" ለመንገድ ስራ የተከማቸ አፈር በህፃናት ላይ ተደርምሶ የአንድ ታዳጊ ሕይወት አጥፍቷል " - የወላይታ ከተማ ፖሊስ

በወላይታ ሶዶ ከተማ መርካቶ ተብሎ በሚጠራዉ አከባቢ ለመንገድ ስራ ተብሎ የተከማቸ አፈር በአካባቢው ሲጫወቱ የነበሩ ሕፃናት ላይ ተደርምሶ የአንድ ታዳጊ ሕይወት ማለፉን የከተማው ፖሊስ አዛዥ ምክትል ኮማንደር ሀብታሙ አስፋዉ ቲክቫህ ኢትዮጵያ ተናግረዋል።

አደጋዉ የተከሰተው በትናትናዉ ዕለት ከቀኑ ዘጠኝ ሰዓት አከባቢ መሆኑን የገለፁት አዛዡ በስፍራው የነበሩት ከ7 እስከ 9 ዓመት የዕድሜ ክልል ዉስጥ የሚገኙ ሶስት ሕፃናት እንደነበሩ ተናግረው ሕይወቱ ካለፈዉ ታዳጊ በስተቀር በሌሎቹ ላይ ምንም አይነት ጉዳት አለመድረሱን ገልጸዋን።

ሕፃናቱ እየተጫወቱ የነበረበት ቦታ ለአደጋ ተጋላጭ መሆን እየጣለ ካለዉ ከባድ ዝናብ ጋር ተዳምሮ ለአደጋዉ መከሰት መንስኤ ሆኗል ሲሉ አስረድተዋል።

ምክትል ኮማንደር ሀብታሙ አስፋው ፥ መሰል አደጋዎች እንዳይከሰቱ የግንዛቤ ማስጨበጫ ስራ እንደሚሰራና በሶዶ ከተማ አስተዳደር የዉስጥ ለዉስጥ የአስፋልት መንገድ ስራ እያከናወነ የሚገኘዉ የቻይና ተቋራጭም አደጋ ሊያስከትሉ በሚችሉ ቦታዎችን ጥበቃ እንዲያስቀምጥ ትዕዛዝ እንደሚሰጥ አስታዉቀዋል።

ከአደጋው ጋር ተያይዞ በአንዳንድ የማህበራዊ ሚዲያ ገፆች ከአስር በላይ ሕፃናት ሕይወት እንዳለፈ ተደርጎ የሚሰራጨዉ መረጃ ከእዉነት የራቀ ነዉ ያሉት ፖሊስ አዛዡ እንደዚህ ዓይነት መረጃ የሚያሰራጩ አካላት ከድርጊታቸው እንዲቆጠቡ አሳስበዋል።

ቲክቫህ ኢትዮጵያ
ሀዋሳ
#TikvahEthiopiaFamilyHW

@tikvahethiopia

" በስህተት ወደ አካውንቴ የገባልኝን 3.5 ሚሊዮን ብር ለባለቤቱ መልሻለሁ " - አቶ በህጉ ወ/ሚካኤል

በተለያዩ ማህበራዊ ሚዲያዎች ላይ በስህተት ወደ አካዉንቱ የገባን 3.5 ሚሊዮን ብር ተመላሽ ያደረገ ግለሰብ ምስጋና እየተቸረው ይገኛል።

ቲክቫህ ኢትዮጵያ በጉዳዩ ዙሪያ በስም ተጠቃሹን ግለሰብ አግኝቶ ያነጋገራቸው ሲሆን የባንክ ባለሙያ አስተያየት እና ምክርም ጠይቋል።

በስህተት የገባላቸዉን 3.5 ሚሊዮን ብር የመለሱት አቶ በህጉ ወ/ሚካኤል ምን አሉ ?

