#makeway

በኢትዮጵያ ከአጠቃላይ የጤና ወጪ ውስጥ
ለሥነ-ተዋልዶ ጤና አገልግሎት የሚመደበው ገንዘብ ከጤና አገልግሎት ፍላጎት አንፃር እጅግ አነስተኛ መሆኑንና ከአጠቃላይ የጤና ወጪ ለሥነ-ተዋልዶ ጤና አገልግሎት የሚመደበው 12 በመቶ ብቻ መሆኑን የስነ ተዋልዶ ጤና ማኅበራት ጥምረት (CORHA) ለቲክቫህ ኢትዮጵያ ገልጿል።

የጥምረቱ የጤና እንክብካቤ ፋይናንሲንግ ቴክኒክ አማካሪ የሆኑት አቶ ሚደቅሳ አዱኛ ጤና ሚኒስቴር በየሁለት ዓመቱ የጤና ወጪ ጥናት እንደሚያወጣ አንስተዋል።

በፈረንጆቹ 2016 እስከ 2019 ያለውን ጊዜ በማካተት በተጠናው ጥናት መሰረትም ከሀገሪቱ አጠቃላይ የጤና ወጪ 12 በመቶ ብቻ መሆኑን ጠቅሰው፤ ዘርፉ ካለበት ችግር አንፃር እጅግ አናሳ መሆኑን ጠቁመዋል።

በኢትዮጵያ ያለው የሥነ-ተዋልዶ ጤና ወጪ ከምስራቅ አፍሪካ አቻዎቿ ጋር፤ በተለይም ከብሩንዲና ኬንያ ጋር ሲነጻጸር አናሳ መሆኑን አቶ አዱኛ ከቲክቫህ ኢትዮጵያ ጋር በነበራቸው ቃለ-ምልልስ አንስተው፥ ሀገሪቱ በሥነ-ተዋልዶ ጤና ላይ የምታፈሰው ኢንቨስትመንት የዘርፉን ችግር ያገናዘበ አለመሆኑን ተናግረዋል።

ቪኤስኦ ኢትዮጵያ፣ ሪድም ዘጀነሬሽን እና የወጣት ሴቶች ክርስቲያን ማኅበር በጋራ " ሜክ ዌይ " የተባለ ፕሮግራም በመፍጠር በጋራ እየሰሩ ሲሆን በዓለም ለ32ኛ በኢትዮጵያ ደግሞ ለ18ኛ ጊዜ የሚታሰበውን ፀረ- ጾታዊ ጥቃት ቀንን አስመልክቶም በሥነ-ተዋልዶ ጤና ላይ የሚመክር መድረክ ከሰመኑ አሰናድተው ነበር።

በመድረኩ ላይ፤ በሀገሪቱ የሥነ-ተዋልዶ ጤናን ለመጠበቅ ከሚመድበው ገንዘብ ውስጥ #50_በመቶ የሚሆነው ሀብት ለአስተዳዳር ወጪ የሚወጣ እንደሆነ የተጠቀሰ ሲሆን ይህም የሥነ-ተዋልዶ ጤና አገልግሎትን ተደራሽነት የሚገድብ እንደሆነ ተነስቷል።

የሥነ-ተዋልዶ ጤና አገልግሎት፥ 23.9 በመቶው የሚሆነው ወጪ መንግሥታዊ ባልሆኑ ድርጅቶች የሚሸፈን ሲሆን 62.7 በመቶው ደግሞ መንግስት ይሸፍናል። ተጠቃሚዎች ደግሞ 12.3 በመቶ የሚሆነውን ያክል ድርሻ እንደሚያወጡና ቀሪው በሌሎች እንደሚሸፈን በጥናቱ ተመላክቷል።

መንግስት የሥነ-ተዋልዶ ጤና አገልግሎትን ዜጎች በነፃ እንዲያገኙ ቢያስቀምጥም ተጠቃሚዎች ለሥነ-ተዋልዶ ጤና አገልግሎት 12.3 በመቶ የሚሆነውን ያክል ድርሻ እያወጡ በመሆኑ የሥነ-ተዋልዶ ጤና አገልግሎት በሚፈልጉ ግለሰቦች ላይ ጫና አሳድሯል ተብሏል።

