#Attention

ተጓዳኝ ሕመም የሌለባቸውና በዕድሜ ወጣት የሆኑ ሰዎች በኮቪድ-19 ሕይወታቸው እያለፈ መሆኑን በሚሊኒየም የኮቪድ19 ሕክምና ማዕከል ዋና ዳይሬክተር ዶ/ር ውለታው ጫኔ አስታወቁ።

ቫይረሱ በራሱ ተጨማሪ ተጓዳኝ የጤና ችግሮችን እንደሚያስከትል አሳስበዋል።

ዋና ዳይሬክተር ዶ/ር ውለታው ፤ "የኮቪድ 19 ቫይረስ ተጓዳኝ ህመም ያለባቸውንና በዕድሜ የገፉትን ብቻ ነው የሚያጠቃው የሚለው የተሳሳተ ግንዛቤ አሁንም በስፋት ይስተዋላል። እስከ ቅርብ ጊዜ ድረስ የታየው ግን የተጠቁት ተጓዳኝ ህመም የሌለባቸው በ30ዎቹ የዕድሜ ክልል ውስጥ ያሉ ጭምር ናቸው" ብለዋል።

ምንም ዓይነት ተጓዳኝ ህመም የሌለባቸውና በዕድሜ ወጣት የሆኑ ሰዎች በቫይረሱ ሕይወታቸው እያለፈ መሆኑን የጠቆሙት ዶክተሩ፣ ምናልባት በዕድሜ የገፉና ተጓዳኝ ህመም ያለባቸው ላይ የበለጠ ቢከፋም እየሞቱ ያሉት ግን በሁሉም የዕድሜ ክልል ውስጥ ያሉ ዜጎች መሆናቸውን ገልፀዋል።

አሁን ላይ ባለው ሁኔታ የጽኑ ህሙማን ታካሚዎችና በኮቪድ-19 ሕይወታቸው የሚያልፍ ወገኖች ቁጥር ጨምሯል። የማሽን ድጋፍና ኦክስጅን የሚያስፈልጋቸው ታካሚዎች ቁጥር ከዕለት ወደ ዕለት እያደገ መምጣቱን አስታውቀዋል።

እንደዶ/ር ውለታው ገለፃ፤ ከወራት በፊት 60 % የሚሆኑ ታካሚዎች ቶሎ አገግመው የሚወጡ ታካሚዎች ነበሩ፤አሁን ላይ ግን ከ50 በመቶ በላይ ያለው ታካሚ በፀና ታሞ የሚመጣ ነው። ይህም የሚያሳየው መዘናጋት መኖሩንና ከውጭ ተጎድተው መቆየታቸውን ነው።

ጥንቃቄ በጎደለ ቁጥር የቫይረሱ ዝውውር እየሰፋ እንደሚሄድ ያመለከቱት ዶክተሩ ከሰዎች ጋር ሳይገናኙ በቤት ውስጥ የቆዩ እናቶችና አባቶች መዘናጋት በመኖሩ ምክንያት በቫይረሱ የመጠቃት ዕድላቸው እየጨመረ መጥቷል። ይህም የሞት ቁጥር እንዲጨምር ማድረጉን አመልክተዋል።~ #EPA

@tikvahethiopia

የሀዋሳ ታቦር ተራራ በባለሃብቶች እንዲለማ ለማድረግ እየተሰራ ነው ተባለ።

የሀዋሳ ልዩ መለያ የሆነው 'ታቦር ተራራ' ባላሀብቶች መዋዕለ ነዋያቸውን የሚያፈሱበትና የኢንቨስትመንት የስበት አካል እንዲሆን እይተሰራ መሆኑን የከተማይቱ ም/ከንቲባ ረዳት ፕሮፌሰር ፀጋዬ ቱኬ ለኢትዮጵያ ፕሬስ ድርጅት ተናግረዋል።

ምክትል ከንቲባው፥ የታቦር ተራራ ባለሃብቶች እንዲያለሙትና "ገበታ ለሀገር" ፕሮጀክትን ሚስተካከል ልማት የሚከናወንበት ስፍራ እንዲሆን እየተሰራ መሆኑን አስረድተዋል።