" ከባንክ ወደ ባንክ በሚደረግ የገንዘብ ዝዉዉር ሂደት በተፈጠረ ስህተት ከሌላ ግለሰብ ወደ አካዉንቴ የገባን 3.5 ሚሊዮን ብር ለባለቤቱ ተመላሽ አድርጊያለሁ።

እኔም የስራ ሰዉ ነኝ እንደዚህ አይነት ክስተት ልያጋጥመኝ ይችላል፤ ስለዚህ ገንዘቡ የኔ ስላልሆነና ለባለቤቱ መመለስ ስላለብኝ ሳላቅማማ መልሻለሁ " ሲሉ ጉዳዩን ለቲክቫህ ኢትዮጵያ አስረድተዋል።

አቶ በህጉ አክለዉም " ብዙ ሰዎች ሞኝ እንደሆንኩ፣ መመለስ እንዳልነበረብኝና ብመልስም ከላዩ ቀንሼ መሆን እንደነበረበት አስተያየት ሲሰጡ ሰምቻለሁ፤ ዳሩ ግን ቅድም እንዳልኩት የኔ ያልሆነ ነገር የኔ አይደለም፤ በተለይም እኔም በቢዝነስ አለም ዉስጥ እንዳለ ሰዉ ነግ በኔ እንደሆነ በመረዳት ማድረግ ያለብኝ ነዉ ያደረኩት "ብለዋል።

የአዋሽ ባንክ ባለሙያ ስለሁኔታዉ ምን አሉ ?

የአዋሽ ባንክ ፊንፊኔ ቅርንጫፍ ኦፕሬሽንናል ማናጀር አቶ ፉፋ አሰፋ ስለ ጉዳዩ ለቲክቫህ ኢትዮጵያ ሲያስረዱ " ከባንክ ወደ ባንክ በሚደረግ የገንዘብ ዝዉዉር አቶ ቦንሳ ታደለ የተባሉ የባንካችን ደንበኛ ከአንዱ ባንክ አካዉንት ወደ ሌላ ባንክ አካዉንት በአካል ተገኝተዉ በማንዋል ፅፈዉ ሂሳብ ሲያስተላልፉ አንድ ቀጥር ተሳስተዉ ፅፈዉ በመስጠታቸዉ 3.5 ሚሊዮን ብር ወደ አቶ በህጉ ወ/ሚካኤል አካዉንንት ተላልፏል " ሲሉ ገልፀዋል።

ባንኩ ለአቶ በህጉ በመደወል ሁኔታውን ማስረዳቱንና አቶ በህጉም ተባባሪ በመሆን ለባለቤቱ ገንዘቡን ተመላሽ ማድረጋቸውን አስታውቋል።

ለሁሉም የባንክ ተጠቃሚዎች የባንክ ባለሙያዉ ምን አሉ ?

" ከባንክ ወደ ባንክ በሚደረግ የገንዘብ ዝዉዉር ሂደት ይህ ዓይነቱ አጋጣሚ የመፈጠር ዕድሉ ሰፊ ነዉ። ሁሉም ሰዉ በብር ዝዉዉርና አጠቃላይ በባንክ አጠቃቀም ወቅት ተገቢዉ ጥንቃቄ ማድረግ አለበት " ሲሉ አሳስበዋል።

#TikvahEthiopiaFamilyHW

@tikvahethiopia

#Update

" ከታሰሩት 14 ባለሙያዎች 7ቱ ሲፈቱ 7ቱ አሁንም በእስር ላይ ይገኛሉ " - የጤና ባለሙያዎች

" የ4 ወራት የትርፍ ሰዓት ክፍያ ተከፍሎን ስራ ጀምረናል፤ በወረዳዉ ስራ ሲዘጋ መክፈል የተለመደ ነው !! "

ከ6 እስከ 9 ወራት የትርፍ ሰዓት ክፍያ ባለመከፈሉ ምክንያት ሥራ ማቆማቸውንና 14 ሰዎች መታሰራቸውን በሲዳማ ክልል ማዕከላዊ ሲዳማ ዞን ሎካ አባያ ወረዳ የሚገኘዉ ሀንጣጤ የመጀመሪያ ደረጃ ሆስፒታል ጤና ባለሞያዎች ለቲክቫህ ኢትዮጵያ መግለጻቸው ይታወሳል።

