#ኢትዮጵያ

በአዲሱ ስርዓተ ትምህርት ዘንድሮ በመላ ሀገሪቱ የ " ኬጂ " ተማሪዎች እንግሊዝኛ ቋንቋ እየተማሩ አይደለም።

የመዋዕለ ህጻናት ተማሪዎች " ኤ፣ ቢ፣ ሲ፣ ዲ… " ን በዜማ መቁጠር፣ " ኤ ፎር አፕል፣ ቢ ፎር ቦል… " እያሉ ቃላት መመሥረትም አቁመዋል።

ከዚህ ዓመት ጀምሮ " ስፖክን ኢንግሊሽ " እና " ኢንግሊሽ ሊትሬቸር " ከ " ኬጂ " ተማሪዎች የትምህርት ዓይነቶች ውስጥ ተሰርዘዋል።

እንደ ቀድሞው በአማርኛ ሂሳብ፤ በእንግሊዝኛ " ማትስ " እያሉ የቁጥሮችን አጠራር በሁለት ቋንቋ መሸምደድም ቀርቷል።

የዘንድሮ የ " ኬጂ " ተማሪዎች ለአካባቢ ሳይንስ እና ለ " ጄኔራል ሳይንስ " ሁለት ደብተር አይዙም።

በአራት ዓመታቸው " ነርሰሪ " የሚገቡት ህጻናት፣ በ6 ዓመታቸው ከ " ዩ ኬጂ " ሲመረቁ የሚያውቁት ብቸኛ የፊደል ገበታ የአፍ መፍቻ ቋንቋቸውን እንዲሆን ተደርጓል።

ልጆችን እንግሊዝኛ በማስተማር ተመራጭ የሆኑት የግል መዋለ ህጻናት ከዚህ ዓመት ጀምሮ ሁሉንም ትምህርት የሚሰጡት በአካባቢው የአፍ መፍቻ ቋንቋ ብቻ ነው።

በአዲሱ የትምህርት ሚኒስቴር አሠራር መሠረት ተማሪዎች እንግሊዝኛ ቋንቋን እንደ አንድ ትምህርት መማር የሚጀምሩት #አንደኛ_ክፍል ሲደርሱ ነው።

ከዚህ ዓመት ጀምሮ መተግበር የጀመረው ሥርዓተ ትምህርት ህጻናት የሚማሩትን ትምህርት በተለያዩ የትምህርት ዓይነቶች (ሰብጀክት) አይከፋፍልም።

የኬጂ ተማሪዎች እንደ ቀድሞው ሂሳብ፣ አማርኛ ወይም አካባቢ ሳይንስ የሚባሉ የትምህርት ዓይነቶች አይኖሯቸውም። በትምህርት አይነቶች ፋንታ ህጻናቱ የሚማሩት " ጭብጦችን " ነው።

ለምሳሌ፤ የመጀመሪያ ዓመት የመዋለ ህጻናት ተማሪዎች ስድስት ጭብጦችን ይማራሉ። ከእነዚህ ጭብጦች ውስጥ፦
* ስለ እኔ፣ ስለ ቤቴ እና ስለ ቤተሰቦቼ
* ትምህርት ቤቴ እና አካባቢዬ የሚሉት ይገኙበታል።

የኬጂ የሁለተኛ ደረጃ ተማሪዎች ከሚማሯቸው ጭብጦች ውስጥ ደግሞ ፦
* ዋሊያ
* ህዋ
* ተክሎች እና መጓጓዣ ተጠቃሽ ናቸው።

በአዲሱ ካሪኩለም መሠረት ህጻናቱ እንደ ቀድሞው አብዛኛውን ጊዜያቸውን ክፍል ውስጥ ቁጭ ብለው ከሰሌዳ እና ከደብተር ጋር እንዲፋጠጡ አይደረግም።

ዘንድሮ የኬጂ ተማሪዎች የሚማሩባቸው ዋነኛ መንገዶች ጨዋታ፣ መዝሙር እና ተረት ናቸው።

በአዲሱ ካሪኩለም የኬጂ ተማሪዎች እንግሊዝኛ እንዲማሩ አይደርግም። በእንግሊዝኛ ምንም ነገር የለም። ሁሉም ነገር በአፍ መፍቻ ቋንቋ ይሰጣል።

