#Туризм

⚡️⚡️⚡️ Туманимизда тушимизга ҳам кирмаган хайрли ишлар тез орада бошланади

Кимдир уйингизга меҳмонга келиб “ажойиб уйингиз ҳақида кўп мақтовларни эшитдик, ўз кўзимиз билан кўриб, завқлангани келдик” деса, албатта қувонасиз.

Чунки сиз меҳмондўст халқнинг таълим-тарбиясини олгансиз-да!

Туризм иқтисодиётни ривожлантирибгина қолмай, маънавий-маърифий масалаларга ҳам туртки беради.

Содда қилиб айтганда, маҳаллий ёки хорижлик сайёҳ келса, уларни завқлантириш, ёрқин таассуротлар бериш учун маданиятимиз, қадриятларимиз, ҳудуд аҳолисининг фазилатлари ҳақида ғурурланиб гапира кетасиз.

Туризм яна кўп соҳалар ривожига ўз таъсирини кўрсатмай қолмайди. Замонавий инфратузилмалар тезда яратилиб, ҳудудлар қиёфаси чирой очади.

Хабарингиз бўлса, Президентимиз Нурафшон шаҳрида бўлиб ўтган Халқ депутатлари Тошкент вилояти Кенгаши сессиясида Паркент туманида сайёҳликни ривожлантириш ҳақида Бош вазир Абдулла Ариповга топшириқ берганди. Шундан кейин Бош вазир туманимизга келиб, зарур ишларни бошлаб берган эди.

Куни кеча туманимизга Бош вазир ўринбосари – Туризм ва маданий мерос вазири Азиз Абдуҳакимов, Тошкент вилояти ҳокимининг туризм, маданият, маданий мерос ва оммавий коммуникация масалалари бўйича ўринбосари  Жамшид Бабажановга туманимиз ҳокими Шоҳруҳ Шоаҳмедов Кумушкон ва Сўқоқ ҳудудида туризм борасида яқин вақт ичида амалга ошириладиган ишлар билан таништирди.

Мутасаддилар тўғри Кумушконга боришди. Ҳудуднинг туризим қишлоғидаги меҳмон уйларида маҳаллий ва хорижий сайёҳлар учун яратилган шарт-шароитлар мутасадди раҳбарларнинг эътиборига тушди. Меҳмон уйи эгалари билан дилдан суҳбатлашишди. Истиқболда янгича ғоялар асосида қулайликларни янада амалга ошириш, маҳаллий ва хорижий сайёҳлар оқимини кўпайтириш борасида зарур таклифларини беришди.

Сўнгра мутасаддилар Кумушкондаги “Edelweiss” меҳмонхонасига боришди. Бош вазир ўринбосарига  ушбу меҳмонхонада туманимиз ҳокими Шоҳрух Шоаҳмедов ташаббуси билан яқин келажакда барпо этилиши кутилаётган янги инвестициявий лойиҳалар таништирилди. 
Муҳим аҳамиятга эга бўлган лойиҳалар билан танишган Бош вазир ўринбосари, айрим лойиҳалар ҳақида ўз таклиф ва тавсияларини берди.

Кейинги манзил Сўқоқ қишлоғи бўлди. Бош вазир ўринбосари Сўқоқда қадимийлик ва замонавийликни уйғунлаштирган этно қишлоқ яратилиши бўйича истиқболдаги режалар билан танишди.

Шундан сўнг мутасаддилар Заркент қишлоғига ҳам кириб ўтишди. Бош вазир ўринбосари ҳудуддаги “вино уйи”нинг фаолияти билан танишиш вақтида бу ердаги вино ишлаб чиқариш жараёнларини ҳам диққат билан кузатди. Виночиликни ривожлантириш ва узум сайли ҳамда вино фестивалларини юқори савияда ўтказиш борасида ҳам таклиф ва тавсияларини айтди.

Охирги манзил Намданак қишлоғидаги “Ҳамкор” вино заводи бўлди. Мутасаддилар у ерда олиб борилаётган ишлар билан яқиндан танишди.

Мутасаддиларга Германия, Япония, Хитой ва бошқа мамлакатлар билан ҳамкорликда иш олиб бориб, Паркентнинг ўзига хос таъмга эга виноларини етказиб бераётган мазкур заводнинг келгусидаги режалари билан туманимиз ҳокими таништирди. Бош вазир ўринбосари ушбу ҳудудда ҳам  этно туризмни ривожлантириш борасида тегишли чораларни кўриш зарурлигини алоҳида таъкидлади.

Хуллас, туманимизда тушимизга ҳам кирмаган хайрли ишлар тез орада кўзга кўрина бошлайди.

👉 @PARKENT_TONGI