ጤና ባለሙያዎቹ ዛራ ለቲክቫህ ኢትዮጵያ እንደገለፁት ከታሰሩት 14 ባለሙያዎች 7ቱ ሲፈቱ 7ቱ አሁንም በእስር ላይ ይገኛሉ ብለዋል።

ካልተከፈለዉ የ9 ወራት ዉዝፍ ዉስጥ የ4 ወራት ክፊያ መፈጸሙን ተከትሎ ሥራ መጀመራቸውን የገለጹት ባለሞያዎቹ " የትርፍ ሰዓት ስራ ከቆመ በኋላ ክፍያ መፈፀም በወረዳዉ የተለመደ ጉዳይ ነዉ " ሲሉ ስጋታቸውን ገልጸዋል።

ከታሰሩ 5ኛ ቀናቸዉን የያዙት የታሰሩ የጤና ባለሙያዎች " እንዲፈቱ በተደጋጋሚ እየጠየቅን ነዉ ያሉት ሰራተኞቹ እስካሁን ግን ግልፅ ምክንያት አልተነገረንም " ብለዋል።

ቲክቫህ ኢትዮጵያ የሎካ አባያ ወረዳ አስተዳዳሪና ፖሊስ አዛዥን ለማግኘት ያደረግነው ጥረት ለጊዜው አልተሳካም።  በጉዳዩ ላይ መረጃ ለመስጠት ፈቃደኛ ከሆኑ ለማስተናገድ ዝግጁ መሆኑን ይገልጻል።

ቲክቫህ ኢትዮጵያ
ሀዋሳ
#TikvahEthiopiaFamilyHW

@tikvahethiopia

" ሚስቱን ገድሎ ሊሰወር የሞከረዉ ግለሰብ በፖሊስና በሕብረተሰቡ ትብብር በቁጥጥር ስር ሊዉል ችሏል " - የጋሞ ዞን ፖሊስ

በአርባ ምንጭ ከተማ ባለቤቱ ገድሎ ሊሰወር የነበረ ግለሰብ መያዙን ፖሊስ ገልጿል።

የጋሞ ዞን ፖሊስ መምሪያ የሕዝብ ግንኙነት ዳይሬክተር ኮማንደር ሬታ ተክሉ ለቲክቫህ ኢትዮጵያ እንደገለፁት የወንጀል ድርጊቱ የተፈፀመዉ አርባ ምንጭ ከተማ ወዜ ቀበሌ ግድብ ሠፈር ነው።

ኮማንደር ሬታ ፤ የገዛ ባለቤቱን በመሳሪያ ተኩሶ በመግደል ሊሰወር የሞከረዉ ተጠርጣሪ በሕዝቡና በፖሊስ ትብብር በቁጥጥር ስር መዋሉን ተናግረዋል።

ተጠርጣሪው አቶ ነብዩ ጌታቸው ኤፍሬም እንደሚባልና ከሟች ጋር በትዳር ዓለም አብረዉ እንደነበሩ በመካከላቸዉ በነበረው አለመግባባት ሟች ወላጆቿ  ጋር በመሄድ ላለፉት 5 ወራት ከቤተሰቦቿ  ጋር ትኖር እንደነበር ገልፀዋል።

በትናትናዉ ዕለት ተጠሪጣርዉ አስቦና አቅዶ ጧት 4 ሰዓት ገደማ " ላናግርሽ እፈልጋለሁ " በማለት ካስጠራት በኋላ ሰዉ የማያይበትን ሁኔታ በማመቻቸት በሽጉጥ አንገቷ ስር ደቅኖ ተኩሶ እንደ ገደላት አስረድተዋል።

