የአ/አ ቤቶች ልማት ኮርፖሬሽን "ሪፖርተር ጋዜጣ" ይቅርታ ይጠይቀኝ/የእርማት ማስተካከያም ያድርግ አለ።

ኮርፖሬሽኑ፥ 'ሪፖርተር ጋዜጣ' ይቅርታ ይጠይቀኝ/የእርማት ማስተካከያ ያድርግ ያለው ጋዜጣው በቀን ሰኔ 2/2013 ዓ.ም ባወጣው ህትመት "የከተማ አስተዳደሩ የ20/80 እና የ40/60 የጋራ ቤት እጣ ሊያወጣ መሆኑ ተጠቆመ" በሚል ያወጣው ዘገባ ከእውነት የራቀ በመሆኑ ነው።

ኮርፖሬሽኑ፥ "የ20/80 እና የ40/60 የጋራ ቤት እጣ ሊያወጣ ነው" ተብሎ የተዘገበው ዘገባ የሚመለከታቸው አካላት ያልሰጡት መረጃ ነው/ከእውነት የራቀ ነው ብሏል።

ጋዜጣው ከተማ አስተዳደሩን ሆነ የቤቶች ልማትና አስተዳደር ቢሮ እንዲሁም የቤቶች ልማት ኮርፖሬሽን ለተሰራጫው ያልተረጋገጠ ዘገባ ይቅርታ በመጠየቅ ማስተባበያ እንዲያወጣ ኮርፖሬሽኑ አሳስቧል።

የሪፖርተር ዜና የመረጃ ምንጭ ማን እንደሆነ እና ማን እንደሰጠው የት እንደተሰጠ ያልገለፀ በመሆኑና የኮርፖሬሽኑ አመራሮችም ምንም አይነት መረጃ እንዳልሰጡ በመግለፃቸው ከታመኑ ምንጮቻችን አግኝተናል ብሎ መዘገቡ አግባብ ስላልሆነ የማስተካከያ የእርምት እርምጃ እንዲወስድ ብሏል ኮርፖሬሽኑ።

በተጨማሪ ፥ እስከ ዛሬ ድረስ የቤቶች ልማት ኮረፖሬሽን በቁጥር በ10 ሺዎች የሚጠቀሱ ቤቶች ሲያስተላልፍ እንጂ የሚታወቀው ከ2 ሺህ ቤቶች በላይ ተብሎ የተጠቀሰው ከትክክለኛ ምንጭ ያልተነገረ መሆኑን የሚያሳይ ነው ብሎታል።

ሪፖርተር ጋዜጣ ለተዘገበው ዘገባ ማስተባበያ በ10 ቀን ማስተባበያው በጋዜጣው እንዲታተም እንዲያድረግና በተሰራጨው ዘገባ የተደናበረውን ሕዝብ የማረጋጋት ስራ እንዲሰራ ተጠይቋል።

ጋዜጣው ይህን ሳያደርግ ቀርቶ ማስተባበያውን ካላወጣ ጉዳዩን ወደ ህግ ለመውሰድ እንደሚገደድ ኮርፖሬሽኑ ለጋዜጣው በላከው ደብዳቤ አሳውቋል።

@tikvahethiopia

#ምርጫ2013

የኢትዮጵያ ብሔራዊ ምርጫ ቦርድ በተለያዩ ምክንያቶች ሰኔ 14/2013 ድምጽ መስጠት የማይቻልባቸውና ምርጫው ጳጉሜ 1 ቀን 2013 ዓ.ም እንዲደረግ የተወሰነባቸው አካባቢዎች ከዚህ ቀደም መግለጹ የሚታወስ ነው።

ከዚህ ውስጥ ለምን ያህል የህዝብ ተወካዮች ም/ቤት መቀመጫዎች እና የክልል ምክር ቤት መቀመጫዎች ምርጫው እንደማይካሄድ ዛሬ በሰጠው መግለጫ በዝርዝር አቅርቧል።