በምክክሩ የሥነ-ተዋልዶ ጤና አገልግሎትን ተደራሽ ለማድረግ ሁሉን አቀፍ ሥራ መሰራት እንደሚኖርበት ሲገለፅ፥ የጾታዊ ለጥቃት ተጋላጮች ተገቢውን ድጋፍ ማድረግ እንዲሁም የፆታዊ ጥቃትን መከላከል የሚያስችል የተቀናጀ የሚዲያ ዘመቻ ማካሄድ ወሳኝ መሆኑ ተገልጿል።

'' መቼም የትም በምንም ሁኔታ ጾታዊ ጥቃትን ዝም አንበል '' በሚል መሪ ቃል የ16 ቀናት የፀረ-ጾታዊ ጥቃት ዘመቻ እየተደረገ መሆኑና በሚቀጥሉት ቀናትም ዘመቻው እንደሚቀጥል ተገልጿል።

@tikvahethiopia

" የኤችአይቪ/ኤድስ የሥርጭት ምጣኔ አሳሳቢ ደረጃ ላይ ደርሷል " - አቶ ፍቃዱ ያደታ

ወጣቶችን ጨምሮ ለበሽታው ተጋላጭ ተብለው በተለዩ የማኅበረሰብ ክፍሎች ላይ እየታየ ያለው የኤችአይቪ/ኤድስ የሥርጭት ምጣኔ አሳሳቢ ደረጃ ላይ መድረሱ ተነግሯል።

የኤችአይቪ/ኤድስ ሥርጭት ፦

* በቀን ሠራተኞች፣
* በሴተኛ አዳሪዎች፣
* በረጅም ርቀት አሽከርካሪዎች፣
* በአደንዛዥ ዕፅ ተጠቃሚዎች ላይ ያለው የሥርጭት ምጣኔ በጣም ከፍተኛ መሆኑ ተገልጿል።

በጤና ሚኒስቴር የኤችአይቪ/ኤድስና ቫይራል ሄፒታይተስ የመከላከልና የመቆጣጠር መሪ ሥራ አስፈጻሚ አቶ ፈቃዱ ያደታ ምን አሉ ?

- የኤችአይቪ ሥርጭት በኢትዮጵያ ከአንድ ፐርሰንት በታች ዝቅ ቢልም የሥርጭት ምጣኔው ከክልል ወደ ክልል የተለያየ ነው።

- ከፍተኛ ሥርጭት ካለባቸው ክልሎች መካከል ፦
• ጋምቤላ ክልል የመጀመሪያው ሆኖ 3.69 በመቶ፣
• አዲስ አበባ ከተማ 3.17 በመቶ፣
• ሐረሪ ክልልና ድሬዳዋ ከተማ አስተዳደር 3 በመቶ የሥርጭት ምጣኔ አላቸው።
• በሶማሌ ክልል ዝቅተኛ የቫይረስ ሥርጭት ነው ያለው።

- በግጭት ምክንያት #የሚፈናቀሉ ማኅበረሰቦችና የተለያዩ የማኅበራዊና የኢኮኖሚያዊ ችግሮች ያሉባቸው ሰዎች ለበሽታው የበለጠ ተጋላጭ ናቸው።

የአዲስ አበባ ከተማ ጤና ቢሮ የኤችአይቪ/ኤድስ ዘርፈ ብዙ ማስተግበሪያ ዳይሬክተር ሲስተር ፈለቀች አንዳርጌ ምን አሉ ?

✦ በአገር ደረጃ የሥጋት ቀጣና ተብለው የተለዩ አካባቢዎች አሉ፤ በአዲስ አበባ ከተማ ካሉት 121 ወረዳዎች 48 ወረዳዎች በትኩረት የሚሠራባቸው ናቸው።

✦ ለበሽታው ይበልጥ ተጋላጭ ናቸው ተብለው የተለዩ የማኅበረሰብ ክፍሎች አሉ እነዚህ። ፦
° አፍላ ወጣቶች፣
° የትዳር አጋራቸውን የፈቱና የሞቱባቸው፣
° ሴተኛ አዳሪዎች ሲሆነ ለእነዚህ አካባቢዎች ትኩረት ተሰጥቶ ይሰራል።

✦ ከቦታ ወደ ቦታ የበሽታው ሥርጭት የተለያየ ነው። በአዲስ አበባ የሥርጭት ምጣኔው 3.4 በመቶ ነው።

✦ የመዘናጋት ሁኔታዎች በሰፊው እየተስተዋሉ ነው። ሞት በመቀነሱ ምክንያት " ኤችአይቪ/ኤድስ የለም " የሚሉ ሰዎች ተበራክተዋል።

