#Bayram_muborak
#Kun_nafasi

Bayroq

Jasorat daraxti sharaf-shon bergan,
Mardlikni yurakka mahkamroq oʻrang.
Mustaqil Vatan deb tikka jon bergan,
Bayroqning qadrini Kubrodan soʻrang.

Soʻrang jonsiz boʻlib tutgan qoʻllardan,
Dushman tigʻi kesgan barmoqdan soʻrang.
Yerga tomchi-tomchi tomgan qonlardan,
Shu qonlarni shimgan tuproqdan soʻrang.

Bilmadim, qandayin bermoqni izoh,
Taʼrifga yetarmi qalamim kuchi.
Har safar moziyga tashlasam nigoh,
Chin mardlar jon berar bayrogʻin quchib.

Shundan buni millat shaʼni deb biling,
Bosh uzra koʻtaring koʻzda yosh bilan.
Dunyoda eng baland nuqtaga iling,
Peshlashsin samoda shu quyosh bilan.

Vatan deb jon bersa kimdir nogahon,
Tobuti ustiga bayrogʻin yoping.
Ruhini samodan izlamang giryon,
Ona yurt bayrogʻin bagʻridan toping.

Qoʻlda bayroq bilan shahd qiling – qaytmas,
Dunyoni jasorat, hayrat-la oʻrang.
Shundayin moʻtabar, shunday muqaddas,
Bayroqning qadrini Kubrodan soʻrang.

✍Vafo Moʻmin

Abdulla Qodiriy nomidagi ijod maktabi

#bayram
#ustozlar_kuni

🔰1-oktyabr – Ustoz va murabbiylar kuni! 🎉🎉🎉


Aqlim shoshar, bilmim toshar,
Siz tufayli ustozim,
Orzularim doim oshar
Jaranglaydi ovozim.

Siz tufayli mana bildim,
Alifbosin arabning.
Qulog'imga sirg'a qildim,
Ma'nosini maktabning.

O'rgatdingiz ming tashakkur,
Qudratli tariximiz.
O'qiymiz qalbda g'urur,
El tanir tarifimiz.

Siz borsizki, yo’lim oydin
Ko’zim oydin, so’zim oydin
Hatto sizdan qolar quyosh
Ham ziyodin, ham chiroydin.

Baxtimizga sog' bo'ling,
Oqarmasin sochingiz.
Yuzgamas mingga to'ling,
Omon bo'lsin boshingiz!

✍8-"B" sinf o'quvchisi Abdurahmonova Xadichabonu


Telegram | Instagram |Facebook

                             
#bayram
#ustozlar_kuni

🔰1-oktyabr – Ustoz va murabbiylar kuni! 🎉🎉🎉


Ustoz ta’rifi

Ustoz kim, muallim kim, bilganlar ayting
Menimcha, ulardan yaxshirog’i yo’q.
Yomon ustoz mavjud, deganlar qayting
Qattiqqo’l ustoz bor, yomon ustoz yo’q.
 
Bir o’ylab qarasam ustoz haqida
Jonkuyar, fidokor ota-onadek
Yozmagan shoir yo’q ul zot haqida
Bizni o’ylar go’yo o’z dilbandidek.
 
Ustoz har jabhada o’rnak bo’lgan zot.
O’zidan kechib-da bizni o’ylaydi.
Ustozning qadriga yetmaganlar bot
Izidan borganlar doim bo’ylaydi.
 
Alisher kimlarni ustoz deb bilgan,
Ustoz Said Ahmad ustozi G’ulom.
Ularsiz qolganlar tarixdan jilgan
Qodiriy ustozdan bilgan alif-lom.
 
Zolimni olim qilar muallimlar
Qalamla olamni olishar bejang
Mehribon, sabrli, o’ychan olimlar
Ustozning borida asabin tejang!
 
