#USA #Somalia

አሜሪካ ዳግም ወታደሮቿን በሶማሊያ ልታሰማራ ነው።

ፕሬዝዳንት ጆ ባይደን የአሜሪካ ወታደሮች እንደገና ወደ ጎረቤታችን ሶማሊያ እንዲሰማሩ ፈቃድ መስጠታቸው ተሰምቷል።

ይህ የጆ ባይደን ውሳኔ የቀድሞው ፕሬዝዳንት ዶናልድ ትራምፕ 700 የሚጠጉ ሶማሊያ ውስጥ ሰፍረው የነበሩ ሁሉም ወታደሮቻቸው አገሪቱን ለቀው እንዲወጡ ያደረጉበትን እርምጃ የሚቀለብስ ነው።

አሁን ፕሬዝዳንት ጆ ባይደን ምን ያህል ወታደሮች ወደ ሶማሊያ እንደሚያሰማሩ ባይታወቅም፣ ነገር ግን ወታደሮቹ የልዩ ተልዕኮ ኃይል አባላት እና እዚያው ሶማሊያ ውስጥ የሚሰፍሩ እንደሚሆኑ ተገልጿል።

ፕሬዝዳንት ባይደን የአሜሪካ ሠራዊት አባላት ዳግም ሶማሊያ ውስጥ እንዲሰማሩ ከመፍቀዳቸው ባሻገር፣ በርካታ ቁጥር ያላቸው ተጠርጣሪ የአልሸባብ መሪዎችን ኢላማ ያደረገ ዕቅድ ማጽደቃቸው ተነግሯል።

ይህ የፕሬዝዳንቱ ውሳኔ አሜሪካ ሠራዊቷን ከአፍጋኒስታን ካስወጣች በኋላ ጥያቄ ውስጥ ገብቶ የነበረውን የፀረ ሽብርተኝነት ዘመቻን መልሶ እንዲያንሰራራ የሚያደርግ ነው ተብሏል።

የአሜሪካ ሰራዊቷን ወደ ሶማሊያ እንደምታሰማራ የተሰማው ትላንት የሶማሊያ ፕሬዚዳንታዊ ምርጫ ተካሂዶ ሀሰን ሼክ ሞሐመድ ማሸነፋቸው ከታወቀ በኃላ ነው።

መረጃው የቢቢሲ ነው።

@tikvahethiopia

#Somalia #USA

አዲሱ የሶማሊያ ፕሬዝዳንት ሀሰን ሼክ ሞሐመድ ፤ የአሜሪካን ጦር ወደ ሶማሊያ መልሶ ለማሰማራት የአሜሪካው ፕሬዝዳንት ጆ ባይደን ያሳለፉትን ውሳኔ በደስታ ተቀብለዋል።

ምንጭ፦ ጋዜጠኛ ሀሩን ማሩፍ (ቪኦኤ)

@tikvahethiopia

#Somalia

አዲሱ የሶማሊያ ፕሬዚዳንት ሀሰን ሼክ ሞሀመድ በዓለ ሲመታቸው ይከናወናል።

ለዚህም በዓለ ሲመት የተለያዩ ሀገራት መሪዎች ወደ ሶማሊያ ሞቃዲሾ በመግባት ላይ ይገኛሉ።

ዛሬ የኢትዮጵያ ጠቅላይ ሚኒስትር ዶ/ር ዐቢይ አሕመድ ከልዑካቸው ጋር ሞቃዲሾ ገብተዋል።

በጠ/ሚ ዶ/ር ዐቢይ በተመራው የልዑካን ቡድን የብልጽግና ፓርቲ ምክትል ፕሬዚዳንት አደም ፋራህ፣ የገንዘብ ሚኒስትሩ አህመድ ሽዴ፣ የጠቅላይ ሚኒስትሩ የብሔራዊ ደህንነት አማካሪ ሚኒስትር አምባሳደር ሬድዋን ሁሴን እና የሶማሌ ክልል ርዕሰ መስተዳድር ሙስጠፌ መሀመድ ይገኙበታል።