✦ ከ20 እስከ 25 ዓመት ዕድሜ ክልል ያሉ ወጣቶች " ሞት የለም " በማለት የመዘናጋት ሁኔታዎች እያሳዩ ነው።

✦ በአጠቃላይ በአገር አቀፍ ደረጃ የሥርጭት ምጣኔ 0.91 በመቶ ነው። በዚህ ሥሌት ከ610‚350 በላይ የሚሆኑ ሰዎች ኤችአይቪ/ኤድስ በደማቸው እንደሚገኝና ከእነዚህ ውስጥም 8‚257 ያህሉ አዲስ የተያዙ፣ እንዲሁም ከ11 ሺሕ በላይ ሰዎች ደግሞ በየዓመቱ በአገር ደረጃ ይሞታሉ።

ቲክቫህ ኢትዮጵያ ይህ መረጃ #ባለቤትነቱ የሪፖርተር ጋዜጣ መሆኑን ያሳውቃል።

@tikvahethiopia

#RUSSIA

ሩስያ ባለፈው ሳምንት ማንኛውም የተመሳሳይ ጾታ ግንኙነት እንቀስቃሴን #ሕገወጥ በማለት ፈርጃለች።

የሩሲያ ጠቅላይ ፍ/ቤት ዓለም አቀፍ የተመሳሳይ ጾታ ግንኙነት የአደባባይ እንቅስቃሴን " #ጽንፈኛ " በማለት ማንኛውንም እንቅስቃሴዎችን አግዷል።

ይህ እገዳ ይፋ ከተደረገ በኃላ ባለፈው አርብ ምሽት የሩስያ ፀጥታ ኃይሎች በሞስኮ ከተማ በሚገኙ ፦
° የተመሳሳይ ጾታ የምሽት ክበቦች (ክለቦች) ° የተመሳሳይ ፆታ ፓርቲዎችን ያዘጋጃሉ በተባሉ ባሮች
° የወንዶች ሳውና ቤቶች ላይ ዘመቻ ማካሄዳቸው ተነግሯል።

ፖሊስ በርካታ የተመሳሳይ ጾታ ክለቦችን ውስጥ በመግባት የተወሰኑትን ታዳሚዎች አጠር ላለ ጊዜ በቁጥጥር ስር ማዋሉ ታውቋል።

በተጨማሪም የአንዳንዶች ፖስፖርት ተወስዶ ፎቶ እንዲነሳ ተደርጓል ተብሏል።

ፖሊስ የምሽት ክበቦች ላይ ዘመቻ ያካሄድኩት " አደንዛዥ እፅ ለመፈለግ ነው " ማለቱ ተነግሯል።

ሩስያ ፦

- ጠቅላይ ፍርድ ቤት የተመሳሳይ ጾታ ግንኙነት የአደባባይ እንቅስቃሴ ጽንፈኛ ነው በማለት ማንኛውንም እንቅስቃሴዎች አግዷል።

- እግድ የተላለፈው የፍትህ ሚኒስቴር ባቀረበው ጥያቄ መሰረት ነው።

- በሩሲያ የተመሳሳይ ጾታ ጥምረት እውቅና #የለውም።

- በሩሲያ #ትዳር ማለት የወንድ እና የሴት ጥምረት ማለት ስለመሆኑ ትርጉም ለመስጠት የአገሪቱ ሕገ መንግሥት ከ3 ዓመታት በፊት ተቀይሮ ነበር።

- እኤአ 2013 ላይ ከተለመደው ውጪ ያለ ጾታዊ ግንኙነት ላይ የሚደረግ ፕሮፖጋንዳን የሚከለክል ሕግ አውጥታለች።

- የተመሳሳይ ጾታ አፍቃሪያንን የሚያመለክቱ ይዘቶች ከመጽሓፍት፣ ከፊልሞች፣ ከማስታወቂያዎች እና ከቴሌቪዥን ፕሮግራሞች እንዲሰረዙ ተደርገዋል።

- በቅርቡ አንድ የሩሲያ የቴሌቪዥን ጣቢያ የፕሮፓጋንዳውን ሕግ ጥሷል ተብሎ እንዳይከሰስ በደቡብ ኮሪያ የፖፕ ሙዚቃ ቪዲዮ ላይ የነበረውን የተመሳሳይ ፆታ መግለጫ የሆነውን ቀለም እንዲለውጥ መገደዱን ገልጿል።

