#Update

የጠቅላይ ሚኒስትር ፅ/ቤት በዛሬው መግለጫ ምን አለ ?

በትግራይ ሰብዓዊ ድጋፍ በተመለከተ :

የብሄራዊ አደጋ ስጋት ስራ አመራር ኮሚሽን ኮሚሽነር አቶ ምትኩ ካሳ ከተናገሩት ፦

- ከ5 ነጥብ 4 ቢሊዮን ብር በላይ ወይም 135 ሚሊዮን ዶላር በላይ ግምት ያለው ምግብ ሸቀጥ ተሰራጭቷል።

- በመጀመሪያ ዙር 4 ነጥብ 5 ሚሊዮን ሰዎች ተጠቃሚ ተደርገዋል። በሁለተኛና በሶስተኛ ዙር 5 ነጥብ 2 ሚሊዮን ሰዎችን ተጠቃሚ ማድረግ ተችሏል።

- 170 ሺህ 798 ሜትሪክ ቶን ምግብ ቀርቧል። ለዚህም ከ5 ነጥብ 4 ቢሊዮን ብር በላይ ወጪ ተደርጓል።

- በ1ኛና በ2ኛ ዙር የተሰራጨው የሰብዓዊ ድጋፍ ወጪ 70 በመቶ በመንግስት እንዲሁም ቀሪው 30 በመቶ በአጋሮች የተሸፈነ ነው። በ3ኛ ዙር ድጋፍ መንግስትን ጨምሮ 6 አካላት ተሳትፎ እያደረጉ ይገኛሉ።

- የዓለም የምግብ ፕሮግራም፣ ወርልድ ቪዥን፣ ኬር ኢንተርናሽናል፣ የትግራይ መልሶ ማቋቋም ድርጅት እና ፉድ ፎር ሀንግሪ በክልሉ የሰብዓዊ ድጋፍ ስራዎች ላይ እየሰሩ ነው።

- መንግስት እየተደረገ ያለውን ድጋፍ እየተቆጣጠረ እንደሚገኝ ገልጸው፤ የእርዳታ አሰጣጥ ሂደቱ እንዲሳካ ምቹ ሁኔታ እየፈጠረ ነው።

ያንብቡ : https://telegra.ph/ENA-06-09 #ኢዜአ

@tikvahethiopia

የኦንላይ ትምህርት በኢትዮጵያ :

ኢትዮጵያ ለ4 የከፍተኛ ትምህርት ተቋማት ፍቃድ በመስጠት ለመጀመሪያ ጊዜ የባሉበት ትምህርትን (online Education) መስጠት ጀምራለች።

ይህ የተገለፀው ‹‹የባሉበት ትምህርት (online Education) ዘርፉን በመልካም ጎን ይቀይረው ይሆን?›› በሚል የዘርፉ ባለሙያዎች የተሳተፉበት የበይነ መረብ ውይይት በተካሄደበት ወቅት ነው።

በውይይቱ ትምህርትን በቴክኖሎጂ መደገፍ በሚቻልበት ሁኔታ እንዲሁም ሊያጋጥሙ በሚችሉ ችግሮች እና የመፍትሄ ሃሳቦች ላይ ምክክር ተደርጓል፡፡

በዚሁ ምክክር መድረክ ላይ የከፍተኛ ትምህርት ጥራና አግባብነት ኤጄንሲ ዋና ዳይሬክተር አንዷለም አድማሴ (ፒኤችዲ) የኦንላይን ትምህርትን በተደራጀ መልኩ ለመስጠት መመሪያ ተዘጋጅቶ ወደ ስራ መግባቱን አስረድተዋል።

አሁን ላይም ለ4 የከፍተኛ ትምህርት ተቋማት ፍቃድ በመስጠት ኢትዮጵያ ለመጀመሪያ ጊዜ የባሉበት ትምህርትን (online Education) መስጠት ጀምራለች ብለዋል። #ኢብኮ

@tikvahethiopia

የግብፅ የውጭ ጉዳይ እና መስኖ ሚኒስትሮች በሱዳን የአንድ ቀን ይፋዊ ጉብኝት አድርገዋል።

የግብፅ ባለስልጣናቱ ከሱዳን አቻዎቻቸው ጋር ሆነው የጋራ መግለጫ አውጥተዋል፡፡

በመግለጫቸው የሕዳሴ ግድቡን ጉዳይ በተመለከተ ሁለገብ ስምምነት ላይ ለመድረስ “ኢትዮጵያ በቁም ነገር ፣ በታማኝነት እና በእውነተኛ የፖለቲካ ፍላጎት እንድትደራደር በቀጣና ፣ በአህጉር እና በዓለም አቀፍ ደረጃዎች ግፊት እንዲደረግ ሁለቱ ሀገራት በጋራ እንደሚሰሩ” አስታውቀዋል፡፡