በኃላም ለመሸሸግና ለመሰወር ሲሞክር  በፖሊስ ክትትልና በሕብረተሰቡ ትብብር በቁጥጥር ስር ዉሎ ምርመራ እየተጣራበት እንደሚገኝ ተናግረዋል።

ተጠርጣሪዉና ሟች በትዳር አብረዉ በነበሩበት ወቅት አንድ ልጅ አፍርተዉ እንደነበርም የፖሊስ መረጃ ያመለክታል።

ተጠርጣሪዉ የወንጀል ድርጊቱን የፈፀመበትን ሽጉጥ ወንዝ ዉስጥ እንደጣለ ቢገልፅም ፖሊስ ባደረገዉ ማጣራት ከደበቀበት በኤግዚቢትነት ይዞታል።

#TikvahEthiopiaFamilyHW

@tikvahethiopia

" በጎፋ ዞን ገዜ ጎፋ ወረዳ ዳግም የመሬት ናዳ እና ጎርፍ ተከስቶ በሰዉና ንብረት ላይ ጉዳት አድርሷል " - የአከባቢው ነዋሪዎች

የደቡብ ኢትዮጵያ ክልል ጎፋ ዞን ገዜ ጎፋ ወረዳ ነዋሪዎች ለቲክቫህ ኢትዮጵያ እንደገለፁት ከሰሞኑ በአከባቢያቸዉ ነፋስ ቀላቅሎ እየጣለ ያለዉ ከባድ ዝናብ የመሬት ናዳ እና ጎርፍ በማስከተሉ በሰዉ ሕይወትና ንብረት ላይ ጉዳት ማድረሱን ተናግረዋል።

ከሚያዚያ 9/2017 ዓ/ም  ጀምሮ ለተከታታይ ቀናት በአከባቢዉ እየጣለ ያለዉ ዝናብ በተለይም ፦
- ጎሬ ኦዳ፣
- ጃዉላ ዉጋ ማሽታሌ፣
- ኤላ፣
- አማሮ ሻጌ፣
- ቡልቂ በተባሉ አከባቢዎች ባስከተለዉ ከባድ ነፋስ፣ ከፍተኛ የዉሃ ሙላት እና የመሬት መንሸራተት  የ3 ሰዎች ሕይወት ሲያልፍ ከ4 በላይ ቤቶች በመሬት ናዳዉ መስመጣቸዉንና፤ የእርሻ ማሳዎች እንዲሁም የቤት እንስሳት ጭምር በመሬት መንሸራተቱ መወሰዳቸዉን ነዋሪዎቹ አስረድተዋል።

በወረዳዉ ሰሞኑን በተከሰተዉ ዳግመኛ  የመሬት መንሸራተት አደጋ ምክንያት የተፈናቀሉ ነዋሪዎች በጎዶ አንደኛ ትምህርት ቤት እና በአንድ የሃይማኖት ተቋም ግቢ ተጠልለው እንደሚገኙ የሚናገሩት ነዋሪዎቹ የዝናብ ሁኔታዉ ቀጣይነት ያለዉ ስለሚመስል አሁንም ከፍተኛ ስጋት ዉስጥ መሆናቸዉን ተናግረዋል።

" በወረዳዉ የዛሬ ዓመት በተከሰተዉ የመሬት መንሸራተት አደጋ ምክንያት የተፈናቀሉ ዜጎችን መሉ በሙሉ መልሶ የማደራጀቱ ስራ ባልተጠናቀቀበት ይህ መከሰቱ ስጋታችንን ከፍ ያደርገዋልም " ብለዋል።

ቲክቫህ ኢትዮጵያ በጉዳዩ ዙሪያ ያነጋገራቸዉ የገዜ ጎፋ ወረዳ አደጋ ስጋት ጽ/ቤት ኃላፊ አቶ ማስረሻ ማናዬ በበኩላቸው በአካባቢው እየጣለ ባለዉ ከባድ ዝናብ በወረዳዉ አራት ቀበሌያት በሰዉ፣ በንብረትና በቤት እንስሳት ላይ ጉዳት ማድረሱን አስታዉቀዋል።