መረጃው ከቢቢሲ / አስቶሮዥኖ ኖቮስቲ / ፣ ሮይተርስ፣ አልጀዚራ  የተገኘ ነው።

@tikvahethiopia

#ቀበሮሜዳ

" 97 በመቶ የምንሆነው ሰፈራ እንዲሰጠን ብንጠይቅም ያለፍላጎታችን ወደ ነበርንበት ቦታ እንድንመለስ እየተገደድን ነው " - ቀበሮ ሜዳ የሚገኙ ተፈናቃዮች

" አንመለስም ካሉ ማንም አያስገድዳቸውም እኛ ግን እርዳታ አናቀርብም " - የአማራ ክልል ኮሚዩኒኬሽን ቢሮ

በጸጥታ ችግር ከኦሮሚያና ትግራይ ክልሎች ተፈናቅለው በአማራ ክልል ማዕከላዊ ጎንደር ዞን አዘዞ ክፍለ ከተማ አካባቢ ቀበሮ ሜዳ መጠለያ ካምፕ የሚገኙ ተፈናቃዮች፣ " 97 በመቶ የምንሆነው ሰፈራ እንዲሰጠን ብንጠይቅም ያለፍላጎታችን ወደ ነበርንበት ቦታ እንድንመለስ እየተገደድን ነው " ሲሉ ለቲክቫህ ኢትዮጵያ በሰጡት ቃል አማረዋል።

የመጠለያ ካምፑ አስተባባሪ አቶ መላሽ ታከለ ለቲክቫህ ኢትዮጵያ በሰጡት ገለፃ ፤ " ከኦሮሚያና ከሁመራ፣ ማይካድራ ያሉ ሰዎች ' ትመለሳላችሁ የሚል ነገር አለ ' የሰማነው ውይይትም የለም። ' ስንሄድ መሠረታዊ ፍላጎቶች ቅድሚያ መሟላት አለባቸው ' የሚል ሀሳብ ነው ያለው ከተፈናቃዮቹ " ብለዋል።

የማኅበረሰቡ ፍላጎት ምን እንደሆነ ለማወቅ፦ አይ.ኦ.ኤም (IOM)፣ ጎንደር ዩኒቨርሲቲ በካምፑ ጥናት አድርገው እንደነበር የገለጹት አስተባባሪው፣ " ማኅበረሰቡ አንድ ቦታ ላይ ሰፍረን ሰርተን እንቀየራለን የሚል ፍላጎት ነበረው፣ እንዲያውም ከ100ው 97 ፐርሰንቱ ሰፈራ ፕሮግራም ነው መርጦ የነበረው " ሲሉ አረጋግጠዋል።

ቀበሮ ሜዳ መጠለያ ካምፕ የሚገኙ ተፈናቃዮች ላነሱት ቅሬታ ምን ምላሽ እንዳላቸው ከቲክቫህ ኢትዮጵያ ጥያቄ የቀረበላቸው የአማራ ክልል ኮሚዩኒኬሽን ቢሮ ምክትል ኃላፊ አቶ ወንድወሰን ለገሰ፣ " እነዚህ ሰዎች እንዲመለሱ ውይይት ጀምረናል፤ አንመለስም ካሉ ማንም አያስገድዳቸውም እኛ ግን እርዳታ አናቀርብም " ብለዋል።

" ምክንያቱም የእነዚህ ሰዎች መሬታቸው፣ ቤታቸው፣ ማኅበራዊ መሠረታቸው ያለው ከተፈናቀሉበት አካባቢ ነው። መንግሥት ጊዜያዊ ድጋፍ ነው የሚያደርገው፣ የትኛውም ድጋፍ ቋሚ አይደለም። ይሄ ተያይዞ ክልሉንም ሰዎቹንም ወደ ድህነት የሚወስድ ስለሆነ በቀጣይ እነዚህ ሰዎች አምነው ወደመጡበት ቄዬ ይመለሳሉ " ሲሉ አክለዋል።

ከትግራይ ክልል ከመቐለ ፣ ከሽሬ ፣ ከዓዲግራት፣ ከዓድዋ የመንግሥት ሠራተኞችን ጨምሮ የተፈናቀሉ አሉ ያሉት አቶ ወንድወሰን፣ " ወደዛ የሚሄዱትን በተመለከተ ከጊዜያዊ አስተዳደሩ ጋር በቀጣይ መነጋገር ይጠይቃል " ነው ያሉት።

