#Жамият

⚡️⚡️⚡️ Туманимизда  Халқаро ногиронлар куни нишонланди

Бугун, туманимиздаги “Наврўз” тўйхонасида 3 декабрь – Халқаро ногиронлар куни муносабати билан байрам тадбир бўлиб ўтди.

Туман ҳокимлиги ташаббуси билан ташкил этилган байрамда бир қатор давлат ва жамоат ташкилоти мутасаддилари, меҳнат фахрийлари, ёшлар, кенг жамоатчилик вакиллари иштирок этди.

“Наврўз” тўйхонасида дастурхон тузалиб, санъаткорлар иштирокида байрам тадбири ўтказилди.

Байрам тадбирига туманимиздаги 62 та маҳалла фуқаролар йиғинларидан 300 нафарга яқин ногиронлиги бўлган шахслар таклиф этилди.

Тадбирда сўзга чиққанлар ногиронлиги бўлган тумандошларимизга самимий ҳурмат-эҳтироми ва эзгу тилакларини изҳор этди.

Таъкидланганидек, ҳаётнинг оғир синовларига бардош бериб келаётган бу тоифадаги тумандошларимизнинг ҳар бири ҳамиша меҳру эътиборимиздан четда қолмайди. Улар ўзининг меҳнати ва қобилияти туфайли жамият ҳаётидан муносиб ўрин эгаллаб, матонати, сабр-бардоши, айниқса, шукроналик фазилатлари билан кўпчиликка ибрат кўрсатиб келмоқда.

Маълумотларга кўра, жорий йил давомида Паркент тумани “Инсон” хизматлар маркази томонидан 465 нафар фуқаро протез-ортопедия маҳсулотлари ва реабилитация қилишнинг техник воситалари билан таъминланди.

Шунингдек, меҳнат қилиш қобилиятига эга ногиронлиги бўлган шахслар билан ўтказилган сўровномага кўра ўзларининг имкониятини инобатга олган ҳолда 14 нафари тумандаги давлат ташкилотларига, 4 нафари хусусий сектор йўналишида ишга жойлаштирилди.

Байрам тадбирида туман Маданият бўлими санъаткорлари ўзларининг куй-қўшиқлари билан йиғилганларга кўтаринки кайфият бағишлади.

👉 @PARKENT_TONGI