ዶ/ር ዐቢይ ዛሬ ሞቃዲሾ ከገቡ በኃላ ከፕሬዚዳንት ሀሰን ሼክ ሞሀመድ ጋር መገናኘታቸውን የሶማሊያ ዜና ምንጮች ዘግበዋል።

ጠቅላይ ሚኒስትሩ ሶማሊያ በሚኖራቸው ቆይታ በፕሬዝደንት ሀሰን ሼክ ሞሀመድ በዓለ ሲመት ላይ ንግግር እንደሚያርጉ ፤ በተጨማሪም በበዓለ ሲመቱ ከሚታደሙ ከሌሎች የሀገራት መሪዎች ጋር የሁለትሽ ምክክር እንደሚያደርጉ ተሰምቷል።

ፎቶ ፡ Ahmed K Kosar / Somali Guardian

@tikvahethiopia

#Somalia

የግብፁ " Banque Misr " እና የቱርኪዬ " Ziraat Katilim " ባንኮች ሶማሊያ ውስጥ እንዲሰሩ ፍቃድ ፀደቀላቸው።

ጎረቤት ሶማሊያ ለግብፅ እና ቱርኪዬ ባንኮች የስራ ፍቃድ አፅድቃለች።

የሶማሊያ ማዕከላዊ ባንክ ቦርድ ትላንት ባካሄደው መደበኛ ስብሰባ መስፈርት አሟልተው ለተገኙት ሁለት ዓለም አቀፍ ባንኮች በሀገሪቱ ውስጥ ቅርጫፎቻቸውን እንዲመሰርቱ እና እንዲንቀሳቀሱ ፍቃድ አፅድቋል።

ፍቃዱ ረጅም ወራት ከወሰደ ሂደት በኃላ ነው የፀደቀው።

ፍቃድ የፀደቀላቸው ባንኮች የግብፁ " Banque Misr " እና የቱርኩ " Ziraat Katilim " ሲሆኑ በሶማሊያ የፋይናንስ ሴክተር እና በሀገሪቱ የኢኮኖሚ እድገት ላይ ትልቅ አስተዋጽኦ እንደሚኖራቸው ፍቃዱን ያፀደቀው CBS ገልጿል።

ሁለቱ ባንኮች ሶማሊያ ውስጥ እንዲሰሩ ፍቃድ ያገኙ #የመጀመሪያዎቹ ዓለም አቀፍ ባንኮች ሆነው ተመዝገበዋል።

@tikvahethiopia

#Somalia #SW

ሀሰን ኢብራሂም ሉግቡር ተገደሉ።

የሶማሊያ ደቡብ ምዕራብ ክልል ፍትህ ሚኒስትር ሀሰን ኢብራሂም ሉግቡር በባይዶዋ ከነ ልጃቸው በአጥፍቶ ጠፊ የቦንብ ጥቃት ተገደሉ።

ሚኒስትሩ የተገደሉት ዛሬ ዓርብ ዕለት ከመስጂድ ሲወጡ በተፈፀመ ጥቃት ነው።

በጥቃቱ ሌሎች 11 ሰዎችም ጉዳት የደረሰባቸው ሲሆን ለጥቃቱ ኃላፊነት የወሰደ አካል የለም።

የደቡብ ምዕራብ ክልል ፕሬዜዳንት አብዲአዚዝ ሀሰን ሞሀመድ ግድያውንና ጥቃቱን አውግዘው ከጥቃቱ ጀርባ የአልሸባብ የሽብር ቡድን መኖሩን አመልክተዋል።

ይህ ጥቃት በያዝነው ወር እኤአ በቀን 27 በታችኛው ሸበል ክልል የማርካ ወረዳ አስተዳዳሪ አብዱላሂ አሊ ዋፎውን ጨምሮ ከ10 በላይ ሰዎችን ከገደለው የአጥፍቶ ጠፊ ጥቃት እንዲሁም በአፍጎዬ ከተማ ፍንዳታ ተከስቶ ቢያንስ አራት ሰዎች ሲሞቱ በርካቶች ከቆሰሉበት ጥቃት ከቀናት በኃላ የተፈፀመ ነው።

