የመሬት መንቀጥቀጡ የቦታ ለውጥ አድርጓል ?

" በአንድ አካባቢ ተደጋግሞ እየተከሰተ ነው ያለው እንጂ የቀረበ ነገር የለም " - ፕ/ር አታላይ አየለ

በትላንትናው ዕለት በቀን፣ በምሽትና በለሊቱ ክፍለ ጊዜ ተደጋጋሚ የሆነ የመሬት መንቀጥቀጦች መከሰታቸው ዓለም አቀፍ ጁኦሎጂካል ተቋማት ዘግበዋል።

ትላንት ምሽት 2:10 የተከሰተው እና ንዝረቱ እስከ አዲስ አበባ ከተሰማው በሬክተር ስኬል 5.0 ሆኖ ከተመዘገበው መንቀጥቀጥ በተጨማሪ ለሊት 7:20 ላይ 5.1 ሬክተር ስኬል የተመዘገበ የመሬት መንቀጥቀጥ መከሰቱን የአሜሪካ ጂኦሎጂካል ሰርቬይ አስታውቋል።

የመሬት መንቀጥቀጡ በተጠቀሰው መጠን መከሰቱን እና ዛሬ ጠዋት 2:11 ላይም ሌላ መንቀጥቀጥ በመታየቱ የመተንተን ስራ እየተሰራ መሆኑን በአዲስ አበባ ዩኒቨርሲቲ የጂኦ ፊዚክስ ህዋ ሳይንስና አስትሮኖሚ ተቋም፤ የሴስሞሎጂ ትምህርት ክፍል ኃላፊ እንዲሁም በዩኒቨርሲቲው የመሬት መንቀጥቀጥ ሳይንስ መምህርና ተመራማሪ የሆኑት ፕ/ር አታላይ አየለ ለቲክቫህ ኢትዮጵያ አረጋግጠዋል።

ትላንት ለሊት 7:20 ላይ የተከሰተው የመሬት መንቀጥቀጥ ከደብረ ሲና 52 ኪሜ ርቀት ላይ ምሽት ላይ የተከሰተው ደግሞ ከአዋሽ 14 ኪሜ ርቀት ላይ የተከሰተ ነው መባሉ ከዚህ ቀደም ይከሰት ከነበረበት የአዋሽ ፈንታሌ አካባቢ የቦታ ለውጥ አለ ማለት አለመሆኑን አስረድተዋል።

ተመራማሪው ለቲክቫህ ኢትዮጵያ በሰጡት ቃል በዝርዝር ምን አሉ ?

" ትላንትና ከሰዓት ጀምሮ በጣም የተደጋጋመ ከፍተኛ መጠን ያለው ከ4.6 ጀምሮ እስከ 5.0 የተመዘገበ መንቀጥቀጥ ተከስቷል ፤ ነገር ግን ደብረ ሲና ሲል ከፈንታሌ በወፍ በረር ሲለካ ነው ከተለያየ አቅጣጫ በማየት ነው እንጂ መነሻው ስለተቀየረ አይደለም።

አንድ አካባቢ ላይ መሬት መንቀጥቀጥ ሲከሰት በአቅራቢያው ያለው ከተማ የትኛው ነው ? የሚለው ይታያል ከዛ የተለያዩ ከተሞችን እንደ ሪፈረንስ ይጠቅስና ከዛ ከተማ ምን ያህል ነው የሚርቀው የሚለውን ሪፈር ያደርጋል፤ እንደዛ ሲሆን ሌላ ሰው መንቀጥቀጡ ለዛ ከተማ ቀርቧል ማለት ነው የሚል ስጋት ሊያድርበት ይችላል ነገር ግን እስካሁን የተቀየረ ነገር የለም፤ ፈንታሌ ዙሪያ ነው እንቅስቃሴው እየተታየ ያለው።

የአሜሪካ ጂኦሎጂካል ሰርቬይ እና የጀርመኑ የጂኦ ሳይንስ ተቋማት የሚጠቀሙት ዳታ አውቶማቲክ ነው ሲስተሙ ቶሎ አናላይዝ አድርጎ የተከሰተበትን መጠን እና አካባቢ ከርቀት ጋር ይናገራል ነገር ግን ይህ አይነቱን አዘጋገብ የሚከተሉት ለማህበረሰቡ በምን ያህል ርቀት ላይ ነው የተከሰተው የሚለውን ለማስረዳት ነው።

ለምሳሌ፦  አንድ ብቻ አይደለም የተለያዩ ቦታዎች ይጠቅሳሉ  ከመተሃራ፣ከደብረሲና ፣ከደብረ ብርሃን እና ከአዲስ አበባስ ምን ያህል ርቀት ላይ ይገኛል ሊል ይችላል በአንድ አካባቢ ተደጋግሞ እየተከሰተ ነው ያለው እንጂ የቀረበ ነገር የለም።

አዲስ ነገር አይደለም ስንመዘግብ የኖርነው ነገር ነው ነገር ግን መሃንዲስም፣ ኢንቨስተርም ሆነ የሚመለከተው አካል ጆሮ ሰጥቶ ጥንቃቄ አድርጎ አያውቅም አሁን የሚከሰተውንም መአት እንደተከሰተ አድርጎ የሚያወራ አለ እንደዛ አይደለም በተለያየ ጊዜ ይመዘገባል።

በ1997 በአፋር ታይቶ የማይታወቅ የቅልጥ አለት እንቅስቃሴ ነበር ብዙ አለም አቀፍ ሳይንቲስቶች ሁሉ መጥተው አብረን የሰራናቸው ስራዎች አሉ፣ ፈንታሌም በፈረንጂዎቹ 1981 እንደ አሁኑ 3 እና 4 ወር የቆየ የቅልጥ አለት እንቅስቃሴ ነበር።

የመረጃ ውንዥብር እየተፈጠረ ነው ሳይንቲስት የምንለው ማነው ? ታማኝነቱስ ምን ያህል ነው ?የሚለው አስቸጋሪ ሆኗል ያልሆነውን ሆኗል እያሉ የሚያወናብደውም ብዝቷል ተማረ የምንለውም መሬት ላይ ያለውም ህብረተሰብ።

መሬት በራሷ ጉዞ እየሄደች የምታስተነፍሰው ሃይል ነው ምንም የሚያስደንቅ ነገር አይደለም ቦታውም፣ በምን ያህል ርቀት ላይ እንደሆነ ይታወቃል በተለይ አዲስ አበባ ያለ ሰው ምንም ሊደነግጥ አይገባም።

