🔈 #የመምህራንድምጽ

" አይደለም ያለ ደመወዝ በደመወዝም እንኳን ኑሮን አልቻልነውም ፤ ደመወዛችን በአግባቡ ሊከፈለን ይገባል " -  መምህራን
 
ከየካቲት ወር 2016 ጀምሮ #እየተቆራረጠ 50% ፣ 30% እየተከፈለ ቆይቶ እስከ የሰኔ ወር ሳይጨምር ውዝፍ ደመወዝ ከ70 እስከ 120% አልተከፈለንም ያሉ በጎፋ ዞን የአይዳ ፣ ገዜ ጎፋ እና ደምባ ጎፋ ወረዳ መምህራን ቅሬታቸዉን ለቲክቫህ ኢትዮጵያ አሰምተዋል።

" ያለደሞዝ አይደለም በደሞዝም ኑሮን አልቻልነዉም " የሚሉት መምህራኑ " ስቃያችን መች ነዉ የሚያበቃው ? " ሲሉ ቅሬታቸዉን ገልጸዋል።

ለቲክቫህ ኢትዮጵያ ቃሉን የሰጠው የደቡብ ኢትዮጵያ ክልል መምህራን ማህበር፥ " የመምህራኑን ድምጽ በተደጋጋሚ ለሚመለከተዉ አካል ሳሳዉቅ ቆይቻለሁ " ብሏል።

መምህራኑም አቤቱታቸውን ለሚመለከተው አካል አቅርበው እንደነበርም አስረድቷል።

ነገር ግን የዞኑ አስተዳደር እና የትምህርት መምሪያው ጥያቄያቸውን ተቀብሎ ተገቢውን ምላሽ ባለመስጠቱ መምህራኑ የአመራሩን ምላሽ እየተጠባበቁ እንደሚገኝ ገልጿል።

ከሰምኑ እነዚህ መምህራን ጥያቄያቸውን በሰላማዊ ሠልፍ ለመጠየቅ ሲሞክሩ  የዞኑ መምህራን ማህበር ከአመራሩ ጋር ውይይት እያደረገ በመሆኑ ሠልፍ እንዳይወጡና በትዕግስት እንዲጠብቁ በማድረግ መመለሱን ማህበሩን አሳውቆናል።

ይሁና መምህራኑ ባልተደራጀ ሁኔታም ቢሆን ጥያቄ ለማቅረብ ወደተለያዩ የወረዳ ትምህርት ጽህፈት ቤቶች መሄዳቸውና በዛም " በዚህ ደረጃ መቀጠል አንችልም ደሞዛችን በአግባቡ ሊከፈለን ይገባል !! " በማለት ድምጻቸዉን ማሰማታቸዉ ተገልጿል።

እንዲህ አይነት ጥያቄዎች ካሁን በፊትም በሌሎች የክልሉ ዞኖች ውስጥም መስተዋላቸውን አንስተን ጥያቄ ያቀረብንላቸው የደቡብ ኢትዮጵያ ክልል የትምህርት ቢሮ ምክትል ኃላፊዉ ዶክተር ታምራት ይገዙ ፤ "  ችግሩን እንደ ክልል ከየካቲት ወር ጀምሮ መቅረፍ ተችሏል " ሲሉ ገልጸዋል።

አሁን ላይ የመምህራንን ደሞዝ በተመለከተ አሰራሩ ዲሴንትራላይዝ ተደርጎ ለየዞኖቹ መሰጠቱን የገለጹት ኃላፊዉ " እኛ ቴክኒካል ድጋፍ እያደረግን ብቻ ነው ያለው " በማለት የደመወዝ ጉዳይ ለነሱ መሰጠቱን ጠቁመዋል።

" ችግሩ በዚህ ደረጃ ከተስተዋለ ግን ገምግመን ድጋፍ የምንሰጥ ይሆናል " ሲሉ ለቲክቫህ ኢትዮጵያ ተናግረዋል።

#TikvahEthiopiaFamilyHW

@tikvahethiopia

🔈 #የመምህራንድምጽ

" መምህራን እየተራቡ ስለትምህርት ጥራት ማዉራት አግባብ አይደለም " - የደቡብ ኦሞ ዞን መምህራን

" በዚህ ደረጃ ክፍያ ይዘገያል ብለን ባናስብም ችግሩ ካለ በቅርብ ይፈታል " - የዞኑ ትምህርት መምሪያ ሀላፊ

ከሰሞኑ በተደጋጋሚ በደረሰን የቅሬታ መልእክት በደቡብ ምእራብ ኢትዮጵያ ክልል የደቡብ ኦሞ ዞን መምህራን ላለፉት ሁለት ወራት ደሞዝ እንዳልተከፈላቸዉ በመግለጽ በተለያዩ ፕሮግራሞች ውስጥ መሳተፍ እንዳልቻሉ ነግረዉናል።