በሌላ በኩል፤ የአልሸባብ የሽብር ቡድን ዛሬ #ከኢትዮጵያ ጋር በምትዋሰነው የሶማሊያዋ የድንበር ከተማ " አቶ " ላይ ለሁለተኛ ጊዜ ጥቃት ከፍቶ እንደነበር ቢቢሲ ሶማልኛ ዘግቧል።

አንድ ስማቸው እንዲገለፅ ያልወደዱ የሶማሌ ክልል ባለሥልጣን በሰጡት ቃል ፤ የሽብር ቡድኑ አቶ ላይ በ2 ሳምንት ውስጥ ለ2ኛ ጊዜ ጥቃት መሰንዘሩን ይህን ተከትሎ ውጊያ መካሄዱን አመልክተዋል።

ዛሬ ወደ አቶ ዘልቆ ጥቃት የመፈጸም ዓላማ የነበረው የአልሻባብ ታጣቂ ኃይል፤ ያሰበው ሳይሳካ #ሽንፈት እንዳጋጠመው ተናግረዋል።

በፀጥታ ኃይሎችም በኩል ጉዳት መድረሱን ያመለከቱት ባለስልጣኑ ለጊዜው ዝርዝር መናገር አልችልም ብለዋል።

አልሸባብ ከጥቂት ቀናት በፊት ኢትዮጵያን ለመዳፈር ሞክሮ በሶማሌ ልዩ ኃይል ክፉኛ መመታቱ አይዘነጋም። አሁንም በድንበር የተጠናከረ ጥበቃ መኖሩን ለማወቅ ችለናል።

@tikvahethiopia

#Somalia

የአልሸባብ ታጣቂዎች ተገደሉ።

ዛሬ ቅዳሜ በሶማሊያ ቤይ ክልል ባርዳሌ ወረዳ ስር በሚገኘው " ቶስዌይን መንደር " አቅራቢያ የአልሸባብ ታጣቂዎች ተገድለዋል።

የሶማሌ ብሄራዊ ጦርና የሶማሊያ ደቡብ ምዕራብ ግዛት የክልል ጦር በአልሸባብ አሸባሪዎች ላይ ባካሄደው የማጥቃት እርምጃ ሶስት የቡድኑ ታጣቂዎች መገደላቸውን የሶማሊያ ብሄራዊ ቴሌቪዥን ጣቢያ ዘግቧል።

@tikvahethiopia

#US #SOMALIA

አሜሪካ ትላንትና ማክሰኞ ፤ ከሶማሊያ መንግስት ጋር በመተባበር በፈፀመችው የአየር ድብደባ 4 የአልሸባብ የሽብር ቡድን አባላትን መግደሏን አሳውቃለች።

የአልሸባብ ታጣቂዎች የሶማሊያ ጦር ላይ በቤልድዌይኔ ጥቃት የከፈቱ ሲሆን ይህን ተከትሎ የአሜሪካ ጦር በአየር በፈፀመው ድብደባ 4 የቡድኑን አባላት መግደሉ ተገልጿል።

አሜሪካ እርምጃው በሶማሊያ መንግስት በኩል ፍቃድ ኖሮት መፈፀሙን አሳውቃለች።

በጥቃቱ በሲቪል ሰዎች ላይ ጉዳት እንዳልደረሰ / ሲቪሎች እንዳልተገደሉ ተመላክቷል።

@tikvahethiopia

#Somalia

የጎረቤት ሶማሊያ ብሄራዊ ጦር በሂራን ክልል እያካሄደ ባለው የፀረ ሽብር ዘመቻ ትላንት በማሃስ አውራጃ መሀመድ ወህሊዬ ዋሱጌን የተባለ የአልሸባብ ቡድን ቀደኛ ሰው ጨምሮ 14 ታጣቂዎችን መግደሉን የሶማሊያ ብሄራዊ ቴሌቪዥን ጣቢያ ዘግቧል።