ተጨማሪ አደጋዎች እንዳይከሰቱ የወረዳዉ መንግስት በልዩ ተኩረት እየሰራ ነዉ ያሉት አቶ ማስረሻ ጉዳት የደረሰባቸውን ነዋሪዎች የማቋቋም ስራም እንደሚሰራ ገልፀዋል።

ባሳለፍነዉ ዓመት በአከባቢዉ የተከሰተዉ መሰል የመሬት መንሸራተትና ናዳ ምክንያት በርካታ ሰዎች መሞታቸዉ የሚታወስ ሲሆን አሁንም ድረስ በአከባቢው በስጋት የተፈናቀሉ ነዋሪዎችን ሙሉ በሙሉ መልሶ የማቋቋም ስራዉ አለመጠናቀቁን በቅርቡ የአካባቢው ነዋሪዎች ለቲክቫህ ኢትዮጵያ ገልጸው ነበር።

ቲክቫህ ኢትዮጵያ
ሀዋሳ
#TikvahEthiopiaFamilyHW

@tikvahethiopia

" ላሟ ጅራት አልባ ጉማሬ መሰል ጥጃ ነው የተገላገለችው። ጥጃዉ ወዲያዉ ሲሞት ላሟም በማግስቱ ሞታለች " - ነዋሪዎች

🔴 " እኔ ስደርስ ባየሁት ነገር በጣም ደንግጫለሁ ! " - የአከባቢው እንስሳት ሀኪም

በደቡብ ኢትዮጵያ ክልል ጎፋ ዞን ገዜ ጎፋ ወረዳ ገዜ ከንቾ ቀበሌ አንዲት ላም ጉማሬ መሰል ጥጃ ከሰዓታት ምጥ በኋላ በሰዎች እርዳታ ብትገላገልም ጥጃዉ ወዲያዉኑ መሞቱንና ላሟም በማግስቱ ሕይወቷ ማለፉን የላሟ አሳዳጊና የአካባቢው ነዋሪዋች ለቲክቫህ ኢትዮጵያ ተናግረዋል።

የላሟ አሳዳጊ አቶ ኢሳያስ አልፋቴ ስለ ጉዳዩ ለቲክቫህ ኢትዮጵያ ሲያስረዱ " ላሚቷ ከዚህ ቀደም ሶስት ዙር ወልዳ ነበር። በአሁኑ ዙር ሆዷ ያለ ልክ ከፍ ብሎ ነበር ፤ የመዉለጃዋ ጊዜ ሲደርስም እንቅስቃሴዋ ዘገምተኛ ነበር " ሲሉ ገልጸዋል።

" በዕለቱ ለመዉለድ መቃረቧን ተከትሎ እንደሁልጊዜው ሁሉ በሰላም ትወልዳለች ብለን ብንጠብቅም ከ5 ሰዓታት በላይ ምጧ በመቀጠሉ ስጋት ስለያዘን ለአከባቢው የእንስሳት ሐኪም ደዉለን ሁኔታዉን አስረድተን ነበር ነገር ግን ባለሙያዉ በቅርበት ስላልነበር በቶሎ አልደረሰልንም ኋላም ላሟ በመዳከሟ የአከባቢው ሰዎች 'የወጣዉን እግር አስረን እንጎትት' በማለታቸዉ ጥጃዉ ተጎትቶ ከወጣ በኋላ ወዲያው ሞቷል " ሲሉ ተናግረዋል።

ጉማሬ መሰሉ ጥጃ ክብደቱ በግምት 50ኪሎ ግራም በላይ ነዉ ያሉን የአካባቢው ነዋሪዌች በማግስቱም ላሚቷም መሞቷን ገልፀዋል።

" እኔ ስደርስ ባየሁት ነገር በጣም ደንግጫለሁ " ያለን በአከባቢዉ የእንስሳት ሐኪም ሕዝቅያስ ሀብታሙ " የተወለደው ጭራ አልባና ከጥጃ ይልቅ ጉማሬ የሚመስል ፍጥረት ነዉ " ብለዋል።

