#Wollo / #ወሎ : እናት ፓርቲ በመግለጫው ፦

1. መንግስትን ፦

የትኛውም ዋጋ ተከፍሎ የወሎ እና የአካባቢውን ማኅበረሰብ ከህወሓት ቡድን ነጻ እንዲያወጣ ጠይቋል።

2. መንግስታዊና መንግስታዊ ያልሆኑ የእርዳታ ድርጅቶችን ፡-

በአካባቢው ያለውን ሰቆቃ በሚመጥን መልኩ እጃቸውን ዘርግተው ቢያንስ የነዋሪውን ረሃብ እንድታስታግሱለት፣ በእቅፉ ያሉና የጣር ድምጽ የሚያሰሙ ሕጻናት ልጆቹ ድምጽ ተሰምቷቸው በአፋጣኝ እንዲደርሱላቸው ተማጽኗል።

3. ለመላው የኢትዮጵያ ሕዝብ ፡-

በሩቅ የሰማነው የረሃብ እልቂት በወሎ ሕዝብ ላይ አንዣቧልና ለነገ ሳይ ከጉርሱ እየቀነስክ ወሎን እንዲታደግ ፤ ችግሩን አርቆ መመልከት ከተቻለ እንደሀገር የሚገባበት ቀውስ ከባድ ስለሆነ ሁሉም ኢትዮጵያዊ እንደየአቅሙ እንዲረባረብ ጥሪ አቅርቧል።

4. ለፖለቲካ ፓርቲዎች ፡-

እስከአሁን ሲደረግ እንደቆየነው ሁሉ " በትብብር የወሎ ሕዝብ ድምጽ እንሁን ብሎም የአቅማችንን እንድናደርግ " ሲል ጥሪ አቅርቧል።

5. መገናኛ ብዙኃንን ፡-

የረሃብ አደጋ ላንዣበበበት የ #ወሎ_ሕዝብ_ድምጽ እንዲሆኑ ጠይቋል። አሁን ያለው ሁኔታ ቢሸፋፈንም እንዲህ ያለው ሽል ገፍቶ መውጣቱ ስለማይቀር ያኔ በታሪክ ፊት አንገትን ከመድፋት አሁን ረሃብ ላንዣበበት የወሎ ህዝብ ድምፅ እንዲያሰሙ ጠይቋል።

@tikvahethiopia

* Germany

የጀርመን መንግስት በሁሉም ጉዳት ባጋጠማቸው አካባቢዎች ሰብዓዊ ድጋፍ ለማዳረስ የሚደረገውን ጥረት ለመደገፍ ዝግጁ ነኝ አለ።

ይህ የተሰማው በዛሬው ዕለት የጀርመን መራሂተ - መንግስት በአፍሪካ የግል ተወካይ እንዲሁም በጀርመን የኢኮኖሚ ትብብርና ልማት ሚኒስቴር የአፍሪካ ኮሚሽነር በሆኑት ሚ/ር ጉንተር ኑክ የተመራ ከፍተኛ ልዑካን ቡድን ከኢትዮጵያ ሰላም ሚኒስትር ሙፈሪሃት ካሚል ጋር በተወያዩበት ወቅት ነው።

የሰላም ሚኒስቴር ውይይቱን ተከትሎ ለህዝብ መረጃ አሰራጭቷል።

የሰላም ሚኒስትር ወ/ሮ ሙፈሪሃት ካሚል በሰሜኑ የኢትዮጵያ ክፍል በህወሃት የጥፋት ምክንያት የተፈጠረው የሰብዓዊ ቀውስ ያለበት ደረጃና ወደፊት በአፋጣኝ ስለሚያስፈልገው ፈጣን ምላሽ ለልዑካን ቡድኑ ማብራራታቸውን ሚኒስቴሩ ገልጿል።

በተለይም በወረራው ምክንያት በአማራ እና አፋር ክልሎች ከ540,000 በላይ ዜጎች ከቤት ንብረታቸው መፈናቀላቸውንና ከ4.5 ሚሊዮን በላይ ህብረተሰብ ተጎጂ መሆኑን ሚኒስትሯ መግለፃቸው ጠቁሟል።