ከትላንት እኩለ ቀን ጀምሮ ጎላ ጎላ ያሉት መንቀጥቀጦች የመደጋገም ፍጥነታቸው ጨምሯል ቀጣይነትም ያለው ሊሆን ይችላል እየተከታተልን እየመዘገብን እንገኛለን " ብለዋል።

#TikvahEthiopiaFamilyAA
#AAU
#ቲክቫህኢትዮጵያ

@tikvahethiopia

ወደ ኖርዌይ ለልምድ ልውውጥ የሄዱ የሁለት የፖለቲካ ፓርቲ አባላት ወደ ሀገር ሳይመለሱ ቀሩ።

የኢዜማ እና የቦሮ ዴሞክራሲያዊ ፓርቲ አባላት ለልምድ ልውውጥ ከሃገር በወጡበት አለመመለሳቸው ተሰምቷል።

የቦሮ ዴሞክራሲያዊ ፓርቲ (ቦሮ) የሴቶች ጉዳይ ሃላፊ ወ/ሮ አበበች ደቻሳ እና የኢትዮጵያ ዜጎች ለማህበራዊ ፍትህ ፓርቲ (ኢዜማ) የሴቶች ጉዳይ ተጠሪ የነበሩት ወ/ሮ ቅድስት ግርማ በመስከረም አጋማሽ ለልምድ ልውውጥ ወደ #ኖርዌይ ባቀኑበት ወቅት አለመመለሳቸው ተነግሯል።

ሁለቱ አባላት ወደ ኖርዌይ ያቀኑትና ያልተመለሱት በኢትዮጵያ የፖለቲካ ፓርቲዎች የጋራ ምክር ቤት የልምምድ ልውውጥ እንዲያደርጉ በተላኩበት ወቅት መሆኑን የም/ ቤቱ ጸሃፊ አቶ ደስታ ዲንቃ ለቲክቫህ ኢትዮጵያ ተናግረዋል።

አባላቱ በጋራ ምክር ቤቱ የሴቶች ክንፍ ሰብሳቢነት እና ስራ አስፈጻሚነት ሲያገለግሉ ነበር።

አቶ ደስታ ፥ " የሴቶችን የፖለቲካ ተሳትፎ ለማጠናከር በሃገር ደረጃ ከፓርላማ አባላት ጋር እና የሲቪክ ተቋማት ጋር እየተገናኙ ብዙ ስራዎችን ሲሰሩ ነበር " ብለዋል።

ለቲክቫህ ኢትዮጵያ ቃላቸውን የሰጡ የኢዜማ አባል ፤ አባሏ በስራ ገበታቸው ላይ አለመኖራቸው በማስረዳት " ለምን እንዳልተመለሱ የምናውቀው ነገር የለም " ብሏል።

የቦሮ ዴሞክራሲያዊ ፓርቲ በበኩሉ ከልጆቿና ከባለቤቷ ጋር በፖለቲካ ምክንያት ለእስር ተዳርገው እንደነበር የገለጸ ሲሆን ለመቅረቷም ምክንያት ይህ ሳይሆን እንዳልቀረ ገልጿል።

#TikvahEthiopiaFamilyAA

@tikvahethiopia

" የአእላፋት ዝማሬ/The Melody of Myriads " በአዲስ አበባ እና በድሬዳዋ በተመሳሳይ ሰዓት እንደሚካሄድ ተገለጸ።

ይህንን የገለጸው አዘጋጁ የኢትዮጵያ ጃንደረባ ትውልድ / ኢጃት ማኅበር ነው።

የኢየሱስ ክርስቶስን በዓለ ልደት ምክንያት በማድረግ የሚዘጋጀው ይህ የዝማሬ መርሐግብር በበዓሉ ዋዜማ ታኅሣሥ 28/ 2017 ዓ/ም ይካሄዳል።

በአዲስ አበባ ከተማ የዝማሬ መርሐግብሩ አምና በተካሄደበት በቦሌ ደብረ ሳሌም መድኃኔዓለም ካቴድራል (ቦሌ መድኃኔዓለም) እንደሚካሄድ ነው አዘጋጆቹ ያሳወቁት።

" የጌታችንን የመድኃኒታችን የኢየሱስ ክርስቶስን በዓለ ልደት በዝማሬ እናክብር " ሲሉ ጥሪ አቅርበዋል።

ሁሉም የኦርቶዶክስ ተዋሕዶ ልጆች የልደት በዓልን ዋዜማ በቤተክርስቲያን ተገኝተው በዝማሬ እንዲያከብሩ ተብሏል።

ከዚህ ጋር በተያያዘ አዘጋጆቹ በአዲስ አበባ እና ድሬዳዋ ሀገረ ስብከት ካዘጋጁት " የአእላፋት ዝማሬ  / The Melody of Myriads " መርሐግብር ውጭ ሌላ እንዳላዘጋጁ እንዲሁም ለዚህ መርሐግብር ተብሎ የሚደረግ ምዝገባም እንደሌለና ምዕመኑ ከሀሰተኛ መረጃዎች ራሱን እንዲጠብቅ  ጥሪ አቅርበዋል።

ባለፈው ዓመት በአዲስ አበባ በቦሌ ደብረ ሳሌም መድኃኔዓለም ካቴድራል በተካሄደው " የአእላፋት ዝማሬ/The Melody of Myriads " እጅግ ከፍተኛ ቁጥር ያለው ኦርቶዶክሳዊ ወጣት የልደት ዋዜማን በዝማሬና በፀሎት ተቀብሎ ነበር።

መርሐግብሩ ላይ ብፁዕ ወቅዱስ አቡነ ማትያስ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖትና ብፁአን አባቶች ተገኝተው እንደነበር አይዘነጋም።

ከመርሐግብሩ ቀደም ብሎ ምዕመናን በተለይም ወጣቶች የተዘጋጁ መዝሙሮችን አጥንተው እንዲመጡ መዝሙሮቹ በኦንላይን ሲሰራጩ ነበር።

ዘንድሮም በተመሳሳይ ለመርሃግብሩ የተዘጋጁ መዝሙሮች በማኅበሩ  የማህበራዊ ሚዲያዎች (Janderbaw Media Youtube) ተጭነው ምዕመኑ ጋር እንዲዳረሱ እየተደረገ ነው።

#TikvahEthiopiaFamilyAA

@tikvahethiopia

#HaileResortJimma

“ ወደ 1.7 ቢሊዮን ብር ፈሰስ ተደርጎበታል" - ሻለቃ ኃይሌ ገብረ ስላሴ

የሻለቃ ኃይሌ ገብረ ስላሴ ሆቴልና ሪዞርት 10ኛ መዳረሻ በኦሮሚያ ክልል ጅማ ከተማ ዛሬ (ሐሙስ ታኀሳስ 24 ቀን 2017 ዓ/ም) ተመርቋል።