መምህራኑ እንደሚሉት አሁን ላይ ከፊሉ በመንግስት አቅም ማሻሻያ ፕሮግራሞች ግማሹ ደግሞ በራሱ ፍላጎት ወደተለያዩ ዩኒቨርሲቲዎች ቢያቀናም ደሞዝ አለመለቀቁን ተከትሎ ግን ችግር ላይ ወድቀዋል።

አሁን ላይ በገቡባቸዉ ዩኒቨርሲቲዎች ዉስጥ አላማቸዉን ካለማሳካታቸዉ ባለፈ ጥለዋቸዉ የመጡ ቤተሰቦቻቼዉ ረሀብ ላይ መዉደቃቸዉን ተከትሎ የሄዱበትን የትምህርትና ስልጠና ፕሮግራሞች ጥለዉ ለቀን ስራ መዳረጋቸዉን ይገልጻሉ።

ከዚህ በተጨማሪ በትራንስፖርት ችግር ምክኒያት ብዙ መምህራን በሚያስተምርበት አካባቢ ቢቀሩም በእንቅርት ላይ እንዲሉ ባሉበት አካባቢም የወባ ወረሽኝ አስቸጋሪ ሆኖባቸዋል።

ችግሩን የመንግስት አካላት ያዉቁታል የሚሉት የጎሪጌሻ የሜኒት ማጅና ቱም የጎልዲያና ሻሻ እንዲሁም የጋቺት እና ሱርማ ወረዳ  ቅሬታ አቅራቢዎች " መምህራን እየተራቡ ስለትምህርት ጥራት ማዉራት አግባብ አይደለም " ብለዋል።

በጉዳዩ ላይ ከቀናት በፊት ያነጋገርናቸዉ የዞኑ ትምህርት መምሪያ ሀላፊዉ አቶ  በበኩላቸዉ በዚህ ደረጃ ክፍያ ይዘገያል ብለን ባናስብም ችግሩ ካለ በቅርብ ይፈታል ብለዋል።

ሀላፊዉ አክለዉም ምናልባትም ችግሩ የበጀት ከሆነ አሁን ላይ በየወረዳዉ ግብር እየተሰበሰበ በመሆኑ በተቻለ ፍጥነት ችግሩ  ይፈታል በማለት የደሞዝ ችግሮ በቅርቡ እንደሚፈታ ገልጸዉልናል።

#TikvahEthiopiaFamilyHW

@tikvahethiopia

🔈#የመምህራንድምጽ

“ ምንም እንቅስቃሴ ያላደረጉ አካቢዎች አሉ፡፡ ግን በአንዴ 700 ሺሕ መምህር አይዳረስም ” - ማኀበሩ

የ1ኛ እና 2ኛ ደረጃ ት/ቤት መምህራን የቤትና የደመወዝ ችግር እየተፈታላቸው እንዳልሆነ በቲክቫህ ኢትዮጵያ በኩል ቅሬታ አቅርበዋል፡፡

መምህራኑ የገለጹት፣ ቤት የተሰጣቸው መምህራን ቢኖሩም ያልተሰጣቸውም እንዳሉ፣ ይህ ደግሞ በተለይ ከዝቅተኛ ደመወዝ ጋር ተዳብሎ ኑሮውን በእጅጉ እንዳከበደባቸው ነው፡፡

ቅሬታውን ያቀረቡት በተለይ በሶማሌ እና በአፋር ክልሎ የሚገኙ መምህራን፣ የኢትዮጵያ መምህራን ማኀበር የመኖሪያ ቤት ችግር እንዲቀረፍ፣ ደመወዝ ማሻሻያ እንዲደረግ የራሱን አስተዋጽዖ እንዲያደርግ ጠይቃዋል፡፡

ቲክቫህ ኢትዮጵያ የመምህራኑን ቅሬታ ይዞ የኢትዮጵያ መምህራን ማኀበር (ኢመማ)ን ማብራሪያ ጠይቋል፡፡

የማኀበሩ ምክትል ፕሬዚዳንት አቶ ሽመልስ አበበ ምን አሉ ?