ሀዋሳ የመላው ኢትዮጵውያን ከተማ ከመሆን አልፋ የቱሪስቶች መዳረሻ በመሆኗ ሰፊ የኢንቨስትመንት ሥራ በማከናወን ሀገርን ተጠቃሚ ማድረግ ይገባል ሲሉ ተናግረዋል።

ምክትል ከንቲባው፥ ታቦር ተራራን ጨምሮ በሃዋሳ አቅራቢያ የሚገኙ ሃብቶችን ሥራ ላይ የማዋል ብርቱ ጥረት መጀመሩን ጠቁመው በቀጣይ ዘርፈ ብዙ ስራዎች እንደሚከናወኑ ገልፀዋል። #EPA

@tikvahethiopia

'የNISS ጥቆማ መቀበያ 910 '

ዜጎች ማንኛውም አይነት ለሀገርና ህዝቦች ሰላምና መረጋጋት እንቅፋት የሚሆኑና ከሀገራዊ ምርጫው ጋር በተያያዘ የደህንነት ስጋት ሊፈጥሩ የሚችሉ አጠራጣሪ ሁኔታዎችን በአቅራቢያቸው ሲመለከቱ ለብሔራዊ መረጃና ደህንነት አገልግሎት አጭር የጥቆማ መስጪያ ቁጥር " 910 " በመጠቀም ጥቆማ መስጠት እንደሚችሉ ተገልጿል።

#EPA

@tikvahethiopia

#ATTENTION

" በቦረና ዞን የተከሰተው ድርቅ ወደ ምሥራቅ ባሌ ዞን እየተስፋፋ ነው " - የኦሮሚያ አደጋ ስጋትና የተነሽዎች ልማት ኮሚሽን

በቦረና ዞን የተከሰተዉ ድርቅ ወደ ምሥራቅ ባሌ ዞን እየተስፋፋ በመሆኑ ቀጣይነት ያለዉ ድጋፍ እንደሚያስፈልግ የኦሮሚያ አደጋ ስጋትና የተነሽዎች ልማት ኮሚሽን አስታወቀ።

የኦሮሚያ አደጋ ስጋትና ተነሽዎች ልማት ኮሚሽን ምክትል ኮሚሺነር ገረሙ ኦሊቃ ለኢፕድ በሰጡት ቃል ፤ ቶሎ መፍትሔ ካልተበጀለት በስተቀር በቦረና ዞን የተከሰተዉ ድርቅ በተመሳሳይ ሁኔታ ወደ ምሥራቅ ባሌ ዞንና ሌሎች ኦሮሚያ ዞኖች እየተስፋፋ ነው።

በቦረና ዞን የተከሰተዉ ድርቅ በመንግሥት፣ በባለሀብቱና በኀብረተሰቡ በተደረገዉ ጥረት በሰዉ ሕይወት ላይ ጉዳት ሳያደርስ መከላከል ተችሏል ብለዋል።

እንደ ምክትል ኮሚሽነሩ ገለጻ፤ ምዕራብና ምሥራቅ ጉጂ፣ ምዕራብ ሀረርጌና ምሥራቅ ባሌ ዞኖች በቅርቡ ድርቅ ከታየባቸዉ አካባቢዎች ዉስጥ ይጠቀሳሉ።

ችግሩን ለመፍታት የክልሉና ፌዴራል መንግሥት ባለሀብቱና ኅብረተሰቡ በተለመደ መልኩ ርብርብ እያደረጉ ይገኛሉ።

የምግብና ዉሃ ችግርን ለመቅረፍ 25 ሺህ 330 ኩንታል እህልና 38 ቦቴዎችን በማቅረብ ችግሩን ለመቀነስት ጥረት እየተደረገ ነዉ።

የክልሉ መንግሥት ችግሩን ለመቅረፍ ከያዘዉ መቶ ሚሊዮን ብር በተጨማሪ ድርቁ በተስፋፋባቸዉ አካባቢዎች ለምግብና ለዉሃ አቅርቦት የሚዉል ተጨማሪ በጀት መመደቡን ተናግረዋል።

