#France #Ethiopia

በፈረንሳይ የኢትዮጵያ አምባሳደር ሄኖክ ከፈረንሳይ ብሔራዊ ምክር ቤት የኢትዮጵያ ወዳጅነት ቡድን አባላት ጋር ተወያይተወል።

ውይይቱ ፍሬያማ ውይይት እንደነበር የውጭ ጉዳይ ሚኒስቴር ገልጿል።

በውይይቱ ወቅት አምባሳደር ሄኖክ ፥ ኢትዮጵያን የማፍረስ አላማ ይዞ ግጭቱን የጀመረው ህወሓት እንደሆነና በአማራ እና አፋር ክልሎች ባደረገው ወረራ ከፍተኛ የሰብአዊ መብት ጥሰቶችን እንደፈፀመ ገልፅዋል።

ጠቅላይ ሚኒስትር ዶ/ር አብይ አህመድ የኢትዮጵያን ሃይሎች በመምራት የህወሓት ሃይሎችን እያሸነፉ እንደሆነ፤ መንግሥት የኢትዮጵያን የግዛት አንድነት እንደሚያረጋግጥና የተጀመረውን የዴሞክራሲ ስርዓት ግንባታና የኢኮኖሚ ሪፎርም አጀንዳ ለመተግበር ቁርጠኛ እንደሆነ አብራርተዋል።

ቨርዢኒ ዱቢ ሙለር ለፈረንሣይ ፓርላማ አባላት ስለ ኢትዮጵያ ወቅታዊ ሁኔታ ገለጻ ለማድረግ እድል በመስጠታቸው አምባሳደሩ ምስጋናቸውን ማቅረባቸውን ከውጭ ጉዳይ ሚኒስቴር የተገኘው መረጃ ያሳያል።

@tikvahethiopia

#FRANCE

🗳 ማክሮን ፕሬዜዳንት ሆነው ተመርጠዋል።

ዛሬ በተካሄደ ምርጫ ኢማኑኤል ማክሮን የፈረንሳይ ፕሬዝዳንት በመሆን ተመረጡ። ማክሮን ፕሬዚዳንት ሆነው የተመረጡት ለሁለተኛ ጊዜ ነው።

በፈረንሳይ የፕሬዝዳንታዊ ምርጫ ፕሬዚዳንት ኢማኑኤል ማክሮን እና ቀኝ ዘመሙዋ ማሪን ለ ፐን ተፎካክረዋል።

በዛሬው ምርጫ ፕሬዝዳንት ኢማኑኤል ማክሮን ተቀናቃኛቸው ማሪን ሊ ፐንን በ58.2 % ለ 41.8 % በሆነ ውጤት ማሸነፋቸውን የFrance 24 ዘገባ ያስረዳል።

የማክሮንን ማሸነፍ ተከትሎ የሀገራት መሪዎች የ " እንኳን ደስ አልዎት " መልዕክት እያስተላለፉ ሲሆን የኢትዮጵያ ጠ/ሚ ዶ/ር ዐቢይ አህመድም የደስታ መልዕክታቸውን ካስተላለፉ ሀገራት መካከል ይገኙበታል።

በሌላ በኩል ፤ የምርጫውን ውጤት ተከትሎ ፕሬዜዳንት ማክሮን በሚቃወሙ አካላት ተቃውሞ ተቀስቅሷል ፤ ለአብነት በፓሪስ በነበረ ተቃውሞ ማክሮንን ሊቃወሙ የወጡ ሰዎች ከፖሊስ ጋር ተጋጭተዋል።

@tikvahethiopia

#France

በአንድ የፖሊስ አባል በተገደለ አንድ የ17 ዓመት ታዳጊ ሀገራቸው በከፍተኛ ተቃውሞና አመፅ ውስጥ የምትገኘው የፈረሳይ ፕሬዝደንት ኢማኑኤል ማክሮን የውጭ ሀገር ስብሰባቸውን አቋርጠው ወደ ሀገራቸው ተመልሰዋል።

ፕሬዜዳንቱ በብራስልስ የአውሮፓ ህብረት ጉባኤ እየታደሙ የነበረ ሲሆን በታዳጊው ግድያ ሀገሪቱ በተቃውሞ መናጧን ተከትሎ ስብሰባቸውን ጥለው ወደ ሀገራቸው ተመልሰዋል።

ወደ ሀገራቸው ከተመለሱ በኃላ ከባለሥልጣኖቻቸው ጋር አስቸኳይ ስብሰባ ተቀምጠው የተለያዩ ውሳኔዎችን አሳልፈዋል።

ካሳለፏቸው ውሳኔዎች መካከልም ፤ አንዳንድ የሚከናወኑ ዝግጅቶች እንዲሰረዙ፣ በማህበራዊ ሚዲያ ለዘረፋ የሚጠሩ ጥሪዎች ላይ ክትትል እንዲደርግ የሚሉት ይገኙበታል።

በተጨማሪ ፕሬዝዳንቱ ተቃውሞውን ለመቆጣጠር አሁን ከተሰማሩት 40 ሺህ የፀጥታ አካላት ተጨማሪ እንደሚሰማሩ አሳውቀዋል። ወላጆች ልጆቸውን ከጎዳና ላይ አመፅ እንዲጠብቁ አሳስበዋል።

ፕሬዜዳንት ማክሮን ፤ " በአንዳንድ ሰፈሮች የአንድ ጎረምሳ ሞት ተቀባይነት በሌለው መልኩ ለሌላ ነገር ውሏል " ሲሉ መናገራቸውን ኤኤፍፒ ዘግቧል።

በፈረንሳይ የአንድ የ17 ዓመት ታዳጊ በፖሊስ አባል መገደሉን ተከትሎ ለተከታታይ ቀናት በሀገሪቱ ብርቱ ተቃድሞ እና አመፅ እየተካሄደ ይገኛል። በተከሰተው አመፅ በተለያዩ ከተሞች በርካታ ተሽከርካሪዎች ጋይተዋል፣ ህንፃዎች ተቃጥለዋል፣ በፖሊስ እና በተቃውሞ አራማጆች ማካከል ግጭት ተፈጥሮ ሰዎች ተጎድተዋል፤ በርካቶችም ታስረዋል።

@tikvahethiopia