በዚህም በሕዳሴው ግድብ ሙሌት እና አስተዳደር ላይ “ፍትሃዊ እና ህጋዊ አስገዳጅ ስምምነት እንዲደረስ እንደሚሰሩ” ገልጸዋል፡፡

በቀጠናው እና በአፍሪካ አህጉር ፀጥታ ፣ ሰላም እና መረጋጋትን ለማስጠበቅ ፣ “የግብፅ እና የሱዳን ቅንጅት አስፈላጊነት” ላይ መስማማታቸውንም የሚያትተው መግለጫው ፣ ለዚህም “ኢትዮጵያ በግድቡ ጉዳይ የያዘችውን ፖሊሲ መቀጠሏ የሚያስከትለውን አደጋ ለመከላከል የአለም አቀፉን ማህበረሰብ ንቁ ጣልቃ ገብነትን ይጠይቃል” ብለዋል፡፡

ኢትዮጵያ በመጪው የክረምት ወቅት “የሕዳሴውን ግድብ ለመሙላት የጀመረችውን ጉዞ ዓለም አቀፉ ማሕበረሰብ እንዲያስቆም” ነው በመግለጫቸው የጠየቁት፡፡

አስገዳጅ ስምምነት ሳይደረስ የግድቡን ሁለተኛ ዙር ሙሌት ማከናወን እንደሚያሰጋቸው ሁለቱ ሀገራት በድጋሚ ገልጸዋል፡፡

ሁለቱን የታችኛው ተፋሰስ ሀገራት የመጉዳት ፍላጎት እንደሌላት በተደጋጋሚ የገለጸችው ኢትዮጵያ ፣ አስገዳጅ ስምምነት የመፈረም ፍላጎት የላትም ፤ የግድቡን ሁለተኛ ዙር የውሃ ሙሌትም በተያዘው ጊዜ እንደምታከናውን ቁርጠኛ አቋም ይዛለች፡፡

#አልዓይን

@tikvahethipia

የፌዴሬሽን ምክር ቤት አፈጉባኤ የጠቅላይ ሚኒስትር ዐቢይ አሕመድን መልዕክት ለአውሮፓ ህብረት የስራ ሃላፊዎች ማድረሳቸው ተገልጿል።

አፈጉባኤ አደም ፋራህ የጠቅላይ ሚኒስትሩን መልዕክት ያደረሱት ፦ ለአውሮፓ ህብረት ምክር ቤት ፕሬዚዳንት ቻርለስ ሚሼል እና ለአውሮፓ ኮሚሽን ፕሬዚዳንት ዩርሱላ ቮን ደር ላየን ነው።

አፈጉባኤው ከአውሮፓ ህብረት (EU) አመራሮች ጋር ኢትዮጵያ ሰላማዊ ፣ ነፃ ፣ እና ፍትሓዊ ምርጫ ለማድረግ እያደረገች ያለው ጥረት፣ የታላቁ የኢትዮጵያ ህዳሴ ግድብ ድርድር፣ በትግራይ እየተደረገ ያለው የሰብአዊ ድጋፎችና ሌሎች የጋራ ጉዳዮች ላይ መክረዋል፡፡

የህብረቱ አመራሮች በትግራይ ክልል ድጋፍ ለሚያስፈልጋቸው ወገኖች የሚደረገው ድጋፍ በአግባቡ እንዲደርሳቸው የሚደረገው ጥረት ይበልጥ መጠናከር እንዳለበት ገልጸዋል፡፡

አመራሮቹ በትግራይ የተፈጸመውን የሰብአዊ መብት ጥሰት አስመልክቶ የኢትዮጵያ ሰብአዊ መብት ኮሚሽን ከመንግስታቱ ድርጅት ሰብአዊ መብት ከፍተኛ ኮሚሽን ጋር የጀመረው የምርመራ ሂደት የሚበረታታ ስለማለታቸው የፌዴሬሽን ምክር ቤት ገልጿል።

@tikvahethiopia

#Tigray

• "350 ሺ ሰዎች ለረሃብ ተጋልጠዋል" - ሮይተርስ ተመልከቱት ያለው የተመድ የውስጥ ሪፖርት

• "ኢትዮጵያ ውስጥ ረሃብ ተከስቷል ለማለት የተቀመጡ መስፈርቶች አሉ፤ አሁን በትግራይ ባለው ሁኔታ ከ90 % በላይ የክልሉ ነዋሪ ሰብዓዊ ድጋፍ አግኝቷል" - የውጭ ጉዳይ ሚኒስቴር


በሮይተርስ የተመለከትኩኝ ባለው የተባበሩት መንግስታት ድርጅት የውስጥ ሰነድ በኢትዮጵያ ትግራይ ክልል ወደ 350,000 ያህል ሰዎች በረሃብ ሁኔታ ውስጥ እንደሚገኙ ተገምቷል።

