" የታሪፍ ማሻሻያው ተጠናቆ ይፋ እስኪሆን ቀደም ሲል በነበረው የታሪፍ ዋጋ አገልግሎቱ ይቀጥላል " - ትራንስፖርት ቢሮ

የህዝብ ትራንስፖርት አገልግሎት ሰጪዎች ላይ የታሪፍ መጠን እንደሚሻሻል የአዲስ አበባ ትራንስፖርት ቢሮ አስታወቀ።

የዓለም አቀፍ ነዳጅ ምርቶች መሸጫ ዋጋ እየጨመረ ከመምጣቱ ጋር ተያይዞ በታህሳስ ወር የነዳጅ ምርቶች የችርቻሮ መሸጫ ዋጋ ላይ አዲስ የዋጋ ማስተካከያ መደረጉ ይታወሳል።

ይህንን ተከትሎ በአዲስ አበባ ከተማ አስተዳደር የትራንስፖርት ቢሮ በህዝብ ትራንስፖርት አገልግሎት ላይ የታሪፍ ማሻሻያ ለማድረግ ጥናቱን በማጠናቀቅ ላይ ሲሆን፥ በቀጣይ ቀናት ይፋ ለማድረግ የቅድመ ዝግጅት ስራዎችን እያከናወነ ይገኛል፡፡

በመሆኑም የታሪፍ ማሻሻያው ተጠናቆ ይፋ እስኪሆን ቀደም ሲል በነበረው የታሪፍ ዋጋ አገልግሎቱ የሚሰጥ ይሆናል፡፡

በከተማዋ በህዝብ ትራንስፖርት አገልግሎት በመስጠት ላይ የሚገኙ አሽከርካሪዎችም የታሪፍ መጠኑ ይፋ ሳይሆን ምንም ዓይነት ዋጋ ባለመጨመር አገልግሎቱን በመስጠት ኃላፊነታቸውን እንዲወጡ ቢሮው አሳስቧል።

ምንጭ፦ በአዲስ አበባ ከተማ አስተዳደር የትራንስፖርት ቢሮ ኮሚዩኒኬሽን ጉዳዮች ዳይሬክቶሬት

@tikvahethiopia

" ኮምቦልቻና ደሴ ኤሌክትሪክ ዛሬ ማግኘት እንዲችሉ በርብርብ እንሰራለን "- የኢ.ኤ.ኃ. የጥገና ባለሙያዎች

በሸዋ ሮቢት - ኮምቦልቻ መስመር የተጎዳውን የኤሌክትሪክ መሰረተ ልማት የሚጠግነው የጥገና ቡድን አባላት የኮምቦልቻና ደሴ ከተሞች ዛሬ ኤሌክትሪክ ማግኘት እንዲችሉ በርብርብ እንሰራለን ብለዋል።

የጥገና ቡድኑ ትናንት ምሽት የጥገና ሂደቱን፣ በየከተሞቹ የደረሰውን ጉዳትና የህብረተሰቡን ስሜት የተመለከተ አጠቃላይ ግምገማ ካደረገ በኋላ ዛሬ የኮምቦልቻና ደሴ ከተሞች ኤሌክትሪክ እንዲያገኙ ለማድረግ የቻለውን ያህል ጥረት እንደሚያደርግ ቃል ገብቷል፡፡

የጥገና ቡድኑ ትናንት ከካራቆሬ - ከሜሴ ያለው የከፍተኛ ኃይል ማስተላለፊያ መስመር ጥገና አጠናቆ አገልግሎት እንዲሰጥ አድርጓል።

የማስተላለፊያ መስመሮችና ማከፋፈያ ጣቢያዎች ኦፕሬሽን ሥራ አስፈፃሚ አቶ ሀብታሙ ውቤ የቴክኒክ ቡድኑ በጥቂት ቀናት ውስጥ ከሸዋሮቢት እስከ ከሚሴ ያለውን መስመር ጠግኖ ለአገልግሎት ለማብቃት ያደረገውን ጥረት አድንቀዋል፡፡

አቶ ሀብታሙ ፥ " ከባድ መስዋዕትነት በመክፈል የህዝቡን ችግር ለመፍታት ያደረጋችሁትን ርብርብ ተቋማችንና ህብረተሰቡ ሁሌም ሲያስታውሰው ይኖራል " ብለዋል፡፡