ሆቴሉ 3 የመመገቢያ አደራሾች፣ የልጆች መጫወቻ፣ ሞሮኮ ባዝ እንዳሉት፣ ለ210 ሰዎች ቋሚ የሥራ እድል እንደፈጠረ፣ ለወደፊት ደግሞ ወደ 400 ለሚሆኑ ሰዎች የሥራ እድል እንደሚፈጥር ተነግሮለታል።

ሆቴሉ አሁን የተጠናቀቁ ወደ 106 ክፍሎች እንዳሉት፣ ሁሉም ሰጠናቀቁ ደግሞ ወደ 114 ክፍሎች እንደሚኖሩት ተመልክቷል።

በመርሀ ግብሩ የተገኙት ሻለቃ ኃይሌ ባደረጉት ንግግር፣ በአንድ ዓመት ከስምንት ወራት የሆቴሉን ግንባታ በአጭር ጊዜ ላጠናቀቁት ሠራተኞች በሙሉ ምስጋና አቅርበዋል።

ጅማ ላይ የኮንስትራክሽን እቃ ውድ መሆኑን የገለጹት ሻለቃ ኃይሌ፣ “ብሎኬት ከአዲስ አበባ እየተጓጓዘ ነው የተሰራው” ሲሉ ተናግረዋል።

“ኮንስትራክሽኑን ውድ ያደረገው የመንገዱ መበላሸት ነው” ያሉት ኃይሌ፣ “ብሎኬቶች እየተሰባበሩ ነበር። ሁሉ ሰው በአውሮፕላን መጓጓዝ አይችልም” ነው ያሉት።

የሆቴሉን ወጪ በተመለከተ በገለጹበት አውድ ደግሞ፣ “ወደ 1.7 ቢሊዮን ብር ፈሰስ ተደርጎበታል” ብለዋል።

የጅማ ከተማ ከንቲባ አቶ ጣሃ ቀመር በመርሀ ግብሩ ተገኝተው ባደረጉት ገለጻ ደግሞ፣ “ጅማ አባጅፋር ሁሉንም የምታቅፍ ከተማ ናት። ባለሃብቶች ጅማን ለመቀየር ከኅይሌ እንዲማሩ ማሳያ ነው” ሲሉ ተናግረዋል።

የጅማ ዞን ዋና አስተዳዳሪ አቶ ትጃኒ ናስር ፥ “ኃይሌ ሲጠራ እንስቃለን፣ ኃይሌ ሲጠራ እንባችን ይመጣል፣ ኃይሌ እንኳን አገኘንህ” በማለት ደስታቸውን ገልጸዋል።

“ሱልልታ ላይ የኃይሌን ሆቴል ሳይ እንዲህ አይነት ሆቴል ጅማ ላይ ቢገነባ ብዬ ተመኝቼ ነበር። አሁን እንደዚህ ተሰርቶ አየሁትና እንባዬ ነው የመጣው። የተመረቀው ለኃይሌ ሳይሆን ለጅማ ህዝብ ነው” ሲሉ አመስግነዋል።

በ10ሩም የኃይሌ ሆቴሎችና ሪዞርቶች 900  ሩሞች እንዳሉ፣ ለ2500 ሠራተኞች የሥራ እድል እንደተፈጠረ ተመልክቷል።

ፎቶ ፦ በግዛቱ አማረ

#TikvahEthiopiaFamilyAA

@tikvahethiopia

“የካሳዋን ጉዳይ አሁንም እየጠበኳት ነው። ግን የለችም” - ሻለቃ ኃይሌ ገብረ ስላሴ

የሻሸመኔ ኃይሌ ሆቴልና ሪዞርት ከዚህ ቀደም ከፍተኛ ውድመት እንደደረሰበት የሚታወቅ ሲሆን ፣ አፍርሰው እየሰሩ እንደነበር ሻለቃ ኃይሌ ገ/ስላሴ ገልጸው ነበር።

ከ10 ወራት በፊት ለቲክቫህ ኢትዮጵያ በሰጡት ቃል፣ “ ሙሉውን አፍርሰን እየሰራን ነው። ከመንግስት ምንም አይነት ማካካሻ አልተሰጠኝም ” ነበር ያሉት።

“ እኔ አላቃጠልኩትም። መንግስት እንደ መንግስት መወጣት ነበረበት ” ብለው፣ “  እኛ ለብዙ አመታት እንግዲህ በኢንቨስትመንት ተሰማርተን እየሰራን ነው ” ማለታቸው አይዘነጋም።

አሁንስ ከመንግሰት ካሳ ተከፈላቸው ?

የሻሸመኔው ሆቴልና ሪዞርት ለደረሰው ውድመት መንግስት ከሳ እንዳልከፈለዎት ገልጸው ነበር፣ ተከፈለዎት ? ተብሎ ቲክቫህ ኢትዮጵያ ዛሬ ጥያቄ ያቀረበላቸው ሻለቃ ኃይሌ አሁንም ካሳ እንዳልተከፈላቸው ተናግረዋል።

“ የካሳዋን ጉዳይ እየጠበኳት ነው ግን የለችም። እሷን ነገር እብቃለሁ ” ነው ያሉት።

የውጪ ኢንቨስተሮች እንዲመጡ እንዲህ አይነት አደጋዎች ሲደርሱ ካሳ ቢከፈል መልካም መሆኑን አስረድተው፣ “ ዞሮ ዞሮ ግን አልሆነም። አልተቀበልኩም ” ብለዋል።

ሆቴሉን ከባለሦስት ወደ ባለአራት ኮከብ አድርገው እየሰሩ መሆኑን ገልጸው፣ “ ህንፃ እያፈረሱ መስሪት ሁለት ሥራ ነው አንደኛ ማፍረስ፣ ሁለተኛ ደግሞ መገንባት አለ ” ሲሉ ተናግረዋል።

“ በአጠቃላይ ግን ስለሆቴልና ሪዞርት ሲወራ እከሌ ሆቴል ከፈተ፣ እከሌ ሪዞርት ከፈተ የሚለው ምንም ፋይዳ የለውም። ማነው የሚተባበረው ? ማነው አብሮት ያለው? ከአዲስ አበባ ከ300 ኪሎ ሜትር ሲመጣ ሴፍ ነው ወይ? የሚሉት ምላሽ የሚፈልጉ ናቸው ” ሲሉም አስገንዝበዋል።

በተያያዘ ዜና በአማራ ክልል በመንግስትና በፋኖ ታጣቂዎች እየተካሄደ ያለውን የተኩስ ልውውጥ ተከትሎ በጎንደር ከተማ ያለው ሆቴላቸው ገቢው እየተቀዛቀዘ መሆኑንም ከዚህ ቀደም መግለጻቸው ይታወሳል።