የኬጂ ትምህርት ይዘት መቀነስ ያላስደሰታቸው ወላጆችም ያሉ ሲሆን ተማሪዎች ከአቅማቸው በታች እንዲማሩ እያደረገ ነው ብለዋል።

በተለይ በአዲስ አበባ ከተማ የሚገኙ የግል ትምህርት ቤቶችም ከወላጆች ቅሬታ እየተቀበሉ መሆኑን የአዲስ አበባ የግል ትምህርት ቤቶች አሠሪዎች ማኅበር ፕሬዝዳንት አቶ አበራ ጣሰው አሳውቀዋል።

የቅድመ አንደኛ ደረጃ ትምህርት ካሪኩለሙ በዝግጅት ላይ በነበረበት ወቅት የትምህርት ይዘቱ መቀነሱን እና የእንግሊዝኛ ቋንቋ ትምህርት መውጣቱን በተመለከተ ማኅበሩ ተቃውሞ አስተያየት መስጠቱንም አስታውሰዋል።

የቅድመ አንደኛ ሥርዓተ ትምህርትን ካዘጋጁ ባለሙያዎች አንዱ የሆኑት ዶ/ር ታደሰ ጃለታ ፤ " ቤተሰብ ልጁ እንግሊዝኛ ከቻለ፣ ፊደል ከቆጠረ ወይም መደመር ከቻለ ተምሯል፣ አድጓል ብሎ ያስባል። በህጻናት ደረጃ ትምህርት እርሱ አይደለም " ብለዋል።

ያንብቡ ፦ https://telegra.ph/BBC-AMAHRIC-01-24

Credit - #BBCAMAHRIC

@tikvahethiopia

#ኤርትራ

ኤርትራ የጀርመን የውጭ ጉዳይ ሚኒስትር አናሌላ ቤርቦክን አሳፍሮ ሲጓዝ የነበረን አውሮፕላንን ከአየር ክልሏ ማስወጣቷ ተነግሯል።

የጀርመን የውጭ ጉዳይ ሚኒስትር አናሌላ ባየርቦክ ትላንት እንዳስታወቁት፤ ወደ ጂቡቲ ሲጓዝ የነበረው የጀርመን መንግስት አውሮፕላን ያለ እቅድ ሳዑዲ አረቢያ ለማረፍ መገደዱን ገልጸለዋል።

ይህ የሆነ በኤርትራ የአየር ክልል ላይ ለማለፍ ፍቃድ ባለማግኘቱ እንደሆነም አስታውቀዋል።

ሚኒስትሯ በ3 የምስራቅ አፍሪካ ሀገራት ለ3 ቀናት ጉብኝት ለማድረግ በጉዞ ላይ የነበሩ ሲሆን፤ የመጀመሪያ ጉብኝታቸውም ጂቡቲ ነበረች።

ሚኒስትሯ ፤ ያለ እቅድ በሳዑዲ አረቢያ ለማረፍ መገደዳቸው በምስራቅ አፍሪካ ቀጠና ያለውን አለመረጋጋት ያመለክታል ብለዋል።

ትላንት ወደ ሳዑዲ አረቢያ ሄደው ለማደር የተገደዱት ሚኒስትሯ ዛሬ በጅቡቲ ጉብኝታቸውን ጀምረዋል።

የጀርመን ውጭ ጉዳይ ሚኒስቴር፤ " አውሮፕላኑን በኤርትራ የአየር ክልል ላይ ለማብረር ፈቃድ እንዳልተሰጠው ያወቅነው ትናንት ጠዋት ከበረራው ጥቂት ደቂቃዎች ቀደም ብሎ ነበር " ብሏል።

አውሮፕላኑ #በበረራ_ላይ_እያለ ፈቃዱን ያገኛል ተብሎ በመወሰኑ ወደዚያ መሄዱንም ገልጿል።

ከቤርቦክ ጋር የተጓዙት ልዑካን ፤ አውሮፕላኑ እየበረረ ፈቃድ ማግኘት እንግዳ እንዳልሆነ ተናግረዋል።

ቤርቦክን ፤ የሱዳን ጦርነት ጉዳይ እና የቀይ ባህር የመርከብ መንገድ ጉዳይ ትኩረት አድርጓል የተባለው የምሥራቅ አፍሪቃ ጉብኝታቸውን ነገ በደቡብ ሱዳን ያጠናቅቃሉ ተብሏል።

