አዳማ‼️

የአዳማ ከተማ ወረዳ ፍርድ ቤት በህገወጥ የገንዘብ ዝውውር #የተከሰሰን ግለሰብ በእስራትና በገንዘብ መቅጣቱን ፖሊስ አስታወቀ።

ከግለሰቡ ላይ በኤግዚቢትነት የተያዘው 73 ሺህ 900 የአሜሪካን ዶላር ለመንግስት ገቢ እንዲሆንም ፍርድ ቤቱ ውስኗል።

የአዳማ ከተማ ፖሊስ መምሪያ የህዝብ ግንኙነት ባለሙያ ዋና ሳጂን ወርቅነሽ ገልሜቻ እንዳሉት ፍርድ ቤቱ ዛሬ በዋለው ችሎች የቅጣት ውሳኔውን ያስተላለፈው #በርሄ_ገብሬ በተባለ ተከሳሽ ላይ ነው።

ግለሰቡ ህዳር 5 ቀን 2011 ዓ.ም 73 ሺህ 900 የአሜሪካን ዶላር በህገ ወጥ መንገድ ሲያዘዋወር በፖሊስ ተይዞ ፍርድ ቤት መቅረቡን አስታውሰዋል።

በእለቱ ግለሰቡ በአዳማ ከተማ ከምሽቱ 2፡30 ላይ የተያዘው ከአዲስ አበባ ወደ ድሬዳዋ በመጓዝ ላይ በነበረ የሰሌዳ ቁጥር 3-03952 ድሬ ፒክ አፕ ተሽከርካሪ ላይ ተሳፍሮ ሲጓዝ እንደነበር አስታውሰዋል።

ፖሊስ ከሕብረተሰቡ በደረሰው ጥቆማ መሰረት በአዳማ ዳቤ ሶሎቄ ቀበሌ ልዩ ስሙ “ኬላ” በተባለ አካባቢ በተሽከርካሪው ላይ ባደረገው ፍተሻ ገንዘቡ በግለሰቡ ሻንጣ ውስጥ ተደብቆ መገኘቱን ፍርድ ቤቱ በሰውና በሰነድ ማስረጃ ማረጋገጡን ገልጸዋል።

ጉዳዩን ሲከታተል የቆየው የአዳማ ከተማ ወረዳ ፍርድ ቤት በግለሰቡ ላይ የሁለት ዓመት ጽኑ እስራትና በአራት ሺህ ብር እንዲቀጣ ውሳኔ ማሳለፉን ሳጂን ወርቅነሽ አስታውቀዋል።

በኤግዚቢትነት የተያዘው 73 ሺህ 900 የአሜሪካን ዶላርም ለመንግስት ገቢ እንዲሆን ፍርድ ቤቱ ትእዛዝ ሰጥቷል።

ምንጭ፦ ENA
@tsegabwolde @tikvahethiopia