ምክትል ኃላፊው አክለው ፣ " ከወልቃይትና  ከሁመራ የተፈናቀሉት በጦርነቱ ወቅት ከሞት የተረፉ ስልሆኑ ችግሩ ዳግም የሚመለስ እየመሰላቸው ወደዛ መሄድ ትንሽ ያዝ ያደርጋቸው ካልሆነ በስተቀር ቀጠናው አስተማማኝ ነው " ብለዋል።

ቀበሮ ሜዳ መጠለያ ካምፕ ያሉ ተፈናቃዮች ያወያያቸው አካል እንደሌለ በገለጹት መሠረት ቲክቫህ ኢትዮጵያ ለአቶ ወንድወሰን እውነታው ምንድን ነው ? ሲል ላቀረበው ጥያቄ ፤ ተፈናቃዮች ያሉባቸው ካምፖች ብዙ ከመሆናቸው አንፃር ገና ቀበሮ ሜዳ እንዳልሄዱ፣ በዕቅዱ መሠረት እንደሚሄዱ፣ በደብረ ብርሃን፣ ሰሜን ሸዋ መጠለያ ጣቢያዎች ተፈናቃዮችን ማወያየት እንደጀመሩ፣ ተፈናቃዮችም በአፋጣኝ ለመመለስ ፈቃደኛ መሆናቸውን አስረድተዋል።

ወደ ኦሮሚያ ክልል ተመለሱ ተብለናል ያሉ ተፈናቃዮችን ቅሬታ በተመለከተ በሰጡት ማብራሪያም፣ ከኦሮሚያ ክልል አኳያ ያለውም እነዚህ ሰዎች የተፈናቀሉበት አካባቢ የጸጥታ ኃይሉ ተጠናክሮ፣ አካባቢው ከሸኔ ጸድቶ ከሆነ፣ ተፈናቃዮቹ እንደሚመለሱ ነው የገለጹት።

መረጃው በአ/አ ቲክቫህ ኢትዮጵያ ቤተሰብ ተጠናቅሮ የተላከ ነው።

@tikvahethiopia

#ለጥንቃቄ

የተከሰተው ጉንፋን መሰል በሽታ በከፍተኛ ሁኔታ የመሰራጨት ባህሪ ስላለው በመከላከያ መንገዶች ላይ ትኩረት ማድረግ ያስፈልጋል ሲል የአዲስ አበባ ጤና ቢሮ አሳስቧል።

ቢሮው ምን አለ ?

- በከተማው በተለይ ከጥቅምት ወር መጀመሪያ ጀምሮ በብዙ ሰዎች ላይ ጉንፋን መሰል በሽታ ተከስቷል።

- ይህ ወቅታዊና በየዓመቱ ከቅዝቃዜ ጋር ተያይዞ የሚከሰት ሲሆን፤ በወረርሽኝ መልክ የሚገለጽ አይደለም።

- የተከሰተውን የቫይረስ አይነት ለመለየት ከትምህርት ቤቶች፣ ጤና ተቋማት እንዲሁም ከፍተኛ መተላለፊያ በሆኑ ቦታዎች ላይ ከሚገኙ ከ178 ሰዎች ናሙና ተወስዶ ምርመራ ተደርጓል። በዚህም 17 በመቶ በላይ የኢንፍሉዌንዛ ቫይረስ እና 3 በመቶ የሚሆነው ከኮቪድ-19 ቫይረስ ጋር የተገናኘ መሆኑ ተረጋግጧል።

- ይህ ህመም በተለይም እድሜያቸው ከ5 ዓመት በታች የሆኑ ህጻናት ላይ የሚከሰት ሲሆን፤ ከመቶ ሰዎች መካከል ሃያ የሚሆኑት ላይ ይስተዋላል።

ምልክቶቹ ፦

° ከፍተኛ ራስ ምታት፣
° ሳል፣
° ከአፍንጫ ብዙ ፈሳሽ መውጣት፣
° ጉሮሮን የማቃጠል ስሜት፣
° ጡንቻ አካባቢ ህመም፣
° የድካም እና የምግብ ፍላጎት መቀነስ የመሳሰሉት ናቸው።

- ምልክቶቹ ሲታዩ ወደ ህክምና ተቋም በመሄድ እራስን ከከባድ ህመም መከላከል ያስፈልጋል።

- በበሽታው የተያዙ ሰዎች አፋቸውን እና አፍንጫቸውን ሳይሸፍኑ ሲያስሉ ወይም ሲያስነጥሱ እንዲሁም ቫይረሱ ያረፈባቸውን ነገሮች ከነኩ በኋላ አፍን፣ አፍንጫ ወይም ዓይንን መንካት ቫይረሱ እንዲሰራጭ የሚያደርጉ መንገዶች ናቸው።

የመከለከያ መንገዶች ምንድናቸው ?