#AlAinNews #DW

@tikvahethiopia

" ከሶማሊያ ጋር የመዋጋት ፣ የመጣላት ፍፁም ፍላጎት የለንም " - ጠ/ሚ ዶ/ር ዐቢይ አህመድ

ኢትዮጵያ ከሶማሊያ ጋር #የመዋጋትም ሆነ የመጣላት ፍላጎት እንደሌላት የኢፌዴሪ ጠቅላይ ሚኒስትር እና የብልፅግና ፓርቲ ፕሬዝዳንት ዶ/ር ዐቢይ አህመድ ተናገሩ።

ዶ/ር ዐቢይ ይህን ያሉት ለፓርቲያቸው ማዕከላዊ ኮሚቴ ባቀረቡት ገለፃ ነው።

ጠቅላይ ሚኒስትሩ ፤ " የምንከተለው የዲፕሎማሲ ጉዟችን ክብርንና ጥቅምን ማስከበር ላይ ያተኮረ ነው። " ብለዋል።

" ሶማሊያ ከማንም በላይ የኢትዮጵያ ወንድም ዘመድ ጎረቤት ናት፤ ባለፉት 10 ዓመታት በሺሕ የሚቆጠሩ ኢትዮጵያዊያን በሶማሊያ ውስጥ የሶማሊያ ሰላም ለማስከበር የህይወት ዋጋ ከፍለዋል። " ሲሉ ገልጸዋል።

" ማንም ሀገር በዓለም ላይ ኢትዮጵያ የከፈለችውን ያህል የከፈለ የለም " ያሉት ጠቅላይ ሚኒስትሩ ፤ " አግዛለው ብሎ መፎከርና ሄዶ መሞት ይለያያል " ብለዋል።

" ኢትዮጵያ ከሶማሊያ ህዝብና መንግስት ጋር ለመጣላት ለመዋጋት ፍጹም ፍላጎት የላትም " ሲሉም ተደምጠዋል።

" አሁን በኢትዮጵያ ያለው መንግስት በሶማሊያ አንድነት የሚታማ መንግስት አይደለም " ያሉት ዶ/ር ዐቢይ ፤ " ለመጀመሪያ ጊዜ በኢትዮጵያ ታሪክ ሶማሊያዊያን አንድ እንዲሆኑ በንግግር ሳይሆን በተግባር የሰራ መንግስት ነው " ብለዋል።

" ከልባችን አንድ እንዲሆኑ ስለምንፈልግ የቀድሞው ፕሬዜዳንት ፈርማጆ ስልጣን ላይ እያሉ ከሱማሌላንድ ፕሬዜዳንት ቢሂ ጋር ኢትዮጵያ፣ ጅቡቲ ለማገናኘት በተደረገ መኩራ እንዲገናኙ አድርገን ውይይት ተደርጓል ፤ ሶማሊያ እና ኬንያ በድንበር ጉዳይ ሲጣሉ አለም ሲንጫጫ ፕሬዜዳንት ፈርማጆን ኬንያ ወስደን ከወንድማቸው ከፕሬዜዳንት ኡሁሩ ጋር እንዲነጋገሩ ጥረት አድርገናል፤ ለምን ? የነሱ ሰላም የኛ ስለሆነ " ሲሉ አስረድተዋል።

" ሶማሊያ እንደ ግጭት ሰፈር አድርጎ የመጠቀም ፍላጎት ከብዙ ኃይሎች ይነሳል፤ እኛ ለዓለም ህዝብ የቀይ ባሕር 'አክሰስ' ጥያቄያችን ህጋዊ መሆኑን አሳይተናል። ዓለም በሙሉ ይገባቸዋልኮ ግን፣ ግን ነው የሚለው ፤ የኛ ፍላጎት ባሕርን አክሰስ ማድረግ ብቻ ነው " ሲሉ ገልጸዋል።

" ከኢትዮጵያ መውሰድ ሲሆን ችግር የለውም፤ ለኢትዮጵያ መስጠት ነው ነውሩ ፤ ዲፕሎማሲያችን እንደዚያ ነው፤ አሁን መልኩን እየቀየረ ነው " ብለዋል።

" በእኛ እና ሶማሊያ መካከል ችግር ይፈጠራል ብዬ ባላስብም " ያሉት ጠቅላይ ሚኒስትሩ ፤ " በሕዝቦች መካከል ጥላቻ እንዳይፈጠር ቁርሾ እንዳይፈጠር በተረጋጋና በሰከነ መንገድ ውጫዊ አክተር በሚያሰክን መንገድ መምራት ይጠይቃል " ሲሉ ተናግረዋል። #PP