ችግሩ ሰፊና ዉስብስብ በመሆኑ በመንግሥት ብቻ የሚፈታ ባለመሆኑ ሌሎች አካላትም ድጋፋቸውን እንዲያጠናክሩ ጥሪ አቅርበዋል።

#EPA

@tikvahethiopia

#ቅዱስ_ገብርኤል

• " ምንም የጸጥታ ስጋት አይኖርም " - የኦሮሚያ ክልል ሰላም እና ፀጥታ ቢሮ

• " የሀዋሳ ሰላም በአስተማማኝ ሁኔታ ላይ ነው ያለው " - የሀዋሳ ፖሊስ መምሪያ

ነገ የሚከበረውን የቅዱስ ገብርኤል ንግስ በዓል በሰላም እንዲጠናቀቅ በቂ ዝግጅት ማድረጋቸውን የኦሮሚያ ክልል ሰላም እና ጸጥታ ቢሮ እና የሀዋሳ ከተማ ፖሊስ መምሪያ አሳውቀዋል።

በዓሉ በተለይ በቁልቢ ቅዱስ ገብርኤል ከተለያዩ ቦታዎች የሚመጡ በርካታ እንግዶች የሚታደሙበት እንደመሆኑ ያለምንም የጸጥታ ስጋት እንዲጠናቀቅ አስፈላጊው ዝግጅት መደረጉን የኦሮሚያ ክልል ሰላም እና ፀጥታ ቢሮ አስታውቋል።

ቢሮው እንደ ክልል በቂ ዝግጅት በመደረጉ ምንም የጸጥታ ስጋት አይኖርም ብሏል።

የሀዋሳ ከተማ ፖሊስ በበኩኑ የቅዱስ ገብርኤል በዓል በከፍተኛ ድምቀት በሚከበርባት ሀዋሳ በዓሉ በሰላም እንዲጠናቀቅ ዝግጅት ተጠናቋል ሲል አሳውቋል።

የከተማው ሰላም በአስተማማኝ ሁኔታ ላይ መሆኑንም አረጋግጧል።

በአሁኑ ወቅት ኅብረተሰቡ አካባቢውን በመጠበቅ እና መረጃ በመለዋወጥ ትልቅ ተሳትፎ እያደረገ መሆኑን ፖሊስ ገልጿል።

ከዚህ በተጨናሪ በጠ/ሚኒ ዐቢይ አሕመድ ጥሪ ከውጭ አገራት የሚመጡትን እንግዶችን ለመቀበል ዝግጅት መደረጉን ሀዋሳ ፖሊስ አሳውቋል።

የእንግዶችን ሰላም ለማስጠበቅ የጸጥታ ኃይሎች አስተማማኝ ዝግጅት ማድረጋቸው ተጠቁሟል። እንግዶች ምንም ዓይነት የጸጥታ ስጋት ሊኖራቸው አይገባም ተብሏል።

ነጋዴዎች በተለይ ሆቴሎች አላስፈላጊ የዋጋ ጭማሪ እንዳያደርጉ ጠንካራ ቁጥጥር እንደሚደረግ እና የትራፊክ መጨናነቅ እንዳይፈጠር ለእንግዶች መኪና ማቆሚያ እንደተዘጋጀ የሀዋሳ ፖሊስ አሳውቋል።

#Kulubi #Hawassa #EPA

@tikvahethiopia

#ከፍተኛ_የደም_እጥረት_ተከስቷል !

በብሔራዊ ደም ባንክ አገልግሎት የደም ለጋሾች ዘርፍ አገልግሎት ዳይሬክተር ዶክተር ተመሥገን አበጀ ፦

" በአገሪቱ ያሉት የሁለቱ ትላልቅ ሃይማኖቶች ተከታዮች ፆም ላይ መሆናቸውን ተከትሎ በመላ አገሪቱ ከፍተኛ የደም እጥረት ተከስቷል።