በዚህም፦

• በቤኒሻንጉል ጉሙዝ ክልል - ለ4 የህዝብ ተወካዮች ምክር ቤት መቀመጫ እንዲሁም ለ13 የክልል ምክር ቤት መቀመጫ፤

• በኦሮሚያ ክልል - ለ7 የህዝብ ተወካዮች ምክር ቤት መቀመጫ እንዲሁም ለ7 የክልል ምክር ቤት መቀመጫ፤

• በአማራ ክልል - ለ10 የህዝብ ተወካዮች ምክር ቤት መቀመጫ እንዲሁም ለ9 የክልል ምክር ቤት መቀመጫ፤

• በደ/ብ/ብ/ህ ክልል - ለ16 የህዝብ ተወካዮች ምክር ቤት መቀመጫ እንዲሁም ለ22 የክልል ምክር ቤት መቀመጫ፤

• በሐረሪ ክልል - ለ2 የህዝብ ተወካዮች ምክር ቤት መቀመጫ እንዲሁም ለ3 የክልል ምክር ቤት መቀመጫ፤

• በአፋር ክልል - ለ2 የህዝብ ተወካዮች ምክር ቤት መቀመጫ እንዲሁም ለ7 የክልል ምክር ቤት መቀመጫ፤

• ሶማሌ ክልል - ለ23 የህዝብ ተወካዮች ምክር ቤት መቀመጫ እንዲሁም ለ72 የክልል ምክር ቤት መቀመጫ በሰኔ 14 ምርጫ የማይካሄድባቸው ናቸው።

በአጠቃላይ ሰኔ 14 በ64 በህዝብ ተወካዮች ምክር ቤት መቀመጫዎች ላይ ምርጫ #የማይካሄድ ሲሆን በእነዚህ አከባቢዎች ምርጫው ጳጉሜ 1 የሚካሄድ ይሆናል።

* ዝርዝር ማብራሪያው ከላይ ተያይዟል።

#TikvahFamily

@tikvahethiopia

የአረብ ሊግ ስብሰባ እና የኢትዮጵያ ምላሽ :

የዐረብ ሊግ የተመድ ጸጥታው ም/ቤት ኢትዮጵያ በዓባይ ወንዝ ላይ እየገነባች ባለችው ታላቁ የሕዳሴ ግድብ ዙሪያ ስንብሰባ እንዲያደርግ ትላንት ባደረገው ስበባ ጠይቋል።

የሊጉ አባል አገራት የውጭ ጉዳይ ሚኒስትሮች ባደረጉት ሰብሰባ የሁሉንም አካላት ፍላጎት የሚያሳካ አስገዳጅ ስምምነት ላይ መደረስ እንዳለበት አንስተዋል።

የዐረብ ሊግ አባል ሀገራት የውጭ ጉዳይ ሚኒስትሮች በአፍሪካ ህብረት አስተባባሪነት እየተካሄደ ያለውን ድርድር አዝጋሚ ነው ሲል ገልጾታል።

ሚኒስትሮቹ በኳታር መዲና ዶኃ ባደረጉት ስብሰባ በአፍሪካ ሕብረት ስር እየተካሄደ ያለው ድርድር አዝጋሚ በመሆኑ የጸጥታው ም/ቤት በግድቡ ዙሪያ ስብሰባ እንዲያደርግ ጥሪ አቅርበዋል።

የሊጉ ዋና ፀሀፊ አህመድ አብዱል ጌት እንዳሉት የግብፅና የሱዳን የውሃ ደህንነት ጉዳይ የዐረብ ሀገራት ደህንነት አካል መሆኑን መግባባት ላይ መደረሱን አስታውቀዋል።

የሕዳሴ ግድብን በተመለከተ የዐረብ ሊግ ለሱዳን እና ለግብፅ ድጋፍ እንዳለውም ዋና ጸሐፊው ገልጸዋል።

ኢትዮጵያ የአረብ ሊግ የህዳሴው ግድብን በተመለከተ በኳታር ተወያይቶ ያሳለፈው ውሳኔ ተቀባይነት የሌለው መሆኑን በውጭ ጉዳይ ሚኒስቴር በኩል አሳውቃለች።