▫ትምህርት ቤቶች እንዲሁም ሰው በተሰበሰበበት ቦታዎች የአፍና አፍንጫ መሸፈኛ ጭምብል ማድረግ፣

▫በሕዝብ ማመላለሻ ትራንስፖርት ውስጥ መስኮቶችን መክፈት፣

▫የእጅን ንፅህና በአግባቡ መጠበቅ

▫በንክኪ ወቅት እጅን በመታጠብ በሽታውን በቀላሉ መከላከል ይቻላል።

* በሽታው በከፍተኛ ሁኔታ የመሰራጨት ባህሪ ስላለው በመከላከያ መንገዶች ላይ ትኩረት ማድረግ ያስፈልጋል።

በበሽታው የተያዙ ሰዎች ማድረግ ያለባቸው ምንድነው ?

በበሽታው የተያዙ ሰዎች ህክምናው ከቤት የሚጀምር ሲሆን ህመሙን ለመከላከል እና ለማስታገስ ፦
☑ በቂ እረፍት መውሰድ፣
☑ ፈሳሽና ትኩስ ነገሮች መጠቀም
☑ በአካባቢው በቂ የአየር ዝውውር እንዲኖር ማድረግ ከዚህ በተጨማሪ ተገቢውን ህክምና በማግኘት ስርጭቱ እንዳይስፋፋ ማድረግ ይገባል።

#ማሳሰቢያ ፦ በሽታው ከአንድ ሳምንት በላይ የሚቆይ ከሆነ በአቅራቢያው ወደሚገኝ የህክናምና ተቋም በመሄድ አስፈላጊውን አገልግሎትና የጤና ባለሙያዎች ምክረ ሃሳቦች ማግኘት ይገባል።

ቲክቫህ ኢትዮጵያ መረጃው ከኢትዮጵያ ፕሬስ ድርጅት ነው ያገኘው።

@tikvahethiopia

#NBE

ብሔራዊ ባንክ " ሪፖርተር ጋዜጣ " ላይ ወጥቷል ባለው አሳሳች ዘገባና አሉባልታ ምክንያት በዋጋ ላይ የሚፈጠር ማንኛውም ሰው ሠራሽ #ጭማሪ ተቀባይነት የለውም፤ ጥብቅ ክትትልም ይደረጋል ብሏል።

ብሔራዊ ባንክ ምን አለ ?

-  በጋዜጣዊ በህዳር 23/2016 እትም ብሔራዊ ባንክ ባለፈው ሳምንት የ2016 በጀት ዓመት የመጀመሪያ ሩብ የዕቅድ አፈጻጸም ሪፖርት ለፓርላማ የፕላን፤ በጀትና ፋይናንስ ጉዳዮች ቋሚ ኮሚቴ ባቀረበበት ወቅት ከአንድ የፓርላማ አባል ቀረበ ከተባለ አስተያየት ላይ ተነሥቶ ብሔራዊ ባንክ በውጭ ምንዛሪ ተመን ላይ በቅርብ ጊዜና በከፍተኛ ደረጃ ለውጥ ለማድረግ ማቀዱን በማስመልከት የወጣው ዘገባ ፈጽሞ ሐሰተኛና አሳሳች፣ ከጋዜጠኝነት ሥነ ምግባር ያፈነገጠ ድርጊት ነው ብሏል።

- " ለፓርላማው ቋሚ ኮሚቴ ጉዳዮን በተመለከተ የቀረበ ዕቅድ የለም " ሲል ገልጿል።

- እስከ 4 ስዓት በፈጀው ውይይት ወቅት በብሔራዊ ባንክ የተነገረ ነገር እንደሌለ ህብራተሰቡ መረዳት አለበት ብሏል።

- በዚህ አሳሳች ዘገባና አሉባልታ ምክንያት በዋጋ ላይ የሚፈጠር ማንኛውም ሰው ሠራሽ ጭማሪ ተቀባይነት የለውም ጥብቅ ክትትልም ይደረጋል ብሏል።

በሪፖርተር ጋዜጣ ላይ የወጣው ዘገባ ምን ይላል ?