በአገሪቱ ያለውም የመጠባበቂያ ደም ክምችት ከ5 ቀናት የማይበልጥ ነው።

በአገር ደረጃ ሲታይ ከፆም በፊት በዚህ ዓመት የነበረው የደም ክምችት አመርቂ የሆነበት ዓመት ነበር ብሎ መውሰድ ይቻላል።

የዐቢይና ረመዷን አፁዋማት ከገቡ በኋላ የመደበኛ ደም ለጋሾችም ሆነ ሌሎች ለጋሾች ቁጥር አሽቆልቁሏል።

ይህም የደም ክምችት ላይ ከፍተኛ እጥረት እንዲፈጠር አድርጓል።

በተለይ እንደ ፕላትሌት የደም ተዋፅዖ እና ‘ኦ’ የደም ዓይነት ክምችቶች እጥረት አሳሳቢ ደረጃ ላይ ደርሷል።

ፕላትሌት የሚባለው የደም ተዋፅዖ ለካንሰር ታማሚዎች እና የደም መፍሰስ ችግር ላለባቸው ታካሚዎች የሚሰጥ የደም ዓይነት ነው፤ ክምችቱ ለአንድ ቀን ብቻ ሲሆን ‘ኦ' የተባለው የደም ዓይነትም በዛ ቢባል ለ2 ቀናት የሚሆን ክምችት ነው ያለው "

ያንብቡ : https://telegra.ph/EPA-04-19-2

#EPA

@tikvahethiopia

🤔

የግል ከፍተኛ ትምህርት ተቋማት ፍቃደኛ አለመሆን የሐሰተኛ የትምህርት ማስረጃዎችን ለማጣራት እያደረግኩት ባለው ጥረት ላይ እንቅፋት ሆኖብኛል ሲል የደቡብ ምዕራብ ኢትዮጵያ ሕዝቦች ክልል ፐብሊክ ሰርቪስና የሰው ሀብት ልማት ቢሮ ማስታወቁን የኢትዮጵያ ፕሬስ ድርጅት አስነብቧል።

የቢሮ ኃላፊ አቶ አሥራት አዳሮ ለኢፕድ በሰጡት ቃል ፦

" በክልሉ ውስጥ ተቀጥረው የሚሠሩ #ባለሙያዎችንና #ኃላፊዎችን የትምህርት ማስረጃዎቻቸውን በመያዝ ትምህርታቸውን ባጠናቀቁበት ኮሌጆችና ዩኒቨርሲቲዎች ድረስ በመሄድ ማስረጃዎቹ ሐሰተኛ ናቸው ወይስ አይደሉም የሚለውን ለማጣራት ሙከራ ብናደርግም የግል ትምህርት ተቋማት ፈቃደኞች አይደሉም፡፡

ከ5 እና 6 ወር በኋላ ተመልሳችሁ ኑ የሚል ምላሽ ስለሚሰጡን ወደ ትምህርት ተቋማቱ የምንልካቸው ባለሙያዎች ለእንግልት እየተዳረጉ ነው።

ሐሰተኛ የትምህርት ማስረጃ የትምህርት ጥራትን ከመጉዳትም ባሻገር የተማረ የሰው ኃይል በተፈለገው ቦታ ላይ እንዳይሠራና ጥራት ያለው አገልግሎት ለኅብረተሰቡ እንዳይሰጥ የሚያደርግ ነው።

በሐሰተኛ የትምህርት ማስረጃዎች ተቀጥረው በሥራ ላይ በሚገኙ #አመራርና #ባለሙያዎች ሕዝቡ ትክክለኛ አገልግሎት እንዳያገኝ ሲያደርጉ ነበር ፤ ክልሉ የሠራተኞችና የሥራ ኃላፊዎች የትምህርት መረጃን አጣርቶ በሚያገኘው ውጤት መሠረት ከሥራ እና ከደመወዝ ከማገድ ባሻገር በሕግ እንዲጠየቁ ይደረጋል።

የማጣራቱን ውጤት ከአንድ ሳምንት ባነሰ ጊዜ ውስጥ ከ6ቱም ዞኖች የተጠቃለሉ መረጃዎችን በማደራጀት ምን ያህል አመራርና ባለሙያ በሐሰተኛ ትምህርት ማስረጃ ተቀጥሮ ሲሠራ እንደነበር ለሕዝቡ ይፋ ይደረጋል።  "

