#SafaricomEthiopia

" 50 በመቶ የኢትዮጵያን ክፍል አዳርሰናል " - ሳፋሪኮም ኢትዮጵያ

ሳፋሪኮም ኢትዮጵያ (ከመጋቢት 23,2016 - መጋቢት 22/2017 ዓም) ድረስ ባለው አንድ አመት ጊዜ ውስጥ ነው የማክሮ ኢኮኖሚ ማሻሻያዎች የአጭር ጊዜ ተፅዕኖን በመቋቋም የተገኘ ጥሩ ውጤት ማስመዝገቡን  ለቲክቫህ ኢትዮጵያ ገልጿል።

ተቋሙ ገቢውን ካሳለፈው በጀት አመት የ270 በመቶ ጭማሪ በማድረግ 7.2 ቢሊዮን ብር ትርፍ ማግኘቱን ገልጿል።

ሳፋሪኮም ኢትዮጵያ " በበጀት ዓመቱ የኔትዎርክ መሠረተ ልማቶችን በማስፋፋት ፈጣን እና አስተማማኝ የ4G አገልግሎቶችን በ3,141 ስትራቴጂካዊ ቦታዎች ላይ በተተከሉ የኔትወርክ ማማዎች አማካኝነት 50 በመቶ የኢትዮጵያን ክፍል አዳርሰናል " ብሏል።

ይህም በበጀት ዓመቱ መጨረሻ በአጠቃላይ 8.8 ሚሊዮን የ90 ቀን ንቁ የድምጽ እና የኢንተርኔት አገልግሎት ደንበኞች ለማፍራት እና በጥራት ለማስተናገድ አስችሎናል ነው ያለው። 

የተገኘው ውጤት ካለፈው ዓመት ተመሳሳይ ወቅት ጋር ሲነጻጸር የ103 በመቶ ጭማሪ መሆኑን ገልጿል።

በውጤቱ መሰረት 7.1 ሚሊዮን የ90 ቀናት ንቁ የኢንተኔት አገልግሎት ተጠቃሚ ደንበኞቹ የዳታ አጠቃቀምም በወር በአማካይ 6.5GB ሲሆን፣ ካለፈው የበጀት ዓመት ጋር ሲነጻጸር በአንድ ተጠቃሚ  ፍጆታ 53 በመቶ ጭማሪን እንዳስመዘገበ ተናግሯል። 

በሳፋሪኮም ስር የሚገኘው የገንዘብ ማስተላለፊያ M-PESA 2.4 ሚሊዮን የ90 ቀናት ንቁ ደንበኞችን በማገልገል 15.8 ቢሊዮን ብር ተዘዋውሮበታል ብሏል።

ሳፋሪኮም " 47 ቢሊዮን ብር የሚጠጋ ኪሳራ ደርሶብኛል " ያለ ሲሆን ገና በኢንቨስትመንት ምዕራፍ ላይ ያለ ኩባንያ እንደመሆኑ መጠን የሚጠበቅ ኪሳራ መሆኑን ለቲክቫህ ኢትዮጵያ አሳውቋል።

ቲክቫህ ኢትዮጵያ
አዲስ አበባ

@tikvahethiopia