- ብሔራዊ ባንክ በሕጋዊውና በጥቁር ገበያው መካከል ያለውን ሰፊ የውጭ ምንዛሪ ተመን ልዩነት #በ95_በመቶ ለማጥበብ ዕቅድ መያዙ መታወቁ ፤ ይህ ዕቅድ ግን መቼና እንዴት እንደሚፈጸም የታወቀ ነገር እንደሌለ ያስረዳል።

- ይህ ባንኩ ዕቅድ የተሰማውም ኅዳር 19 ቀን 2016 ዓ/ም የሕዝብ ተወካዮች ምክር ቤት የበጀትና ፋይናንስ ጉዳዮች ቋሚ ኮሚቴ የብሔራዊ ባንክን የ2016 በጀት ዓመት ዕቅድና የመጀመርያ ሩብ ዓመት የሥራ አፈጻጸም በገመገመበት ወቅት ነው ብሏል።

- ብሔራዊ ባንክ ይህንን ዕቅዱን በቋሚ ኮሚቴው የግምገማ መድረክ ላይ #በይፋ_ባያቀርብም፣ ለቋሚ ኮሚቴው የቀረበን #ሰነድ የተመለከቱ አንድ የም/ ቤት አባል፤ ዕቅዱን ከሪፖርቱ ላይ እንደተመለከቱ ጠቅሰው ማብራሪያ እንዲሰጣቸው ጠይቀዋል።

የም/ቤቱ አባሉ ምን አሉ ?

" ብሔራዊ ባንክ በሕጋዊው የውጭ ምንዛሪ ተመንና በጥቁር ገበያው መካከል ያለውን ልዩነት በ95 በመቶ የማቀራረብ ዕቅድ ይዟል።

ነገር ግን በአሁኑ ወቅት በሕጋዊው የምንዛሪ ተመንና በጥቁር ገበያው መካከል ያለው ልዩነት እጥፍ ነው።

ስለዚህ ልዩነቱን በ95% ለማጥበብ የተያዘው ዕቅድ በተጨባጭ የሚቻል ነው ወይ ? ወይስ ዲቫሉዌሽን ለማድረግ (የብርን የመግዛት አቅም ለማዳከም) አስባችኋል? " ሲሉ ማብራሪያ እንዲሰጣቸው ጠይቀዋል።

- የብሔራዊ ባንክ ዋና ገዥ አቶ ማሞ ምሕረቱ፤ "እንደየ ሁኔታው እየተመዘኑ የሚወሰዱ ዕርምጃዎች ይኖራሉ እንጂ በዚህ ወቅት ይህ ዕርምጃ ይወሰዳል ብሎ ብሔራዊ ባንክ ሊናገር አይችልም "  የሚል ምላሽ መስጠታቸው በጋዜጣው ላይ ሰፍሯል።

- አቶ ማሞ " የውጭ ምንዛሪ ጉዳይን በተመለከተ ሁሉን ነገር እዚህ መናገር አልችልም። ብሔራዊ ባንክን በሚመለከቱ አንዳንድ ጉዳዮች ላይ የምናደርገው ውይይት ተገቢ ላልሆነ ስፔኩሌሽን (ግምት) የሚያጋልጥ መሆን የለበትም። ገና ጥናት ያልተደረገበት ጉዳይ ላይ ብንወያይም ትርጉም የለውም። ዋናው ቁልፍ ነገር ዓላማችን ላይ መወያየት ሊሆን ይገባል። የባንኩ ዋና ዓላማ የተረጋጋ የዋጋ ሁኔታና የተረጋጋ የውጭ ምንዛሪ ሥርዓት እንዲኖር ማስቻል ነው " ማለታቸውንም ጋዜጣው አስፍሯል።

ብሔራዊ ባንክ ይህን ዘገባ ነው #አሳሳችና #አሉባልታ ነው ያለው።

$ በአሁኑ ወቅት የዶላር ሕጋዊው የውጭ ምንዛሪ ተመን 55.5 ብር የደረሰ ሲሆን፣ በጥቁር ገበያው ግን አንድ ዶላር እስከ 110 ብር እየተመነዘረ ይገኛል።

