በአዲስ አበባ ዙሪያ ፤ ቤቶችን የማፍረስ እንቅስቃሴ ካለባቸው አካባቢዎች መካከል " አለም ገና ዳለቲ " ተጠቃሽ ነው።

ከላይ በአፋን ኦሮሞ የተያያዘው መልዕክት ከሰሞኑን አለም ገና ዳለቲ የተላለፈ ሲሆን መልዕክቱ ፤

" ጥር 24 ቀን 2005 በወጣው የሊዝ ውል መሠረት ከዚህ አመት በኋላ የሚገነቡ ግንባታዎች ሕገወጥ ስለሆኑ ማስረጃ ያላችሁ ሰዎች ማስረጃችሁን በ3 (ሶስት) ቀናት ውስጥ እንድታቀርቡ  ያሌላችሁ ደግሞ ንብረታችሁን እንድታነሱ በአክብሮት እንጠይቃለን። " የሚል ነው።

@tikvahethiopia

በአዲስ አበባ ዙሪያ ባሉ አካባቢዎች በዘመቻ መልክ ቤቶች እየፈረሱ ይገኛሉ።

የመንግስት አካል እነዚህ ቤቶች እያፈረሰ ሚገኘው ፤  " ህገወጥ ቤቶች ናቸው " በሚል እንደሆነ ተሰምቷል። በተለያዩ አካባቢዎች በ3 ቀን ለቃችሁ ውጡ የሚል መልዕክትም መለጠፉን ተመልክተናል።

ነዋሪዎች በበኩላቸው ፤ ለረጅም ያህል ጊዜ የኖሩበት ቤት እየፈረሰ መሆኑን ገለፀው ልጆቻቸው ሜዳ ላይ በመውደቃቸው መፍትሄ እንዲፈለግላቸው ተማፅነዋል።

ከሰሞኑን በለቡ ባቡር ጣቢያ በነበረ ቤት የማፍረስ እርምጃ ወቅት ደግሞ ነዋሪዎች ቤቱ አይፈርስም በማለት ባሰሙት ተቃውሞና በተከሰተ ግጭት በሰው ላይ ጉዳት ደርሶ እንደነበር ተሰምቷል።

ቤት ፈረሰብን ካሉት መካከል ቤቱን ከዓመታት በፊት ከገበሬ ላይ እንደገዙ ፤ ከ2005 በፊት ለተሰሩት ቤቶችም የቤት ቁጥር ሲሰጥ እንደነበር ፤ " ህጋዊ ካርታ ይሰጣችኃል ጠብቁ " የተባሉም እንደነበሩ አመልክተዋል።

ቤቶች እየፈረሰባቸው ናቸው ከተባሉበት አካባቢዎች አንዱ በሆነው  " ዓለም ባንክ " አካባቢ የቲክቫህ ቤተሰብ አባላት በአካል ሄደው ሁኔታውን ለመመለከት ችለዋል።

ቤታቸው የፈረሰባቸው በርካታ ዜጎች ሜዳ ላይ በአንድ ስፍራ ተሰባስበዋል ፤ ነዋሪዎቹ አዳራቸውን በዛው እንዳደረጉም ገልፀዋል። ቤቶች በሚፈርስበት ወቅት ጉዳት መድረሱንና ተኩስም እንደነበር ጠቁመዋል።

የቲክቫህ ኢትዮጵያ የቤተሰብ አባላት ፤ በስፍራው ላይ በተገኙበት ወቅት የፀጥታ ኃይሎችን ተመልክተዋል ፤ ቤታቸው የፈረሰባቸው ግለሠቦችም " ከአካባቢው እንዲበተኑ " መልዕክት ሲያስተላለፍ ነበር።

አንድ ቤቱ የፈረሰበት ግለሰብ እሱን ጨምሮ ልጆቹና ባለቤቱ እንዲሁም ሌሎችም አዳራቸውን ውጭ (ሜዳ ላይ) ማደርጋቸውን ገልጾ ፤ በርካቶችም መጠጊያ ይሆነናል ወዳሉት ቤተዘመድ ምሽቱን ሲጓዙ እንደነበር ገልጿል።

በስፍራው ላይ ተሰብስበው የነበሩት ዜጎች መፍትሄ ይፈለግላቸው ዘንድ ጥያቄ ሲያቀርቡ የነበረ ሲሆን 10 ዓመት ለሚጠጋ ጊዜ የኖሩበት ቤት እንዲፈርስ የተደረገባቸውም አሉ።

" ህገወጥ ቤቶች ፈርሶባቸዋል የተባሉ አካባቢዎች ህጋዊ ካርታ፣  መብራት፣ ውሃ የሌላቸው ናቸው " ሲሉ ደግሞ በወቅቱ ስፍርው ላይ የነበሩ አንድ የመንግስት አካል ነግረውናል። እነዚህ ቤቶች ላይ እየተወሰደ ያለው እርምጃ ህግን የማስከበር ብቻ ነው ከሌላ ከምንም ጉዳይ ጋር የሚያያዝ አይደለም ሲሉ ገልጸዋል።

" አሁን እየተወሰደ ያለው እርምጃ ወቅቱን ያገናዘበ አይደለም ፤ እነዚህ ዜጎች ምንም መሄጃ የሌላቸውም ፣ በዚህ በበዓል ወቅት ይህ መደረጉ ፍፁም ህሊና ቢስነት ነው ፤ እርምጃም ከተወሰደ በኃላ መሄጃ ያጡትን ማብላት እና ውጭ ብርድ ላይ እንዲያደርጉ ከማድረግ አንድ ቦታ ላይ እንዲጠለሉ ማድረግ ይገባ ነበር " ሲሉ አንድ ጉዳዩን ሲከታተሉ የነበሩ የአካባቢው ነዋሪ ተናግረዋል።

" ከህገወጥ ግንባታ ጋር በተያያዘም ከላይ እስከ ታች ያለው ሁሉም አካል ተጠናቂ መሆን ይገባዋል ይህ ሲደረግ ነው ህግ ተከበረ የሚባለው ፤ ይህ ሁሉ ሰው እየተንገላታ እየተጎዳ በወቅቱ ይህን ሲመለከቱ የነበሩ እና በይሁንታ ያለፉ አካላት ሁሉ ከህግ ተጠናቂነት ማለፍ የለባቸውም ሲል አክሏል።

ከላይ ከተጠቀሱት አካባቢዎች ባለፈ በተለያዩ የአዲስ አበባ ዙሪያ አካባቢዎች ቤቶች እየፈረሱ እንደሆነ እየተሰማ ሲሆን እስካሁን ስለጉዳዩ ለህዝብ ማብራሪያ የሰጠ አካል የለም።

@tikvahethiopia