የጎንደሩ ሆቴል ገቢው በምን ያህል ቀንሷል ? ሲል ቲክቫህ ኢትዮጵያ ከዚህ ቀደም ላቀረበላቸው ጥያቄ ሻለቃ ኃይሌ፣ “ አለ እንዴ ለመሆኑ ቢዝነሱ? 56፣ 57 ሩም ተይዞ 5 ሰዎች ስላሳደርክ ምንድን ነው ገቢው? ” የሚል ጥያቄ አዘል ምላሽ ሰጥተውም ነበር።

አሁንስ የጎንደሩ ሆቴል ገቢ በምን ደረጃ ላይ ይገኛል? በሚል ዛሬ ከጋዜጠኞች ለቀረበላቸው ጥያቄ በሰጡት ምላሽ ደግሞ፣ “ በጎንደሩ ሆቴል የሚፈለገውን ያህል እየተሰራ አይደለም ” የሚል ምላሽ ሰጥተዋል።

የቀጣይ የኃይሌ ሆቴልና ሪዞርቶች መዳረሻ የት እንደሚሆን በዛሬ የጅማ ሪዞርት ምረቃ መርሀ ግብር ላይ ማብራሪያ የሰጡት ሻለቃ ኃይሌ፣ የሻሸመኔውንና የደብረ ብርሃኑን ለማጠናቀቅ እየተሰራ መሆኑን ገልጸው፣ “ ድሬዳዋና ሀረርም ቀጣይ መዳረሻችን ይሆናል” ሲሉ ጠቁመዋል።

#TikvahEthiopiaFamilyAA

@tikvahethiopia

" እዛ አካባቢ ያሉ ቀበሌዎች ሙሉ በሙሉ የሚፈናቀሉበት ሁኔታ ሊፈጠር ይችላል " -የኢትዮጵያ ቀይ መስቀል ማህበር

በአፋር ክልል የጋቢ ረሱ ዞን ዱለቻ ወረዳ ዶፋን ተራራ ላይ የእሳተ ገሞራ ፍንዳታ መከሰቱ ይታወቃል።

በዚሁ መሠረት በአካባቢው ነዋሪዎች ላይ ጉዳት እንዳይደርስ በተቀናጀ ሁኔታ ወደ ጊዜያዊ መጠለያ የማጓጓዝ ሥራ እየተሠራ ነው ተብሏል።

ሁኔታውን አስመልክቶ ቲክቫህ ኢትዮጵያ ጥያቄ ያቀረበላቸው የኢትዮጵያ ቀይ መስቀል ማህበር የአፋር ክልል ቅርንጫፍ ጽ/ቤት ሃላፊ አቶ አሊ ሷሊህ ፥ " ቅድሚያ ህይወት የማዳን ስራዎች እና ነዋሪዎችን አደጋው ከተፈጠረበት አካባቢ የማሸሽ ሥራ ከክልሉ መንግስት ጋር እየተሰራ ነው " ብለዋል።

" ማህበረሰቡ ደህንነቱ ወደ ተረጋገጠ አካባቢ ከመጣ በኋላ የችግሩን ስፋት እና መጠን የሚገመግም እና ምን ያህል ማህበረሰብ እርዳታ ይፈልጋል የሚለውን ለመለየት የሚያስችል ቡድን አዋቅረን ዛሬ ጠዋት ወደ አካባቢው ልከናል " ብለዋል።

" ጉዳዩ ቀጣይነት ያለው በመሆኑ በአሁኑ ሰዓት ምን ያህል መጠለያ ጣቢያ ያስፈልጋል የሚለው በውል አልታወቀም "  ያሉት ሃላፊው " ዱለቻ አካባቢ ከሁለት ቀበሌዎች እንዲሁም አዋሽ ፈንታሌ ሳቡሬ አካባቢ በርካታ ሰዎች እየወጡ ነው ሦስት መጠለያ ጣቢያዎች ያስፈልጋሉ ብዬ አስባለሁ ትክክለኛ ቁጥሩን የምናውቀው የላክነው ቡድን መረጃውን ይዞ ሲመጣ ነው " ብለዋል።

አክለውም ፥ " ችግሩ ሊቀጥል እና ሊሰፋ ይችላል በሂደት ላይ ያለ ነገር ስለሆነ ተጨማሪ ቀበሌዎች ይፈናቀላሉ ተብሎ ይጠበቃል እዛ አካባቢ ያሉ ቀበሌዎች ሙሉ በሙሉ የሚፈናቀሉበት ሁኔታ ሊፈጠር ይችላል " ነው ያሉት።

አቶ አሊ ዛሬ ወደ ስፍራው ያቀናው ቡድን መረጃዎችን ሰብስቦ ይመለሳል ያሉ ሲሆን ውጤቱ እንደቀረበ በ 72 ሰዓት ውስጥ አስፈላጊውን ድጋፍ እናደርጋለን ብለዋል።

#TikvahEthiopiaFamilyAA

@tikvahethiopia

#የአእላፋትዝማሬ #TheMelodyofMyriads

“ ኦርቶዶክሳዊያን ወጣቶች ልደትን በቤተ ክርስቲያን አሳልፉ ፤ በአዲስ አበባና በድሬዳዋ የምትገኙም በዝማሬው ላይ እንድትገኙ ” - የኢትዮጵያ ጃንደረባው ትውልድ (ኢጃት)

ታኅሳስ 29 ቀን 2017 ዓ/ም የሚከበረውን ኢየሱስ ክርስቶስ የልደት በዓል ምክንያት በማድረግ የኢትዮጵያው ጃንደረባ ትውልድ ያዘጋጀው “ልደትን በባለ ልደቱ ቤት” የተሰኘውን የአእላፍ ዝማሬ በተመለከተ አዘጋጆቹ ዛሬ በስካይ ላይት ሆቴል መግለጫ ሰጥተዋል።

የዝማሬ ጉባዔው በአዲስ አበባ በድሬዳዋ እንደሚከናወን የገለጹት አዘጋጆች፣ “ ላለፉት ስምንት ወራት ለዚህ ታላቅ የዝማሬ ጉባዔ ከፍተኛ ዝግጅት ሲደረግ ቆይቷል ” ብለዋል።

የጉባዔው ዋነኛ ዓላማ በአልባሌ ቦታ የሚውሉ ወገኖች በዓሉን በቤተክርስቲያን የመላክትን ዝማሬ በመዘመር እንዲያሳልፉ ለማድረግ ያለመ መሆኑ ተመልክቷል።