#EPA

@tikvahethiopia

#MoE

106 ሺህ ተማሪዎች ለመጀመሪያ ጊዜ በሚሰጠው የአቅም ማሻሻያ የትምህርት ፕሮግራም ተካተዋል፡፡

በ2014 ትምህርት ዘመን የ12ኛ ክፍል ማጠቃለያ ፈተና ወስደው #ከ50_በመቶ በታች ውጤት ያስመዘገቡ ተማሪዎች ለአራት ወራት ያህል በሀገሪቱ በሚገኙ ዩኒቨርሲቲዎች በሚሰጠው የአቅም ማሻሻያ ፕሮግራም ይሳተፋሉ፡፡

የ #Remedial ፕሮግራሙ ከአ/አ ዩኒቨርሲቲ፣ ከአ/አ ሳይንስና ቴክኖሎጂ ዩኒቨርሲቲ እንዲሁም ከአዳማ ሳይንስና ቴክኖሎጂ ዩኒቨርሲቲ ውጪ ባሉ ሁሉም የመንግስት እና የግል ዩኒቨርሲቲዎች ይሰጣል፡፡

ትምህርት ሚኒስቴር ከዩኒቨርሲቲዎች የተውጣጡ ባለሙያዎች እና ፕሮፌሰሮች ኮሚቴ በማዋቀር ከ9ኛ እስከ 12ኛ ክፍል ያሉት የትምህርት አይነት ይዘቶችን መለየቱን በሚኒስቴሩ የአካዳሚክ ጉዳዮች መሪ ሥራ አስፈጻሚ ኤባ ሚጀና (ዶ/ር) ለኢፕድ ተናግረዋል፡፡

በአቅም ማሻሻያ ፕሮግራሙ የተፈጥሮ ሳይንስ ተማሪዎች ፊዚክስ፣ ባዮሎጂ፣ ኬሚስትሪ፣ እንግሊዘኛ፣ የተፈጥሮ ሳይንስና ሂሳብ የትምህርት አይነቶችን የሚወስዱ ሲሆን፤ የማህበራዊ ሳይንስ ተማሪዎች ታሪክ፣ ጂኦግራፊ፣ እንግሊዘኛ፣ ማህበራዊ ሳይንስና ሂሳብ ትምህርት አይነቶችን እንደሚወስዱ መሪ ሥራ አስፈጻሚው ገልጸዋል፡፡

የትምህርት ይዘቶቹን መሰረት አድርጎ በተቋማት የሚዘጋጅ (ከ30 በመቶ) እና በማዕከል የሚዘጋጅ (ከ70 በመቶ) የሚያዝ ፈተና በመፈተን በድምሩ 50 በመቶ እና ከዚያ በላይ የሚያገኙ ተማሪዎች መደበኛ የዩኒቨርሲቲ ትምህርታቸውን በመንግስት እና በግል ዩኒቨርሲቲዎች መቀጠል ይችላሉ ብለዋል፡፡ #EPA

More : @tikvahuniversity

የሰራዊቱ ተሽከርካሪዎች ሰሌዳ እየተቀየረ መሆኑ ተነግሯል።

የሀገር መከላከያ ሚኒስቴር አዲስ የተሸከርካሪ ሰሌዳ በማዘጋጀት በአገልግሎት ላይ እያዋለ መሆኑን አሳውቋል።

ሰራዊቱ ከዚህ ቀደም ሲጠቀምበት የነበረውን የተሸከርካሪ ሰሌዳ በአዲስ ሠሌዳ የቀየረ ሲሆን ከነሃሴ 25 ቀን 2015 ዓ.ም ጀምሮ ተሸከርካሪዎች ላይ በመለጠፍ አገልግሎት መጀመሩ ተገልጿል።

በአጭር ጊዜ ውስጥ ለሁሉም የተቋሙ ተሸከርካሪዎች አዲስ ሰሌዳ እንደሚደርስ ይፋ ሆናል።

የሰሌዳ / ታርጋ ቅያሪ የተደረገው በተለያየ ምክንያት የተቋሙ በርካታ ሰሌዳዎች ከተቋሙ እውቅና ወጪ በሌሎች እጅ በመገኘቱ ነው ተብሏል።

በመሆንም እነዚህ ከተቋሙ እውቅና ውጭ በሌሎች እጅ የገቡ ሰሌዳዎች ለህገ-ወጥ ተግባር እንዳይውሉ ለመከላከል ታሳቢ ተደርጎ ሰሌዳው መቀሩን ሚኒስቴሩ አስረድቷል።