በተጨማሪ የተለያዩ የጦር መሳሪያዎች በጦሩ ተይዘዋል።

አሜሪካ ደግሞ የአየር ላይ ጥቃት በመፈፀም የሽብር ቡድኑ ታጣቂዎችን መደበቂያ ማውደሟ ተገልጿል።

አሜሪካ የአየር ድብደባ የፈፀመችው የፀረሽብር ኦፕሬሽን እያካሄደ የሚገኘውን የሶማሊያ ብሄራዊ ጦርን ለመደገፍ ነው።

ከቀናት በፊት አሜሪካ በሶማሊያ መንግስት ጥያቄ የአየር ጥቃት መፈፀም መጀመሯን መነገሩ አይዘነጋም።

@tikvahethiopia

#Somalia

" ... የሶማሊያ ህዝብ ማብቂያ በሌለው የሀዘን መግለጫ እና ሀዘን መሰላቸቱን አውቃለሁ " - ሀሰን ሼክ ሞሐመድ

የጎረቤት ሀገር ሶማሊያ ፕሬዝዳንት ሀሰን ሼክ ሞሐመድ " አልሸባብ " ን ለማጥፋት ሁሉን አቀፍ ጦርነት ለመክፈት ቃል ገቡ።

ፕሬዝዳንቱ ስልጣን ከያዙ ወዲህ ለመጀመሪያ ጊዜ ባወጡት መግለጫ የሶማሊያ ህዝብ የሰላም ጠላት በሆኑት ጨካኞች ላይ ለሚካሄድ አጠቃላይ ጦርነት ይዘጋጅ ሲሉ ጥሪ አቅርበዋል።

" የሶማሊያ ህዝብ ማብቂያ በሌለው የሀዘን መግለጫና ሀዘን መሰላቸቱን አውቃለሁ " ያሉት ፕሬዝዳንቱ አሸባሪው ቡድን በሚፈጽመው በእያንዳንዱ ግድያ እጅግ የተከበሩ ሰዎች እየሞቱ ነው ብለዋል።

ፕሬዝዳንቱ ስልጣን ከያዙ ወዲህ ከባድ ነው የተባለው የአልሸባብ ጥቃት ባለፈው አርብ ሞቃዲሾ በሚገኘው በ " ሃያት ሆቴል " ውስጥ ተፈፅሟል። በዚሁ ጥቃትም 21 ሰዎች ሲገደሉ ሌሎች 117 ቆስለዋል።

የሶማሊያ ጠ/ሚ ፣ የሀገር ውስጥ ጉዳይ እና የውጭ ጉዳይ ሚኒስትሮች የተገኙበትን የብሔራዊ የፀጥታ ኮሚቴ ስብሰባ ያካሄዱት ፕሬዝዳንት ሞሐመድ " ህዝባችንን የሚያጠፉት አሸባሪዎች የሚቆጣጠሯቸው አካባቢዎች ነጻ እስኪወጡ ድረስ ቡድኑን ለማዳከም ቆርጠን ተነስተናል " ብለዋል።

ይህንንም ፤ መንግሥታት ቅድሚያ የሚሰጠው ጉዳይ መሆኑን ገልፀው የእቅዱ ዝግጅትና አተገባበሩ እየተካሄደ መሆኑን ማስታወቃቸውን ዶቼ ቨለ ዘግቧል።

@tikvahethiopia

#Ethiopia #Somalia

" የፕሮግራሙ ይዘት የኢትዮጵያን መንግስት ፖሊሲ #የማይወክል ነው " - የውጭ ጉዳይ ሚኒስቴር

ትላንት በኢትዮጵያ ብሄራዊው ቴሌቪዥን ጣቢያ (Etv World) በእንግሊዝኛ ቋንቋ የተሰራጨ ፕሮግራም ከፍተኛ መነጋገሪያ ሆኗል።

ፕሮግራሙን ተመልክተው ቅሬታቸውን የገለፁ በርካቶች ሲሆኑ ፤ ፕሮግራሙን በተመለከተ የሶማሊያ ሚዲያዎች ሲቀባበሉት ውለዋል።

በEtv የእንግሊዝኛው የተረጋገጠ የፌስቡክ ገፅ ላይ አሁን ድረስ ያለው ይኸው ፕሮግራም ስለ ሱማሊያ የተለያዩ የሚያነሳ ሲሆን ከእነዚህም ውስጥ አንዱ አዲሱን ፕሬዜዳንት እና መንግስታቸውን የሚመለከት ነው።

