" የተባረሩት መምህራን ወደ ስራ ገበታቸው ይመለሳሉ " - ርዕሰ መምህር ዶ/ር ወርቁ ነጋሽ

" መስተካከል ያለባቸው እጅግ ብዙ ጉዳዮች ስላሉ ት/ቤቱ ከወላጅ ተወካዮች ጋር ለመስራት የገባውን ቃል ያክብር " - PTSA

የአንድነት ኢንተርናሽናል ትምህርት ቤት የወላጆችን ጥያቄ በማለባበስ ፣ አግባብ ባልሆነ መንገድ 4 መምህራንን እና 1ሌላ ድጋፍ ሰጪ ሰራተኛን አባርሯል በማለት የትምህርት ቤቱ መምህራን እና የተማሪ ወላጆች ቅሬታቸውን ለቲክቫህ ኢትዮጵያ አቅርበዋል።

መምህራን እና የተማሪ ወላጆች ምን አሉ ?
  
- የተማሪ ወላጆች በ2016 ዓ.ም የትምህርት ዘመን ትምህርት ቤቱ " የመምህራኑን የደሞዝ ይጨመርልን ጥያቄ እመልሳለሁ " በማለት ወላጆች ከፍተኛ ነው ያሉትን የ75 በመቶ የተማሪዎች የትምህርት ክፍያ ጭማሪ ተደርጓል ብለዋል።

- ትምህርት ቤቱ #ለመምህራን ከ60 እስከ 100 % የደሞዝ ጭማሪ አደርጋለሁ በማለት ከወላጅ ኮሚቴ ጋር ተስማምቶ ወላጆች የ75 በመቶ የክፍያ ጭማሪ ያድርጉ እንጂ ትምህርት ቤቱ ለወላጆች እና ለመምህራን የገባውን ቃል በማጠፍ በአማካይ ከ10 - 15 በመቶ ብቻ ጭማሪ ማደረጉ ቅሬታ ማሳደሩን ገልጸዋል።

- የትምህርት ቤቱ አስተዳደር የተከተለው አሰራር ልክ አይደለም ያሉት ወላጆች " ጥሩ መምህራን እንዳይለቁብን የደሞዝ ጭማሪ ይደረግላቸው፣ የልዩ ፍላጎት ተማሪዎች ባለሙያ ይቀጠርላቸው፣ አስፈላጊ የትምህርት መማሪያ ግብአቶች ይቅረቡ " ተብሎ በተደጋጋሚ ለት/ ቤቱ ጥያቄ ቢቀርብም ትምህርት ቤቱ ምላሽ መንፈጉን ወላጅ የሆኑት ዶ/ር ቴዎድሮስ ወ/ገብርኤል ለቲክቫህ ኢትዮጵያ አስረድተዋል።

ይህንን ተከትሎ የተማሪ ወላጆች ፦
° ልጆቻችንን የመማሪያ መፅሃፍት በሌለበት ፣
° ጥያቄአችን ባልተመለሰበት ፣
° መምህራን አላግባብ እየተባረሩ ባለበት ሁኔታ ልጆቻችንን ወደ ት/ቤት የምንልክበት ምክንያት የለም በማለት ልጆቻቸውን ከታህሳስ 3/ 2016 ዓ/ም ጀምሮ ወደ ትምህርት ቤት እንዳይሄዱ አድርገው ቆይተዋል።

የአንድነት ትምህርት ቤት የወላጅ የአስተማሪዎችና የተማሪዎች ማህበር (PTSA) ጉዳዩን ወደ ትምህርት ሚኒስቴር የወሰደው ሲሆን በትምህርት ሚኒስቴር ፕ/ር ብርሃኑ ነጋ መሪነት በትምህርት ቤቱ እና በወላጅ የአስተማሪዎችና የተማሪዎች ማህበር ኮሚቴ መሃል ውይይት ተደርጓል።

ቲክቫህ ኢትዮጵያ ይህን ጉዳይ በተመለከተ የአንድነት ኢንተርናሽናል ት/ቤት ርዕሰ መምህር የሆኑትን ዶ/ር ወርቁ ነጋሽን አነጋግሯል።

ዶ/ር ወርቁ ምን አሉ ?

* በትምህርት ሚኒስቴር ሚኒስትር ፕሮፌሰር ብርሃኑ ነጋ የተመራው ውይይት " #ፍሬያማ ነበር " ብለዋል።

* ከስራ የተሰናበቱት 4 መምህራን እና 1 ድጋፍ ሰጪ ሰራተኛ ወደስራ ገበታቸው እንዲመለሱ መወሰኑን ገልፀውልናል።

ቲክቫህ ኢትዮጵያ ፦
>  የመምህራን ደሞዝ ፣
> የወላጆች የተማሪና መምህራን መፅሃፍ ችግር ጥያቄ ላይ የተደረሰው ስምምነት ምን እንድነው ? ብሎ ርዕሰ መምህሩን ጠይቋል።

ርዕሰ መምህሩ ዶ/ር ወርቁ ፤ ስብሰባው ላይ አዲስ የወላጅ ተወካይ ተመርጦ በሚቀጥሉት ቀናት የትምህርት ሚኒስትሩ የመደቡት ተወካይ በሚገኙበት ድርድር እንዲደረግባቸው አቅጣጫ ተቀምጧል ብለዋል።