@tikvahethiopia

#ትግራይ #እስልምና
 
ለዓመታት የተቋረጠው ግንኙነት እንዲቀጥል ስምምነት ላይ መደረሱ ተነገረ።

በአስከፊውና ደም አፋሳሽ ጦርነቱ ምክንያት ተቋርጦ የነበረው የትግራይ ክልል እስልምና ጉዳዮችና የኢትዮጵያ እስልምና ጉዳዮች ጠቅላይ ምክር ቤት ግንኙነት የቀረበውን ይፋዊ ይቅርታ ተከትሎ ግንኙነቱ ወደ ቀድመው እንዲመለስ መወሰኑ ታውቋል።

የትግራዩን ጦርነት ተከትሎ የትግራይ የእስልምና ጉዳዮች ምክር ቤት 2014 ዓ/ም ላይ ከኢትዮጵያ እስልምና ጉዳዮች ጠቅላይ ምክር ቤት ተለይቶ ራሱን ችሎ እንደተቋቋመ በይፋ አስታውቆ ነበር።

በፕሪቶሪያው ስምምነት መሰረት ጦርነቱ መቆሙን ተከትሎ የኢትዮጵያ እስልምና ጉዳዮች ጠቅላይ ምክር ቤት እና የትግራይ ክልል የእስልምና ጉዳዮች ግንኙነት ወደነበረበት እንዲመለስ ጥረት ሲደረግ ቢቆይም አልተሳካም ነበር።

ጥር 16 ቀን 2016 ዓ.ም የትግራይ የእስልምና ጉዳዮች ምክር ቤት በመቐለ ከተማ ባካሄደው #አስቸኳይ ስብሰባ የኢትዮጵያ እስልምና ጉዳዮች ጠቅላይ ምክር ቤት አቀረበ ባለው የይቅርታ ደብዳቤ ላይ ከተወያየ በኃላ በሙሉ ድምፅ በመቀበል ከሶስት አመታት በላይ የተቋረጠው ግንኙነት እንዲቀጥል መወሰኑን ገልጿል።

በደም አፋሳሹ እና አስከፊው የትግራይ ጦርነት ምክንያት በተፈጠረ መቃቃርና አለመጣጣም የትግራይ የኦርቶዶክስ የሃይማኖት አባቶች ከኢትዮጵያ ኦሮቶዶክስ ቤተክርስትያን ተለይተው " መንበረ ሰላማ " በሚል የራሳቸው ቤተክህነት ማቋቋማቸው ይታወቃል።

መረጃው በመቐለ የቲክቫህ ኢትዮጵያ ቤተሰብ አባል ተዘጋጅቶ የተላከ ሲሆን በነገው ዕለት ተጨማሪ መረጃዎችን የምናደርሳችሁ ይሆናል።
                                       
@tikvahethiopia            

#AddisAbaba

በአዲስ አበባ ከተማ ፤ በተለያዩ ጊዜያት የጅምላ እስር እና አፈሳ ይደረጋል በሚል ቅሬታዎች ሲነሱ ቆይተዋል። የመንግስት ምላሽ ደግሞ " በከተማው እንዲህ ያለው ነገር የለም " የሚል እንደነበር አይዘነጋም።

ይኸው የአፈሳ ነገር ሰሞኑን ከነበረው በዓል ጋር ተያያዞ ቀጥሎ በርካታ ወጣቶች " በመንግሥት የጸጥታ ኃይሎች እየታፈሱ ታስረዋል " በሚል ቲክቫህ ኢትዮጵያ ቅሬታዎች ደርሶት ተመልክቷል።

አንድ ለቲክቫህ ኢትዮጵያ ቃላቸውን የሰጡ የታሳሪ ቤተሰብ ፤ ከሰሞኑን የአማራ ብሄር ተወላጆች የሆኑ 32 ሰዎች ተይዘው መታሰራቸውን ፤ እነዚህ ሰዎች ሥራ ሰርተው ልጅ የሚያሳድጉ፣ ቤተሰብ የሚረዱ ሰዎች እንደሆኑ ገልጸዋል።

የት ነው የታሰሩት ? ምን አድርገውስ ነው ? ተብሎ ከቲክቫህ ኢትዮጵያ ጥያቄ የቀረበላቸው የታሳሪ ቤተሰብ፣ " ንፋስ ስልክ ላፍቶ ሆኖ ወረዳ 12 የሚባል ነው ልዩ ቦታው " ሲሉ መልሰዋል።