ምንጭ፦ የኢትዮጵያ ኤሌክትሪክ ኃይል

@tikvahethiopia

#NewsAlert

የሚኒስትሮች ምክር ቤት በዛሬው ዕለት ባካሄደው 2ኛ መደበኛ ስብሰባው በኢትዮጵያ አገራዊ ምክክር ኮሚሽን ማቋቋሚያ ረቂቅ አዋጅ ላይ ተወያይቶ ውሳኔ አሳልፏል።

መንግስት በ6ኛው አገራዊ ምርጫ ይሁኝታ አግኝቶ ሲመረጥ ቃል ከገባባቸው አገራዊ ጉዳዮች መካከል ሁሉን አካታች የሆነ አገራዊ ምክክርና ውይይት በማካሄድ አገራዊ መግባባት እና በአገር ጉዳይ የጋራ አቋም እንዲኖር የሚያስችሉ ስራዎችን መስራት አንዱ መሆኑ ይታወቃል።

በዚሁ መሰረት መሠረታዊ በሚባሉ አገራዊ ጉዳዮች በተለያየ ጎራ የተሰለፉ የፖለቲካ ልሂቃንም ሆኑ ምልዓተ ህዝቡ ተቀራራቢና በአገራዊ አንድነት ገንቢ አቋም እንዲይዙ ለማድረግ አካታች አገራዊ ምክክሩን ተግባራዊ ለማድረግ በገለልተኝነት ለመምራትና ለማስተባበር የሚችል ቅቡልነት ያለው ተቋም ማቋቋም አስፈላጊ ሆኖ በመገኘቱ የኢትዮጵያ አገራዊ ምክክር ኮሚሽን ማቋቋሚያ ረቂቅ አዋጅ ተዘጋጅቶ ለሚኒስትሮች ምክር ቤት ለውሳኔ ቀርቧል።

ምክር ቤቱም በቀረበው የማቋቋሚያ ረቂቅ አዋጅ ላይ በዝርዝር ከተወያየ በኋላ ግብዓቶችን በማከል ይጸድቅ ዘንድ ለህዝብ ተወካዮች ምክር ቤት እንዲተላለፍ ወስኗል።

#PMOEthiopia

@tikvahethiopia

#ጥንቃቄ

" የተሸከርካሪ ሰሌዳን እናስጨርሳለን በማለት ገንዘብ ከሚጠይቁ ግለሰቦች ተጠንቀቁ " - የፐብሊክ ሰርቪስ ትራንስፖርት አገልግሎት

የተሸከርካሪ ሰሌዳን እናስጨርሳለን በማለት ገንዘብ ከሚጠይቁ ግለሰቦች ህብረተሰቡ እንዲጠነቀቅ የተሸከርካሪ ሰሌዳን ህትመትና ስርጭት ከትራንስፖርትና ሎጂስቲክስ ሚኒስቴር በውክልና ተረክቦ ስራውን በማከናወን ላይ ያለው የፐብሊክ ሰርቪስ ትራንስፖርት አገልግሎት መልዕክቱን አስተላልፏል።

የድርጅቱ የኮሙዩኒኬሽን ጉዳዮች ዳይሬክተር አቶ ሰለሞን አምባቸው በሰጡት መግለጫ ድርጅቱ የተሸከርካሪ ሰሌዳን በህጋዊ መንገድ ከክልልና ከከተማ አስተዳደር ትራንስፖርት ቢሮዎች ጋር በመተባበር በመስጠት ላይ መሆኑን ገልጸዋል።

የተፈጠረው የህትመት ስርጭት አከናዋኝ የባለቤትነትን ለውጥ በመጠቀም አንዳንድ ግለሰቦች የሰሌዳ ቁጥር የሚፈልጉ አሽከርካሪዎችን ጉዳይ እናስፈፅማለን በማለት የማታለል ተግባር እየፈፀሙ መሆኑን አንስተው እነዚህን ወንጀለኞች ለማጋለጥ ድርጅቱ ከሚመለከታቸው አካላት ጋር በመስራት ላይ መሆኑን ተናግረዋል።