የተቀየሩት ሰሌዳዎች የሠራዊቱን ተልዕኮ እና ግዳጅ መነሻ አድርጎ በሚሰጡት አገልግሎት መሰረት #በኮድ ተለይተው የተዘጋጁ ናቸው ተብሏል። #EPA

@tikvahethiopia

#ICS

የሕዝብ ተ/ም/ቤት የሕግ እና ፍትህ ጉዳዮች ቋሚ ኮሚቴ ፤ የኢሚግሬሽንና ዜግነት አገልግሎትን የ9 ወር አፈጻጸም ትላንት ገምግሟል።

ኮሚቴው ከዚህ ግምገማ በፊት ማለትም ሚያዚያ 3/2016 ላይ #ድንገተኛ ምልከታ አድርጎ ነበር።

ቋሚ ኮሚቴው ምን አለ ?

- ምንም እንኳ የተጀመሩ ሥራዎች ጥሩና ተስፋ ሰጪ ቢሆኑም በአገልግሎት አሰጣጥ ላይ የሚታዩ ችግሮችን እና የተገልጋይን ቅሬታ መፍታት አልተቻለም።

- ተገልጋዮች አገልግሎት ለማግኘት ብለው በሚደርስባቸው እንግልትና ስቃይ ምክንያት በተቋሙ አገልግሎት አሰጣጥ ላይ ከፍተኛ ቅሬታ እንደሚያቀርቡ በድንገተኛ ምልከታ መመልከት ተችሏል።

- በዋና መ/ ቤቱ ተገልጋይ በተቋሙ ሠራተኞች ፦
➡️ #መሰደብ፣
➡️ #መመናጨቅ
➡️ #መገፍተር_ጭምር የሚደርስበት በመሆኑ ተገልጋይ በሥነ ምግባር መስተናገድ አለበት።

- በአዲስ አበባ " ካሳንቺስ አካባቢ " የሚገኘዉ የውጪ ዜጎች አገልግሎት ተቋም የሚሰጠው አገልግሎት ኢትዮጵያን የማይመጥን፣ ምቹ ያልሆነ እና የንጽህና ጉድለት ያለው ነው። ይህ መታረም አለበት።

- ዋናው መስሪያ ቤት ለአገልግሎት ምቹ ያልሆነ፣ ሕንፃው የቆየ እና አስፈላጊዉን የማሻሻያ ጥገና ያላገኘ ነው። ሕንፃው ከተቋሙ አገልግሎት አሰጣጥ ባህሪ ጋር የማይጣጣም ስሪት ያለው ነው።

- በዋና መስሪያ ቤት ያለው መጨናነቅ እንዲቀንስ በአዲስ አበባ ከተማ ከአምስት ያላነሱ ቅርንጫፍ ጽህፈት ቤቶች እንዲከፈቱ የመፍትሔ ሃሳብ ቢሰጥም አልተፈጸመም። በተለይ በአዲስ አበባ ቅርንጫፍ የማስፋፋት ሥራዎች መሠራት አለበት።

- የደላላ ሰንሰለት በመለየት ማቋረጥ ያስፈልጋል።

- አሁንም ከደላሎች ጋር የሚመሳጠሩ የተቋሙ #ሠራተኞች በመኖራቸው ትኩረት ሰጥቶ መሥራት አለበት።

- የሠራተኛ ባጅ አለመኖሩም ሊታሰብበት ይገባል።

በምክር ቤቱ የተገኙት የኢሚግሬሽን እና ዜግነት አገልግሎት ዋና ዳይሬክተር ወ/ሮ ሰላማዊት ዳዊት ለተነሱት ጉዳዮች ምላሽ ሰጥተዋል።

ያንብቡ ፦ https://telegra.ph/EPA-04-27-2 #EPA

@tikvahethiopia

#ለጥንቃቄ🚨

" ሰሞኑን የተከሰተው ጉንፋን መሰል በሽታ ለመከላከል ህብረተሰቡ ከፍተኛ ጥንቃቄ ማድረግ አለበት " - የአዲስ አበባ ጤና ቢሮ

ሰሞኑን በስፋት የሚስተዋለውን ጉንፋን መሰል በሽታ ለመከላከል ከፍተኛ ጥንቃቄ ማድረግ እንደሚገባ የአዲስ አበባ ጤና ቢሮ ገለጸ፡፡