ከታሳሪዎቹ አንዱን ሄደው እንደጠየቁና  " እሱም የከሰሱን ሁላችንንም ‘ ፋኖ በሚል ነው ’ " እንዳሏቸው ገልጸዋል።

" ፓሊስም ብናናግር ‘እኛ መፍትሄ አንሰጥም’ ነው የሚሉት " ያሉት እኚሁ ቤተሰብ ፤ ከታሳሪዎቹ መካከል አራቱ በባጃጅ ሥራ የሚተዳደሩ ቤተሰቦቻቸው መሆናቸውን ተናግረዋል።

ታሳሪዎቹን ፓሊስ እንዴትና የት እንደያዟቸው ጠይቀናቸው ፤ " ከላፍቶ ሚካኤል፣ ሚካኤልን ወስደው ከባህረ ጥምቀቱ ወደ ቤታቸው እየተመለሱ ነው የያዟቸው የሃና ማርያም ፓሊሶች " ብለዋል።

ስለጉዳዩ ምን ምላሽ እንዳላቸው ለመጠየቅ ቲክቫህ ኢትዮጵያ ሰዎቹ ታስረውበታል ወደ ተባለው ላፍቶ ወረዳ 12 ፓሊስ ጣቢያ ያደገው የስልክ ሙከራ አልተሳካም።

የንፋስ ስልክ ፓሊስ መምሪያ ኮማንደር ዘለቀ ግን " እኛ ጋ በእንደዚህ አይነት ጉዳይ የታሰረ የለም " ብለው ተጨማሪ ማብራሪያ ለመስጠት ተቆጥበዋል።

በሌላ በኩል ፤ ባለፈው ሳምንት በአዲስ አበባ ኮተቤ ቅዱስ ገብርኤል ቤተክርስቲያን አካባቢ የጥምቀት በዓል በተፈጠረ ረብሻ በበዓሉ አክባሪዎች ላይ አካላዊ ጉዳት መድረሱን ቲክቫህ ኢትዮጵያ ተመልክቶ ነበር።

ረብሻው የተፈጠረው ቅዳሜ ጥር 11 ቀን 2016 ዓ/ም ታቦተ ፅላቱ ወደ ቤተ ክርስቲያኑ ግቢ ሊገባ ሲል በበዓለ ጥምቀቱ ሲሳተፉ የነበሩ ወጣቶች የዘመኔ ካሴና ምሬ (ምህረት) ወዳጆን ሥም በመጥራት ስለፋኖ እያቀነቀኑ በነበረበት ወቅት ሲሆን ፣ በበዓሉ ታዳሚዎች በኩልም ወደ ፀጥታ አካላት የድንጋይ ውርወራ ሲደረግ ተስተውሏል።

የአይን እማኞች በወቅቱ የተሳሰቡ ወጣቶች የፖለቲካ ይዘቶችን ያያዙ መልዕክቶችን ሲያስተጋቡና ፖሊስም ቆሞ ሲመለከታቸው ከቆየ በኃላ ወደ እርምጃ መሄዱን ተናግረዋል።

በወቅቱም በርካታ ወጣቶች በፓሊስ አባላት ታስረዋል። ቲክቫህ ኢትዮጵያ ያነጋገራቸው የአንድ ወጣት እናት ልጃቸው እንደተወሰደ ገልጸዋል።

ቲክቫህ ኢትዮጵያ ጉዳዩንና በወቅቱ ስለተፈጠረው የፀጥታ ሁኔታ ለማጣራት ወደ አዲስ አበባና ፌደራል ፓሊስ ያደረገው ሙከራ ሳይሳካ ቀርቷል።

ነገር ግን ከበዓሉ ቀደም ብሎ ፖሊስ በእንዲህ ያለው በዓል እንዲጎላ የምንፈልገው ሃይማኖታዊና ባህላዊ ስነስርዓቱን ብቻ እንዲጎላ ፣ የፖለቲካም ይሁን ማንኛውም መልዕክት እንደማይታገስ አስጠንቅቆ ነበር።