Ustoz haqda so’ylash chun bir umr oz
Shul sabab suhbatni to’xtataylik soz…


✍️Abdulla Qodiriy nomidagi ijod maktabi 8-sinf o’quvchisi Nurmuhammad Hasanov


Telegram | Instagram |Facebook

#bayram
#ustozlar_kuni

Emas oson murg’aklarning ilk ustozi bo’lmoqlik,
Bir biz emas barchasiga yillar berar guvohlik.


🔰Abdulla Qodiriy nomidagi ijod maktabi 8-“A” sinf o’quvchisi Ixtiyorova Shabnamning aziz ustoz va murabbiylarimizga atab tayyorlagan videoroligini tomosha qiling!
🎉💐💐


Telegram | Instagram |Facebook

#bayram

🎉🎉🎉
Iymon qayda edi, ustoz bo‘lmasa,
Urfon qayda edi, ustoz bo‘lmasa.
Sohibqiron qayda, Navoiy qayda,
Cho‘lpon qayda edi, ustoz bo‘lmasa!

🔰Abdulla Qodiriy nomidagi ijod maktabi direktori Hilola Nazirovaning barcha ustoz va murabbiylarga atalgan tabrigi!

Aziz ustozlar, bayramingiz qutlug’ bo’lsin! 💐💐💐


Telegram | Instagram |Facebook

#bayram
#ustozlar_kuni

🔰Abdulla Qodiriy nomidagi ijod maktabining faol o’quvchilari Respublika miqiyosidagi 1-oktyabr “O’qituvchilar va murabbiylar kuni” munosabati bilan o’tkazilgan bayram tadbirida ishtirok etishdi. 💐🎉🎉


Telegram | Instagram |Facebook

​#ona_tilim_faxrim
#bayram_tabrigi


🔰“Millatning millat ekanini belgilovchi birlamchi omil – uning tili va adabiyotidir!”, degan edi Abdulla Avloniy.

So‘z inson qalbiga ozuqa baxsh etuvchi omil bo‘lsa, ona tilida aytilgan kalom mana shu ozuqaning manbaidir! U ona allasi bilan qalbga singib ketgan.

Bugun 21-oktyabr – O‘zbek tiliga Davlat tili maqomi berilgan kun! Bugun ona tilimizning bayrami!

Til – millat ko‘zgusi.
Til – millat iftixori.
Til – millat qalbi, millat vijdoni!

Dunyoning qay tomonida bo‘lmaylik, albatta, o‘zbekligimiz va o‘zbek tilimizdan faxr tuyaylik.

O‘zbek tili bayrami barchamizga muborak bo‘lsin, Azizlar!

Abdulla Qodiriy nomidagi ijod maktabi direktori Hilola Nazirova


Telegram | Instagram |Facebook

​#bayrogim_iftixorim
#bayram_tabrigi


🇺🇿Har gal moviy samo uzra hilpirayotgan davlatimiz bayrog‘iga ko‘zim tushganida, hurlik, ozodlik, tinchlik, xotirjamlik tuyg‘ularini his qilaman.

Sportchilarimiz g‘alaba qilib, bayroqni faxr-la yelkalariga tashlashganini ko‘rganimda, iftixor tuyaman.

Dunyo minbarlarida o‘nlab davlatlar bayrog‘i yonida o‘z yurtim yalovini ko‘rganimda qalban g‘ururlanaman!

Xorij safarlarida yurganimda, Vatanim ramzini ko‘rganimda, beixtiyor sog‘inchdan ko‘zlarim yoshlanadi.

Bayroq shunchaki mato emas. U buyuk millatning yalovi! U buyuk tarixning ko‘rinishi! U ozodlik, mustaqillik ramzi!

Bugun O‘zbekiston Respublikasining “Davlat bayrog‘i to‘g‘risida”gi qonuni qabul qilinganligiga 32 yil to‘ldi.

O‘zbekiston Respublikasi Oliy Kengashining 1991-yil 18-noyabrdagi navbatdan tashqari VII sessiyasida tasdiqlangan Davlat bayrog‘i – mamlakat davlat suverenitetining ramzi hisoblanib, u yer yuzining shu sarhadlarida mustaqil O‘zbekiston davlati borligini anglatadi va o‘zida milliy-madaniy an’analarimizni mujassamlashtiradi.