ይህንን ፕሮግራም በተመለከተ ኢትዮጵያ ዛሬ ምሽት በውጭ ጉዳይ ሚኒስቴር በኩል አጭር መግለጫን አውጥታለች።

የኢፌዲሪ የውጭ ጉዳይ ሚኒስቴር ትላንት በ “Etv WORLD” ፕሮግራም ስለ ሶማሊያ ፌዴራላዊ ሪፐብሊክ በሚመለከት በቀረበው ፕሮግራም ላይ ትክክለኛ ያልሆነ ዘገባ መመልከቱን ገልጿል።

ሚኒስቴሩ ፤ የፕሮግራሙ ይዘት የኢትዮጵያን መንግስት ፖሊሲ የማይወክል እና ከሁለቱ ሀገራት ግንኙነት ጋር የማይጣጣም ነው ብሎታል።

@tikvahethiopia

#Somalia

የጎረቤት ሶማሊያ መንግስት በ " አልሸባብ " ላይ መጠነ ሰፊ ዘመቻ እያካሄደ ሲሆን በዚህ ዘመቻ በርካታ የቡድኑን ታጣቂዎች መግደል ጨምሮ ተይዘው የነበሩ ቦታዎችን ነፃ አድርጓል።

የሶማሊያ ብሄራዊ ጦር ከጉሪኤል ከተማ በስተምስራቅ 55 ኪሎ ሜትር ርቀት ላይ የምትገኘውን የ " ጃው " መንደር በአካባቢው ማህበረሰብ ድጋፍ ከአልሸባብ ነፃ ማድረጉ ተሰምቷል።

ጃው በጉሪኤል እና ኤልቡር መካከል ያለ ስልታዊ ቦታ መሆኑን የሀገሪቱ ብሄራዊ ቴሌቪዥን ጣቢያ ገልጿል። ከዚህ አካባቢ በፊት ባለፈው አርብ በተሰራ ኦፕሬሽን ሳጋልጌድ፣ ያሶማን እና አቦሬይ የሚባሉ አካባቢዎች ከአልሸባብ ነፃ ማድረግ ተችሏል።

በሌላ በኩል ፤ የሶማሊያ ብሄራዊ ጦር በአካባቢው ማህበረስብ እገዛ በሂራን ክልል በያሶማን መንደር አቅራቢያ በትናንትናው እለት ባካሄደው ዘመቻ 75 የአልሸባብ ታጣቂዎች መገደላቸው ተመላክቷል።

በአጠቃላይ በዚሁ ክልል እስካሁን በተካሄደ የፀረ ሽብር ዘመቻ ኦፕሬሽን 200 የቡድኑ ታጣቂዎች መገደላቸውና 30 መንደሮች ከአልሸባብ ነፃ መደረጋቸውን የሀገሪቱ ጦር አሳውቋል።

Photo Credit : SNTV

@tikvahethiopia

#Somalia #Ethiopia

የሶማሊያ ኘሬዝደንት ሃሰን ሼክ መሃሙድ በኢትዮጵያ ይፋዊ የስራ ጉብኝት ለማድረግ አዲስ አበባ ገብተዋል።

ኘሬዝደንት ሃሰን ሼክ መሃሙድ ቦሌ አለምአቀፍ አውሮፕላን ማረፊያ ሲደርሱ የኢፌዴሪ ጠ/ሚ ዶ/ር ዐብይ አህመድ እና ሌሎች ከፍተኛ የመንግስት ስራ ሃላፊዎች አቀባበል አድርገውላቸዋል።