የፐብሊክ ሰርቪስ ትራንስፖርት አገልግሎት ስራውን ከመረከቡ በፊት በቀን በአማካኝ 300 የሰሌዳን ቁጥሮች ይታተሙ እንደነበር ገልፀው በአሁኑ ጊዜ የዕረፍት ቀናትን ጨምሮ በምሽት ክፍለ ጊዜ ህትመትና ስርጭት በመከናወኑ በቀን በአማካኝ ከ3 ሺህ በላይ የተሸከርካሪ ሰሌዳዎችን በመታተም ላይ መሆኑን ገልጸዋል፡፡

ጉዳይ እናስፈፅማለን በማለት ገንዘብ የሚጠይቁ ግለሰቦች ሲያጋጥሙት ህብረተሰቡ ለፖሊስ መጠቆም አለበት ያሉት አቶ ሰለሞን አምባቸው ድርጅቱ በተቀላጠፈና በአጭር ጊዜ በህጋዊ መንገድ የሁሉንም ዓይነት ተሸከርካሪዎች የሰሌዳ ቁጥር እያተመ በማሰራጨት ላይ መሆኑን ተናግረዋል፡፡

@tikvahethiopia

#CustomsCommission

" የጀመርነውን እርምጃ አጠናክረን እንቀጥላለን " - የጉምሩክ ኮሚሽን

የጉምሩክ ኮሚሽን ፥ የግል መገልገያ እቃዎችን በቦሌ አለም አቀፍ ኤርፖርት ለማስገባት ለመንገደኞች የተፈቀደውን መመሪያ ተገን አድርገው ከመመሪያው ውጭ በህገወጥ ንግድ ላይ የተሰማሩ ተመላላሽ መንገደኞች በመንግስት ገቢ እና በንግድ ስርዓቱ ላይ ጫና እያደረሱ በመሆኑ የተጀመረው እርምጃ አጠናክሮ እንደሚቀጥል ገልጿል።

የጉምሩክ ኮሚሽን ኮሚሽነር ደበሌ ቃበታ ጋዜጣዊ መግለጫ ሰጥተዋል።

ኮሚሽነር ደበሌ ፥ የዓለም አቀፍ መንገደኞች ከውጭ ወደ ኢትዮጵያ ሲመጡ ይዘዋቸው ስለሚመጡ እና ከቀረጥ ነጻ ስለተፈቀዱ ብሎም ስላልተፈቀዱ የግል መገልገያ እቃዎችን ለመወሰን ከዚህ በፊት መመሪያ ቁጥር 51/2010 ጸድቆ ስራ ላይ መዋሉን ጠቅሰዋል፡፡

ኮሚሽኑ ባደረገው ጥናት መሰረት ከመመሪያው ዓላማ ውጭ አንዳንድ ተመላላሽ መንገደኞች በህገወጥ ንግድ ላይ ተሰማርተው በመገኘታቸው መንግስት በዘርፉ የሚያገኘውን ገቢ እንዲያጣ እና በንግድ ስርዓቱም ላይ ፍትሀዊ ውድድር እንዳይኖር እያደረጉ መሆኑን ጠቁመዋል፡፡

እነዚህ በህገወጥ ንግድ ላይ የተሰማሩ ተመላላሽ መንገደኞች የሚያደርጉት የገንዝብ ዝውውር በህጋዊ የፋይናንስ ተቋማት የሚከወን ባለመሆኑም ህገወጥ የገንዝብ ዝውውር እንዲስፋፋ፣ የኑሮ ውድነት እንዲባባስና የንግድ ስርዓቱ እንዲታወክ እያደረጉ መሆኑን ገልፀዋል።

መመሪያውን ተላልፈው የተገኙ አካላት ከድርጊታቸው እንዲታቀቡ እና ወደ ህጋዊ የንግድ መረብ እንዲገቡ ኮሚሽኑ በተደጋጋሚ ጥሪ ቢያቀርብም ከድርጊታቸው ሊቆጠቡ አለመቻላቸውን ኮሚሽነር ደበሌ ገልጸው በእነዚህ አካላት ላይ የሚወሰደው እርምጃ ተጠናክሮ እንደሚቀጥል እና ከሌሎች የጸጥታ አካላትም ጋር በቅንጅት እየሰራ መሆኑን አስረድተዋል፡፡

