#update የፊታችን ሐምሌ 11 ቀን 2011 ዓም የሲዳማ ሕዝብ ደቡብ ከሚባል ድሪቶ ውስጥ ለማደር የማይገደድበት እና በራሱ ዕጣ ፈንታ ላይ በራሱ ምክር ቤት ራሱ ብቻ የወሰነበትን ውሳኔ የሚያጸናበት ቀን ነው ሲል ኤጄቶ የተባለው የሲዳማ የመብት አቀንቃኝ ቡድን አስታወቀ።

ቡድኑ ዛሬ በሐዋሳ ከተማ ከአባላቱ እና ከደጋፊዎቹ ጋር መወያየቱን በመግለፅ የሲዳማ ሕዝብ በክልል የመደራጀት ጥያቄ ዙሪያ ያለውን አቋም በማኅበራዊ ድረ ገጹ ይፋ አድርጓል።

በዚሁ መግለጫው አንዳመለከተው የሲዳማ ኤጄቶች የሲዳማ ጥያቄ እና ጥያቄው የሚፈታበት ዴሞክራሲያዊ መንገድ ሀገራዊ ለውጡን በማይናድ መሠረት ላይ የሚገነባና ኅብረ ብሔራዊ ፌደራሊዝሙን የሚያጠናክር ኩነት መሆኑን እናምናለን ብሏል።

የሲዳማ ክልል ጥያቄን አስመልክቶ ከየትኛውም አካል የሚሰጥ ኢ-ሕገ መንግሥታዊ፡ ምላሽ ምንም አይነት ተቀባይነት አይኖረውም ያለው መግለጫው ጥያቄያችንን እና ውሳኔያችንን ለመቀልበስ የሚነዙ #ማስፈራሪያዎች እና #ዛቻዎች የሲዳማን ሕዝብ ጥንታዊ የጀግንነት ስነልቦና በጉልህ ካለመገንዘብ የሚመነጩ ተራ ፉከራዎች እንደሆኑ እንገነዘባለን ሲልም አትቷል።

የሲዳማን ሕዝብ የነጻነት ቀን ለማጨለም እና ሃሳቡንም በተንሸዋረረ መልኩ የተረዱ አካላት ይህን ቀን የዓለም ፍጸሜ በማስመሰል የሚያሰሙትን ተራ ፕሮፓጋንዳ አምርረን እንቃወማለን ሲል ገልጿል።

ምንጭ፦ የጀርመን ራድዮ
🗞ቀን ሰኔ 27/2011 ዓ/ም
@tsegabwolde @tikvahethiopia