ሃሰን ሼክ መሃሙድ በሚኖራቸው ቆይታ የሁለቱ ሃገራት እና ቀጠናዊ በሆኑ ጉዳዮች ዙሪያ ውይይት ይደረጋል ተብሎ እንደሚጠበቅ የውጭ ጉዳይ ሚኒስቴር አሳውቋል።

ፕሬዜዳንቱ ምርጫ አሸንፈው ወደ ስልጣን ከመጡ በኃላ በተለያዩ ሀገራት ይፋዊ የስራ ጉብኝት ያደረጉ ሲሆን አሁን ደግሞ ወደ ኢትዮጵያ መጥተዋል።

Photo Credit : የውጭ ጉዳይ ሚኒስቴር

@tikvahethiopia

#Somalia

ሶማሊያ የአልሸባብ ከፍተኛ መሪ መገደሉን ገለፀች።

የሶማሊያ መንግስት ለረጅም ጊዜ ሲያፈላልገው የነበረው የአልሸባብ ከፍተኛ መሪ አብዱላሂ ናዲር በሶማሊያ ብሄራዊ ጦር እና በዓለም አቀፍ የፀጥታና ደህንነት አጋሮች በተካሄደ ኦፕሬሽን መገደሉን የሀገሪቱ መንግስት አሳውቋል።

የአልሸባቡ ከፍተኛ መሪ የተገደለው በመካከለኛው ጁባ ክልል ሃራምካ መንደር መሆኑ ተገልጿል።

አብዱላሂ ናዲር ከአልሸባብ መስራቾች መካከል እና ከፍተኛ አመራሮች አንዱ ሲሆን ሞቱን ተከትሎ የሶማሊያ መንግስት " እሾሁ ከሶማሊያ ህዝብ ላይ ተወግዷል " ሲል ገልጿል።

ከዚህ ቀደም ይህንን ግለሰብ ላገኘው / ለጠቆመ 3 ሚሊዮን ዶላር እንደሚሰጥ ተገልጾ ነበር።

በሌላ በኩል ፤ የፕሬዜዳንት ሀሰን ሼክ ሞሀሙድ መንግስት በአልሸባብ ላይ እያካሄደ ያለውን መጠነ ሰፊ ዘመቻ የቀጠለ ሰሆን ባለፉት ሁለት ሳምንታት በሞቃዲሾ የአልሸባብ መረብ በፀጥታ ኃይሎች በተሳካ ሁኔታ መበጣጠሱን እና የቡድኑን አተባባሪዎች፣ ተላላኪዎች እንዲሁም 5 የሚደርሱ ተከራተውበት የነበሩ ቤቶችን በቁጥጥር ስር ማዋላቸው ተገልጿል።

ምንም እንኳን በአልሸባብ ላይ የተከፈታው ዘመቻ ተጠናክሮ ቢቀጥልም ከሰሞኑን የየሞቃዲሾ ፖሊስ ኮሚሽነር ፋርሃን ሞሐሙድ አዳን በአልሻባብ መንገድ ዳር በተጠመደ የቦንብ ፍንዳታ ተገድለዋል።

በአልሸባብ ላይ እየተካሄደ ካለው ዘመቻ ጋር በተያያዘ ትላንት የሱማሊያ ፕሬዝዳንት ሀሰን ሼክ ሞሃሙድ እያንዳንዱ ሱማሊያዊ አልሸባብ ለመዋጋት መሰለፍ አለበት ያሉ ሲሆን ከአልሸባብ ጋር በሚደረገው ፍልሚያ ገለልተኛ የሚባል አቋም ፈጽሞ ሊኖር አይችልም ብለዋል።

ፕሬዜዳንቱ ከቅርብ ጊዜ ወዲህ በርካታ ዜጎች ከአልሸባብ ጋር የሚደረገውን ውጊያ እየተቀላቀሉ መሆኑን አሳውቀዋል።

@tikvahethiopia