የኢትዮጵያ መንግስት በትግራይ ክልል ሰብዓዊ እርዳታ አቅርቦትን ለማቀላጠፍ በርካታ ማሻሻያዎችን በማድረግ ዝግጁነቱን ያረጋገጠ ቢሆንም በአለም ዓቀፍ የሰብዓዊ ድርጅቶች እየተሰጠ ያለው ምላሽ ግን ካለው ፍላጎት አንጻር እጅጉን አናሳ መሆኑንም በውይይቱ ወቅት ሚኒስትሯ ተናግረዋል።

ሚ/ር ኑክ የጀርመን መንግስት የሰብዓዊ ድጋፍ በሁሉም ጉዳት ባጋጠማቸው አካባቢዎች ለማዳረስ የሚደረገውን ጥረት ለመደገፍ የጀርመን መንግስት ዝግጁ መሆኑን አስታውቀዋል።

@tikvahethiopia

የመፈንቅለ መንግስት ሙከራ በጎረቤት ሱዳን !

የሱዳን መንግስት መገናኛ ብዙሃን በሀገሪቱ "ያልተሳካ" የመፈንቅለ መንግስት ሙከራ መደረጉን አሳውቁ።

የአገሪቱ ገዥ ምክር ቤት አባል ሁኔታው ​​በቁጥጥር ስር መዋሉን ለሮይተርስ ተናግረዋል።

ሰኞ በመፈንቅለ መንግስት ሙከራው ተሳትፈዋል የተባሉ ተጠርጣሪዎች ላይ ምርመራ ሊጀመር እንደሆነ የተገለፀ ሲሆን የሀገሪቱ ጦር በአጭር ጊዜ ውስጥ መግለጫ ይሰጣል ተብሎ እየተጠበቀ ነው።

ስማቸው እንዳይጠቀስ ያልፈለጉ አንድ ምንጭ ደግሞ ለሮይተርስ፥ መፈንቅለ መንግስቱ ከዋና ከተማዋ ካርቱም በናይል ወንዝ ማዶ በኦምዱርማን ግዛት የመንግሥት ሬዲዮ ጣቢያን ለመቆጣጠር ሙከራ መደረጉን ገልፀዋል።

@tikvahethiopia

የኤርትራ መንግስት ምላሽ ለጆ ባይደንን ትዕዛዝ ፦

" ...በአሜሪካ እና አውሮፓ ሀገራት የሚተላለፉ ውሳኔዎችንና የሚወሰዱ እርምጃዎችን ዋነኛ የሀገራዊ ህጎችን እንዲሁም የሀገራትን ነፃነት እና ሉኣላዊነትን የሚጥሱ፣ በማጠልሸት እና በማሰይጠን ዲፕሎማሲያዊ ማስፈራራት የሚያምኑ እና የሚመረኮዙ በመሆናቸው በርትህ እና በህግ ተቀባይነት የላቸውም " - የኤርትራ መንግስት

@tikvahethiopia

የኤርትራ መንግስት የጆ ባይደንን ትዕዛዝ ተቃወመ።

ባለፈው ሳምንት የአሜሪካው ፕሬዝዳንት ጆ ባይደን በሰሜን ኢትዮጵያ ያለው ግጭት እንዲራዘም ባደረጉ ፣ የሰብዓዊ መብት ጥሰቶች ላይ እጃቸው አለበት ባሏቸው ፣ ሰብዓዊ እርዳታ እንዳይቀርብ ያስተጓጎሉና የቶክስ አቁም ስምምነት እንዳይደረስ እንቅፋት ሆነዋል ባሏቸው ፦
- የኢትዮጵያ ፌዴራል መንግስት አካላት
- የአማራ ክልል ባለስልጣናት
- የህወሓት /TPLF/ አመራሮች
- የኤርትራ መንግስት አመራሮች ላይ ተጨማሪ ማዕቀብ እንዲጣል ማዘዛቸው ይታወሳል።

ይህን ጉዳይ በተመለከተ የኤርትራ መንግስት ባወጣው መግለጫ ውሳኔውን "በህግ ተቀባይነት የሌለው" ሲል ተቃውሞታል።

የኤርትራ መንግስት በመግለጫው ፥ የህወሓት / TPLF መሪዎች በሰሜን ዕዝ ላይ ወረራ እንደጀመሩ በግልፅ በአደባባይ መናገራቸውን በማስታወስ ወረራው አስቀድሞ በድርጅቱ ማዕከላዊ ስብሰባ ላይ በውይይት የፀደቀ እቅድ እንደነበር በጦርነት ወቅት የተገኘው የህወሓት/TPLF ሚስጥራዊ ሰነድ አጋልጧል ብሏል።

