፍ ማወክ በህግ ተከልክሏል።

6. በማንኛውም ቦታና ስዓት ጥይትም ሆነ ሮኬት ርችት መተኮስ በጥብቅ ተከልክሏል።

7. በተከለከሉ ቦታዎች በእምነት ተቋማት፣ በገቢያዎች፣ ህዝብ በብዛት በሚሰበሰብባቸው ቦታዎች ፣ በሆቴሎች፣ መጠጥ ቤቶችና ግሮሰሪዎች፣ ልዩ ልዩ መዝናኛ ቦታዎች ጦር መሳሪያ ይዞ መገኘትና መንቀሳቀስ ተከልክሏል።

8. የሠራዊቱን ሚሊተሪ (አልባሳት) ከሰራዊቱ አባላት ውጭ መልበስ የተከለከለ ነው ፦
- የልዩ ኃይል ፣
- የፓሊስ ፣
- የመከላከያ ሠራዊት ፣
- የፌዴራል ፓሊስ ልብስ መልበስ በጥብቅ ተከልክሏል።

9. ያልተፈቀዱ ስብሰባዎችን ማለትም ያለ መንግስት እውቅና ውጭ ስብሰባ ማድረግ ፣ ወታደራዊ ስልጠና መስጠት ተከልክሏል።

10. አድማ መቀስቀስ፣ ማድረግና ማስተባበር እንዲሁም መደበኛ ስራን ማስተጓጎል በጥብቅ ተከልክሏል።

11. የአማራን ህዝብ ከጥቃትና ከውርደት ለመታደግ መስዋትነት የከፈሉ የአማራ የቁርጥ ቀን ልጆች ፣ የአማራ ልዩ ኃይል አባላት በተፈጠረው የመረጃ ክፍተት ከተለያየ አካባቢ ተነስተው ወደ ከተማው የመጡ በከተማው በተዘጋጀው ማረፊያዎች እንዲሰባሰቡ ማሳሰቢያ ተለልፏል። ከዚህ ውጭ በተናጠልም ሆነ በቡድን መሳሪያ ይዞ መንቀሳቀስ እና ጥይት መተኮስ ተከልክሏል።

12. ፀጉረ ልዉጥ/አጠራጣሪ ሰው ከቤቱ ያሳደረ ፣ያከራየ፣ በሆቴሉ አልጋ ያስያዙ እንዲሁም ለሚመለከተዉ የፀጥታ አካል ጥቆማ ያልሰጠ በህግ  ይጠየቃል።

መረጃው የጎንደር ከተማ አስተዳደር የፀጥታ ኮማንድ ፖስት ነው።

@tikvahethiopia

#Gondar

ታሪካዊቷ የጎንደር ከተማ አዲስ ከንቲባ ተሾመላት።

አቶ ባዩህ አቡሃይ በዛሬው ዕለት የጎንደር ከተማ አስተዳደር ተቀዳሚ ምክትል ከንቲባ ሆነው ተሹመዋል።

የጎንደር ከተማ ምክር ቤት ዛሬ እያካሄደ በሚገኘው 4ኛ ዙር 10ኛ ዓመት 3ኛ መደበኛ ጉባኤ ነው አቶ ባዩህ አቡሃይ የጎንደር ከተማ አስተዳደር ተቀዳሚ ምክትል ከንቲባ አድርጎ የሾመው።

ምንጭ፦ የጎንደር ኮሚኒኬሽን

@tikvahethiopia

#GONDAR

በጎንደር ዩኒቨርሲቲ ሆስፒታል የህክምና ዶክተር የሆነው የቲክቫህ ኢትዮጵያ ቤተሰብ አባል በከተማው ስላለው ሁኔታ መረጃዎችን አጋርቶናል።

- ታማሚዎች በኦክስጂን እና ደም እጥረት እየሞቱ መሆኑን ገልጿል።

- ለአምቡላንስ ጨምር ምንምአይነት የትራንስፖርት አማራጭ እንደሌለ ፤ ታማሚዎች በሰው ኃይል በሸክም ወደ ሆስፒታሉ እየመጡ መሆኑን አስረድቷል።

- ወደ 20 (ሰላማዊ ሰዎች) ወደ ሆስፒታሉ ከደረሱ በኃላ እንደሞቱ እንዲሁም ከ200 በላይ ሰዎች ተጎድተው ሆስፒታል እንደሚጡ ከነዚህ ውስጥ አብዛኞቹ ሰላማዊ ሰዎች መሆናቸውን ገልጿል።

- በርከታ ሰዎች በቤታቸው ሞተው፣ ቀብራቸውም በአካባቢያቸው በተለይም በቀበሌ 4 ፣ 12 ፣ 11 እና 18 መፈፀሙን አመልክቷል።

- ባለፈው ሰኞ በነበረ ግጭት ከሆስፒታሉ የተወሰኑ ህፃዎች በመሳሪያ ቢመቱትም የተጎዳ ሰው ግን እንዳልነበር ገልጿል።

- ሆስፒታሉ ምግብ እንዲሁም መድሃኒት እያለቀበት መሆኑን አመልክቷል።

ዛሬ ጎንደር እንዴት ናት ?

አሁን ላይ በጎንደር ከተማ ከየትኛውም አቅጣጫ የተኩስ ድምፅ እየተሰማ አይደለም። ጥዋት ላይ ለጥቂት ሰከንድ ፒያሳ እና ቀበሌ 18 አካባቢ ተኩስ ተሰምቶ ነበር።

ከትላንት ማታ አንስቶ ዛሬም ጥዋት በከተማው አብዛኛው ክፍል ላይ የኢትዮጵያ ሀገር መከላከያ ሰራዊት ያለ ሲሆን ሰራዊቱ በሆስፒታሉ አካባቢም መኖሩን ይኸው ዶክተር ገልጿል።

የህክምና ዶክተሩ ከምንም በላይ በሆስፒታል ያለው የኦክስጅን ፣ የደም እጥረት እንዲሁም የአምቡላንስ ትራንስፖርት ጉዳይ እጅግ አሳሳቢ መሆኑን በመግለፅ መፍትሄ እንዲፈለግ ጥሪ አቅርቧል።

ጥንታዊቷ እና ታሪካዊቷ #ጎንደር ባለፉት ቀናት ከፍተኛ የሆነ ግጭት ካስተናገዱ የአማራ ክልል ከተሞች መካከል አንዷ ናት።

@tikvahethiopia