ቢሮ ለኢፕድ እንደገለጸው " ከሰሞኑ በስፋት የተከሰተው የጉንፋን በሽታ የላይኛውን የመተንፈሻ የሰውነት ክፍሎች የሚያጠቃ ተላላፊ ሕመም ነው " ብሏል።

በሽታውን ለመከላከልና እንዳይስፋፋ ህብረተሰቡ ከፍተኛ ጥንቃቄ ሊያደርግ ይገባል ሲልም አሳስቧል።

የተከሰተው ጉንፋን መሰል በሽታ በዋነኝነት በተለይ የኢንፍሉዌንዛ ቫይረሶች አማካኝነት የሚከሰት መሆኑን ገልጾ የላይኛውን የመተንፈሻ የሰውነት ክፍሎች ማለትም ፦
- አፍንጫን፣
- ጉሮሮን
- የአየር መተላለፊያ ባንቧን እንደሚያጠቃ ቢሮው አመልክቷል።

ከወቅታዊው የቅዝቃዜና ደረቅ የአየር ፀባይ ጋር ተያይዞ ለቫይረሶች ምቹ የመራቢያ ወቅት በመሆኑ በስፋት የሚሰራጭ መሆኑ ተጠቅሷል።

ትምህርት ቤቶችና ክረምቱን ተከትሎ የሚዘጉ የሥራ ተቋማት በመከፈታቸው የሰዎች ግንኙነት ከመጨመሩ ጋር ተያይዞ ስርጭቱ የጨመረ መሆኑ ተመላክቷል።

° ሳል፣
° ትኩሳት፣
° ራስ ምታት፣
° ጉሮሮን መከርከር፣
° ማስነጠስ፣
° የአፍንጫ ፈሳሽ መብዛት፣
° ከፍተኛ ድካም፣
° ብርድ ብርድ ማለት፣
° የትንፋሽ ማጠር እና የምግብ ፍላጎት መቀነስ ዋና ዋናዎቹ ምልክቶች ናቸዉ ተብሏል።

ቫይረሱ በቀላሉ ከሰው ወደ ሰው የሚተላለፍ ሲሆን በቫይረሱ የተጠቃ ግለሰብ በሚያስልበት እና በሚያስነጥስበት ጊዜ ከሚወጡ ጠብታዎች  ጋር ንክኪ፣ ቫይረሱ ያረፈበትን ቁሳቁስ ንክኪ ማድረግ ዋነኛ መተላለፊያ መንገዶች ናቸው።

በመሆኑም ፦
🔴 የእጅና የቁሳቁስ ንጽህናን በመጠበቅ፣
🔴 ሰዎች በተሰበሰቡበት ቦታ የአፍና አፍንጫ ጭምብል በማድረግ፣
🔴 ስፖርታዊ እንቅስቃዜን ማዘወትር፣
🔴 መስኮቶችን በመክፈት በቂ የአየር ዝዉዉር እንዲኖር ማድረግ
🔴 በቂ የጸሀይ ብርሀን ማግኘትና አትክልትና ፍራፍሬ በመመገብ በሽታውን መከላከል እንደሚገባ ቢሮው ገልጿል።

በሽታው በሁሉም ሰው ላይ የሚከሰት ቢሆንም በተለይም እድሜያቸው ከ5 ዓመት በታች የሆኑ ህጻናት፣ አዛውንቶችና እና ተጓዳኝ በሽታ ያለባቸው ሰዎች ላይ የሚጠነክር በመሆኑም በትኩረት መከላከልና ከተያዙ አስፈላጊው ክትትልና የህክምና ድጋፍ ሊያገኙ ይገባል ሲል አሳስቧል።

በመከላከያ መንገዶች ላይ ትኩረት ማድረግ በሽታውን ከመከላከል ጀምሮ በህመሙ ከተያዙ በቤት ውስጥ ከሚደረጉ ክትትሎች እና ወደ ጤና ተቋም በመሄድ አስፈላጊውን ህክምና ማግኘት ይገባል ተብሏል።

#EPA

@tikvahethiopia