ዘገባውን የላከው የአዲስ አበባ ቲክቫህ ኢትዮጵያ ቤተሰብ አባል ነው።

@tikvahethiopia

#Update

" የቀረበውን የይቅርታ (ዓፉታ) ደብዳቤ በሙሉ ድምፅ ተቀብለነዋል " - የትግራይ ክልል እስልምና ጉዳዮች ምክር ቤት

የትግራይ እስልምና ጉዳዮች ምክር ቤት ትላንት ባካሄደው አስቸኳይ ስብሰባ ከኢትዮጵያ እስልምና ጉዳዮች ጠቅላይ ምክር ቤት ጋር የነበረው ልዩነት በይቅርታ ተፈቶ ወደ ቀደመው ግንኝኑነት እንዲመለስ ውሳኔ አሳልፏል።

ምክር ቤቱ ፤ በትግራይ ላይ ሲካሄድ በነበረ የጦርነት ጊዚያትም ጭምር ጦርነት ወለድ ችግሮች ተቋቁሞ መጅሊሱን በመምራት ሰላም እንዲመጣ ከፍተኛ አስተዋፅኦ ያደረገ ተቋም መሆኑን ገልጿል።

ከዚሁ በተጨማሪ " የኢትዮጵያ እስልምና ጉዳዮች ጠቅላይ ምክር ቤት በትግራይ ላይ የተካሄደው ጦርነት ባለማውገዙና ባለመቃወሙ ምክንያት ተቋማችን ልዩነቱ መፈጠሩን መግለፃችን ይታወቃል " ብሏል።

ትላንት ጥር 16/2016 ዓ.ም በዚሁ ጉዳይ ላይ ምክርቤቱ ባካሄደው አስቸኳይ ጉባኤ ባለ 6 ነጥብ የአቋም መግለጫ ማውጣቱን አሳውቋል።

1ኛ. የኢትዮጵያ እስልምና ጉዳዮች ጠቅላይ ምክር ቤት ጥር 7/2016 ለትግራይ እስልምና ጉዳዮች ምክር ቤት ፤ በትግራይ ላይ የተካሄደው ጦርነትና ጦርነቱ ተከትሎ በሙስሊሙ ማህበረሰብ የደረሰው የሞት ፣ የአካል ጉዳትና የሃይማኖት ተቋማት ውድመት ባለማውገዙ እንዲሁም የትግራይ እስምልና ጉዳዮች ም/ቤት ያሳየውን ጠንካራና በሳል አመራር ተገንዝቦ ባለመደገፉ ፤ ይህን እንደ ችግር ተቀብሎና አምኖ ያቀረበውን የይቅርታ (ዓፉታ) ደብዳቤ የትግራይ እስልምና ጉዳዮች ምክር ቤት በጥልቀት በማየትና በመረዳት ጥቅሙን መሰረት በማድረግ በሙሉ ድምፅ ተቀብሏል።

2ኛ. የትግራይ እስልምና ጉዳዮች ምክር ቤት ፤ ከኢትዮጵያ እስልምና ጉዳዮች ጠቅላይ ምክር ቤት ባለው ግንኙነት መካከል የተፈጠረው ልዩነት የሙስሊም ማህበረሰቡ ጥቅም በሚጠቅምና በሚያጠናክር መልኩ በሰላማዊ መንገድ ችግሮችን ለመፍታትና የትግራይ የሙስሊም ማህበረሰብ ተጠቃሚ እንዲሆን ጥረት እንደሚደረግ ገልጿል።

3ኛ. ምክር ቤቱ ከኢትዮጵያ እስልምና ጉዳዮች ጠቅላይ ምክር ቤት በፈጠረው የይቅርታ (ዓፉታ) መድረኽ ተከትሎ ከ3 አመታት በላይ ተቋርጦ የነበረው የሀጂና ዑሙራ መሰረታዊ ሃይማኖታዊ መብት በኢትዮጵያ እስልምና ጉዳዮች ጠቅላይ ምክር ቤት እንዲፈፀምና እንዲረጋገጥ ጥረት እንደሚደረግ አሳውቋል።

4ኛ. በሰመ አህለል ሱና ወልጀምዓ ምክንያት ከትግራይ እስልምና ጉዳዮች ጠቅላይ ምክር ቤት እውቅና ድጋፍ ውጪ የሚደረግ እንቅስቃሴ በህዝበ ሙስሊሙ መካከል ልዩነት የሚፈጥር ስለሆነ ያልተገባው እንቅስቃሴ እንዲቆም እንደሚሰራ አሳውቋል።