የኢትዮጵያው ጃንረባ ትውልድ ቦርድ ምክትል ሰብሳቢ አቶ ቢንያም አሕመድ ፤  “ ኦርቶዶክሳዊያን ወጣቶች ልደትን በቤተ ክርስቲያን አሳልፉ ፤ በአዲስ አበባና በድሬዳዋ የምትገኙም በዝማሬው ላይ እንድትገኙ ” ብለዋል።

“ በሌሎች አካባቢዎች ላይ የተዘጋጁ ዝግጅቶች ካሉም በእዛው በመገኘት እንድታሳልፉ የኢትዮጵያ ጃንደረባው ትውልድ ጥሪ ያቀርባል ” ሲሉ አሳስበዋል።

በመርሃ ግብሩ በቤተክርስቲያን ቅጽር ግቢ ውስጥ ምንም አይነት ሽያጭ እንደማይከናውን አዘጋጆቹ አሳውቀዋል።

በሌላ በኩል፣ “ አእላፋት ዝማሬ ነጭ ልብስ ልበሱ ” ተብሏል በሚል ነጭ ልብስ በተጋነነ ዋጋ የሚቸበችቡ ሁነቱን የተከተሉ ነጋዴዎች ተስተውለዋል።

ቲክቫህ ኢትዮጵያ፣ ነጭ ልብስ በውድ ወጋ እየተቸበቸበ ነው የሚል አስተያዬት እየተሰጠ ተስተውሏል፣ ለመርሀ ግብሩ ነጭ ልብስ ብቻ ለብሶ መምጣት ግዴታ ነው ? ሲል ለአዘጋጆቹ ጥያቄ አቅርቧል።

የኢትዮጵያው ጃንረባ ትውልድ ቦርድ ምክትል ሰብሳቢ አቶ ብንያም አሕመድ በሰጡት ምላሽም፣ “ ነጭ ልብስ የሌለን ያለንን ልብስ ንጹህ አድርገን እንምጣ። ዓላማችን ልብሱ ለመቁረቢያ እንዲሆን ነው ” ብለዋል።

“ ኦርቶዶክሳዊ ኢኮኖሚ እንዲፈጠር ይፈለጋል ግልጽ ነው። በዚህ ምክንያት ወደ ስራ የሚገቡ፣ ሥራቸውን የሚያስፋፉ፣ የሚለወጡ ኦርቶዶክሳዊያን ቢኖሩ ይሄ የማኀበራችን አንዱ ዓላማ ነው ” ሲሉ ነው የተናገሩት።

“ ስለዚህ ይህን በቀና ዓይን ነው የምናየው ” ያሉት አቶ ብንያም፣ “ በእርግጥ በዚሁ ምክንያት ደግሞ አጋጣሚውን የሚጠቀሙ፣ Accidental Entrprenuers የምንላቸው መጥተው ባለሃብት ለመሆን የሚጥሩ ይኖራሉ ” ሲሉም አክለዋል።

“ ልደቱ የሰዎች የመላክት ዝማሬ ነው። ስለዚህ ይህንን በማሰብ ነጭ ለብሰን እንመጣለን ” ብለው፣ “ ዘወትር ወደ ቤተ ክርስቲያን ስንሄድ የምናደርገው ነው፣ የተለዬ ነገር የለውም ” ነው ያሉት።

ሆኖም ነጭ ልብስ የሌላቸው ያላቸውን ልብስ በአግባቡ ለብሰው በዝማሬ መርሀ ግብሩ መገኘታቸው እንዳይዘነጋ መልዕክት ተላልፏል። 

ዝማሬው ዘማሪያን እየዘመሩ ምዕመናን የሚቀበሉበት ሂደት ሳይሆን ልደቱን በሚያወሱ ዝማሬዎች ሁሉም በጋራ ምስጋና እንዲያቀርብ መሆኑ ተሰምሮበታል።

#TikvahEthiopiaFamilyAA

@tikvahethiopia

#Update

“ ከ29 በላይ ኢትዮጵያውያንን ወደ ሌላ ቦታ ሸጠዋቸዋል። ቀሪዎቹም ከፍተኛ ስጋት አለባቸው ” - በማይናማር ያሉ ኢትዮጵያውያን ወላጆች ኮሚቴ

በማይናማር የሚገኙ ኢትዮጵያውያን ካሉበት አስቸጋሪ ሁኔታ የኢትዮጵያ መንግስት እንዲያስወጣቸው በተደጋጋሚ እየተማጸኑ እንደሚገኙ ይታወቃል።

የወላጆች ኮሚቴ በበኩሉ፣ “ ግብረሰዶም ወደማፈጸምበትና ኩካሊት እያወጡ የሚሸጡ ሰዎች ወዳሉበት ካምቦዲያ ሊሸጧቸው እንደሆነ ሰምተናል ” ሲል ስጋቱን ገልጾልን ነበር።

ስለጉዳዩ ማብራሪያ የጠየቅነው ውጪ ጉዳይ ሚኒስቴር፣ ልጆቹ ያሉበት ቦታ አዳጋች እንደሆነ፣ ከአገራቱ ጋር የሥራ ስምሪት አለመኖሩ ሁኔታውን አስቸጋሪ እንዳደረገው ለቲክቫህ ኢትዮጵያ ሲገልጽ መቆየቱ አይዘነጋም።

ከቶኪዮ ኤምባሲ ጋር እየተነጋገረ መሆኑንም ገልጾ የነበረው ሚኒስቴሩ ከዚያ በኋላ ላቀረብለት ጥያቄ፣ “ አዲስ መረጃ ካለ አሳውቃለሁ ” ቢልም እስካሁን ያለው ነገር የለም።

አሁንስ የኢትዮጵያውያኑ ጉዳይ ከምን ደረሰ ?

የወላጆች ከሚቴ ለቲክቫህ ኢትዮጵያ በሰጠው ቃል፣ “ ከ29 በላይ የማሆኑ ኢትዮጵያውያንን ወደ ሌላ አገር ሸጠዋቸዋል። ቀሪዎቹም ከፍተኛ ስጋት አለባቸው ” ብሏል።

በመሆኑም ልጆቹ ካሉበት ስቃይ እንዲወጡ በኢትዮጵያ የሚገኙ የተለያዩ ተቋማት ጫና እንዲያደርጉ ቢሯዎቻቸውን እያንኳኳ በደብዳቤ ጭምር እየተማጸነ መሆኑን ገልጾ፣ መንግስት አሁንም ለጉዳዩ ትኩረት እንዲሰጥ ጠይቋል።

ኮሚቴው በዝርዝር ምን አለ ?

