🔈#የህዝብድምጽ

የአማራ ህዝብ አስተማማኝ ሰላምን ካጣ ዓመታት አልፈዋል።

በየጊዜው የሚያገረሸው የተኩስ ልውውጥ የሰዎችን ህይወት መቅጠፉን ቀጥሏል።

በክልሉ ያሉ ሲቪል ሰዎች በሰላም ወጥቶ መግባት ቅንጦት እንደሆነ ይናገራሉ።

የኢኮኖሚውና የሰላም እንቅስቃሴውም ከሌሎች ክልሎች አንጻር እየተዳከመ ይገኛል።

ከዚህ ቀደም የሀገርና የውጭ ቱሪስት የሚጎርፍባቸው አካባቢዎች ዛሬ ሰው አይታይባቸውም።

በዚህ ስራ የተሰማሩ ዜጎችም ስራ አጠተው ቁጭ ብለዋል።

አስተያየቱን የሰጠን ወጣት አስጎብኚ ፥ " ይኸው ግራ ተጋብተን ቁጭ ብለናል። የሚበላ ማግኘት አልቻልም። ይህ ሁኔታ በዚህ እየቀጠለ ከሄደ ከአሁኑም በላይ ከባድ መዘዝ ይዞ ይመጣል " ሲል ገልጿል።

የሸቀጦች ዋጋም ቀደሞም ተወዷል አሁን ደግሞ ጭራሽ ዶላር ጨምሯል ተብሎ ተሰቅሏል።

ከተኩስ ልውውጥ ባለፈ እገታ ፣ ዘረፋ የተለመደ ተግባር እየሆነ ነው።

ገንዘብ ያላቸው ባለሃብቶች ባለው የፀጥታ ችግር ከክልሉ ውጭ ሃብታቸውን ይዘው እየሄዱ ናቸው።

አንድ ቃላቸውን የሰጡን የንግድ ሰው ፣ ባህር ዳር ላይ እሳቸውን ጨምሮ ሌሎች በሚፈለገው ልክ ስራ መስራት ስላልተቻለ እንዲሁም ጥናት ተደርጎ በሚፈጸመው እገታ ምክንያት የሚወዱትን ከተማ ለቀው አ/አ ለመግባት መገደዳቸውን ጠቁመዋል።

ከምንም በላይ ግን በዝቅተኛ ኢኮኖሚ ላይ ያለው ህዝብ ፣ ህጻናት፣ እናቶች ከፍተኛ ዋጋ እየከፈሉ ናቸው።

ትራንስፖርት በየጊዜው ስለሚቋረጥ ለህክምናም ይሁን ለሌላ ጉዳይ መንቀሳቀስ አልተቻለም። የአየር ትራንስፖርት ለመጠቀም አቅም የለም።

አንድ ደብረ ማርቆስ ያሉ እናት በሰጡት ቃል " እኔ ልጄን ማሳከም ነበረብኝ አዲስ አበባ ፥ ግን ሰሞኑን የጸጥታ ሁኔታው አስጊ ስለነበር አልተቻለም። ፈጣሪን እየተማጸንኩ ቁጭ ብያለሁ " ብለዋል።

አንድ የባህር ዳር ነዋሪ በበኩላቸው ፥ በየጊዜው የሚያገረሸው ጦርነት ምክንያት ህዝቡ የከፋ ቀውስ ላይ እንደጣለው ይህም ደግሞ አሁን ከአመት እንዳለፈው ገልጸዋል።

ከዚህ ባለፈው በባህር ዳር በየጊዜው የሚጣለው ቦምብ ከፍተኛ የደህንነት ስጋት እንደደቀነ ምሽት ላይ ለመንቀሳቀስ እንደማይችል ተናግረዋል።

ከባህር ዳር ወደ አ/አ በትራንስፖርት መሄድ አስቸጋሪ እንደሆነ ፣ ያለው የዋጋ ግሽበትም ማህበረሰቡን ለከፋ ኢኮኖሚያዊ ችግር እየጋለጠ እንደሆነ አመልክተዋል።

በተለያዩ ቦታዎችም የመድሃኒት አቅርቦት አሳሳቢ መሆኑን ጠቁመዋል።

" አሁን አሁን በሰላም ወጥቶ መግባት ቅንጦት " የሚሉት ነዋሪው ፤ የአማራ ጉዳይ ግን ችላ እንደተባለ ተናግረዋል።

ሌላው የተማሪዎች ጉዳይ ሲሆን ዘንድሮ ብዙ ተማሪ ሀገር አቀፍ ፈተና ላይ አልተቀመጠም። አማራ ክልል ጂኒየስ የሚባሉ ተማሪዎችን በየዓመቱ ያፈራል። በጦርነት ውስጥ እንኳን ሆኖ ከሀገር ከፍተኛውን ውጤት የሚያመጡት የዚሁ ክልል ልጆች ናቸው።

አንድ 12ኛ ክፍል ፈተና መፈተን ያልቻለ የጎጃም አካባቢ ተማሪ ፥ " ቀጣይ እንፈትናለን ይላሉ መቼ እንደሆነ አናውቅም። እኛ አካባቢ ዛሬም ድረስ መረጋጋት የለም። ይኸው እድሜያቻን በከንቱ ማለቁ የማይቀር ይመስላል " ሲል አስተያየቱን ሰጥቷል።

የአማራ ህዝብ ከዓመታት በፊት የትግራይ ጦርነት ተስፋፍቶ በመጣበት ወቅት ለወራት በከፍተኛ ስቃይ ፣ መከራ እና በደል ውስጥ አልፏል።

ከሲቪሎች ግድያ፣ ጉዳት ባለፈ ለበርካታ ወራት ኢኮኖሚው ቆሞ ነበር። ጦርነቱ በሰላም ስምምነት ከቆመ በኃላ ደግሞ ክልሉ ዛሬም ድረስ በሌላ ቀውስ ውስጥ ነው ያለው።

ባለፉት ዓመታት በክልሉ ዘላቂ መረጋጋት ታይቶበት አያውቅም። ይህ ሁኔታ በቀጣይ አመታት በሁሉም ዘርድ የሚያሳድረው ጫና ከፍተኛ ነው።

#Amhara #Ethiopia

@tikvahethiopia