Bayrog‘imiz o‘zida butun O‘zbekiston xalqining asriy orzu-istaklari, g‘ayrati va shijoatini, xalqimizga xos mehmondo‘stlikni mujassam etgan.

Davlat ramzlari har bir mamlakatning mustaqilligini ifodalovchi muqaddas belgidir. Respublikamiz davlat ramzlari xalqimizning shon- sharafi, tarixiy xotirasi va intilishlarini o‘zida mujassam etib, tinch va osoyishta, ozod va erkin hayotimiz, yorug‘ kelajagimizga bo‘lgan ishonchimiz ifodasidir.

Mustaqil davlatimiz bayrog‘i tinch va osoyishta, ozod hamda erkin hayotimiz, yorug‘ kelajagimizga bo‘lgan ishonchimiz timsolidir.

Davlat ramzlarining muqaddasligini, ular bizga yurt manfaati har nedan ustunligini anglatib, eslatib turishini har birimiz yodda tutishimiz shart.

Bayrog‘imizning balandligi yurtimizning obro‘-nufuzi yuksakligidan dalolatdir. Shunday ekan, sarbaland qaddimiz va qadrimiz timsolini hamisha e’zozlaylik va boshimiz uzra baland ko‘taraylik!

Bugungi millatimiz timsoli kuni barchamizga muborak bo‘lsin!

Hilola Nazirova, Abdulla Qodiriy nomidagi ijod maktabi direktori.


Telegram | Instagram |Facebook

#bayram_tabrigi

Assalomu alaykum qadrli hamkasblar!
Soʻnggi yillarda Prezidentimiz tomonidan ta’lim tizimini rivojlantirish, yoshlarni qoʻllab-quvvatlash uchun zarur sharoitlar yaratilmoqda. Ulgʻayib kelayotgan yosh avlodning ilm-fanga boʻlgan intilishlarini ragʻbatlantirish, intellektual va ijodiy salohiyatini roʻyobga chiqarish borasidagi islohotlar tizimli amalga oshirilmoqda.
Bu yo’lda jamiyatning eng asosiy tirgagi-Siz aziz ustoz va murabbiylardir. Sizning yurtimiz taraqqiyoti, vatanimiz ravnaqi yo’lida qilayotgan fidokorona mehnatlaringiz alohida tahsinga sazovordir! Ta’lim tizimida ,xususan, bizning maktabimizda faoliyat ko’rsatayotgan kadrlarimizning asosiy qismi xotin-qizlar ekanini inobatga olsak, ularning sharafli mehnatini ikki karra tilga olsak arziydi! Chunki hech birimizga sir emaski, o’qituvchilik jonkuyarlik, fidokorlik talab qiluvchi kasblardan biridir. Siz va bizning yonimizda biz bilan yelkama yelka turib, ham oilasini, ham o’z kasbini chin dildan sevib matonat bilan mehnat qilayotgan har bir xodimamizga o’zim va butun millat nomidan tashakkur bildiraman!
Hurmatli ustozlar, siz borsizki, millatning ertasi bo’lgan yoshlar ma’nan yetuk, jismonan sog’lom, ilg’or fikrli insonlar bo’lib voyaga yetishadi. Siz borsizki, davlatimiz kundan kunga rivojlanib jahonning eng taraqqiy topgan davlatlari bilan yuzlashadi! Sizlarning zahmatli mehnatlaringiz ortidan ham ilm-u fanda ham sportda ham madaniy sohalarda vatanimiz bayrog’i yuksaklarga ko’tariladi!
Shunday ekan, men sizlarga mustahkam sog’lik va oilaviy xotirjamlik tilayman. Millat kelajagi uchun ko’rsatayotgan jonbozligingiz albatta o’z mevasini beradi. Shu fursatdan foydalanib men barchangizni kasb bayramingiz bilan chin qalbimdan tabriklayman!

Hurmat bilan B.B.To'ychiyev