የተባረሩት መምህራን ወደስራቸው ሲመለሱ ፦

° በፋይላቸው ምንም አይነት መጥፎ ሪከርድ ሳይኖር፣
° የነበራቸው ጥቅማ ጥቅም እንደተጠበቀ ሆኖ
° የተፈጠረው ስህተት ታምኖ #ከይቅርታ ደብዳቤ ጋር እንዲመለሱ የሚል ውሳኔ መወሰኑን ሰምቻለሁ ያሉት መ/ርት ብሩክታይት ፍቃዱ ነገር ግን በይፋ ወደ ት/ት ቤቱ መመለሳቸውን የሚገልፅ ደብዳቤ እንዳልደረሳቸው ገልፀዋል።

ት/ቤቱ ያለአግባብ ከስራ ያሰናበታቸውን 5 ሰራተኞች ወደስራቸው ለመመለስ በመወሰኑና እንዲሁም ለሌሎች ጥያቄዎች መፍትሔ ለማምጣት እንዲቻል ለመወያየት ዝግጁነቱን በማሳየቱ ልጆችን በቤት ለማቆየት የተላለፈው ውሳኔ አብቅቶ ልጆቹ ወደ ት/ቤት እንዲሄዱ ማድረጋቸውን ያናገርናቸው ወላጆች ሲያስረዱ በዛሬው እለት ትምህርት መጀመሩን ርዕሰ መምህሩ አሳውቀውናል።

የትምህርት ቤቱ የወላጅ የአስተማሪዎችና የተማሪዎች ማህበር (PTSA) በት/ቤቱ ርዕሰ መምህር ዶ/ር ወርቁ ነጋሽ የተወሰዱ የእርምት እርምጃዎች ይበል የሚያሰኝ መሆኑን ጠቁሞ ሆኖም መስተካከል ያለባቸው ብዙ ጉዳዮች ስላሉ ከወላጅ ተወካዮች ጋር ለመስራት የገቡትን ቃል #እንዲያከብሩ ጠይቋል።

@tikvahethiopia

#ደመወዝ

° " ደመወዝ በአግባቡ #እየተከፈለን_አይደለም ፤ የሚመለከተዉ አካል ካላናገረን ማስተማር አንችልም " - የከምባ ወረዳ መምህራን

° " በየሶሻል ሚዲያ ' ደመወዝ አልተከፈለንም ' እያሉ ገጽታችንን የሚያበላሹትን በህግ እንጠይቃለን " - የዞኑ ትምህርት መምሪያ ሀላፊ

° " ያልተከፈላቸው መምህራን #ስራ_ስለማቆማቸው መረጃ አለኝ " - የደቡብ ኢትዮጵያ ክልል መምህራን ማህበር

ከሰሞኑ በጋሞ ዞን ከምባ ወረዳ መምህራን " ደሞዝ በአግባቡ እየተከፈለን አይደለም " በማለት ቅሬታቸዉን አሰምተዋል።

" ዞኑ ውስጥ ካሉት ሀያ ክላስተሮች ተለይተን ደመወዝ አልተከፈለንም " ያሉ መምህራን ስራ ማቆማቸውንና የሚመለከተው አካል ካላናገራቸው ስራ እንደማይገቡ በመግለጽ ቅሬታቸዉን አቅርበዋል።

ቲክቫህ ኢትዮጵያም ይህንን የመምህራን ጉዳይ ሰምቶ ይመለከታቸው ያላቸውን አካላት ማለትም ፥ የደቡብ ኢትዮጵያ ክልል መምህራን ማህበርና የዞኑን ትምህርት መምሪያ አነጋግሯል።

የክልሉ መምህራን ማህበር ፕሬዚዳንት አቶ አማኑኤል ጳዉሎስ ምን አሉ ?

አቶ አማኑኤል ፥ " በዞኑ በከምባ ወረዳ #ለመምህራን እየተከፈለ ያለው ደሞዝ የተቆራረጠና አግባብ ባልሆነ መልኩ እየተፈጸመ ነው " ብለዋል።

አክለውም ፤ " በክላስተር ተቆራርጦ ከመክፈሉ ባለፈ በአንድ ትምህርት ቤት እንኳን ለጥቂት መምህራን ተከፍሎ ለአብዛኛው ደግሞ አለመከፈሉ ያበሳጫቸው መምህራን ስራ አለመግባታቸውን ተከትሎ ትምህርት ቤቶች ስለመዘጋታቸው መረጃ አለን " ብለዋል።

የጋሞ ዞን ትምህርት መምሪያ ሀላፊው አቶ አብርሀም አምሳሉ ምን አሉ ?

አቶ አብርሀም ፤ " ያለኝ መረጃ ለመምህራን ደመወዝ በአግባቡ እየተከፈላቸው መሆኑን እና ስራም እየተሰራ መሆኑን ነው " ብለዋል።

" ይሁንና በየሶሻል ሚዲያው ላይ የአካባቢውን ገጽታ ለማጠልሸት በማሰብ ' ደመወዝ አልተከፈለንም ' እያሉ የሚንቀሳቀሱ አካላት ወሬውን እያናፈሱት ነው " ሲሉ ተናግረዋል።

" እነዚህ አካላት በህግ እየተጠየቁ ሲሆን ወደፊትም ይጠየቃሉ " ብለዋል።

ምን አልባት ያልተከፈላቸዉ መምህራን ካሉ የዲስፕሊን እና መሰል ችግር ያለባቸው ሊሆኑ ይችላሉ ሲሉ አክለዋል።

በተጨማሪም በአካባቢው ላይ ትምህርት መቋረጡን የሚመለከት መረጃ እንደሌላቸዉ በመግለጽ ችግር ተከስቶ ከሆነ እንደሚስተካከል ለቲክቫህ ኢትዮጵያ ገልጸዋል።

#TikvahEthiopiaFamilyHW

@tikvahethiopia