ቲክቫህ ኢትዮጵያ
ሀዋሳ
#TikvahEthiopiaFamilyHW

@tikvahethiopia

#Update

በሲዳማ ክልል ማዕከላዊ ሲዳማ ዞን ሎካ አባያ ወረዳ ከትርፍ ሰዓት ክፊያ ጋር በተያያዘ ሁለት ሳምንት ለሚጠጋ ጊዜ በእስር ላይ የቆዩ የጤና ባለሙያዎች በዋስ መፈታታቸዉን ቲክቫህ ኢትዮጵያ ከስፍራዉ አረጋግጧል።

ከጉዳዩ ጋር በተያያዘ ከሚያዚያ 8/2017 ዓ/ም ጀምሮ 14 የጤና ባለሙያዎች ታስረዉ የነበረ ሲሆን 7ቱ ከቀናት እስር በኋላ ተለቀዉ 7ቱ እስከ ዛሬ ረፋድ ድረስ በሀንጣጤ ከተማ ፓሊስ ጣቢያ በእስር ላይ የቆዩ ቆይተዋል።

ዛሬ እያንዳንዳቸው በ50 ሺህ ብር ዋስ ከእስር እንዲፈቱ መደረጉን የዓይን እማኞች ተናግረዋል።

በሲዳማ ክልል ማዕከላዊ ሲዳማ ዞን ሎካ አባያ ወረዳ በሚገኘዉ ሀንጣጤ የመጀመሪያ ደረጃ ሆስፒታል ያሉ የጤና ባለሙያዎች ከ6 እስከ 9 ወራት የትርፍ ሰዓት ክፍያ ባለመከፈሉ ከወረዳ እስከ ክልል መዋቅር አሳዉቀዉ የትርፍ ሰዓት ስራ ማቆማቸዉን ለቲክቫህ ኢትዮጵያ አሳዉቀዉ ነበር።

ቲክቫህ ኢትዮጵያም በጉዳዩ ዙሪያ ከእስር ተፈቱ የተባሉ የጤና ባለሙያዎችን ለማግኘት ያደረገዉ ሙከራ አልተሳካም።

ጉዳዩን አሁንም በቅርበት የምንከታተል ይሆናል።

ቲክቫህ ኢትዮጵያ
ሀዋሳ
#TikvahEthiopiaFamilyHW

@tikvahethiopia

" ያለ ቅድመ ሁኔታ ከስራ መስመር እንድንወጣ መደረጉ ለዘርፈ ብዙ ችግር ዳርጎናል " - የኤሌክትሪክ ባጃጅ አሽከርካሪዎች

" በመንግስት አበረታችነት በሚሊዮን የሚቆጠር ገንዘብ በብድርና በዋስትና ጭምር አዉጥተን በቅርቡ የገዛናቸዉ የኤሌክትሪክ ባጃጆች በአስፓልት መንገዶች እንዳሰሩ ተደርገዋል ፤ ይህም ለዘርፈ ብዙ ችግር ዳርጎናል " ሲሉ በሀዋሳ ከተማ የሚገኙ አሽከርካሪዎች ለቲክቫህ ኢትዮጵያ ቅሬታቸውን አሰምተዋል።

እያንዳንዳቸው በ1 ሚሊዮን 2 መቶ ሺ ብር ገዳማ የሚገዙ 140 በላይ ባጃጆች በከተማው እንደሚገኙ የሚገልፁት አሽከርካሪዎቹ ያለ አንዳች ዉይይትና ቅድመ ሁኔታ ካሳለፍነዉ አርብ ጀምሮ " በአስፋልት መንገዶች እንዳይሰሩ ተብለናል " በሚል የትራፊክ ፖሊሶችና የመንገድ ደህንነት አስከባሪዎች የእንቅስቃሴ ገደብ እንደጣሉባቸው አስረድተዋል።