@tikvahethiopia

" የነዳጅ ችግር የሚባል ነገር የለም " - ኮሚሽነር ምትኩ ካሳ

ባለፈው ሀሙስ በኢትዮጵያ የተመድ ቢሮ ማስተባበሪያ ከኢትዮጵያ መንግስት ጋር በጋራ መግለጫ ሰጥተው ነበር።

መግለጫውን የሰጡት በተመድ በኩል ዶ/ር ካትሪን ሱዚ በኢትዮጵያ በኩል የብሔራዊ አደጋ ስጋት ስራ አመራር ኮሚሽነር ምትኩ ካሳ ነበሩ።

በመግለጫው ላይ ህወሓት ስለዘረፋቸው የኮምቦልቻ እና ደሴ UN መጋዘኖች፣ ትግራይ ክልል ገብተው ስለቀሩት ተሽከርካሪዎችና ሌሎችም በርካታ ጉዳዮች ተነስተው ነበር።

ኮሚሽነር ምትኩ ፥ ተመድ እርዳታ ጭነው ትግራይ ገብተው ስለቀሩት ተሽከርካሪዎች መመለስን አስመልክቶ ምንም ያደረገው እንቅስቃሴ እንደሌለና ተሽከርካሪዎቹ ከትግራይ ያልተመለሱት በነዳጅ እጥረት እንደሆነ የሚነገረው ከእውነት የራቀ መሆኑን ተናግረዋል።

ኮሚሽነር ምትኩ፥ የፌዴራል መንግሥት መቐለን ለቆ ሲወጣ 400 ሺህ ኩንታል ስንዴ፣ 2.5 ሚሊዮን ሊትር ዘይትና 14 ሚሊዮን ሊትር ነዳጅ ትቶ እንደወጣ አስታውሰዋል።

" በቂ ነዳጅ የለም የተባለው ተቀባይነት የሌለው ነው " ሲሉ ተናግረዋል።

አክለው፥ " እኛ ባለን መረጃ ሽረ እና መቐለ ላይ በብላክ ማርኬት ዋጋ ነው ነዳጅ እየሸጠ ያለው TPLF እራሱ፤ ኮምቦልቻን በወረረበት ሰዓትም ከኮምቦልቻ ዴፖ በርካታ ነዳጅ ወስዷል። ስለዚህ የነዳጅ ችግር የሚባል ነገር የለም " ብለዋል።

እርዳታ ለማድረስ ወደ ትግራይ የሄዱ ከ1 ሺህ በላይ ተሽከርካሪዎች ዛሬም ድረስ እንዳልተመለሱ እና ህወሓት እየተገለገለባቸው እንደሆነ ትላንት ተገልጿል።

https://telegra.ph/MoFA-Ethiopia-12-10

@tikvahethiopia

#Update

የ2ኛ ደረጃ ትምህርት ቤት ተማሪዎች የፊታችን ሰኞ ወደ ትምህርት ገበታቸው ይመለሳሉ።

ተማሪዎች የዘማች ቤተሰቦችን ሰብል በመሰብሰብ የተሳተፉበት የአንድ ሳምንት የማህበራዊ የበጎ ፍቃድ አገልግሎት ስኬታማ እንደነበር ዛሬ መግለጫ የሰጠው የመንግስት ኮሚኒኬሽን አገልግሎት ሚኒስትር ዴኤታ ወ/ሮ ሰላማዊት ካሳ አሳውቀዋል።

ሚኒስትር ዴኤታዋ በዘመቻው ላይ ለተሳተፉ አካላት በሙሉ ምስጋናቸውን አቅርበዋል።

ከፊታችን ሰኞ ከምሮ መምህራኑ እና ተማሪዎች ወደ መደበኛ ትምህርታቸው እንደሚመለሱ አመልክተዋል።

ተማሪዎቹ በበጎ ፍቃድ ስምሪታቸው ያለፈውን ጊዜም ለማካካስ እንደየትምህርት ቤቶቹ ባህሪ እንቅስቃሴ እንደሚደረግም ተገልጿል።

@tikvahethiopia