“ ምንም መፍትሄ የለም። እንዲያውም የተወሰኑ ልጆችን ወደሌላ ቦታ ሸጠዋቸዋልና ያን የሰሙ ልጆች በጣም ተረብሸዋል።

ወደ ካምቦዲያ እየሸጧቸው ነው ስለተባለ ተጨናንቀዋል። በየቀኑ ‘ምን አዲስ ነገር አለ?’ ነው የሚሉን። እኛም ውጪ ጉዳይን አሳስበን መፍትሄ በመጥፋቱ አሁን የሃይማኖት ተቋማትን እየተማጸንን እንገኛለን።

ልጆቹን በማይናማር ከነበሩበት ቦታ አንስተው ወደ ሌላ ቦታ እየሸጧቸው ነው። ይሄ ነው ችግር የሆነው። በየጊዜው አዲስ ነገር ነው የሚሰማው በጣም ይጨንቃል።

ውጪ ጉዳይ ሚኒስቴርን በተደጋጋሚ ብንጠይቅም ምንም አዲስ ነገር የለም። አሁንም ተሰባስበን ልንሄድ ነው። የሃይማኖት ተቋማት ጫና እንዲያደርጉ እየተማጸንን ነው።

ዱኣ አድርጉ፤ ጾም ጸሎት ይታወጅ ብለን እየጠየቅን ነው።

ሀገራቱንም፣ ህዝብንም፣ ቤተሰብንም መጥቀም የሚችሉ የተማሩ ልጆቻችን ስቃዬ ላይ እያሉ ውጪ ጉዳይ ሰምቶ ዝም ከማለት ያስቸገረው ነገር ካለም ለጠቅላይ ሚኒስቴር ጽሕፈት ቤት እንዲያቀርቡልን እንጠይቃለን።

ጠቅላይ ሚኒስቴር ጽሕፈት ቤትም ሄደን ነበር ለቅሬታ ሰሚ ክፍል ጥያቄያችንን በኢሜይል እንድናስገባ ነው የነገሩን። ግን በኢሜይል ብቻ አስገብተን አንቀመጥም ደብዳቤም እንወስዳለን ” ብሏል።

(ጉዳዩን እስከ መጨረሻው የምንከታተለው ይሆናል)

#TikvahEthiopiaFamilyAA

@tikvahethiopia

#የአእላፋትዝማሬ #TheMelodyofMyriads

በዓልን በማይገባ ቦታ የሚያሳልፉ በእግዚአብሔር ቤት ሆነው እንዲያሳልፉ ለማድረግ ዓላማ ያለው የአእላፋት ዝማሬ / The Melody of Myriads መርሐግብር ዛሬ ሰኞ በገና ዋዜማ በአዲስ አበባ እና ድሬዳዋ ይከናወናል።

ቦታው ፦
👉አዲስ አባባ ፦ ቦሌ በድብረ ሳሌም መድኃኔዓለም
👉 ድሬዳዋ ፦ ለገሀር አደባባይ

ከነዚህ ከተሞች ውጭ በኢትዮጵያዊው ጃንደረባ ትውልድ / ኢጃት አማካኝነት  የተዘጋጀት የአእላፋት ዝማሬ መርሐግብር የሌለ ቢሆንም ሁሉም ምእመናን ፣ ኦርቶዶክሳዊያን ሁሉ በዓሉን ቤተክርስቲያን እንዲያሳልፉት ጥሪ ቀርቧል።

በአዲስ አበባ እና ድሬዳዋ ምእመናን ከዝማሬው በፊት ልክ 10:00 ሰዓት ላይ ተገኝተው የአንድ ሰዓት ጸሎተ የምሕላና ጸሎተ ኪዳን ላይ እንዲሳተፉ አደራ ተብሏል።

የዘንድሮው የአእላፋት ዝማሬ ከአምናው በተለየ ጥራት ለማካሄድ በየትኛውም ቦታ የቆመ ሰው የሚሰማው ድምጽ ሆነ የሚያየው ምስል እኩል እንዲሆን ጥረት ተደርጓል።

ለነፍሰ ጡሮች  እና የአካል ጉዳተኞች ልዩ ስፍራ የተዘጋጀ ሲሆን ለአስተባባሪዎች በመንገር ቦታ ማግኘት ይቻላል።

የጤና እክል ለሚያጋጥማቸው ተንቀሳቃሽ ክሊኒኮች አሉ።

የመኪና ማቆሚያን በተመለከተ በቤተክርስቲያን ቅፅጽረ ግቢ ሆነ አስፋልት ዳር መኪና ማቆም ተከልክሏል። መኪና ማቆም የሚቻለው ከህንጻዎቹ ጀርባ ነው።

መኪና ያላችሁ መርሐግብሩ ሲጠናቀቅ ወደናተ አቅጣጫ የሚሄዱትን በመጫን የትራንስፖርት ሰርቪስ እንድትሰጡ አደራ ተብሏል።

ወደ መርሐግብሩ የምትመጡ ነጭ ልብስ አድርጋችሁ እንድትመጡ ያንን ማድረግ ያልቻላችሁ ያላችሁን ልብስ ንጹህ አድርጋችሁ እንድትመጡ ጥሪ ቀርቧል።

በቂ ከበሮ ስለተዘጋጀ ከበሮ ይዞ መምጣት አያስፈልግም።

ቦሌ መድኃኔዓለም በጊብሰን በኩል ያለው በር ለቅዱስ ፓትርያርኩና ለሊቃነ ጳጳሳት መግቢያ ስለሆነ ምእመናን ሌሎች በሮችን እንዲጠቀሙ ተብሏል።

ድሬዳዋ ምድር ባቡር አደባባይ የሚያስገቡትን 5 በሮች መጠቀም ይቻላል።

በመርሐግብሩ በቂ ጥበቃ የተመደበ ሲሆን ፍተሻም ይኖራል።

ምን ይዞ መገኘት / መግባት አይቻልም ?