አንድ ስሙ እንዳይገለጽ የፈለገ የኤሌክትሪክ ባጃጅ አሽከርካሪ አስቀድሞ የቤንዚኑን ባጃጅ ይሰራበት እንደነበርና እሱን ሽጦ የወላጆቹን የቤት ካርታ በማስያዝ የኤሌክትሪክ ባጃጅ መግዛቱን ገልጾ ወደ ስራ ከገባ አንድ ወር ባልሞላ ጊዜ ዉስጥ " በአስፋልት መንገድ መስራት አትችሉም " ተብለን ከስራ መስመር እንድንወጣ ተደርገናል ብለዋል።

ሌላኛዉ ቅሬታ አቅራቢ ደግሞ " ባጃጁን የገዛሁት መንግስት ለጭስ አልባ ሞተሮች የሰጠዉን ትኩረት በሚገባ ካጠናሁ በኋላ ነዉ በድንገት የተወሰደዉ እርምጃ እጅግ አሳዝኖናል " ሲል ተናግሯል።

ከባጃጅ ግዢዉ በተጨማሪ ለ3ኛ ወገን 12 ሺ ብር ገደማ፣ 2 ፐርሰንት ተብሎ ደግሞ 21 ሺ ብር እና ለታርጋ 10 ሺ ብር ከእያንዳንዱ ባጃጅ ለመንግስት ገቢ አድርገናል የሚሉት አሽከርካሪዎቹ " ከተማዉንና ዘመኑን የሚመጥን ትራንስፖርት ነዉ " ስንባል ቆይተን በድንገት ከመስመር ዉጡ መባላችን ለዘርፈ ብዙ ችግሮች ዳርጎናል ብለዋል።

በባጃጅ ስራዉ
- ቤተሰብ የሚያስተዳድሩ ፣
- ያስያዙትን የቤት ካርታ ለማስለቀቅ በየቀኑ ገንዘብ በባንክ ገቢ የሚያደርጉ
- ባጃጅ በዕቁብ ብር ገዝተዉ የቀን እቁብ የሚጥሉ፣
- ልጆች የሚያስተምሩ
- ቤተሰብ እጃቸዉን የሚጠብቅና ልዩ ልዩ የግዴታ ወጪዎች ያለባቸዉ አሽከርካሪዎች ይበዛሉ የሚሉት ቅሬታ አቅራቢዎቹ ለከተማዉና ለክሉም መንገድና ትራንስፖርት ቢሮ ሄደን ይኸን ሁሉ ገልፀን ብናመለክትም ተገቢውን ምላሽ አላገኘንም ብለዋል።

አንዳድ የመስሪያ ቤቶቹ ባለሙያዎች " ለምን ዉስጥ ለዉጥ እየሰራችሁ ጥያቄ አትጠይቁም " ይላሉ ነገር ግን የባጃጁ ስሪት ለኮብል ስቶን (የድንጋይ ንጣፍ) መንገድ ፍፁም የማይሆንና በቀናት ዉስጥ 'ሲልድ ባትሪዉንና ዲናሞዉን' ከጥቅም ዉጪ የሚያደርግ መሆኑን ገልፀዋል።

ቲክቫህ ኢትዮጵያ በጉዳዩ ዙሪያ ከሀዋሳ ከተማ መንገድ ልማትና ትራንስፖርት መምሪያ ኃላፊና ምክትል ኃላፊዉ መረጃ ለማግኘት ያደረገዉ ተደጋጋሚ ሙከራ አልተሳካም።

ምላሻቸዉን ስናገኝ የሚናካትት ይሆናል።

ቲክቫህ ኢትዮጵያ
ሀዋሳ
#TikvahEthiopiaFamilyHW

@tikvahethiopia