@tikvahethiopia

#ድርቅ #ትግራይ

" ከምበላባቸው ቀናት #ጦሜን የማድርባቸው ቀናት ይበዛሉ " - የሰንዓለ ነዋሪ

" በድርቅ ምክንያት 6 ሰዎች ህይወታቸው አልፏል ፤ ... 89 ከመቶ ነዋሪ በከባድ የደርቅ አደጋ ላይ ይገኛል " -  ዒስራ ዓዲ ወጀራት ወረዳ

በትግራይ ደቡባዊ ምስራቅ ዞን ዒስራ ዓዲ ወጀራት ወረዳ ባጋጠመው ድርቅ ምክንያት 6 ሰዎች መሞታቸውን የወረዳው የኢኮኖሚ ዘርፍ ፅህፈት ቤት አስታወቀ።

ፅ/ቤቱ ፤ በወረዳው ቀበሌ ገበሬ ማህበራት ያጋጠመው ድርቅ በጊዜው ካልተገታ የሟቾች ቁጥር ሊጨምር ይችላል ሲል አስጠንቅቋል።

ወ/ሮ ኣልጋነሽ ከበደ በወረዳው የሰንዓለ ነዋሪ የእድሜ ባለፀጋ ናቸው።

ወ/ሮ ኣልጋነሽ ፤ ከማሳቸው የሚያገኙት ገቢ ከአመት አመት ስለማይመግባቸው ድሮውኑ በሴፍትኔት እገዛ ሲተዳደሩ ነበር።

በጦርነቱ ምክንያት የሴፍትኔት አገልግሎት በመቆሙ የዘንድሮ ድርቅ መቋቋም አቅቷቸዋል። በዛ ላይ አህታቸው በረሃብ ምክንያት በመሞትዋ ሁለት ልጆችዋን የመንከባከብ ሃላፊነት በእሳቸው ላይ ወድቀዋል።

ወ/ሮ ኣልጋነሽ ችግሩ የሚይዙት የሚጨብጡት አሳጥቷቸው ከሚበሉባቸው ጦማቸው የሚያድሩባቸው ቀናት እንደሚበዙ ተናግረዋል።

ከወረዳዋ ሰንዓለ ቀበሌ ገበሬ ማህበር ብቻ ድርቅ ባስከተለው ችግር ቄያቸው ጥለው ከተሰደዱ 40 የቤተሰብ አስተዳዳሪዎች አንድዋ ወ/ሮ ፎቴን ኣባዲ ናቸው።

በድርቁ ምክንያት ከማሳቸው ያገኙት ገቢ ባለመኖሩ ፣ በዛ ላይ ከምግባረ ሰናይ ተቋማትና መንግስት የሚሰጥ እርዳታ በመቆሙ ቤታቸው ቆልፈው እግራቸው ወደ መራቸው ተሰደዋል። 

ድርቅ ባስከተለው ረብ አስከአሁን 6 ሰዎች መሞታቸው የሚገልፁት የወረዳው የኢኮኖሚ ዘርፍ ፅህፈት ቤት ሃላፊ ወ/ሮ ሃሪፈያ ግደይ ፤ የወረዳው 89 ከመቶ ነዋሪ በከባድ የደርቅ አደጋ ላይ እንደሚገኝ አስታውቀዋል።  

የምግባረ ሰናይ ድርጀቶች የፌደራልና የክልሉ መንግስታት ችግሩ በመረዳት ቶሎ እንዲደርሱ ጥሪ ያቀረቡት ሃላፊዋ ፣ በተለይ እናቶችና ህፃናት ታሳቢ ያደረገ አስቸኳይ መፍትሄ እንዲደረግ ማሳሰባቸውን የትግራይ ቴሌቪዥንን ዋቢ በማድረግ የቲክቫህ ኢትዮጵያ የመቐለ ቤተሰብ አባል ዘግቧል።

ቲክቫህ ኢትዮጵያ በትግራይ ያጋጠመው ደርቅ የሚመለከት ተከታታይ መረጃዎችን በማቅረብ ላይ ሲሆን ፤ በክልሉ ምስራቃዊ ዞን ሶስት ወረዳዎች ባጋጠመ የድርቅ አደጋ የበርካታ ሰዎች ህይወት ማለፉን የክልሉ የመንግስት አካላት መናገራቸውን መዘገቡ ይታወሳል።
                      
@tikvahethiopia