➡ መሳሪያዎች
➡ ተቀጣጣይ ነገሮች
➡ የግል ካሜራ ፣ ድሮን
➡ ሽቶና ስፕሬይ
➡ ኮስሞቲክስ
➡ ክብሪት
➡ ስክሪብቶና የሾሉ ነገሮች
➡ የግል ከበሮ ይዞ መምጣት ክልክል ነው።

ወደ አእላፋት ዝማሬ የሚመጡ ምዕመናን እስከ 10 ጧፍ ይዘው እንዲመጡ ጥሪ ቀርቧል።

ሦስቱ ጧፎች የአእላፋት ዝማሬ / The Melody of Myriads / እስኪጠናቀቅ የሚበሩ ሲሆን የቀሩትን ለደብሩ በመባ መልክ ያስረክቡ። በደብሩ በኩልም ለገጠር አብያተ ክርስትያናት ድጋፍ ይደረጋል ተብሏል።

NB. የዕለቱን ሁነት የሚቀርጹ ፣ በቀጥታም የሚያስተላልፉ መገናኛ ብዙሃን ስላሉ ምእመናን በዝማሬና ምስጋና ላይ ብቻ ትኩረት እንዲያደርጉ ጥሪ ቀርቧል።

' ልደቱን በባለ ልደቱ ቤት ! '
#TheMelodyofMyriads

#TikvahEthiopiaFamilyAA

@tikvahethiopia

“ ቅልጥ አለቱ በመሬት ውስጥ የሚያደርገዉ እንቅስቃሴና ወደ ላይ የመውጣት ግፊቱ እንደቀጠለ ነው።  ግን ቀዝቅዞ እዛው ሊቀር፣ ከመሬት በላይ ሊፈነዳ ይችላል ” - ኤሊያስ ሌዊ (ዶ/ር)

በአዋሽ ፈንታሌና ዶፈን ቮልካኖዎች መካከል የሚከሰተው የመሬት መንቀጥቀጥ ጠንከርና ከፍ እያለ መምጣቱ በተደጋጋሚ ተገልጿል። ሰሞኑንም በተደጋጋሚ እየተከሰተ ተስተውሏል።

ቲክቫህ ኢትዮጵያ፣ ለመሆኑ ምን መደረግ አለበት? ሲል ለአዲስ አበባ ዩኒቨርሲቲ የጂኦፊዚክስ፣ ስፔስ ሳይንስ እና አስትሮኖሚ ተቋም ዳይሬክተር ኤልያስ ሌዊ (ዶ/ር) ጥያቄ አቅርቧል።

ኤልያስ ሌዊ (ዶ/ር) ምን መለሱ ?

“ ስምጥ ሸለቆ አካባቢ ነው ያለነው። ስምጥ ሸለቆ የሚፈጠርበት ተፈጥሯዊ ሂደት ነው። ተፈጥሯዊ ስል፤ ርዕደ መሬት እያስጨነቀው ላለ ማህበረሰብም ሆነ ለእኛ ባለመያዎቹ ሲንቀጠቀጥ ያስጨንቃል። 

ወዴትስ ያመራ ይሆን? የሚለው ያሳስባል። ግን መንስዔው ይታወቃል ተፈጥሮም የራሷን ሂደት እየሄደች ነው ያለችው ለማለት ነው። የስምጥ ሸለቆ አፈጣጠር አንዱ ሂደት ነው ለማለት ነው። 

እናም ከዚህ ቀደምም እንደገለጽነው ቅልጥ አለት መሬት ውስጥ እየተንቀሳበሰ ነው። በፈንታሌና በዶፈን ተራራዎች መካከል። የምናየው ርዕደ መሬት የዛ ውጤት ነው።

የሰሞኑ ክስተት እየነሆነ ያለው የዛ እንቅስቃሴ የፈጠረው መንቀጥቀጥ ሞገድ በመሬት ውስጥ ተጉዞ ነው አዲስ አበባ ድረስ የሚሰማን። 

መጠኑ ከፍ ሊል ይችላል ወይ? ለሚለው ጥያቄ፣ ሊልም ላይልም ይችላል። ማለትም ከዚህም በላይም ከፍ ሊል ይችላል።

ነገር ግን ይሄ በሚሆንበት ጊዜ እኛ ምን ማድረግ አለብን? የሚለው ነው መታወቅ ያለበት" የሚል ማብራሪያ ሰጥተዋል።

መደረግ ስላለበት ጥንቃቄ ኤልያስ (ዶ/ር) ምን ተናገሩ?

“እስካሁን ድረስ ከፍ ያለ የመሬት መንቀጥቀጥም አልመጣም። መደርግ ስለሚገባው ነገርም ሲጠቀስ አንዳንድ ሚዲያ ላይ ሰዎች መቀለጃ አድርገውታል። ‘ጠረንጴዛ ሊያድነን ነው ወይ?’ ይላሉ።

ግን ይሄ የዓለም አቀፍ ተሞክሮና ስታንዶርድ ነው። ብዙ ሰዎች በዚሁ መንገድ ከአደጋ ድነዋል። 

ስለዚህ ከኮለን አካባቢ ሥር መቆም፣ ከጠረንጴዛ ሥር በፍጥነት መግባት፣ አሳንሰር አለመጠቀም፣ ፎቅ ላይ ለመውረድ አለመሞከር ያስፈልጋል። 

እሳት ሊያቀጣጥሉ የሚችሉ እንደ ሻማ ያሉ ነገሮችን ማጥፋት የመሳሰሉት እርምጃዎች ቀላል ይመስላሉ ግን የብዙዎችን ሕይወት አትርፈዋል።

በጣም የአጭር ጊዜ ስለሆነ የሚሆነው ከቤት ለመውጣትም ጊዜ ላይሰጥም ይችላል። 

የጊዜ አለማግኘት ብቻም ሳይሆን ቁልፍ ቆልፈን ቁጭ ብለን እንኳ እጃችንን እየተንቀጠቀጠ ለመክፈት ያዳግታል። በመሆኑም ከላይ የተጠቀሱትን ጥንቃቄዎች ማድረግ አለብን።

ማንም ሊያቆመው አይችልም ይሄንን ክስተት። ለኛ አሁን እዚህ ካለው የመሬት መንቀጥቀጥ በይበልጥ እያሰጋን ያለው ፈንታሌ አካባቢ ያለው ሁኔታ ነው። ጥፋት ካደረሰ ከኛ በበለጠ እዛ አካባቢ ነው ብዙ ጥፋት የሚያደርሰው።

እዛም ያለው የሰው ሕይወት ነው፤ እዚህም ያለው የሰው ሕይወት ነው። ሕይወት ነው የትም ቦታ ያለው። እዛ ላሉት ወገኖቻችንም እየተጨነቅን ነን ያለነው።

እዛ አካባቢ መሬት ውስጥ የሚጓዘው ቅልጥ አለት ወደ ላይ የመውጣትም እዛው የመቅረትም የሁለቱም ፓስቢሊቲ አለው። 

ከቀን ወደ ቀን የምናየው መረጃ እንደሚያሳየው ቅልጥ አለቱ ወደ ላይ ለመውጣት በሚያደርገው ግፊት መሬት እየተወጣጠረች ነው፡፡

ይህ ማለት ግን እርግጠኛ ሆነን ይፈነዳል ማለት አይደለም። ቀዝቅዞም እዛው ሊቀር፣ መጨረሻም እዛው ሊቆም ይችላል።

ቅልጥ አለቱ ወደ ላይ የሚመጣ ከሆነ ምን ማድረግ አለብን የሚለውን የሚመለከታቸው ባለድርሻ አካላት፣ የመንግስት አካላት፣ መስሪያ ቤቶች፣ የግል ድርጅቶች፣ ዓለም አቀፍ ድርጅቶች ጋር በሕብረት እየተሰራ እንደሆነ አውቃለሁ።