5ኛ.  ምክር ቤቱ የሙስሊም ማህበረሰቡ መብት ፣ በትምህርት ቤቶችና መንግስታዊና መንግስታዊ ያልሆኑ ተቋማት የሚፈጠር ሃይማኖታዊ ጫናና ችግር የትግራይ ጊዚያዊ አስተዳደርና የትግራይ ትምህርት ቢሮ እንዲያርሙት ጥሪ አቅርቧል።

6ኛ. በትግራይ እስልምና ጉዳዮች ምክር ቤት የሰሜናዊ ምዕራብ ዞን እስልምና ጉዳዮች ስራ አስፈፃሚ መሰረት አድርጎ የተካሄደ ግምገማ ባለመቀበል ካለፈው ጥፋት ሳይማሩ አሁንም መድረክ ረግጠው በመውጣታቸው ከሊቀመንበርነታቸእ እንዲሰናበቱ የቀረበውን ሃሳብ በአብላጫ ድጋፍ በአንድ ተቃውሞ ድምፅ በመቀበል አሰናብቷቸዋል።

ይህ መረጃ ተዘጋጅቶ የተላከው በመቐለ የቲክቫህ ኢትዮጵያ ቤተሰብ አባል ነው።

@tikvahethiopia

የትግራይ ክልል የእስልምና ጉዳዮች ምክር ቤት ትላንት ካደረገው አስቸኳይ ጉባኤ በኃላ ባወጣው መግለጫ ፤ " የፌደራል እስልምና ጉዳዮች ጠቅላይ ምክር ቤት ጥር 7/2016 ዓ.ም በላከው ደብዳቤ ጦርነቱን ባለመቃወሙና ባለማውገዙ ስህተት መሆኑን አምኖ ይቅርታ ጠይቋል " ብሏል።

ምክር ቤቱ በጉባኤው የተገኙት የመላ ትግራይ የሙስሊም ማህበረሰብ ተወካይ አባላት ሰፊ ውይይት በማድረግ የቀረበውን የይቅርታ (ዓፉታ) ደብዳቤ በሙሉ ድምፅ መቀበላቸውን አሳውቋል።

ም/ቤቱ ይቅርታውን እንዲቀበል ካስቻሉት ዋና ምክንያቶችም ዘርዝሯል።

➡ የትግራይ ሙስሊሞች ሃይማኖታዊ ግዴታ የሆነው የሀጅና ዑምራን እና ልሎች ሃይማኖታዊ አገልግሎቶች በፌደራል እስልምና ጉዳዮች ጠቅላይ ምክር ቤት ብቻ ስለሚሰጡ፤

➡ የትግራይ አስልምና ጉዳዮች ምክር ቤት የሀጅና ዑምራን ሃይማኖታዊ አገልግሎት በራሴ መንገድ አካሂዳለው ካለ የግድ ከኤምባሲዎችና ከቆንስላዎች ግንኙነት ማድረግ ስለሚጠበቅበት ፤ ይህ ስልጣን ደግሞ ለፌደራል እስልምና ጉዳዮች ጠቅላይ ም/ ቤት ብቻ የተፈቀደ በመሆኑ፤

በዚህንና ሌሎች የትግራይ የሙስሊም ማህበረሰብ መብቶች የሚያስክብሩ ጉዳዮች ግምት ውስጥ በማስገባት የቀረበው የይቅርታ ደብዳቤ በምክር ቤት አባላቶች በሙሉ ድምፅ ተቀባይነት ማግኘቱን ይፋ አድርጓል።

መረጀው በመቐለ የቲክቫህ ኢትዮጵያ ቤተሰብ አባል ተዘጋጅቶ የቀረበ ነው።

@tikvahethiopia

#Update

የትግራይ ክልል እስልምና ጉዳዮች ከፍተኛ ም/ቤት ከፌዴራል የእስልምና ጉዳዮች ጠቅላይ ም/ ቤት ተልኮልኛል ያለውን ደብዳቤ ይፋ አድርጓል።

ይህን ደብዳቤ ተከትሎ ምክር ቤቱ ባካሄደው አስቸኳይ ጉባኤ ይቅርታውን ተቀብሎ ግንኙነቱ ወደ ቀደመው ሁኔታ እንዲመለስ እና ችግሮችም በይቅርታ እንዲፈቱ ወስኗል።

ደብዳቤው ከምክር ቤቱ ይፋዊ የማህበራዊ ትስስር ገፅ የተገኘ ነው።

@tikvahethiopia