“ ሶማሌ ክልል አካባቢ ላይ ምንም አይነት መሬት አልሰጡም፡፡ ምንም እንቅስቃሴ ያላደረጉ አካቢዎች አሉ፡፡ በሶማሌና አፋር ክልሎች፡፡ ግን በአንዴ 700 ሺሕ መምህር አይዳረስም፡፡

ድሬዳዋ በጣም ብዙ መምህራን ተሰጥተዋል፡፡ ሀረሪ ላይ በዚህ ዓመት ብቻ ለ34 መምህራን አንድ ሙሉ ኮንዶሚኒየም ተሰጥቷል፡፡ የአጠቃለይ ትምህርት ላይ ያለው የመኖሪያ ቤት ጉዳይ እተሰጠ ነው፡፡ አልተቋረጠም፡፡

ደብረ ብርሃን ቅድሚያ ተሰጥቷቸዋል፡፡

ኦሮሚያ ክልል ለምሳሌ በትምህርት
ቤት ጭምር መኖሪያ ቤት እየተሰራ ነው ለመምህራን፡፡

አዲስ አበባ ላይ በዚህ አመት ብቻ ከ400 በላይ ቤቶች ተሰጥተዋል፡፡ አሁን ደግሞ ቦታ ለመስጠት ተደራጁ ተብሎ በመደራጀት ላይ ናቸው፡፡

ለእያንዳንዱ ለ700 ሺሕ መምህር በአንድ ጊዜ መስጠት አይቻልም፡፡ ሁላችንም በአንዴ ቸኩለን የቤት ባለቤት እንሁን ቢባል አይቻልም፡፡ ችግሮች አሉ፡፡ በሂደት የአባሎቻችን ጥያቄ እየተመለሰ መሄድ አለበት ትክክል ነው፡፡

ከደመወዝ ጋር በተያያዘ የሥራ ክብደት ምዘና ተሰጥቷል፡፡

ደፍሬ ነው የምናገረው በሥራ ክብደት ምዘናው መምህራን የተቀመጡበት ቦታ ትክክለኛ ቦታ ላይ ነው፡፡ ኢንፈሌሽኑ ኢንፈሌትድ ሆኗል፡፡

እሱን ጥያቄ ለጠ/ሚ አቢይ አህመድ (ዶ/ር) አንስተናል፡፡ ከደመወዝ ጋር በአጠቃለይ የተያያዘው ምናልባት እንደ መንግስት አሁን ከከረንሲ ለውጥ ጋር ተያይዞ የሚጨመር ነገር አለ ሚባል ነገር አለ፡፡ አጠቃላይ ሆነውን ነገር የምናየው ነው የሚሆነው፡፡

የዩኒቨርሲቲ መምህራን ቅሬታ ግን አልተፈታም፡፡

የእነርሱ በተለዬ መንገድ መፈታት ነበረበት እየተፈታ አይደለም፡፡

ለጠ/ሚ አቢይ አህመድ (ዶ/ር)ም አንስተናል፡፡ አሁንም በሂደት ላይ ነው፡፡ ዛሬ ተጠይቆ ነገ መልስ ይገኛል የሚል እምነት የለንም እናም የሂደት ውጤት ነው። ”

የማኀበሩ ፕሬዚዳን ዮሐንስ በንቲ (ዶ/ር) በበኩላቸው ፦

“ ስታክ አድጎ የነበረው የዩኒቨርሲቲዎች እንጂ 1ኛና 2ኛ ደረጃ ላይ ችግር የለም፡፡ ግን አንዳንድ ክልሎች አካባቢዎች የመሬት አቅርቦት ችግርም አለባቸው፡፡ ግን ያልሄዱባቸው ደግሞ እንዳለ ሪፖርት አለ፡፡

አይሆናችሁም የሚል ሳይሆን ከቢሮክራሲ ጋር የሚያያዝ  ነገር ነው ችግሩ፡፡ የእኛም አመራር በቅርበት ክትትል አድረጎ ከሚመለከታቸው ጋር ሆኖ ማስፈጸም፣ መምህራንም በማኀበር መደራጀት አለባቸው፡፡ ያልተሟሉ ነገሮች ካሉ እነርሱን ማሟላት የሚያፈልግ ይመስለኛል። ” የሚል ማብራሪያ ሰጥተዋል፡፡

#TikvahEthiopiaFamilyAA

@tikvahethiopia