የአረብ ሊግ የግብጽ እና የሱዳንን መሰረተ ቢስ ውንጀላ ላይ ሳይመሰረት በህዳሴ ግድቡ ድርድር ዙሪያ ገንቢ ሚና መጫወት ሲገባው ሚዛናዊነት የጎደለው እና ወደ አንድ ወገን ያደለ ውሳኔ መወሰኑ ተቀባይነት እንደሌለው ገልጻለች።

ውሳኔው በቀጠናው የአባይን ወንዝ በትብብርና በዘላቂነት ለመጠቅም የሚያስችል መንገድ አለመሆኑንም አሳውቃለች።

የአርብ ሊግ አባል ሀገራት የአባይ ወንዝን አጠቃቀም እና የኢትዮጵያን ነባር አቋም በሚገባ ሊያውቁ ይገባቸዋልም ብላለች።

#ኢብኮ #አልዓይን

@tikvahethiopia

የታጣቂዎች ጥቃት የሁለት ወጣት ኢንጂነሮችን ነፍስ ነጠቀ።

በኮንስትራክሽን የስራ ላይ ተሰማርተው በሙያቸው ሀገራቸውን እና ህዝባቸውን እያገለገሉ የነበሩ ሁለት ወጣት ኢንጂነሮች በታጣቂዎች ተገደሉ።

#አሥራት_ሺካ እና #ሮቤል_ልደቱ የተባሉት ወጣት ኢንጂነሮች ትላንት ሰኔ 8/2013 ለሥራ ጉዳይ "አማሮ ልዩ ወረዳ" ሲጓዙ "ጀሎ" በምትባል ቀበሌ በታጣቂዎች በተከፈተባቸው ተኩስ ህይወታቸው አልፏል።

ሁለቱም ወጣት ኢንጂነሮች ባላቸው እውቀት ህዝባቸውን እና ሀገራቸውን በማገልገል ላይ እያሉ ነው በታጣቂዎች በግፍ የተገደሉት።

የወጣቶቹን ግድያ የአማሮ ልዩ ወረዳ ፖሊስ ፅ/ ቤት ለቲክቫህ ኢትዮጵያ ያረጋገጠ ሲሆን ጉዳዩን ለደቡብ ክልል ፖሊስ ኮሚሽን አሳውቀናል ብሏል።

በሌላ በኩል የደቡብ ክልል ኮንስትራክሽን ባለልስጣን ባወጣው የሀዘን መግለጫ ወጣት ሮቤል ልደቱ የባለስልጣን መስሪያ ቤቱ የመንግስት ፕሮጀክቶች ግንባታ ጥራት ክትትል እና ቁጥጥር ስራ ሂደት ባለሞያ እንደነበር ገልጾ በህልፈቱ የተሰማውን ሀዘን ገልጿል።

ባልስልጣኑ 'ድንገተኛ ህልፈተ ህይወት' ብሎ ከመግለፅ በዘለለ ዝርዝር መረጃ አልሰጠም።

የደቡብ ክልል ፖሊስ ኮሚሽን ስለግድያው ፣ ጥቃት ፈፃሚዎቹ ስለመያዛቸው እና ሌሎች ተያያዥ መረጃ እንዲሰጠን ያደረግነው ሙከራ አልተሳካም።

@tikvahethiopia

ኢትዮጵያ 381 ዜጎቿን ከሳዑዲ አረብያ መለሰች።

ከኢፌዴሪ የውጭ ጉዳይ ሚኒስቴር ባገኘነው መረጃ መሰረት ኢትዮጵያ በዛሬው ዕለት 381 ዜጎቿን ከሳኡዲ አረብያ ፤ ጂዳ ከተማ በማስወጣት ወደ አገራቸው መልሳለች።

ዜጎቻችን ከጄዳ ሹሜሲ የስደተኞች ማቆያ ጣቢያ ነው ወደሀገራቸው እንዲመለሱ የተደረገው።

ኢትዮጵያ ሳዑዲ አረቢያ በችግር ላይ የሚገኙ ዜጎቿን በተጠናከረ ዘመቻ ወደ ሀገራቸው የመመለሱን ተግባር አሁንም ቀጥላለች።

መረጃው የውጭ ጉዳይ ሚኒስቴር እና በጅዳ የኢትዮጵያ ቆንስላ ነው።

@tikvahethiopia