በሰነዱ ላይ ትንታኔ የሰጡት የተባበሩት መንግስታት ድርጅት ኤጀንሲዎች እና የእርዳታ ቡድኖች ናቸው።

ይህ ነው የሮይተርስ ዘገባ : https://www.reuters.com/world/africa/exclusive-some-350000-people-ethiopias-tigray-famine-un-document-2021-06-09/?rpc=401

የውጭ ጉዳይ ሚኒስቴር ቃል አቀባይ አምባሳደር ዲና ሙፍቲ ዛሬ ሳምንታዊ ሰጥተው ነበር።

በዚህ መግለጫቸው ላይ "በትግራይ ክልል 350 ሺህ ሰዎች ለረሃብ ተጋልጠዋል" በሚል በተመድ የውስጥ ሰነድ ላይ ቀረበ የተባለውን ለህዝብ ይፋ ያልሆነ ሰነድ ምንጭ ተደርጎ የወጣውን መረጃ ትክክል እንዳልሆነ አሳውቀዋል።

አምባሳደር ዲና ፥ "ኢትዮጵያ ውስጥ ረሃብ ተከስቷል ለማለት የተቀመጡ መስፈርቶች አሉ፤ አሁን በትግራይ ባለው ሁኔታ ከ90 በመቶ በላይ የክልሉ ነዋሪ ሰብዓዊ ድጋፍ አግኝቷል" ሲሉ አስረድተዋል።

አክለውም ፥ በቀጣይ የእርሻ ስራም 70 በመቶ ለግብርና ስራ የሚውል መሬት ለእርሻ ስራ ዝግጅት መደረጉን ጠቅሰው በዚህ ሁኔታ ረሃብ ይከሰታል የሚለው ትክክል እንዳልሆነ ተናግረዋል።

@tikvahethiopia

#EritreaTroops

ዛሬ ሳምታዊ መግለጫ የሰጡት የውጭ ጉዳይ ሚኒስቴር ቃለ አቀባይ አማባሳደር ዲና ሙፍቲ "የኤርትራ ወታደሮች በምእራብ ኦሮሚያ ውስጥ በሚገኙ ዞኖች እና በደቡብ ኦሮሚያ ውስጥ አሉ" ስለሚባለው ጉዳይ ተጠይቀው ነበር።

አምባሳደር ዲና “መረጃ የለኝም” የሚል ምላሽ ሰጥተዋል።

የኦሮሞ ነጻነት ግንባር (ኦነግ) ፥ የኤርትራ ወታደሮች በኦሮሚያ ክልል በተለይ በቦረና ዞን ነጌሌ ከተማ አካባቢ እንዲሁም በሆሮ ጉዱሩ ወለጋ ዞን አባይ ጮመን በሚባል ስፍራ መታየታቸውን ገልፆ ነበር።

ኦነግ የኤርትራ ወታደሮች ናቸው ያላቸው ግለሰቦች “ሁሉም አፋን ኦሮሞ ቋንቋን የማይችሉ እና የተወሰኑት ብቻ አማርኛ ቋንቋ የሚችሉ ናቸው” ብሏል።

አምባሳደር ዲና ሙፍቲ ፥ “የኤርትራ ወታደሮች በኦሮሚያ ክልል ውስጥ ታይተዋል ስለመባሉ ምንም መረጃ የለኝም” ብለዋል።

በትግራይ ክልል ያሉት የኤርትራ ወታደሮችን በተመለከተም ተጠይቀው ምላሽ ሰጥተዌ።

አማባሳደር ዲና የኤርትራ ወታደሮች ከትግራይ ክልል መውጣት መጀመራቸውን ገልጸው ፣ ይህንንም መከላከያ ሚኒስቴር ማረጋገጡን አስታውሰዋል።

ትግራይ ክልል ከሚገኙ የኤርትራ ወታደሮች ምን ያክሉ ወጡ? መቼ ሙሉ በሙሉ ይወጣሉ ? የሚለውን በተመለከተ “ሙሉ መረጃ የለኝም” ሲሉ መልሰዋል።

በሌላ በኩል የሰሜን አትላንቲክ ቃልኪዳን ጦር (NATO) በትግራይ ካለው ችግር ጋር በተያያዘ “ኢትዮጵያን ለመውረር ተዘጋጅቷል” እየተባለ ስለሚወራው ጉዳይ ሚኒስቴር መስሪያ ቤቱ መረጃ እንደሌለው ጠቁመዋል።

አምባሳደር ዲና ፥ “ኢትዮጵያ ከሁሉም የኔቶ (NATO) አባላት ጋር መልካም ግንኙነት ነው ያላት፤ ይህንን ያደርጋሉ የሚል እምነት የለኝም” ሲሉ የግል አስተያየት ሰጥተዋል።

የዚህ ዘገባ ባለቤት "አል ዓይን ኒውስ" ነው።

@tikvahethiopia