ባለፉት ወራት ይሄን አቻ የሌለው ወንጀል ለመሸፈንና ህወሓትን ከተጠያቂነት ለማዳን ከዛም ባለፈ ሃጥያቱን ወደሌላ ወገን ለማሳበቅ በሰብዓዊ መብት እና የሰብአዊ እርዳታ ስም ሲካሄድ የቆየው ጆሮ የሚያደነቁር የተደራጀ ፕሮፖጋንዳ ዘመቻ እጅግ አስደማሚ ነው ሲል የኤርትራ መንግስት ገልጿል።

መግለጫው አክሎ ፥ ህወሓት እኤአ በ1998 ኤርትራ ላይ ጦርነት አውጆ በሰላማዊ ሰዎች ላይ ሰፊ የጦር ወንጀል በመፈፀም እራሳቸው አሜሪካ እና የአውሮፓ ህብረት ምስክር /ዋስ ሆነው የፈረሙበትን የመጨረሻውና አሳሪ ብይን ባለመቀበል ለ20 ዓመታት በቀጠናው የፈጠረው ውጥረት ፣ ሱማሊያ ላይ የፈፀመው ወረራ እና ውድመት፣ በኢትዮጵያ ህዝብ ላይ የፈፀመው ግፍ፣ በደልና ከፍተኛ የሰብዓዊ መብት ጥሰት በዋናነት በአሜሪካ እና አውሮፓ ህብረት ሀገራት ተባርኮ ሲፈፅመው የነበረው ወንጀል እንደሆነ በማስረጃነት አቅርቧል።

አሁን ላይ በኢትዮጵያ የተከሰተውን እና የአፍሪካ ቀንድን ሰላም እየጎዳ ያለው የፀጥታ ችግርና ሰብዓዊ ቀውስ ህወሓት ባለፉት 27 ዓመታት የስልጣን ዘመኑ በምዕራባውያን ሀገራት ትልቅ ባጀትና አይዞህ ባይነት እየታገዘ ሲፈፅመው የነበረው ወንጀል እና ውጤት ቀጣይ ተግባር ነው ብሎታል።

በአሁን ወቅት ህወሓት በተጨነቀ መንፈስ ውስጥ ሆኖ ወዲያ እና ወዲህ እያለ ባለበት የቀቢፀ ተስፋ ሰዓት የኢትዮጵያ ህዝብ እራሱን መከላከል እና ደህንነቱን ማስጠበቅ ባህሪያዊና ህጋዊ መብቱ መሆኑን የኤርትራ መንግስት መግለጫ ጠቁሟል።

ህወሓት እራሱን ከተጠያቂነት ለማሸሽ የትግራይን ህዝብ እንደማያዣነት ይዞ ለከፍተኛ ችግር ለመዳረግ እየፈፀመ እና እየቀጠለ ያለበት አውዳሚ ተግባር የዓለም ማህበረሰብ ሊያወግዘና ሊኮንነው ይገባል ብሏል።

ዓለም አቀፉ ማህበረሰብ ህወሓት በሚሊዮን የሚቆጠሩ ህፃናት እና ሴቶችን ጨለማ ውስጥ የከተተበትን ኢሰብዓዊ ድርጊት ከመኮነን ይልቅ የተወሰኑ ወንጀለኞችን ለማዳን የተለያዩ ጫናዎችን በሌሎች ላይ መፍጠር ታሪክ ይቅር የማይለው ኢ-ፍትሃዊ ተግባር ነው ሲል በምዕራባውያን ሀገራት እየተደረገ ያለውን ተግባር ኮንኖታል።

በእንዲህ ያለው ሁኔታ በአሜሪካና አውሮፓ ሀገራት የሚተላለፉ ውሳኔዎችንና የሚወሰዱ እርምጃዎችን ዋነኛ የሀገራዊ ህጎችን እንዲሁም የሀገራትን ነፃነት እና ሉኣላዊነትን የሚጥሱ፣ በማጠልሸት እና በማሰይጠን ዲፕሎማሲያዊ ማስፈራራት የሚያምኑና የሚመረኮዙ በመሆናቸው በርትህ እና በህግ ተቀባይነት የላቸውም ሲል የኤርትራ መንግስት የባይደንን ውሳኔ አጥብቆ ተቃውሞታል።

Credit : ጋዜጠኛ ብርሃነ በርኸ (ኣስመራ-ቪኦኤ)

@tikvahethiopia