እኛ የምርምር ማዕከል ነን ሥራችን መረጃ ማቅረብ ነው። እነርሱ ደግሞ ያንን መረጃ ወስደው በተግባር ላይ ያውሉታል የሚል ሙሉ እምነትና ግምት አለን። አንዳንድ ሥራዎችም እንደተጀመሩ መረጃ አለኝ። 

በኛ በኩል እንደ ምርምር ተቋም መንስኤው ምንድን ነው? መጠኑ ስንት ነው? ምን መደረግ አለበት? የሚለውን እያቀረብን ነው ያለነው። 

ከዚህ በተጨማሪ ያለው ነገር መጠነ ሰፊ ሥራዎችን ናቸው የሚጠይቁት። መጠነ ሰፊ መስሪያ ቤቶችንም መቀናጀት ያስፈልጋል። 

እኛ ብቻም ሳንሆን በዓለም አቀፍ በሙያው ዘርፍ ካሉት ባለሙያዎች ጋር እንደ ኢንስቲትዩት እየተገናኘና መረጃ እያቀናጀ ነው ያለው” ነው ያሉት።

#TikvahEthiopiaFamilyAA

@tikvahethiopia

" ከፍተኛ ቁጥር ያለው ሰው በእግሩ ነው የመጣው ፤ ቀጥሎ በትራንስፓርት እየመጣ ያለ እንግዳ አለ " - የላሊበላ ከተማ አስተዳደር

የኢየሱስ ክርስቶስ የልደት በዓል በተለይ በላሊላ ውቅር አብያተ ክርስቲያን በደማቁ ይከበራል።

ድንቁ የላሊበላ ውቅር አብያተ ክርስቲያን የሚገኝበት አማራ ክልል በፋኖ ታጣቂዎችና በመንግስት የጸጥታ ኃይሎች መካከል የተኩስ ቀጠና ከሆነ አንድ አመት ከወራት በላይ ቢያስቆጥርም፣ ህዝበ ክርስያቱ በዓሉን በቦታው ለማክበር ከመጓዝ እንዳልተገደበ ተሰምቷል።

የክልሉ ህዝብ ከአንድ አመት በላይ ለሆነ ጊዜ በጦርነት ቀጠና በመሆኑ ከቦታ ቦታ በሰላም በመንቀሳቀስ የነፍስና የሥጋ ስራውን ለማከናወን ከመቸገሩ ባሻገር ሞት፣ የአካል ጉዳትና የንብረት ውድመት እያስተናገደ ይገኛል።

ከዚህ ባሻገር በቡግና ወረዳ በድርቅና በምግብ እጥረት የሚላስ የሚቀመስ እንደ ሰማይ የራቃቸው ጨቅላ ህፃናት በከፋ ችግር ውስጥ ያሉበት ክልል ነው።

ይሁን እንጂ የክልሉን ህዝብ ጨምሮ በሌሎች አካባቢዎች ያሉ ኦርቶዶክሳዊያን ወደ ቦታው ለማቅናት የክልሉ ሁኔታ እምብዛም እንዳልገደባቸው ተነግሯል።

ቲክቫህ ኢትዮጵያ፣ የበዓሉ የዋዜማ ድባብ እና ዝግጅት ምን ይመስላል ? ሲል ለላሊበላ ከተማ አስተዳደር ጥያቄ አቅርቧል።

የላሊበላ ከተማ ተቀዳሚ ምክትል ከንቲባ አቶ ወንድምነው ወዳጅ ምን አሉ ?

“ ቅዱስ ላሊበላ ከተማ የገና በዓልን ለማክበር በቂ ቅድመ ዝግጅት በማድረግ እንግዶቿን እየተቀበለች ነው። እንግዶች ከተለያዩ የአገሪቱ ክፍሎች ወደ ከተማዋ እየገቡ ይገኛሉ።

ከፍተኛ ቁጥር ያለው ሰው በእግሩ ነው የሚመጣው። ከዛ ቀጥሎ በትራንስፓርት እየመጣ ያለ እንግዳ አለ። የኢትዮጵያ አየር መንገድ ከአዲስ አበባ፣ ከባሕር ዳር፣ ከጎንደር በዘረጋው በረራም እንግዶች ገብተዋል።

ቅዱስ ላሊበላ ከተማ እንግዷቿን በመቀበል የነበረ ግርማ ሞገሷን በመላበስ ተናገራለች። ወጣቶች ዝቅ ብለው እግር በማጠብ እንግዶችን የማስተናገድ ባህላቸውን አከናውነዋል ” ሲሉ ገልጸዋል።

ክልሉ የጸጥታ ችግር ላይ መሆኑ ይታወቃል፤ ከዚሁ ጋር በተያያዘ የጸጥታውን ጉዳይ በተመለከተ ምን እንደተሰራ ከቲክቫህ ኢትዮጵያ ጥያቄ ቀርቦላቸዋል።

አቶ ወንድምነው በሰጡት ምላሽም፣ “ ገናን ማክበር የጸጥታ ችግር ስጋት ሊሆን አይችልም ” ብለዋል።

“ ገና ሃይማኖታዊ በዓል ነው፤ ገና ህዝባዊ በዓል ነው፣ ገና እምነታዊ በዓል ነው። ገና የጸጥታ ችግር ሊሆን አይችልም። ገናን ማክበር የሚፈልግ ሰው ልቦናውን አዘጋጅቶ መገኘት ብቻ ቅድመ ሁኔታ ነው ” ሲሉ አክለዋል።

ምን ያህል እንግዶች እንደሚገኙ ሲጠየቁም፣ ከበዓሉ በኋላ እንጂ አሁን ለመገመት እንደሚያዳግት አቶ ወንድምነው ለቲክቫህ ኢትዮጵያ ምላሽ ሰጥተዋል።

የእንኳን አደረሳችሁ መልዕክት አስተልፈው ፣ “ ጥሪያችንን አክብራችሁ በላሊበላ ታድማችሁ ከተማችንን ወደነበረ ግርማ ሞገሷ እየመለሳችሁ ላላችሁ ላቅ ያለ ክብር አለን ” ሲሉ አመስግነዋል።

#TikvahEthiopiaFamilyAA

@tikvahethiopia